Vanhu lava tshembekaka va tshembiwa hi vatswari, vanghana ni vathori va vona. Va landzela milawu, va hetisisa switshembiso swa vona naswona mikarhi hinkwayo va vulavula ntiyiso.

Eka swiyimo swin’wana, ntshunxeko lowu u wu kumaka u wu kuma hikwalaho ka leswi va ku tshembaka.

“Ndlela leyinene yo endla leswaku vatswari va wena va ku tshemba, i ku kombisa leswaku u kurile naswona wa byi tiva vutihlamuleri bya wena, ku nga ri loko va ri kona ntsena kambe ni loko va nga ri kona.”—Sarahi.

NSINYA WA NAWU WA LE BIBELENI: “Tshamani mi tikombisa leswi n’wina mi nga swona.”—2 Vakorinto 13:5.

Loko u lava leswaku va ku tshemba, swiringanyeto leswi landzelaka swi nga ku pfuna.

Vulavula ntiyiso. Loko u tshamela ku vulavula mavunwa vanhu a vange he ku tshembi. Kambe loko u tshembeka ni ku vulavula ntiyiso loko u endle swihoxo, vanhu va ta ku tshemba.

“Swa olova ku tshembeka loko swilo swi famba kahle. Kambe loko u tshembeka hambiloko swilo swa kona swi ta ku endla munhu loyi a nga riki lonene, vanhu va ta ya va ku tshemba swinene.”—Caiman.

NSINYA WA NAWU WA LE BIBELENI: “Hi [navela] ku tikhoma hi ku tshembeka eka swilo hinkwaswo.”—Vaheveru 13:18.

Vana la tshembekaka. Eka ndzavisiso wun’wana wa le United States, vathori va 78 wa tiphesente va vule leswaku ku tshembeka i “xin’wana xa swilo swinharhu swa nkoka swinene lexi khamphani yi xi langutaka loko yi thola munhu.” Loko u tshembeka sweswi swi ta ku pfuna ni loko se u kurile.

“Vatswari va mina va swi xiya loko ndzi hetisisa vutihlamuleri bya mina ni ku endla mitirho ya mina ya le kaya va nga ndzi salanga ndzhaku. Loko ndzi endla tano, va ya va ndzi tshemba swinene.”—Sarah.

NSINYA WA NAWU WA LE BIBELENI: “Hi ku tshemba ku yingisa ka wena, ndza swi tiva leswaku u ta endla ku tlula ni leswi ndzi swi vulaka.”—Filemoni 21.

Lehisa mbilu. Swa olova ku vona loko miri wa munhu wu kula hi ku hatlisa kambe a swi olovi ku xiya loko hakunene a kurile emiehleketweni.

“Leswaku vatswari va wena ni van’wana va ku tshemba swi teka nkarhi naswona swi lava matshalatshala. Kambe loko u hetisisa vutihlamuleri bya wena swi ta endla leswaku va ku tshemba hi ku famba ka nkarhi.”—Brandon.

NSINYA WA NAWU WA LE BIBELENI: “Tiambexeni . . . ku va ni mbilu yo leha.”—Vakolosa 3:12.