Swivutiso Swa Vahlayi . . .

Xana Misava Yi Ta Pona Hi 2012?

▪ “Vanhu vo tala va ye eximutanini xin’wana xa le Furwa hi ku tshemba leswaku misava yi le kusuhi ni ku hela . . . Va kholwa leswaku misava yi ta hela hi ti-21 ta December 2012, ku nga makumu ya malembe ya 5 125 eka khalendara ya khale ya Vamaya.”—BBC News.

Ku nga khathariseki ku vhumbha ka varhangeri va vukhongeri lava byelaka vanhu leswaku misava yi ta hela, vanhu lava tivulaka van’wasayense ni vanhu va lembe-xidzana ra vu-21 lava vhumbhaka leswi nga ta endleka enkarhini lowu taka, a hi fanelanga hi va tshemba hikuva misava yi ta va kona ku ringana nkarhi wo leha. Ina, misava yi ta pona hi 2012. Kahle-kahle, pulanete ya Misava, yi ta va kona hilaha ku nga heriki.

Bibele yi hi byela leswi: “Xitukulwana xa hundza, xitukulwana xa ta; kambe misava yi kona hilaha ku nga riki na makumu.” (Eklesiasta 1:4) Nakambe, xiya marito lama vuriwaka eka Esaya 45:18, yi ri: “Hikuva Yehovha, . . . Muvumbi wa misava ni Muendli wa yona, Yena Loyi a yi simekeke yi tiya, loyi a nga yi tumbuluxelangiki swa hava, loyi a yi vumbeke leswaku ku akiwa eka yona, u te: ‘Hi mina Yehovha, a ku na un’wana.’”

Xana tatana la nga ni rirhandzu a nga heta tiawara to tala a ri karhi a endlela n’wana wakwe wa jaha thoyi ya byatso leswaku a n’wi tsakisa kumbe a endlela n’wana wakwe wa nhwana thoyi ya yindlu leswaku a n’wi tsakisa, ivi endzhaku ka ku n’wi nyika yona a yi onha? Sweswo ku ta va ku ri tihanyi! Hilaha ku fanaka, Xikwembu xi vumbe misava ngopfu-ngopfu leswaku swivumbiwa leswi nga vanhu swi tiphina eka yona. Xikwembu xi byele mpatswa wo sungula, ku nga Adamu na Evha, xi ku: “Tswalanani mi andza, mi tata misava, mi yi fuma.” Endzhaku ka sweswo, “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.” (Genesa 1:27, 28, 31) Xikwembu a xi xi rivalanga xikongomelo xa xona hi misava; a xi nge pfumeli leswaku misava yi lovisiwa. Malunghana ni switshembiso swakwe hinkwaswo, Yehovha u te: “A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 55:11.

Hambiswiritano, ku rhandza ka Yehovha i “ku lovisa lava onhaka misava.” (Nhlavutelo 11:18) ERitweni rakwe, u tshembisa leswi: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—Swivuriso 2:21, 22.

Xana leswi swi ta endleka rini? A ku na munhu la swi tivaka. Yesu u te: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi etilweni hambi ku ri N’wana, kambe swi tiviwa hi Tatana.” (Marka 13:32) Timbhoni ta Yehovha a ti ringeti ku vhumbha nkarhi lowu Xikwembu xi nga ta lovisa vanhu lavo biha ha wona. Hambileswi ti xalamukeleke “xikombiso” xa makumu ni ku tshemba leswaku vanhu va hanya “emasikwini yo hetelela” ya le Bibeleni, a ti swi tivi hi ku kongoma leswaku “makumu” ma ta fika rini. (Marka 13:4-8, 33; 2 Timotiya 3:1) Ta swi twisisa leswaku Tata wa tona wa le tilweni ni N’wana wakwe hi vona va swi tivaka leswaku makumu ma ta fika rini.

Enkarhini wa sweswi, Timbhoni ta Yehovha ti khomeke hi ku chumayela mahungu lamanene ya Mfumo wa Xikwembu, ku nga hulumendhe ya le tilweni leyi nga ta fuma ni ku hundzula pulanete ya Misava yi va paradeyisi ya ku rhula, leyi eka yona “lavo lulama va [nga] ta dya ndzhaka ya misava.”—Pisalema 37:29.

[Laha Xifaniso Xi Humaka Kona eka tluka 10]

Image Science and Analysis Laboratory, NASA-Johnson Space Center