Haykanush, muhuweleri la nga khuvuriwangiki la tshamaka eArmenia, u thumbe phasipoti ekusuhi ni le kaya ka yena. Endzeni ka phasipoti a ku ri ni makhadi ya le bangi ni mali yo tala swinene. U byele nuna wakwe, loyi na yena a nga muhuweleri la nga khuvuriwangiki hi mhaka leyi.

Vatekani lava a va ri ni swiphiqo leswikulu swa timali naswona a va ri ni swikweleti. Kambe va endle xiboho xo tlherisa mali yoleyo eka adirese leyi a yi ri eka phasipoti. Wanuna loyi la lahlekeriwile hi swilo swakwe swin’we ni ndyangu wakwe va hlamarile swinene. Haykanush ni nuna wakwe va hlamusele leswaku leswi va swi dyondzeke eBibeleni hi swona swi endleke leswaku va tshembeka. Kutani va va hlamusele ndlela leyi Timbhoni ta Yehovha ti tikhomaka ha yona ni ku nyika ndyangu wolowo minkandziyiso.

Ndyangu wolowo a wu lava ku nyika Haykanush mali leswaku wu n’wi nkhensa, kambe a nga pfumelanga. Hi siku leri landzelaka, nsati wa nuna loyi a lahlekeriweke u endzele Haykanush ni nuna wakwe ekaya ka vona leswaku a ya va nkhensa. U sindzise Haykanush ku amukela xingwavila xa dayimani.

Ku fana ni ndyangu wolowo, vanhu vo tala va nga hlamala ndlela leyi Haykanush ni nuna wakwe va tshembekeke ha yona. Kambe xana sweswo swi n’wi hlamarisile Yehovha? Xana u ku langute njhani ku tshembeka ka vona? Xana a swi boha leswaku va tshembeka?

Tinhlamulo ta swivutiso leswi ti olovile. Ha yini? Hikuva malandza ya Xikwembu ma swi tiva leswaku ku tekelela timfanelo ta xona i swa risima eka xona ku tlula dayimani, nsuku kumbe rifuwo. I ntiyiso leswaku leswi Yehovha a swi tekaka swi ri swa risima swi hambanile ni leswi vanhu van’wana va swi tekaka swi ri swa risima. (Esaya 55:8, 9) Malandza ya Yehovha ma swi tiva leswaku matshalatshala ya wona yo tekelela timfanelo ta yena i ya risima swinene.

Hi nga kota ku xiya sweswo eka leswi Bibele yi swi vulaka hi ku twisisa ni vutlhari. Swivuriso 3:13-15 yi ri: “Wa tsaka munhu la kumeke vutlhari, ni munhu la kumaka ku twisisa, hikuva ku byi pindzula swa antswa ku ri ni ku pindzula silivhere ni ku byi kuma swi tlula ku kuma nsuku. I byinene ku tlula tikorala, naswona hinkwaswo leswi tsakisaka swa wena a swi nge ringani na byona.” Swi le rivaleni leswaku Yehovha u teka timfanelo leti ti ri ta risima ku tlula xuma xin’wana ni xin’wana.

Kutani ku vuriwa yini hi ku tshembeka?

Yehovha wa tshembeka. A ‘nga hembi.’ (Tito 1:2) Kutani u huhutele muapostola Pawulo leswaku a tsalela Vakreste va Vaheveru va le nkarhini wa vaapostola a ku: “Hambetani mi hi khongelela, hikuva ha tshemba leswaku hi ni ripfalo ro tshembeka, hileswi hi navelaka ku tikhoma hi ku tshembeka eka swilo hinkwaswo.”—Vaheveru 13:18.

Yesu Kreste u veke xikombiso lexinene emhakeni ya ku tshembeka. Hi xikombiso, loko Muprista Lonkulu Kayafasi a ku eka yena, “Hi Xikwembu lexi hanyaka ndza ku hlambanyisa leswaku u hi byela loko u ri Kreste N’wana wa Xikwembu!,” Yesu u tshembekile kutani a vula leswaku hi yena Mesiya. U vulavule ntiyiso hambileswi a swi tiva leswaku huvo ya Sanedri a yi ta n’wi hehla hi leswaku i musandzi ni ku endla leswaku a dlayiwa.—Matewu 26:63-67.

Ku vuriwa yini hi hina? Xana hi ta tshama hi tshembekile loko hi ri exiyin’weni lexi laha loko ho ka hi nga vulavuli ntiyiso kumbe ku cincanyana mhaka yo karhi swi nga ta endla leswaku hi vuyeriwa hi swo karhi?

Emasikwini lawa ya makumu swi nga ha hi tikela ku tshembeka tanihi leswi vanhu vo tala va  ‘tirhandzaka ni ku rhandza mali.’ (2 Timotiya 3:2) Loko ku ri ni swiphiqo swa timali kumbe loko ku pfumaleka mintirho, vanhu vo tala va vona onge ku yiva, ku nga tshembeki kumbe ku endla nchumu wun’wana ni wun’wana lowu kombisaka ku nga tshembeki a swi hoxanga. Leswi swi tolovelekile lerova vanhu vo tala va vona onge ku nga tshembeki hi yona ndlela yin’we ntsena leyi nga endlaka leswaku va vuyeriwa. Hambi ku ri Vakreste van’wana va endle swiboho leswi hoxeke ni “mpindzulo wa vukanganyisi” naswona va tionhe vito evandlheni.—1 Timotiya 3:8; Tito 1:7.

Hambiswiritano, Vakreste vo tala va tekelela Yesu. Va swi xiya leswaku ku va ni timfanelo to fana ni ta Xikwembu i swa risima ku tlula rifuwo rin’wana ni rin’wana. Hi yona mhaka vantshwa lava nga Vakreste a va kopeli leswaku va ta pasa exikolweni. (Swivuriso 20:23) A hi minkarhi hinkwayo hi nga ta vuyeriwa hi swo karhi loko hi tshembeka hilaha swi endlekeke hakona eka Haykanush. Hambiswiritano, Xikwembu xi vula leswaku ku tshembeka i nchumu lowunene naswona ku endla leswaku hi va ni ripfalo leri baseke, ku nga nchumu wa risima.

 Xikombiso xa Gagik xi kombisa sweswo. U vula leswi: “Loko ndzi nga si va Mbhoni, a ndzi tirha eka khamphani leyikulu swinene laha n’wini wa khamphani a vika xiviko xa mavunwa xa leswaku u kume ntswalo lowutsongo ebindzwini rakwe leswaku a nga hakeli swibalo. Tanihi mininjhere, a ndzi fanele ndzi ‘seketela’ n’wini wa khampani hi ku ba mati eka mulanguteri wa xibalo leswaku a nga paluxi vukungundzwana lebyi a byi ri ku endliweni. Kutani a ndzi tiveka hi ku nga tshembeki. Loko ndzi ta va ndzi dyondze ntiyiso, ndzi tshike mukhuva wolowo, hambileswi ntirho wa kona a wu holela swi nyawula. Kutani ndzi sungule bindzu ra mina naswona ndzi ri tsarise to ho suka ndzi tlhela ndzi hakela swibalo swa mina hinkwaswo.”—2 Vakorinto 8:21.

Gagik u ri: “Mali leyi a ndzi yi kuma a yi ringana ni kwalomu ka hafu ya muholo wa mina wa khale naswona se a swi ndzi tikela ku wundla ndyangu wa mina. Hambiswiritano, sweswi ndzi titwa ndzi tsakile. Ndzi ni ripfalo leri baseke eka Yehovha. Ndzi xikombiso lexinene eka vana va mina vambirhi va majaha, naswona ndzi kume malunghelo evandlheni. Sweswi ndzi tiveka tanihi munhu wo tshembeka eka vanhu lava ndzi tirhaka na vona ni lava langutelaka xibalo.”

Yehovha u rhandza lava endlaka leswaku a dzunisiwa hi ku tekelela timfanelo takwe letinene, ku katsa ni ku tshembeka. (Tito 2:10) Nakambe loko hi endla tano, u hi tshembisa ku hi pfuna. U huhutele Hosi Davhida ku vula leswi: “A ndzi ri jaha, kambe se ndzi dyuhele, kambe a ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa.”—Pisalema 37:25.

Mhaka ya ku tshembeka ka Rhuti yi kombisa sweswo. Hi ku tshembeka u ye emahlweni a tshama ni n’wingi wakwe Nawomi hambileswi se a kurile. Rhuti u rhurhele eIsrayele, laha a ta kota ku gandzela Xikwembu xa ntiyiso. (Rhuti 1:16, 17) A a tshembekile naswona u tirhe hi matimba a tshovela, a landzelela Nawu lowu a wu endleriwe swisiwana. Yehovha u khathalele Rhuti na Nawomi hilaha a endleke hakona eka Davhida. (Rhuti 2:2-18) U endle swo tala ngopfu ku tlula ku khathalela Rhuti. U n’wi hlawule leswaku a va xirho xa ndyangu wa Hosi Davhida swin’we na Mesiya la tshembisiweke!—Rhuti 4:13-17; Matewu 1:5, 16.

Malandza man’wana ya Yehovha swi nga ha ma tikela ku kuma mali leyi eneleke leswaku ma kota ku tihanyisa. Kambe ku ri na ku ringeta ku kuma ndlela yo olova kambe leyi nga ni vukungundzwana, ma tirha hi matimba leswaku ma tikhathalela. Loko ma endla tano ma kombisa leswaku timfanelo ta Xikwembu letinene, ku katsa ni ku tshembeka, i ta nkoka ngopfu eka wona ku tlula rifuwo.—Swivuriso 12:24; Vaefesa 4:28.

Ku fana na Rhuti, Vakreste emisaveni hinkwayo va kombise leswaku va tshemba leswaku Yehovha u ta va pfuna. Va n’wi tshemba hi ku helela Loyi a tshembiseke leswi: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Vaheveru 13:5) Hi ku phindhaphindha, Yehovha u kombise leswaku wa swi kota ku pfuna lava tshembekaka naswona u ta va pfuna minkarhi hinkwayo. Minkarhi hinkwayo wa xi hetisisa xitshembiso xa yena xo khathalela swilaveko swa malandza yakwe swa nyama.—Matewu 6:33.

I ntiyiso leswaku vanhu va teka tidayimani ni rifuwo swi ri swa risima. Kambe hi nga tiyiseka leswaku Tata wa hina wa le tilweni u teka ku tshembeka ka hina ni timfanelo tin’wana letinene ti ri ta nkoka ku tlula xuma xa risima!