Dyondza Eka Rito Ra Xikwembu

Hi Xihi Xikongomelo Xa Xikwembu Hi Misava?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Hi xihi xikongomelo xa Xikwembu hi misava?

Misava i kaya ra vanhu. Endzhaku ko vumba tintsumi leswaku ti tshama etilweni, Xikwembu xi vumbe vanhu leswaku va ta tiphina laha misaveni. (Yobo 38:4, 7) Xisweswo, Yehovha u veke munhu wo sungula eparadeyisini yo saseka leyi vitaniwaka Edeni kutani a n’wi nyika ntshembo wo hanya hilaha ku nga heriki laha misaveni, yena swin’we ni vatukulu lava a a ta va na vona.—Genesa 2:15-17; hlaya Pisalema 115:16.

Ntanga wa Edeni a ko va xiphemunyana xa misava. Mpatswa wo sungula, ku nga Adamu na Evha, a wu ta va ni vana. Loko vanhu va ya va andza, a va ta khathalela misava kutani va yi endla paradeyisi. (Genesa 1:28) Misava a yi nge pfuki yi lovisiwile.—Hlaya Pisalema 104:5.

2. Ha yini misava yi nga ri paradeyisi sweswi?

Adamu na Evha a va xi yingisaka Xikwembu, kutani va hlongoriwile aEdeni. Paradeyisi yi lahlekile naswona ku hava munhu la koteke ku yi vuyetela. Bibele yi ri: “Misava yi vekiwe evokweni ra lowo homboloka.”—Yobo 9:24; hlaya Genesa 3:23, 24.

Kambe Yehovha a nga xi rivalanga xikongomelo xakwe xo sungula hi vanhu naswona a nge tsandzeki ku xi hetisisa. (Esaya 45:18) U ta endla leswaku vanhu va va leswi eku sunguleni a a lava leswaku va va swona.—Hlaya Pisalema 37:11.

3. Xana Xikwembu xi ta ku vuyetela njhani ku rhula emisaveni?

Leswaku vanhu va tiphina hi ku rhula, Xikwembu xi fanele xi rhanga xi lovisa vanhu vo homboloka. Enyimpini ya Armagedoni, tintsumi ta Xikwembu ti ta lovisa hinkwavo lava kanetaka Xikwembu. Sathana u ta pfaleriwa malembe ya 1 000, kambe vanhu lava rhandzaka Xikwembu va ta pona leswaku va tiphina hi swilo leswintshwa emisaveni.—Hlaya Nhlavutelo 16:14, 16; 20:1-3; 21:3, 4.

  4. Xana ku xaniseka ku ta hela rini?

Hi nkarhi wa malembe ya gidi, Yesu u ta fuma misava a ri etilweni naswona u ta vuyetela paradeyisi. Nakambe u ta herisa swidyoho swa lava rhandzaka Xikwembu. Xisweswo, Yesu u ta herisa vuvabyi, ku dyuhala ni rifu.—Hlaya Esaya 11:9; 25:8; 33:24; 35:1.

Xana Xikwembu xi ta byi herisa rini vubihi laha misaveni? Yesu u nyikele “xikombiso” lexi nga ta kombisa loko makumu ma ri ekusuhi. Swiyimo swa misava leyi, leswi xungetaka vutomi bya vanhu swi kombisa leswaku sweswi hi hanya ‘emakumu ka mafambiselo ya swilo.’—Hlaya Matewu 24:3, 7-14, 21, 22; 2 Timotiya 3:1-5.

5. I vamani lava nga ta hanya eParadeyisini ya nkarhi lowu taka?

Yesu u lerise valandzeri vakwe leswaku va endla vadyondzisiwa ni ku va dyondzisa tindlela ta Xikwembu ta rirhandzu. (Matewu 28:19, 20) Emisaveni hinkwayo, Yehovha u pfuna vanhu va timiliyoni leswaku va ta hanya emisaveni leyintshwa. (Sofaniya 2:3) ETiholweni ta Mfumo ta Timbhoni ta Yehovha, vanhu va dyondza ndlela yo va vanuna lavanene, vatatana lavanene, vasati lavanene ni vamanana lavanene. Vana ni vatswari va dyondzisiwa tidyondzo leti nga ta va pfuna leswaku va kholwa leswaku swiyimo swi ta cinca hi ku famba ka nkarhi.—Hlaya Mikiya 4:1-4.

EHolweni ya Mfumo, u ta hlangana ni vanhu lava rhandzaka Xikwembu ni lava lavaka ku dyondza ku xi tsakisa.—Hlaya Vaheveru 10:24, 25.

Leswaku u kuma rungula leri engetelekeke, vona ndzima 3 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.