XANA hakunene Yesu u hanye vutomi lebyi nga ni xikongomelo? Entiyisweni, u kuriseriwe endhawini leyi a va nga fuwanga naswona a va nga ri na nhundzu yo tala. Kahle-kahle a a “nga [ri] na ndhawu yo veka nhloko yakwe.” (Luka 9:57, 58) Ku engetela kwalaho, a a vengiwa, a lumbetiwa naswona eku heteleleni u dlayiwe hi valala vakwe.

U nga ha anakanya u ku, ‘Vutomi byebyo a hi lebyi ndzi vonaka byi ri ni xikongomelo!’ Kambe ka ha ri ni swin’wana leswi hi faneleke hi swi xiya hi vutomi bya Yesu. A hi kambisiseni swilo swa mune hi vutomi byakwe.

“Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.”—Yohane 4:34.

Hi marito yakwe ni swiendlo, Yesu a a tikarhatela ku hetisisa ku rhandza ka Tata wakwe wa le tilweni, ku nga Yehovha. * Yesu u kume ntsako lowukulu hi ku endla ku rhandza ka Xikwembu. Entiyisweni, u swi fanise ni swakudya, hilaha swi kombisiweke hakona eka tsalwa leri ra ha ku tshahiwaka. Xiya swiyimo leswi a endleke xifananiso xexo eka swona.

Yesu u vule marito wolawo loko ku lava ku va nhlikanhi. (Yohane 4:6) A a fambe hi le swintshabyanini swa Samariya mixo hinkwawo kutani swi le rivaleni leswaku a a twa ndlala. Entiyisweni, vadyondzisiwa vakwe a va n’wi kombele va ku: “Rabi, dyana.” (Yohane 4:31) Nhlamulo yakwe yi kombise leswaku a titwa a xurhile ni ku va ni matimba hikwalaho ko endla ntirho wa Xikwembu. Xana sweswo a swi twali swi fambisana ni wanuna loyi a a ri ni xikongomelo evuton’wini?

“Ndza n’wi rhandza Tatana.”—Yohane 14:31.

Yesu a a ri ni vuxaka bya le kusuhi ni Tata wakwe wa le tilweni. Rirhandzu ra Yesu eka Xikwembu ri n’wi susumetele leswaku a twarisa hi Tata wakwe—vito Rakwe, swikongomelo ni timfanelo. Yesu u tekelele Tata wakwe hi ku helela hi marito, swiendlo ni malangutelo—lerova loko hi hlaya hi Yesu swi fana ni loko hi hlaya hi Tata wakwe. Xisweswo, loko Filipi a kombele Yesu a ku: “Hi kombe Tatana,” Yesu u hlamule a ku: “Loyi a ndzi voneke u vone na Tatana.”—Yohane 14:8, 9.

Yesu a a rhandza Tata wakwe swinene lerova a tiyimisele ku n’wi yingisa kukondza a fa. (Vafilipiya 2:7, 8; 1 Yohane 5:3) Rirhandzu ro tano eka Xikwembu ri endle leswaku Yesu a va ni xikongomelo evuton’wini.

“A nga kona la nga ni rirhandzu ro tlula leri, ra leswaku munhu a nyiketa moya-xiviri wakwe hikwalaho ka vanakulobye.”—Yohane 15:13.

A swi kanakanisi leswaku ntshembo wa hina wa vumundzuku tanihi vanhu lava nga hetisekangiki a wu tsakisi. Bibele yi ri: ‘Xidyoho xi nghene emisaveni hi munhu un’we [Adamu], ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.’ (Varhoma 5:12) Hi nge swi koti ku balekela vuyelo bya xidyoho, ku nga rifu.—Varhoma 6:23.

Lexi tsakisaka hi leswaku Yehovha u nyike vanhu ntlhantlho wa xiyimo lexi va nga eka xona. U pfumelele leswaku N’wana wakwe loyi a hetisekeke loyi ku nga Yesu a xaniseka ni ku fa leswaku a ta va nkutsulo lowu lavekaka ku ponisa vanhu eka vuhlonga bya xidyoho ni rifu. Hikwalaho ko susumetiwa hi rirhandzu leri a ri na rona eka Tata wakwe ni vanhu, Yesu u nyikele vutomi byakwe lebyi hetisekeke hi ku swi rhandza hikwalaho ka hina. (Varhoma 5:6-8) Rirhandzu ro tano leri pfumalaka vutianakanyi ri endle leswaku vutomi byakwe byi va ni xikongomelo. *

“Loyi i N’wananga, la rhandzekaka, loyi ndzi n’wi amukeleke.”—Matewu 3:17.

Yehovha u vule marito wolawo a ri etilweni hi nkarhi lowu Yesu a a ri eku khuvuriweni. Xisweswo, Yehovha u swi kombise erivaleni leswaku wa n’wi rhandza N’wana wakwe, ku nga Yesu naswona wa n’wi amukela. A swi hlamarisi leswi Yesu a vuleke a nga tipfinyingi a ku: ‘Tatana wa ndzi rhandza.’ (Yohane 10:17) Hi ku tiva leswaku Tata wakwe wa n’wi rhandza naswona wa n’wi amukela, Yesu u ve ni xivindzi xa ku tiyisela ku kanetiwa ni ku hlekuriwa. Rirhandzu leri ri endle leswaku Yesu a kota ku langutana ni rifu. (Yohane 10:18) Leswi Yesu a a swi tiva leswaku Tata wakwe wa n’wi rhandza naswona wa n’wi amukela, swi endle leswaku vutomi byakwe byi va ni xikongomelo.

Swi le rivaleni leswaku vutomi bya Yesu a byi ri ni xikongomelo. I ntiyiso leswaku hi nga dyondza swo tala eka yena malunghana ni ndlela leyi ha yona hi nga kotaka ku hanya vutomi lebyi nga ni xikongomelo. Xihloko lexi landzelaka xi ta kambisisa ndzayo yin’wana leyi Yesu a yi nyikeke valandzeri vakwe malunghana ni ndlela leyi va faneleke va hanya ha yona.