NHLOKO-MHAKA YA XIFUNENGETO: HA YINI KU RI NI KU XANISEKA KONGHASI? XANA KU TA HELA RINI?
Ku Fa Ka Vanhu Vo Tala Lava Nga Riki Na Nandzu!
Noelle a a ri n’wana la rhandzekaka loyi a a rhandza ku dirowa. Siku rin’wana nimadyambu hi ximumu, u fambe a ri yexe a ya endzhaku ka yindlu kutani a wela edan’wini ro hlambela ra le kaya ka vona. Loko a nwela a ku sale mavhiki mambirhi leswaku a va ni malembe ya mune.
Charlotte, Daniel, Olivia, Josephine . . . Lawa i mavito ya vana van’wana va 20 lava nga ni malembe ya tsevu kumbe ya nkombo lava hinkwavo ka vona loko va helerile va endlaka 26 lava duvuriweke va fa exikolweni xa le Connecticut, le U.S.A., hi December 14, 2012. Eka ntirho wa ku va tsundzuka, Presidente Obama u vule mavito ya vana lava kutani a byela ntshungu lowu a wu ri ni gome a ku: “Makhombo yo fana ni lawa ma fanele ma hela.”
Bano loyi a nga ni malembe ya 18 u suke eIraq hi 1996 kutani a rhurhela eNorway ni ndyangu wa ka vona. Vanghana va yena a va n’wi vitana hi vito leri nge Sun Rays, leswi vulaka ku vonakala ka dyambu. Hambiswiritano, lexi twisaka ku vava, hi July 22, 2011, Bano a a ri un’wana wa vanhu va 77 lava dlayiweke hi munhu loyi a hisekelaka tlhelo loyi a tibumeke a ku: “Ndza tisola . . . hileswi ndzi tsandzekeke ku va dlaya va tele.”
Timhaka leti fanaka leti tshovaka mbilu ti vikiwa hi ku phindha-phindha emisaveni hinkwayo. Anakanya hi gome ni ku vava loku veke kona hikwalaho ka timhangu, vugevenga, tinyimpi, vutherorisi, timhangu ta ntumbuluko ni makhombo man’wana. Vanhu vo tala lava nga riki na nandzu va dlayiwile kumbe va xanisiwa ku nga ri na xivangelo!
Vanhu van’wana va sola Xikwembu, va vula leswaku Muvumbi wa hina a nga khathali hi vanhu. Van’wana va gimeta hi ku vula leswaku Xikwembu xa ku vona ku xaniseka ka hina kambe xo ku ba hi makatla. Van’wana va vula leswaku makhombo yo tano ya kunguhatiwe ka ha ri emahlweni. Swi tikomba ku ri ni mavonelo yo tala malunghana ni mhaka leyi. Xana hi nga ti kuma kwihi tinhlamulo leti tshembekaka ni leti enerisaka? Eka swihloko leswi landzelaka hi ta kambisisa Rito ra Xikwembu, ku nga Bibele, leswaku hi kuma tinhlamulo ta leswi vangaka ku xaniseka ni ndlela leyi ku nga ta herisiwa ha yona.
