1, 2. I swivutiso swihi leswi tlakukaka hikwalaho ka marito ya Yesu lama nga eka Matewu 24:14?

YESU u profete leswaku emasikwini ya makumu, mahungu lamanene ya Mfumo ma ta chumayeriwa eka vanhu hinkwavo. (Matewu 24:14) Tanihi Timbhoni ta Yehovha, hi tiveka emisaveni hinkwayo hi ntirho wa hina wo chumayela. Vanhu van’wana va tsakela rungula leri hi ri chumayelaka, loko van’wana va nga ri tsakeli. Kambe hambi ku ri vanhu lava nga ri tsakeriki rungula ra hina va hi xixima hikwalaho ka ntirho wa hina. Hi vula leswaku hi hina ntsena hi endlaka ntirho lowu Yesu a profeteke ha wona. Xana hi fanele hi vula sweswo? Hi nga tiyiseka njhani leswaku ntirho wa hina wo chumayela hi wona lowu Yesu a profeteke ha wona?

² Mintlawa yo tala ya vukhongeri yi vula leswaku yi chumayela rungula ra Yesu. Kambe yi chumayela ntsena etikerekeni, eka thelevhixini kumbe eka Internet, kumbe yi byela van’wana ndlela leyi yi dyondzeke ha yona hi Yesu. Van’wana va ehleketa leswaku ku pfuna lava pfumalaka, ku tirha tanihi madokodela, ku  va vaongori kumbe vadyondzisi i ndlela yin’wana yo chumayela. Kambe xana mintirho leyi yi fambisana ni ntirho wo chumayela lowu Yesu a vulavuleke ha wona?

3. Hi ku ya hi Matewu 28:19, i swilo swihi swa mune leswi valandzeri va Yesu va faneleke va swi endla?

³ Xana Yesu a lava leswaku vadyondzisiwa vakwe va rindzela vanhu va ta eka vona? Doo! Endzhaku ka loko a pfuxiwile, Yesu u byele valandzeri vakwe va madzana a ku: “Fambani mi ya endla vanhu va matiko hinkwawo va va vadyondzisiwa, mi va khuvula . . . , mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Tanihi valandzeri va Yesu, hi fanele hi endla swilo swa mune. Hi fanele hi endla vadyondzisiwa, hi va khuvula ni ku va dyondzisa. Kambe, hi fanele hi sungula hi ya eka vanhu. Xidyondzi xin’wana xa Bibele xi ri: “Ku ‘famba’ i ntirho wa mupfumeri un’wana ni un’wana, ku nga khathariseki laha a tshamaka kona.”—Matewu 10:7; Luka 10:3.

4. Ku katseka yini leswaku hi va “vaphasi va vanhu”?

⁴ Xana Yesu a a langutele yini eka vadyondzisiwa vakwe? Xana a a lava leswaku va chumayela va ri voxe kumbe a lava leswaku va hleleka tanihi ntlawa? Leswi swi nga kotekiki leswaku munhu un’we a chumayela “matiko hinkwawo,” vadyondzisiwa vakwe a va fanele va hleleka tanihi ntlawa. Sweswo hi leswi Yesu a a vula swona loko a rhamba vadyondzisiwa vakwe leswaku va va “vaphasi va vanhu.” (Hlaya Matewu 4:18-22.) Yesu a nga kombeteli eka muphasi un’we wa tinhlampfi loyi a tirhisaka xinjovo kutani a rindzela tinhlampfi leswaku ti dyela. Ku ri na sweswo, Yesu a kombetela eka ku phasa ka vanhu hi ku tirhisa tinkoka. Muxaka wo tano wa ku phasa wu lava leswaku vanhu va tirha hi matimba, tanihi nhlengeletano naswona ku va ni vanhu vo tala lava tirhisanaka.—Luka 5:1-11.

5. I swivutiso swihi swa mune leswi faneleke swi hlamuriwa naswona ha yini?

⁵ Leswaku hi tiva lava chumayelaka mahungu lamanene namuntlha, hi fanele hi hlamula swivutiso leswi swa mune:

• I rungula rihi leri valandzeri va Yesu va faneleke va ri chumayela?

• Va fanele va ri chumayela hi xikongomelo xihi?

• I tindlela tihi leti va faneleke va ti tirhisa?

• Va fanele va chumayela ku ya fikela kwihi naswona va fanele va chumayela nkarhi wo tanihi kwihi?

Tinhlamulo ta swivutiso leswi ti ta hi pfuna ku tiva leswaku i vamani lava endlaka ntirho lowu ponisaka vutomi naswona swi ta endla leswaku hi ya hi lava ku ya emahlweni hi chumayela.—1 Timotiya 4:16.

6. Ha yini u tiyiseka leswaku Timbhoni ta Yehovha ti chumayela rungula ra ntiyiso?

⁶ Hlaya Luka 4:43. Yesu u chumayele “mahungu lamanene ya Mfumo,” naswona u lava leswaku vadyondzisiwa vakwe va endla hilaha ku fanaka. I ntlawa wihi lowu chumayelaka vanhu hinkwavo rungula rero? I Timbhoni ta Yehovha ntsena! Hambi ku ri vanhu lava nga hi tsakeriki va pfumela sweswo. Hi  xikombiso, xiya leswi mufundhisi un’wana wa murhumiwa loyi a tshameke ematikweni yo hambanahambana a swi byeleke Mbhoni yin’wana. Etikweni rin’wana ni rin’wana, mufundhisi loyi u vutise Timbhoni ta Yehovha leswaku ti chumayela rungula rihi. Mufundhisi u te, “Hinkwato ka tona i swiphukuphuku lerova ti ndzi hlamule ti ku: ‘Mahungu lamanene ya Mfumo.’” Leswi mufundhisi loyi a swi vuleke swi kombisa leswaku a hi swiphukuphuku kambe hi Vakreste va ntiyiso lava nga ni vun’we. (1 Vakorinto 1:10) Magazini lowu nge Xihondzo xo Rindza Xi Huwelela Mfumo Wa Yehovha wu vulavula hi Mfumo wa Xikwembu. Magazini lowu wu kumeka hi tindzimi ta 254 naswona n’hweti ni n’hweti ku kandziyisiwa tikopi ta kwalomu ka 59 000 000 leswi endlaka leswaku ku va wona lowu hangalasiwaka ngopfu emisaveni hinkwayo!

7. Hi swi tiva njhani leswaku vafundhisi a va chumayeli ntiyiso?

⁷ Vafundhisi a va chumayeli hi Mfumo wa Xikwembu. Loko va vulavula hi Mfumo, vo tala va vona va vula leswaku i nchumu lowu nga le mbilwini ya munhu. (Luka 17:21) A va va dyondzisi vanhu leswaku Mfumo wa Xikwembu i mfumo wa le tilweni lowu hosi ya wona ku nga Yesu. Ku ri na sweswo va vulavula ngopfu hi Yesu hi nkarhi wa Khisimusi kumbe wa Paseka. A va va byeli vanhu leswaku Mfumo wa Xikwembu wu ta herisa swiphiqo swa vanhu naswona ku nga ri khale wu ta herisa vubihi hinkwabyo laha misaveni. (Nhlavutelo 19:11-21) Swi le rivaleni leswaku varhangeri va vukhongeri a va swi tivi leswi Yesu a nga ta swi endla tanihi Hosi ya Mfumo wa Xikwembu. Naswona tanihi leswi va nga ri twisisiki rungula ra Yesu a va swi twisisi leswaku ha yini va fanele va chumayela.

8. Hi xihi xikongomelo xo biha lexi vadyondzisiwa va Yesu va faneleke ku xi papalata loko va chumayela?

⁸ Vadyondzisiwa va Yesu a va fanelanga va chumayela hi xikongomelo xo endla mali kumbe ku aka miako ya manyunyu. Yesu u te: “Mi amukele mahala, nyikani mahala.” (Matewu 10:8) Kutani ntirho wo chumayela a wu fanelanga wu endliwa bindzu. (2 Vakorinto 2:17) Vadyondzisiwa va Yesu a va fanelanga va lava ku hakeriwa loko va endla ntirho wo chumayela. (Hlaya Mintirho 20:33-35.) Hambileswi xileriso xa Yesu xi nga erivaleni, tikereke to tala ti khomeke ngopfu hi ku hlengeleta mali, leswaku ti khathalela miako, ti hakela vafundhisi swin’we ni vatirhi van’wana va le kerekeni. Hikwalaho ka sweswo vafundhisi vo tala i swigwili.—Nhlavutelo 17:4, 5.

9. Timbhoni ta Yehovha ti swi kombisa njhani leswaku ti endla ntirho wo chumayela hi xikongomelo lexinene?

⁹ Xana Timbhoni ta Yehovha ti hlengeleta minyikelo eTiholweni ta tona ta Mfumo kumbe etinhlengeletanweni? Doo! Ntirho wa tona wu seketeriwa hi minyikelo ya ku tirhandzela. (2 Vakorinto 9:7) N’wexemu, Timbhoni ta Yehovha ti tirhe tiawara ta kwalomu ka tibiliyoni timbirhi entirhweni wo chumayela mahungu lamanene naswona ti fambise tidyondzo ta Bibele to tlula kaye wa timiliyoni n’hweti ni n’hweti. A ti hakeriwi  kambe ti tsakile hileswi ti tirhisaka mali ya tona leswaku ti endla ntirho lowu. Mukambisisi un’wana u vule leswi hi ntirho wa Timbhoni ta Yehovha: “Xikongomelonkulu xa tona i ku chumayela ni ku dyondzisa.” U tlhele a vula leswaku Timbhoni ta Yehovha a ti na vafundhisi. Kutani leswi hi nga endliki ntirho wo chumayela hi xikongomelo xo kuma mali, hi xihi xikongomelo xa hina? Hi endla ntirho lowu hi ku tirhandzela ni hileswi hi rhandzaka Yehovha ni vanhu vakwe. Langutelo leri hi nga na rona ri hetisisa vuprofeta lebyi nga eka Pisalema 110:3. (Yi hlaye.)

10. Hi tihi tindlela leti Yesu ni vadyondzisiwa vakwe va ti tirhiseke loko va chumayela?

¹⁰ Hi tihi tindlela leti Yesu ni vadyondzisiwa vakwe va ti tirhiseke loko va chumayela? Va ye hinkwako laha a va ta kuma vanhu kona. Hi xikombiso, va chumayele exitarateni ni le timakete. Va tlhele va ya emakaya ya vanhu leswaku va va lava kona. (Matewu 10:11; Luka 8:1; Mintirho 5:42; 20:20) Ku chumayela hi yindlu ni yindlu a ku ri ndlela leyi a va fanele va yi tirhisa leswaku va fikelela vanhu va mixaka hinkwayo.

11, 12. Ndlela leyi vafundhisi va chumayelaka ha yona yi hambana njhani ni leyi vanhu va Yehovha va yi tirhisaka?

¹¹ Xana tikereke ti chumayela mahungu lamanene hilaha Yesu a endleke hakona? Hi ntolovelo, mufundhisi loyi a hakeriwaka u chumayela ekerekeni. Vafundhisi a va endli vadyondzisiwa lavantshwa kambe va ringeta hi matimba leswaku lava se va nga swirho swa kereke va nga tshiki kereke. Minkarhi yin’wana  va ringete ku khutaza swirho swa kereke ya vona leswaku swi chumayela. Hi xikombiso, hi 2001 Mupapa John Paul wa Vumbirhi eka papila leri a ri tsaleke u vule leswaku swirho swa kereke swi fanele swi chumayela Evhangeli swi tlhela swi hiseka ku fana na muapostola Pawulo loyi a nga te: “Ndzi le khombyeni loko ndzi nga ma vuli mahungu lamanene.” Kutani mupapa loyi u vule leswaku ntirho wo chumayela a wu fanelanga wu endliwa hi vanhu vatsongo lava leteriweke kambe wu fanele wu endliwa hi swirho hinkwaswo swa kereke. Hambiswiritano a hi swingani leswi wu endleke.

¹² Ku vuriwa yini hi Timbhoni ta Yehovha? Hi tona ntsena leti chumayelaka leswaku Yesu u sungule ku fuma tanihi Hosi ku sukela hi 1914. Ti yingisa Yesu naswona ti rhangisa ntirho wo chumayela evuton’wini bya tona. (Marka 13:10) Buku leyi nge, Pillars of Faith—American Congregations and Their Partners yi vule leswaku Timbhoni ta Yehovha ti teka ntirho wo chumayela wu ri wa nkoka swinene. Yi tlhela yi vula leswaku loko ti kuma vanhu lava twaka ndlala, va ri ni xivundza ni lava va vabyaka ti ringeta ku va pfuna kambe a ti rivali leswaku xikongomelonkulu xa tona i ku chumayela vanhu hi makumu ya misava leyi ni ku va dyondzisa malunghana ni ku ponisiwa. Timbhoni ta Yehovha ti ya emahlweni ti chumayela rungula rolero ni ku tekelela ndlela leyi Yesu ni vadyondzisiwa vakwe a va endla ha yona.

13. Ntirho wo chumayela wu fanele wu endliwa ku fikela kwihi?

¹³ Yesu u vule leswaku valandzeri vakwe a va ta chumayela ni ku dyondzisa mahungu lamanene “emisaveni hinkwayo leyi akiweke.” A va lerisiwe ku endla vanhu va “matiko hinkwawo” vadyondzisiwa. (Matewu 24:14; 28:19, 20) Leswi vulaka leswaku mahungu lamanene ma fanele ma chumayeriwa emisaveni hinkwayo.

14, 15. I yini lexi kombisaka leswaku Timbhoni ta Yehovha ti hetisise vuprofeta bya Yesu malunghana ni ku chumayela matiko hinkwawo? (Vona swifaniso leswi nga eku sunguleni ka xihloko lexi.)

¹⁴ I Timbhoni ta Yehovha ntsena leti hetisiseke vuprofeta bya Yesu bya leswaku mahungu lamanene ma ta chumayeriwa emisaveni hinkwayo. Ha yini hi vula tano? EUnited States ku ni vafundhisi va kwalomu ka 600 000 kasi ku ni Timbhoni ta Yehovha ta kwalomu ka 1 200 000 leti chumayelaka mahungu lamanene etikweni rero. Emisaveni hinkwayo ku ni vafundhisi va kereke ya Khatoliki va 400 000, kambe ku ni Timbhoni ta Yehovha to tlula 8 wa timiliyoni leti chumayelaka ematikweni ya 240. Swi le ri valeni leswaku Timbhoni ta Yehovha ti chumayela mahungu lamanene emisaveni hinkwayo, ku nga nchumu lowu yisaka ku dzuneka eka Yehovha!—Pisalema 34:1; 51:15.

¹⁵ Hina Timbhoni ta Yehovha, xikongomelonkulu xa hina i ku chumayela mahungu lamanene eka vanhu vo tala hilaha hi nga kotaka hakona makumu ma nga si fika. Leswaku hi kota ku endla ntirho lowu, hi hundzuluxele ni ku kandziyisa tibuku ta timiliyoni, timagazini, swiphephana, swirhambo swa nhlengeletano ni swa Xitsundzuxo hi tindzimi to tlula 700. Hi nyika vanhu minkandziyiso leyi mahala. Lembe leri nga hela ntsena, hi kandziyise minkandziyiso leyi sekeriweke eBibeleni ya kwalomu ka tibiliyoni ta 4,5.  Nakambe hi tlhele hi kandziyisa tikopi ta Bibele ya Vuhundzuluxeri Bya Misava Leyintshwa Bya Matsalwa Yo Kwetsima to tlula 200 wa timiliyoni hi tindzimi to tlula 130. Eka website ya hina leyi nga le nawini, ku kumeka rungula hi tindzimi to tlula 750. I Timbhoni ta Yehovha ntsena leti endlaka ntirho lowu wo hlamarisa.

16. Hi swi tivisa ku yini leswaku Timbhoni ta Yehovha ti ni moya wa Xikwembu?

¹⁶ Xana ntirho wo chumayela wu ta endliwa ku fikela rini? Yesu u vule leswaku mahungu lamanene ma ta chumayeriwa ku fikela loko makumu ma fika. Hina Timbhoni ta Yehovha, hi swi kotile ku chumayela ku ta fikela enkarhini lowu wa makumu hikwalaho ko pfuniwa hi moya lowo kwetsima wa Yehovha. (Mintirho 1:8; 1 Petro 4:14) Vanhu van’wana va vukhongeri va nga ha ku: “Hi ni moya lowo kwetsima.” Kambe xana va swi kota ku endla ntirho lowu Timbhoni ta Yehovha ti wu endlaka enkarhini lowu wa makumu? Mintlawa yin’wana yi ringetile ku chumayela hilaha hi endlaka hakona, kambe yi tsandzekile. Van’wana va swi tsakela ku chumayela kambe va chumayela ku ringana nkarhi wo karhi ntsena. Kasi van’wana va nga ha chumayela hi yindlu ni yindlu kambe a va chumayeli mahungu lamanene ya Mfumo. Hikwalaho a va endli wona ntirho lowu sunguriweke hi Yesu.

17, 18. (a) Ha yini hi nga tiyisekaka leswaku Timbhoni ta Yehovha hi tona ntsena leti chumayelaka mahungu lamanene ya Mfumo namuntlha? (b) Hi swi kotisa ku yini ku ya emahlweni ni ntirho lowu wo chumayela?

¹⁷ I vamani lava chumayelaka mahungu lamanene ya Mfumo namuntlha? I Timbhoni ta Yehovha ntsena! Hi swi tiva njhani? Hikuva hi chumayela rungula ra ntiyiso, ku nga mahungu lamanene ya Mfumo. Loko hi ri ensin’wini hi tirhisa tindlela letinene to lavisisa vanhu. Hi chumayela hi xikongomelo lexinene hikuva hi rhandza Yehovha ni vanhu. Ntirho wa hina wo chumayela wu endliwa emisaveni hinkwayo hikuva hi chumayela vanhu va matiko hinkwawo ni tindzimi hinkwato. Nakambe hi ta ya emahlweni hi chumayela mahungu lamanene ya Mfumo kukondza makumu ma fika!

¹⁸ Swi tsakisa ngopfu ku vona ntirho lowunene wa vanhu va Yehovha wo chumayela mahungu lamanene enkarhini lowu wa makumu. Kambe hi swi kotisa ku yini ku endla ntirho lowu hinkwawo? Muapostola Pawulo u te: “Xikwembu hi xona lexi, hi ku ya hi leswi xi swi tsakelaka, xi tirhaka endzeni ka n’wina leswaku mi va ni matimba ya ku rhandza ni ku endla.” (Vafilipiya 2:13) Onge Yehovha a nga hi nyika matimba lama lavekaka leswaku hi endla hilaha hi nga kotaka hakona leswaku hi chumayela mahungu lamanene!—2 Timotiya 4:5.