NHLOKOMHAKA LEYI DYONDZIWAKA 27
“Tshemba Yehovha”
“Tshemba Yehovha; Vana ni xivindzi u tiya.”—PS. 27:14.
RISIMU 128 Ku Tiyisela Ku Ya Fika eMakumu
LESWI HI NGA TA SWI DYONDZA *
1. (a) Yehovha u hi nyike ntshembo wihi? (b) Swi vula yini ku “tshemba Yehovha”? (Vona “Nhlamuselo Ya Xiga.”)
YEHOVHA u nyike hinkwavo lava n’wi rhandzaka ntshembo wo tsakisa. Ku nga ri khale u ta herisa mavabyi, gome ni rifu. (Nhlav. 21:3, 4) U ta pfuna “lavo rhula” lava n’wi tshembaka leswaku va endla misava yi va paradeyisi. (Ps. 37:9-11) Nakambe u ta endla swi koteka leswaku hinkwerhu hi va ni vuxaka lebyikulu na yena ku tlula na lebyi sweswi hi tiphinaka ha byona. Wolowo i ntshembo wo tsakisa! Kambe i yini lexi endlaka hi tshemba leswaku switshembiso swa Xikwembu swi ta endleka? Yehovha a nga si tshama a nga swi endli leswi a swi tshembiseke. Hi ni xivangelo lexi twalaka xa ku “tshemba Yehovha.” * (Ps. 27:14) Hi kombisa ku tshemba Yehovha hi ku lehisa mbilu hi tsakile hi yimela Yehovha a endla leswi a nga swi tshembisa.—Esa. 55:10, 11.
2. I yini leswi Yehovha a swi endleke?
2 Yehovha se u swi kombisile leswaku wa swi endla leswi a swi tshembisaka. Xiya xikombiso lexi. Ebukwini ya Nhlavutelo, Yehovha u tshembise leswaku enkarhini wa hina u ta hlengeleta vanhu va matiko, tinxaka ni tindzimi naswona a a ta endla leswaku va n’wi gandzela hi vun’we. Namuntlha, ntlawa wa vanhu volavo wu tiveka tanihi “ntshungu lowukulu.” (Nhlav. 7:9, 10) Hambileswi ntshungu lowu wu nga ni vavanuna, vavasati ni vana va tinxaka, tindzimi ni mindhavuko yo hambanahambana, i ndyangu lowukulu emisaveni hinkwayo lowu nga ni vun’we. (Ps. 133:1; Yoh. 10:16) Lava ntshungu lowukulu va chumayela hi ku hiseka. Va tshama va tiyimisele ku byela un’wana ni un’wana loyi a va yingisaka hi ntshembo wa vona wa ku hanya emisaveni leyintshwa. (Mat. 28:19, 20; Nhlav. 14:6, 7; 22:17) Loko u ri un’wana wa lava ntshungu lowukulu a swi kanakanisi leswaku ntshembo lowu i wa nkoka swinene eka wena.
3. Sathana u tiyimisele ku endla yini?
3 Sathana a nga lavi u va ni ntshembo. U tiyimisele ku ku endla u tshemba leswaku Yehovha a nga na mhaka na wena ni leswaku A nge swi endli leswi a hi tshembiseke swona. Loko Sathana o swi kota ku hi endla hi nga ha vi ni ntshembo, a hi nge he vi na xivindzi naswona hi nga tshika na ku gandzela Yehovha. Hilaha hi nga ta swi vona hakona, Sathana u ringetile ku hetela Yobo ntshembo ni ku ringeta ku n’wi tshikisa ku gandzela Yehovha.
4. Hi ta bula hi yini eka nhlokomhaka leyi? (Yobo 1:9-12)
4 Eka nhlokomhaka leyi, hi ta kambisisa swilo leswi Sathana a swi tirhiseke leswaku a ringeta ku tshikisa Yobo ku tshembeka eka Yehovha. (Hlaya Yobo 1:9-12.) Hi ta tlhela hi bula hi leswi hi nga swi dyondzaka eka Yobo ni leswaku hikwalahokayini hi fanele hi tsundzuka leswaku Xikwembu xa hi rhandza ni leswaku xi ta swi endla leswi xi swi tshembiseke.
SATHANA U RINGETE KU HETELA YOBO NTSHEMBO
5-6. Yobo u humeleriwe hi yini hi ku copeta ka tihlo?
5 Swilo a swi n’wi fambela kahle Yobo. A a ri ni vuxaka lebyinene na Yehovha. A a ri ni ndyangu lowukulu lowu twananaka naswona a a ri xigwili. (Yobo 1:1-5) Kambe hi siku rin’we ntsena, sweswo swi xaxile hinkwaswo. U rhange a lahlekeriwa hi rifuwo rakwe. (Yobo 1:13-17) Ivi ku landzela vana vakwe hinkwavo lava a va rhandzaka. Ehleketa hi khombo leri n’wi weleke. Vatswari va twa ku vava swinene loko va loveriwa hi n’wana. Kutani ehleketa ndlela leyi Yobo ni nsati wakwe va tsemekeke nhlana ni ku twa ku vava hayona loko va twa leswaku vana va vona hinkwavo va khume va file. A swi hlamarisi leswi Yobo a handzuleke swiambalo ni ku tlhela a wela ehansi a rila!—Yobo 1:18-20.
6 Endzhaku ka sweswo Sathana u hlasele Yobo hi vuvabyi byo vava swinene lebyi n’wi chicheke ni xindzhuti. (Yobo 2:6-8; 7:5) Phela Yobo a a xiximiwa swinene emugangeni wa ka vona. Vanhu a va ta eka yena va ta lava switsundzuxo. (Yobo 31:18) Sweswi se a va sungula ku n’wi papalata. A a nga ha laviwi, vamakwavo, vanghana hambi ku ri malandza yakwe se a va n’wi komba xikosi.—Yobo 19:13, 14, 16.
Timbhoni to tala ta manguva lawa ta ma twisisa maxangu ya Yobo (Vona ndzimana 7) *
7. (a) Yobo a a ehleketa leswaku u vangeriwa hi mani maxangu kambe i yini leswi a nga ala ku swi endla? (b) Mukreste a nga langutana ni miringo yihi hilaha swi kombisiweke hakona eka xifaniso?
7 Sathana a a lava Yobo a tshemba leswaku u xaniseka hileswi a hlundzukiseke Xikwembu. Hi xikombiso, Sathana u tirhise xidzedze leswaku xi wisa yindlu leyi a ku ri ni vana va Yobo va khume lava a va ri eku tiphineni hi swakudya. (Yobo 1:18, 19) U tlhele a endla leswaku ndzilo wu xika hi le tilweni kutani wu hisa mintlhambi ya Yobo ku katsa ni varisi va yona. (Yobo 1:16) Hikwalaho ka leswi xidzedze ni ndzilo swi xikeke hi le tilweni, Yobo a a ehleketa leswaku swi huma eka Yehovha Xikwembu. Hikwalaho ka sweswo, Yobo a a tshemba leswaku swi nga ha endleka a kwatise Yehovha. Nilokoswiritano, Yobo u arile ku rhukana Tata wakwe wa le tilweni. Yobo u pfumerile leswaku eka malembe lawa hinkwawo Yehovha u n’wi katekise hi swilo swo tala leswinene. Kutani u tibyele leswaku loko swi n’wi tsakisile ku amukela hinkwaswo leswinene, u fanele a tiyimisela ku amukela ni leswo biha. U te: “Vito ra Yehovha a ri ye emahlweni ri dzunisiwa.” (Yobo 1:20, 21; 2:10) Ku ta fikela sweswi, Yobo u swi kotile ku tiyisela vuvabyi, ku lahlekeriwa hi rifuwo ni ku twisiwa ku vava. Kambe Sathana a a nga si heta hi yena.
8. Sathana u endle yini ku ringa Yobo?
8 Sathana u tirhise rhengu rin’wana leswaku a ringa Yobo; u kucetele vanghana vakwe vanharhu vo biha leswaku va n’wi endla a titwa a nga pfuni nchumu. Vanghana lava va Yobo va vule leswaku Yobo u xaniseka hileswi a endleke swilo swo tala swo biha. (Yobo 22:5-9) Va tlhele va ringeta ku n’wi endla a tshemba leswaku hambiloko o endla leswinene, matshalatshala lawa a ma endlaka leswaku a tsakisa Xikwembu a ma nga pfuni nchumu. (Yobo 4:18; 22:2, 3; 25:4) Entiyisweni a va ringeta ku endla Yobo a kanakana leswaku Xikwembu xa n’wi rhandza nileswaku xi ta n’wi khathalela naswona a va lava a vona swi nga pfuni nchumu ku xi tirhela. Marito ya vona ma nga ha va ma endle Yobo a vona onge a ku nga ha ri na ntshembo.
9. I yini leswi pfuneke Yobo a va ni xivindzi?
9 Ehleketa hi leswi. Yobo u tshame enkumeni naswona u twa ku vava swinene. (Yobo 2:8) Vanghana vakwe va tshamela ku n’wi byela leswaku i munhu wo biha nileswaku hinkwaswo leswi a tshameke a swi endla a swi pfuni nchumu. Miringo yakwe yi na kunene ku fana ni xihangu loko gome rakwe ro loveriwa hi vana ri n’wi dyisa mbitsi. Eku sunguleni Yobo a nga hlamuli nchumu. (Yobo 2:13–3:1) Loko ku ve vanghana va Yobo va ehleketa leswaku ku miyela kakwe ku kombisa leswaku u ta fularhela Muvumbi wakwe, va be hansi. Kutani Yobo a tlakusa nhloko a languta vanghana vakwe a ku: “Ndzi ta fa ndza ha tshembekile!” (Yobo 27:5) I yini leswi pfuneke Yobo a va ni xivindzi hambi a xaniseka? Hambiloko swilo swi n’wi fambela ximatsi, a nga heleriwanga hi ntshembo wa leswaku Xikwembu xakwe lexi nga ni rirhandzu, eku heteleleni xi ta n’wi twela vusiwana. A swi tiva leswaku hambiloko o fa, Yehovha a a ta n’wi pfuxa.—Yobo 14:13-15.
HI NGA N’WI TEKELELA NJHANI YOBO?
10. Mhaka ya Yobo yi hi dyondzisa yini?
10 Mhaka ya Yobo yi hi dyondzisa leswaku Sathana a nge swi koti ku hi sindzisa leswaku hi tshika ku gandzela Yehovha ni leswaku Yehovha wa swi vona leswi hi endlekelaka. Nakambe leswi endlekeleke Yobo swi nga hi pfuna hi swi twisisa kahle swilo swin’wana leswi katsekeke. Xiya swin’wana leswi hi nga swi dyondzaka eka Yobo.
11. Hi nga tiyiseka hi yini loko hi nga tshiki ku tshemba Yehovha? (Yakobo 4:7)
11 Yobo u kombise leswaku loko hi nga tshiki ku tshemba Yehovha, hi nga hlula ndzingo wun’wana ni wun’wana naswona hi nga swi kota ku kaneta Sathana. Loko hi endla tano ku ta endleka yini? Matsalwa ma hi tiyisekisa leswaku Diyavulosi u ta hi baleka.—Hlaya Yakobo 4:7.
12. Ntshembo wa leswaku vafi va ta pfuxiwa wu n’wi tiyise njhani Yobo?
12 Hi fanele hi va ni ripfumelo leri tiyeke ra leswaku vafi va ta pfuxiwa. Hilaha hi dyondzeke hakona eka nhlokomhaka leyi hundzeke, mikarhi yo tala Sathana u tirhisa ku chava loku hi nga na kona ka rifu leswaku a ringeta ku hi endla hi nga tshembeki eka Yehovha. Eka mhaka ya Yobo, Sathana u vule leswaku Yobo a a ta endla xin’wana ni xin’wana, hambi ku ri ku tshika ku tshembeka leswaku a ponisa vutomi byakwe. Sathana a a hoxisile. Hambiloko Yobo ri n’wi xele kambirhi naswona a nun’hwetela ni sirha, a nga tshikanga ku tshembeka eka Yehovha. Ku va a tshemba leswaku Yehovha u lulamile nileswaku eku heteleleni u ta xi lulamisa xiyimo xakwe, swi n’wi pfunile leswaku a tiyisela. Yobo a a ri ni ripfumelo ra leswaku loko Yehovha a nga xi lulamisi xiyimo xakwe loko a ha hanya, A a ta n’wi pfuxa enkarhini lowu taka. A a ri ni ripfumelo leri tiyeke ra leswaku vafi va ta pfuxiwa. Loko ntshembo wolowo wu ri wa xiviri eka hina, hambiloko swi vonaka onge hi nga ha lahlekeriwa hi vutomi bya hina, sweswo a swi nge hi endli hi tshika ku tshembeka.
13. Hikwalahokayini hi fanele hi swi tekela enhlokweni swilo leswi Sathana a swi tirhiseke ku ringa Yobo?
13 Hi fanele hi swi tekela enhlokweni swilo leswi Sathana a swi tirhiseke ku ringa Yobo hikuva ninamuntlha u tirhisa swilo leswi fanaka leswaku a hi ringa. Twana swihehlo leswi Sathana a swi vuleke: “Munhu [ku nga ri Yobo ntsena] u ta humesa hinkwaswo leswi a nga na swona leswaku a ponisa vutomi byakwe.” (Yobo 2:4, 5) Entiyisweni Sathana u vula leswaku a hi n’wi rhandzi Yehovha Xikwembu nileswaku hi ta n’wi fularhela leswaku hi ponisa vutomi bya hina. Sathana u tlhela a vula leswaku Xikwembu a xi hi rhandzi nileswaku a xi nge ma tekeli enhlokweni matshalatshala lama hi ma endlaka leswaku hi xi tsakisa. Leswi hi lumiweke ndleve, hina lava hi tshembaka Yehovha a hi humbiwi mano hi marhengu ya Sathana.
14. Miringo yi nga paluxa yini hi hina? Kombisa.
14 Hi fanele hi teka miringo ku ri ndlela leyi hi nyikaka nkarhi lowunene wa leswaku hi titiva kahle. Miringo leyi weleke Yobo yi n’wi pfune leswaku a tiva laha a a fanele a antswisa kona. Hi xikombiso, u dyondze leswaku a a fanele a titsongahata swinene. (Yobo 42:3) Na hina ku na swo tala leswi hi nga swi dyondzaka hi hina vini loko hi ri emiringweni. Makwerhu loyi a vuriwaka Nikolay, * loyi a khomiweke hambileswi a a vabya swinene u ri: “Jele yi fana na X-ray, yi kombisa swilo leswi Mukreste a faneleke a antswisa eka swona.” Loko hi tiva laha hi salelaka kona endzhaku, hi ta swi kota ku antswisa.
15. Hi fanele hi yingisa mani naswona hikwalahokayini?
15 Hi fanele hi yingisa Yehovha ku nga ri valala va hina. Yobo u rhiye ndleve loko Yehovha a vulavula na yena. Xikwembu xi pfune Yobo a vona swilo hi ndlela leyinene, kahlekahle xi te: ‘Xana wa ma vona matimba ya mina yo tumbuluxa? Ndza swi tiva hinkwaswo leswi ku endlekeleke. Xana u ehleketa leswaku a ndzi nge ku khathaleli?’ Hi ku titsongahata Yobo u kombise ndlela leyi a byi tlangelaka hayona vunene bya Yehovha. U te: “Ndzi twe mavarivari ha wena, kambe sweswi ndza ku vona hi matihlo ya mina.” (Yobo 42:5) Swi vonaka onge loko Yobo a vula marito lama a ha tshame enkumeni, miri wakwe wu tele hi swilondza naswona vana vakwe a va file. Nilokoswiritano, Yehovha u tiyisekise Yobo leswaku Wa n’wi rhandza ni ku n’wi amukela.—Yobo 42:7, 8.
16. Hi ku ya hi Esaya 49:15, 16, hi fanele hi tsundzuka yini loko hi ri emiringweni?
16 Na hina namuntlha, vanhu va nga hi rhuketela va tlhela va hi teka hi nga pfuni nchumu. Va nga ha ringeta ku onha vito ra hina kumbe ra nhlangano wa hina ni ku hi “hembela hi swilo swo tala swo homboloka.” (Mat. 5:11) Mhaka ya Yobo hi yi dyondzisa leswaku Yehovha wa tshemba leswaku hi ta tshama hi tshembekile eka yena loko hi ri emiringweni. Yehovha wa hi rhandza naswona a nge pfuki a va tshikile lava n’wi tshembaka. (Hlaya Esaya 49:15, 16.) U nga swi yingisi swihehlo leswi vuriwaka hi valala va Xikwembu! Makwerhu James wa le Turkey loyi ndyangu wakwe wu ringiweke swinene u ri: “Hi xiye leswaku loko hi yingisela mavunwa lawa vanhu va Xikwembu va phyarhekiwaka wona a swi ta hi heta matimba. Kutani a hi tshamela ku anakanyisisa hi ntshembo lowu Xikwembu xi hi nyikeke wona ni ku hiseka entirhweni wa Xikwembu. Sweswo swi endle leswaku hi nga heleriwi hi ntsako.” Ku fana na Yobo, hi yingisa Yehovha! Mavunwa lawa valala va hina va hi hembelaka ha wona a ma nge wu herisi ntshembo wa hina.
NTSHEMBO WA WENA WU TA KU TIYISA
Yobo u katekisiwile hileswi a tshameke a tshembekile. Yena ni nsati wakwe va tiphinile hi mikateko ya Yehovha nkarhi wo leha (Vona ndzimana 17) *
17. U dyondza yini eka vavanuna ni vavasati vo tshembeka lava ku vulavuriwaka ha vona eka Vaheveru ndzima 11?
17 Yobo i un’wana wa malandza ya Yehovha loyi a kombiseke xivindzi loko a ri emiringweni leyikulu. Eka papila leri muapostola Pawulo a ri tsaleleke Vaheveru, u vule leswaku van’wana i xiphemu xa “papa lerikulu swinene ra timbhoni.” (Hev. 12:1) Hinkwavo va weriwe hi miringo leyikulu; kambe va tshame va tshembekile eka Yehovha. (Hev. 11:36-40) Xana ku tiyisela ka vona ni ku tirha hi matimba swi ve nyuku wa mbyana? Nikatsongo! Hambileswi va feke va nga swi vonanga switshembiso swa Xikwembu swi endleka, va ye emahlweni va tshemba Yehovha. Leswi a va tiyiseka leswaku Yehovha wa va amukela, a va tshemba leswaku va ta swi vona switshembiso swakwe swi endleka. (Hev. 11:4, 5) Xikombiso xa vona xi nga hi tiyisa leswaku hi nga tshiki ku tshemba Yehovha.
18. U tiyimisele ku endla yini? (Vaheveru 11:6)
18 Namuntlha hi hanya emisaveni leyi nyanyaka ku biha. (2 Tim. 3:13) Sathana u ya emahlweni a ringa vanhu va Xikwembu. Hambi hi langutana na yini enkarhini lowu taka, onge hi nga tiyimisela ku tirhela Yehovha hi matimba hi tiyiseka leswaku “hi tshemba Xikwembu lexi hanyaka.” (1 Tim. 4:10) Tsundzuka leswi Xikwembu xi nga n’wi endlela swona Yobo ku kombisa “leswaku Yehovha u ni ntwelavusiwana lowukulu ni tintswalo.” (Yak. 5:11) Na hina a hi tshameni hi tshembekile eka Yehovha hi tshemba leswaku u ta katekisa “lava [n’wi] lavaka hi mbilu hinkwayo.”—Hlaya Vaheveru 11:6.
RISIMU 150 Lavani Xikwembu Leswaku Xi Ta Mi Kutsula
^ par. 5 Loko hi ehleketa hi munhu loyi a nga tiyisela maxangu lamakulu, mikarhi yo tala hi ehleketa hi Yobo. Hi nga dyondza yini eka leswi endlekeleke wanuna loyi wo tshembeka? Hi dyondza leswaku Sathana a nge hi sindzisi leswaku hi tshika ku tirhela Yehovha. Nakambe hi dyondza leswaku mikarhi hinkwayo Yehovha wa swi tiva leswi hi humelelaka. Tanihi leswi Yehovha a heriseke miringo ya Yobo, siku rin’wana U ta herisa maxangu ya hina. Loko hi swi kombisa hi swiendlo leswaku ha swi tshemba leswi, hi ta va hi katseka eka lava ‘tshembaka Yehovha’ hi mbilu hinkwayo.
^ par. 1 NHLAMUSELO YA XIGA: Rito ra Xiheveru leri hundzuluxeriweke ri va “ntshembo” kahlekahle ri vula ku rindzela nchumu wo karhi hi mahlongati. Ri nga tlhela ri vula ku tshemba munhu wo karhi.—Ps. 25:2, 3; 62:5.
^ par. 14 Mavito man’wana ma cinciwile.
