Hi lembe leri landzeleke, ndzi sungule ku tlanga eka tifilimi naswona eka to tala a ndzi ri ximunhuhatwankulu. Vateki va mahungu a va rhandza ku vulavula na mina, vateki va swifaniso a va rhandza ku ndzi teka swifaniso, vanhu a va ndzi rhamba loko va endla mintirho yo karhi yo fana ni ku pfuriwa ka miako kumbe loko va sungula mabindzu lamantshwa kumbe ku dya na vona swakudya swa ninhlikanhi ni swa nimadyambu. A ndzi laviwa hala ni hala.

Kambe hi ku famba ka nkarhi, ndzi kume leswaku leswi hinkwaswo a swi nga ndzi tsakisi hi ndlela leyi a ndzi ehleketa leswaku swi ta va ha yona. A ndzi tirha ngopfu eku endleni tifilimi leti nga ni madzolonga naswona sweswo a swi ri ni khombo. Leswi eHong Kong a va nga endli leswaku mutlangi a va ni munhu un’wana loyi a endlaka swiendlo swo karhi leswi nga ni khombo ku fana ni vatlangi va le Hollywood, a ndzi boheka ku endla swilo leswi nga ni khombo, swo fana ni ku fambisa xithuthuthu ehenhla ka movha. Eka tifilimi leti a ndzi katseka eka tona, to tala a ti ri ta ku tikhoma ko biha ni madzolonga. Tin’wana a ti kombisa swilo swa vudimona.

Hi 1995 ndzi tekane ni muendli wa tifilimi. Hambileswi a ndzi ri ni swilo hinkwaswo leswi a swi ta ndzi tsakisa swo tanihi ndhuma, mali, nuna loyi a ndzi rhandzaka, a ndzi tshikilelekile ni ku va ni gome. Hikwalaho, ndzi tshikile ku tlanga tifilimi.

Ndzi sungule ku tsundzuka ndlela leyi a ndzi xi rhandza ha yona Xikwembu loko ndza ha ri xinhwanyetana. Hi minkarhi yoleyo, hi Mugqivela wun’wana ni wun’wana mina na sesi wa mina a hi rhandza ku endzela ndyangu wun’wana wa Timbhoni ta Yehovha. Tata wa kwalaho Joe McGrath, a a hi dyondzisa Bibele hinkwerhu ku katsa ni vana vakwe vanharhu va vanhwanyana. Ndyangu lowu a wu ri ni rirhandzu naswona tata wa kona loyi a hi n’wi vitana malume Joe, a a xixima nsati wakwe ni vana. A ndzi swi rhandza ku ya na vona eka minhlangano ya vona ya Vukreste. Minkarhi yin’wana a hi ya na vona eka minhlangano leyikulu. A ku ri minkarhi  yo tsakisa swinene naswona a ndzi titwa ndzi sirhelelekile loko ndzi ri ni Timbhoni ta Yehovha.

Kambe ekaya swiyimo a swi nga tsakisi. Mahanyelo ya tatana a ma dyisa manana mbitsi a xeva hi nhlomulo. Loko ndzi ri ni malembe ya kwalomu ka khume, Manana u tshikile ku tihlanganisa ni Timbhoni ta Yehovha. Hambileswi a ndzi nga hiseki, a ndzi tshikanga kukondza ndzi ya khuvuriwa loko ndzi ri ni malembe ya 17. Kambe endzhakunyana, ndzi sungule ku tikhoma hi ndlela leyi nga riki ya Vukreste naswona a ndzi nga ha ri Mbhoni.

Endzhakunyana ko tekiwa, vakulu vambirhi va le vandlheni ra Timbhoni ta Yehovha ta laha a ndzi tshama kona, va ndzi endzerile. Va ndzi hlamuserile leswaku ndzi nga endla yini leswaku ndzi tlhelela eka Yehovha Xikwembu va tlhela va kombela murhumiwa la vuriwaka Cindy leswaku a ta ndzi pfuna. Hi nkarhi wolowo a ndzi nga ha ri na ripfumelo naswona ndzi n’wi komberile leswaku a ndzi tiyisekisa eBibeleni leswaku hakunene Bibele i Rito ra Xikwembu. U ndzi kombe vuprofeta bya le Bibeleni lebyi se byi hetisekeke. Hakatsongotsongo, hi ve vanghana naswona u kombele ku ndzi dyondzisa Bibele. Ndzi pfumerile naswona a ku ri ro sungula ndzi khensa Yehovha hileswi a nga Xikwembu xa rirhandzu lexi lavaka leswaku ndzi tsaka.

Loko ndzi sungule ku ya eminhlanganweni ya Vukreste nakambe, ndzi xiye leswaku ndza swi tsakela ku va ni Timbhoni ku tlula ku va ni lava a ndzi tirha na vona eku endleni ka tifilimi. Kambe ndlela leyi ndzi kuleke ha yona yi ndzi endle ndzi nga ha tshembi munhu naswona a ndzi tilan’wile. Un’wana wa lava a hi gandzela na vona u ndzi kombile eBibeleni leswaku ndzi nga langutana njhani ni leswi a swi ndzi karhata naswona ndzi dyondze ku tihlawulela vanghana va ntiyiso.

Hi 1997 mina ni nuna wa mina hi rhurhele eHollywood, California le U.S.A. Loko ndzi ri kwalaho, a ndzi pfuna vanhu hi ku va dyondzisa Rito ra Xikwembu. Ku dyondzisa vanhu Bibele swi ndzi nyike ku eneriseka ku tlula ndhuma ya ku endla tifilimi. Hi xikombiso, hi 2002 ndzi hlangane na Cheri munghana wa mina wa khale wa le Hong Kong. Mina na yena hi endle swilo swo tala leswi fanaka evuton’wini. Yena u ve N’wamburhi wa Hong Kong emahlweni ka mina. Loko ndzi wina, hi yena a ndzi tlhandlekeke harhi ya kona. U ve muendli wa tifilimi a tlhela a va mutsari wa tona ni ku tirha ni vakongomisi lava dumeke. Na yena u rhurhele eHollywood.

Mbilu ya mina yi vave ngopfu loko ndzi twa leswaku loyi Cheri a a ta tekana na yena u dlayiwe hi mavabyi ya mbilu. A nga kumanga nchavelelo eka vukhongeri lebyi a a ri eka byona bya Vubudha. A a fana na mina a hanya vutomi bya vulovolovo lebyi vo tala a va byi navela kambe a ri ni gome naswona a nga tshembi munhu. Ndzi sungule ku bula na yena hi leswi a ndzi swi dyondza eBibeleni kambe leswi a a ri Mubudha a swi nga n’wi oloveli ku pfumelelana na swona.

Siku rin’wana hi 2003, Cheri u ndzi bele riqingho a ri eVancouver le Canada laha a a endlela kona filimi. Loko a ndzi fonela a a twala a tsakile a ndzi byela leswaku loko a ri karhi a jikajika hi movha a vona ndhawu, u sungule ku khongela hi rito leri twalaka a ku: “Kahlekahle Xikwembu xa ntiyiso i mani? Vito ra wena u mani?” Hi nkarhi wolowo loko a ri karhi a chayela, u hundze hi le Holweni ya Mfumo kutani a vona vito leri nge Yehovha. U swi xiyile leswaku yoleyo a ku ri nhlamulo ya Xikwembu naswona a nga ha yimayimanga, u lave ku tihlanganisa ni Timbhoni ta Yehovha. Endzhaku ka masikunyana, u sungule ku ya eminhlanganweni ya Xichayina eVancouver.

 Endzhaku ka nkarhi Cheri u te: “Vanhu lava va ndzi rhandza. Ndzi kota ku va byela leswi ndzi karhataka.” A ndzi tsake swinene loko a ndzi byela leswi hikuva loko Cheri a ha endla tifilimi, a a nga ri na vanghana. A nga tshikanga ku ya eminhlanganweni. Kambe hi 2005 u sungule ku endla tifilimi timbirhi eChayina naswona a a fanele a tlhelela eHong Kong. Lexi tsakisaka hileswaku hi 2006, u tinyiketerile eka Yehovha a tlhela a khuvuriwa a va Mbhoni enhlengeletanweni ya le Hong Kong. A a lava ku heta nkarhi wo tala a tirhela Yehovha kambe ntirho wakwe wu endle leswaku swi nga n’wi oloveli ku endla tano naswona sweswo a swi nga n’wi nyiki ntsako.

Hi 2009, vutomi bya Cheri byi cincile. U tshike ntirho wakwe leswaku a va ni nkarhi wo tala wa ku tirhela Yehovha. U tiendlele vanghana lavantshwa evandlheni ra Vukreste. U heta nkarhi wo tala a ri karhi a chumayela mahungu lamanene naswona wa swi tsakela ku pfuna vanhu leswaku va hanya vutomi lebyi nga ni xikongomelo.—Matewu 24:14.

Hi ku famba ka nkarhi Cheri u dyondze Xinepalese leswaku a pfuna ntlawa wa Timbhoni leti vulavulaka ririmi leri eHong Kong. Vanhu vo tala lava vulavulaka ririmi leri, a va tekeriwi enhlokweni hikuva a va xi tivi Xinghezi kumbe Xichayina nileswi ndhavuko wa vona wu hambaneke ni wa kwalaho. Cheri u ndzi byele ndlela leyi a swi tsakeleke ha yona ku pfuna vanhu lava leswaku va twisisa Bibele. Hi xikombiso, loko siku rin’wana a chumayela hi yindlu ni yindlu, u hlangane ni wansati la vulavulaka Xinepalese loyi a a nga tivi swo tala hi Yesu naswona a a nga tivi nchumu hi Xikwembu xa ntiyiso ku nga Yehovha. Cheri u n’wi hlayele Bibele a n’wi komba leswaku Yesu u khongele eka Tata wakwe wa le tilweni. Loko wansati yoloye a swi vona leswaku a nga khongela eka Xikwembu xa ntiyiso lexi vito ra xona ku nga Yehovha, u ma amukerile mahungu lamanene lawa Cheri a n’wi tiseleke wona. Ku nga ri khale, nuna wa wansati loyi ni n’wana wa vona va sungule ku dyondza Bibele.—Pisalema 83:18; Luka 22:41, 42.

Loko ndzi vona ndlela leyi Cheri a a swi tsakela ha yona ku heta nkarhi wo tala a ri karhi a chumayela, ndzi tivutisile leswaku, ‘i yini lexi ndzi sivelaka leswaku na mina ndzi endla hilaha a endlaka hakona?’ Hi nkarhi wolowo na mina a ndzi tshama eHong Kong. Ndzi tlhele ndzi hlela swiyimo swa mina leswaku na mina ndzi va ni nkarhi wo tala wo dyondzisa vanhu ntiyiso wa le Bibeleni. Ndzi xiye leswaku loko ndzi yingisela vanhu ni ku va pfuna leswaku va twisisa Rito ra Xikwembu, swi ndzi endla ndzi tsaka swinene.

Hi xikombiso, ndzi kote ku dyondza Bibele ni wansati un’wana wa Muvietnam loyi a a tshama a ri ni gome. Sweswi u tshama a tsakile naswona u rhandza ku va kona evandlheni ra Vukreste.

Mina na Cheri hi kume nchumu lowu nga wa nkoka ku tlula ndhuma. Ku va eka tifilimi a swi tsakisa hikuva a swi hi endla hi duma kambe ku dyondzisa vanhu hi Yehovha Xikwembu swi hi nyika ntsako lowukulu ni ku eneriseka hikuva swi yisa ku dzuneka eka yena. Hakunene hi wu vonile ntiyiso wa marito ya Yesu lama nge: “Ku nyika swi tisa ntsako lowukulu ku tlula ku amukela.”—Mintirho 20:35.