NHLOKOMHAKA YA XIFUNENGETO | XANA SWA PFUNA KU KHONGELA?
Xana Ku Ni Loyi A Yingiselaka?
Vanhu van’wana va ehleketa leswaku ku khongela i ku tlanga hi nkarhi hikuva a ku na loyi a yingiselaka swikhongelo. Van’wana va ringetile ku khongela kambe va vona onge a ku na loyi a hlamulaka. Un’wana loyi a nga pfumeriki leswaku Xikwembu xi kona u tsale leswi a a swi ehleketa hi Xikwembu kutani a khongela a ku: “Ndzi kombela u ndzi hlevelanyana.” Kambe u vule leswaku Xikwembu “a xi vulanga nchumu.”
Kambe Bibele ya hi tiyisekisa leswaku Xikwembu xi kona naswona xa swi yingisela swikhongelo. I Munhu loyi a tlakukeke swinene evuakweni hinkwabyo, i Xikwembu. EBibeleni vanhu va khale va tsaleriwe marito lama nge: ‘Kunene Xikwembu xi ta ku komba tintswalo loko xi twa xirilo xa wena; entiyisweni xi ta ku hlamula.’ (Esaya 30:19) Tsalwa rin’wana eBibeleni ri ri: “Xikhongelo xa lavo lulama xa n’wi tsakisa.”—Swivuriso 15:8.
Yesu u khongele eka Tata wakwe “naswona u twiwe hi tindleve timbirhi.”—Vaheveru 5:7
Nakambe eBibeleni ku ni swikombiso swa lava swikhongelo swa vona swi twiweke. Tsalwa rin’wana ri vula leswaku Yesu u endle “swikombelo . . . eka Loyi a a swi kota ku n’wi ponisa naswona u twiwe hi tindleve timbirhi.” (Vaheveru 5:7) Swikombiso swin’wana swi kumeka eka Daniyele 9:21; na 2 Tikronika 7:1.
Kambe ha yini vanhu van’wana va vone onge swikhongelo swa vona a swi hlamuriwi? Hi fanele hi khongela ntsena eka Xikwembu xa ntiyiso ku nga Yehovha, * ku nga ri eka swikwembu swin’wana kumbe eka lava feke. Nakambe Xikwembu xi lava leswaku hi ‘kombela hi ku ya hi ku rhandza ka xona,’ hi kombela swilo leswi amukelekaka eka xona. Xa hi tiyisekisa leswaku loko hi khongela hi ndlela leyi, “xa hi twa.” (1 Yohane 5:14) Leswaku swikhongelo swa hina swi twiwa, hi fanele hi sungula hi tiva Xikwembu xa le Bibeleni, hi tlhela hi dyondza hi ku rhandza ka xona.
Vanhu vo tala va tshemba leswaku xikhongelo a ko va ntsena nchumu lowu fambisanaka ni kereke, kambe Xikwembu xa swi yingisa swikhongelo ni ku swi hlamula. Isaac wa le Kenya u ri: “Ndzi khongerile ndzi kombela mpfuno leswaku ndzi kota ku twisisa Bibele. Endzhaku ka sweswo ku ni loyi a teke a ta ndzi pfuna.” Hilda wa le Philippines a a lava ku tshika ku dzaha. Endzhaku ka loko a ringete ko tala ku tshika, nuna wakwe u n’wi komberile a ku: “Khongela eka Xikwembu leswaku xi ku pfuna.” U n’wi yingisile kutani a ku: “Ndlela leyi xi ndzi pfuneke ha yona yi ndzi hlamarisile. Ndzi titwe ndzi nga ha swi naveli ku dzaha. Ndzi hetelele ndzi tshikile.”
Xana Xikwembu xi nga ku pfuna eka swilo leswi u swi kombelaka leswi fambisanaka ni ku rhandza ka xona?
^ ndzim. 6 Yehovha i vito ra Xikwembu hilaha Bibele yi vulaka hakona.
