Eric: Mina a ndzi munhu la rhandzaka swinene vukhongeri. Hikwalaho a ndzi voni ku ri ni swo tala leswi hi nga bulaka ha swona.

Brian: Ndzi tsakela ku tiva sweswo. Hi mina Brian. Ndzi nga tsakela ku ku tiva na wena.

Eric: Mina ndzi Eric.

Brian: Ndzi tsakela ku ku tiva Eric.

Eric: Na mina ndza tsaka ku ku tiva.

Brian: Ndzi kombela ku ku vutisa, xana u kulele endyangwini lowu rhandzaka vukhongeri?

Eric: Ina. Loko ndzi suka ekaya ndzi ya ekholichi ndzi tshike swa vukhongeri.

Brian: Ndza swi twisisa. U dyondzele yini ekholichi?

Eric: Tidyondzo to hambanahambana ni dyondzo ya matimu. I khale ndzi rhandza dyondzo ya matimu, ku nga ndlela leyi vanhu va nga ya va hluvuka ha yona ematin’wini hinkwawo.

Brian: Matimu wona ma tsakisa. Kambe tanihi loko u swi tiva, Bibele i buku ya matimu. Xana loko u ri karhi u endla ndzavisiso wa yi tirhisa Bibele?

Eric: E-e, ndza swi tiva leswaku i buku ya kahle, kambe a ndzi nga anakanyi leswaku i buku ya matimu.

Brian: U tikomba u ri munhu la tsakelaka ku tiva swo tala. Loko u ri ni nkarhinyana, ndzi nga tsakela ku ku komba swikombiso swi nga ri swingani swa matimu ya ntiyiso lama kumekaka eBibeleni.

Eric: U nga ndzi komba, kambe a ndzi na yona Bibele.

Brian: Hi swona, ndzi ta ku komba eka ya mina. Xikombiso xo sungula xi kumeka eka 1 Tikronika ndzima 29 tindzimana 26 na 27. Tindzimana teto ti ri: “Loko ku ri Davhida n’wana wa Yese, u fume tiko hinkwaro ra Israyele; masiku lawa a fumeke eIsrayele a ku ri malembe ya 40. Ehebroni u fume malembe ya nkombo, kasi eYerusalema u fume malembe ya 33.”

Eric: I xikombiso xa matimu lama tshembekaka hi ndlela yihi?

Brian: Kahlekahle, vakaneti va tshame va vula leswaku Hosi Davhida a nga si tshama a va kona.

Eric: Hakunene? Ha yini va kanakane vukona byakwe?

Brian: A ku ri ni vumbhoni byitsongo lebyi nga humiki eBibeleni lebyi kombisaka leswaku a a ri munhu wa xiviri. Hambiswiritano hi 1993, vayimburi va yimbule ribye ra khale swinene leri a ri ri ni marito lama nge, “Yindlu ya Davhida.”

Eric: I mhaka yo tsakisa.

Brian: Un’wana loyi a kumekaka eBibeleni loyi ku kanakaniweke vukona byakwe i Pontiyo Pilato, ndhunankulu leyi fumeke enkarhini wa Yesu. Ku vulavuriwe hi yena eka Luka ndzima 3, ndzimana 1 tanihi un’wana wa vatirhelamfumo va hi nkarhi wolowo. Ku ni mavito yo hlayanyana eka ndzimana leyi. Xana ku ni leri xiyekaka ngopfu?

Eric: Ina, ndza yi vona yi ri: “Loko Pontiyo Pilato a [a] ri ndhunankulu ya Yudiya, naswona Heroda [a] a ri mufumi wa muganga wa Galeliya.”

Brian: I ntiyiso. Se i malembe yo tala swidyondzi  swi ri karhi swi kanakana leswaku Pontiyo Pilato a a ri munhu wa xiviri. Malembe ya kwalomu ka 50 lama hundzeke, le Vuxa Xikarhi ku kumiwe ribye leri a ri kovotliwe vito rakwe hi ndlela leyi vonakaka eka rona.

Eric: Wa tiva, a ndzi si tshama ndzi twa vuxokoxoko byo tano.

Brian: Ndza tsaka ku bula na wena hi mhaka leyi.

Eric: Ku vula ntiyiso, i khale ndzi yi xixima Bibele kambe a ndzi nga ehleketi leswaku ya tirha ni le nkarhini wa hina. Yi nga ha va yi ri ni matimu lama tshembekaka, kambe a ndzi ehleketi leswaku yi ni nkoka wo karhi.

Brian: Vanhu vo tala va nga pfumelelana ni mhaka leyi. Kambe a ndzi pfumelelani na vona. Xivangelo hi leswaku, swilaveko swa nkoka swa hina vanhu a swi cincanga ku sukela eku sunguleni. Hi xikombiso, hi lava swakudya, swiambalo ni ndhawu yo tshama. Hi lava ku vulavurisana ni van’wana ni ku va ni mindyangu leyi tsakeke. Xana a hi ntiyiso leswaku hinkwerhu hi swi teka swi ri swa nkoka swilo sweswo?

Eric: I ntiyiso.

Brian: Bibele yi nga hi pfuna etimhakeni teto hinkwato. Hi nga yi vula buku ya khale kambe ya tirha ni le nkarhini wa hina.

Eric: U vula njhani?

Brian: Ndzi vula leswaku, Bibele yi ni milawu leyi ya ha tirhaka ni namuntlha hi ndlela leyi a yi tirha ha yona loko yi tsariwa madzana ya malembe lama hundzeke.

Eric: Yi tirha etimhakeni tihi?

Brian: Bibele yi nga hi kongomisa etimhakeni to va ni langutelo lerinene hi mali, ku va ni ndyangu lowu tsakeke kumbe ku va munghana lonene. Yi nga hi dyondzisa ndlela yo humelela evuton’wini. Hi xikombiso, xana a hi ntiyiso leswaku masiku lawa a swi olovi leswaku munhu a va wanuna ni nhloko ya ndyangu leyi humelelaka?

Eric: Swi tano, ndzi pfumelelana na wena emhakeni leyi. Mina ni nsati wa mina se hi ni lembe hi tekanile, naswona a hi minkarhi hinkwayo hi pfumelelanaka etimhakeni to karhi.

Brian: U tiyisile. Kambe Bibele yi ni milawu leyi nga tikiki leyi tirhaka. Hi xikombiso a hi hlaye Vaefesa ndzima 5 tindzimana 22, 23 na 28. Loko u swi tsakela u nga yi hlaya.

Eric: Swi lulamile. Yi ri: “Vavasati a va tiveke ehansi ka vanuna va vona hilaha va endlaka hakona eHosini, hikuva wanuna i nhloko ya nsati wakwe tanihi leswi Kreste na yena a nga nhloko ya vandlha, leswi yena a nga muponisi wa miri lowu.” Kutani ndzimana 28 yi ku: “Hi ndlela leyi vavanuna va fanele ku rhandza vasati va vona ku fana ni mimiri ya vona. Loyi a rhandzaka nsati wakwe wa tirhandza.”

Brian: Inkomu, u hlaye kahle. Xana a hi ntiyiso leswaku loko vatekani havambirhi va ringeta ku tirhisa xitsundzuxo lexi, lexi nga tikiki, vutomi bya ndyangu byi ta antswa?

Eric: Ina, ndzi tshemba tano. Kambe swa olova ku swi vula ku ri ni ku swi endla.

Brian: I ntiyiso, a ku na munhu la hetisekeke. Kahlekahle, eka ndzima yoleyo ya Bibele ku ni ndzimana leyi hi khutazaka ku va lava anakanyelaka. * Eka vuxaka byin’wana ni byin’wana ku laveka ku ringanisela ni ku titwananisa ni xiyimo. Mina ni nsati wa mina hi kume leswaku Bibele yi nga hi pfuna leswaku hi kota ku ringanisela.

Eric: Ndza swi twisisa.

Brian: Timbhoni ta Yehovha ti ni Web site leyi nga ni rungula lerinene malunghana ni vukati ni vutomi bya ndyangu. Loko u ri ni nkarhinyana ndzi nga ku komba swin’wana leswi yi nga na swona.

Eric: Swi lulamile. U nga ndzi komba.

Brian: Hi swona. Adirese ya Web site leyi i www.jw.org/ts. Hi leri tlukankulu.

Eric: Ndzi rhandza swifaniso leswi.

Brian: Sweswo i swiendlakalo swa ntirho wa hina wo chumayela lowu hi wu endlaka emisaveni hinkwayo. Aha, se hi fikile laha a ndzi lava kona. Ku ni xiyenge lexi nga ni nhlokomhaka leyi nge: “Leswi Nga Pfunaka Mimpatswa Ni Vatswari.” Ehansi ka nhlokomhaka leyi, ku ni swihlokwana swo hlayanyana leswi vulavulaka hi swiyimo swo hambanahambana. Xana ku ni lexi u tsakelaka leswaku hi bula ha xona.

 Eric: Ina. “Ku Tlhantlha Swiphiqo eVukatini Bya Wena.” Ndzi nga xi tsakela.

Brian: Xihloko lexi xi hlamusela tindlela ta mune to lulamisa swiphiqo. Xiya ndzimana leyi. Xana u nga tsakela ku yi hlaya?

Eric: Ina. Yi ri: “Tanihi leswi mbilu ni mahahu swi nga swa nkoka leswaku ngati yi kota ku endla ntirho wa yona, rirhandzu ni xichavo swa laveka leswaku ku vulavurisana ku va loku vuyerisaka evukatini.” Ndzi tsakisiwa hi ndlela leyi yi hlamuseriwaka ha yona.

Brian: Inkomu, u hlaye kahle. Ku ni tsalwa ra Bibele leri tshahiweke laha. U nga ri pfula hi ku tlika eka rona.

Eric: Oho, ndza ri vona. Vaefesa 5:33 yi ri: “Un’wana ni un’wana wa n’wina a a rhandze nsati wakwe hilaha a tirhandzaka hakona; hi hala tlhelo, wansati u fanele ku va ni xichavo xo enta eka nuna wakwe.”

Brian: Xana u swi xiyile leswaku ku kandziyisiwa ku nyika leswi un’wana a languteleke ku swi kuma?

Eric: A ndzi swi twisisi leswi u swi vulaka.

Brian: I nge ndzi ku vutisa, xana a hi ntiyiso leswaku wanuna u lava ku xiximiwa hi nsati wa yena, kasi wansati u lava ku tiyisekisiwa hi nuna wakwe leswaku wa n’wi rhandza hakunene?

Eric: I ntiyiso, ndzi pfumelelana na swona sweswo.

Brian: Loko wanuna a tshamela ku lava tindlela to kombisa rirhandzu eka nsati wa yena, xana a swi nge n’wi oloveli wansati ku kombisa xichavo eka nuna wa yena?

Eric: Sweswo swi tikomba swi ta tirha.

Brian: Hikwalaho, tsalwa leri ra le Bibeleni, hambiloko ri tsariwe 2 000 wa malembe lama hundzeke, ri vulavula hi swilaveko swa vatekani havambirhi evukatini naswona ri nyikela xitsundzuxo lexi tirhaka, lexi loko xi tirhisiwa xi pfunaka hakunene. Hilaha xikombiso lexi hi xi hlayeke laha henhla xi vuleke hakona, “mbilu ni mahahu” ya vukati swi ta tshama swi hlayisekile.

Eric: Ndza pfumela hakunene leswaku ku ni swo tala eBibeleni ku tlula leswi a ndzi swi anakanya.

Brian: Ndza tsaka ku twa sweswo, Eric. Ndzi ta tsakela ku va hi tlhela hi hlangana kwala leswaku ndzi ta twa mavonelo ya wena hi xihlokwana lexi nge: “Magoza Ya Mune Yo Lulamisa Swiphiqo,” lexi nga eka xihloko lexi eka Web site ya hina. *

Eric: Swi lulamile. Mina ni nsati wa mina hi ta xi kambisisa.