XANA u tshame u byeriwa xihundla?— * Ku na xin’wana lexi ndzi lavaka ku ku byela xona. EBibeleni xi vitaniwa “xihundla xo kwetsima lexi tshameke xi ri xihundla ku sukela khale ka khaleni.” (Varhoma 16:25) Eku sunguleni i Xikwembu ntsena lexi a xi tiva “xihundla xo kwetsima.” A hi kambisise leswi Xikwembu xi swi endleke leswaku xihundla lexi xi tiviwa hi vanhu vo tala.

Xo sungula, xana wa swi tiva leswaku rito leri nge “kwetsima” ri vula yini?— Ri vula ku basa kumbe ku hlawuleka swinene. Kutani xihundla xi vitaniwa xihundla xo kwetsima hikuva xi huma eka Xikwembu, lexi kwetsimaka. U ehleketa leswaku i vamani lava a va lava ku tiva xihundla lexi xo hlawuleka?— I tintsumi. Bibele yi ri: “Tintsumi ti navela ku nyangisisa swona swilo leswi.” A ti lava ku twisisa xihundla lexi xo kwetsima.—1 Petro 1:12.

Loko Yesu a ta emisaveni, u vulavule hi xihundla xo kwetsima a tlhela a xi hlamusela. U byele vadyondzisiwa vakwe a ku: “N’wina mi nyikiwe xihundla xo kwetsima xa mfumo wa Xikwembu.” (Marka 4:11) Xana u swi xiyile leswaku i yini xihundla xo kwetsima?— I Mfumo wa Xikwembu, lowu Yesu a hi dyondziseke leswaku hi wu khongelela!—Matewu 6:9, 10.

Sweswi a hi kambisise leswi endleke leswaku Mfumo wa Xikwembu wu tshama wu ri xihundla “ku sukela khale ka khaleni,” kukondza Yesu a ta emisaveni kutani a wu hlamusela. Endzhaku ka loko Adamu na Evha va tlule nawu wa Xikwembu kutani va hlongoriwa entangeni wa Edeni, malandza ya Xikwembu ma sungule ku xiya leswaku xa ha ta ya emahlweni xi endla misava hinkwayo yi va paradeyisi. (Genesa 1:26-28; 2:8, 9; Esaya 45:18) Ma tsale hi ntsako lowu vanhu a va ta va na wona emisaveni ehansi ka Mfumo wa Xikwembu.—Pisalema 37:11, 29; Esaya 11:6-9; 25:8; 33:24; 65:21-24.

Sweswi anakanya hi Mufumi wa Mfumo wa Xikwembu. Xana wa swi tiva leswaku i mani loyi Xikwembu xi n’wi hlawuleke leswaku a va Mufumi?— I N’wana wa xona, “Hosana ya Ku Rhula,” ku nga Yesu Kreste. Bibele yi ri: “Ku fuma ka vuhosana ku ta va ekatleni ra yena.” (Esaya 9:6, 7) Mina na wena hi fanele hi nghenisa “vutivi . . . bya xihundla xo kwetsima xa Xikwembu, ku nga Kreste.” (Vakolosa 2:2) Hi fanele hi swi tiva leswaku Xikwembu xi teke vutomi bya ntsumi yo sungula (N’wana wa moya) leyi xi yi vumbeke kutani xi byi nghenisa ekhwirini ra Mariya. N’wana yoloye, loyi a a ri ntsumi ya matimba, Xikwembu xi n’wi rhumele emisaveni tanihi xitlhavelo leswaku hi ta kuma vutomi lebyi nga heriki.—Matewu 20:28; Yohane 3:16; 17:3.

Kambe ku ni swo tala leswi hi faneleke hi swi tiva malunghana ni xihundla lexi ku tlula ku tiva leswaku Xikwembu xi hlawule Yesu leswaku a va Mufumi wa Mfumo wa xona. Xin’wana lexi katsekaka eka  xihundla xo kwetsima hileswaku ku ni vavanuna ni vavasati lava nga ta fuma na Yesu etilweni!—Vaefesa 1:8-12.

A hi buleni hi mavito ya van’wana lava nga ta fuma na Yesu etilweni. Yesu u byele vaapostola vakwe vo tshembeka leswaku u ya etilweni a ya va lunghiselela ndhawu. (Yohane 14:2, 3) Loko u hlaya matsalwa lama nga laha hansi, u ta vona mavito ya vavanuna ni vavasati va nga ri vangani lava nga ta fuma na Yesu eMfun’weni wa Tata wakwe.—Matewu 10:2-4; Marka 15:39-41; Yohane 19:25.

Ku hundze malembe swi nga si tiveka leswaku i vangani lava nga ta fuma na Yesu eMfun’weni wakwe wa le tilweni. Kambe sweswi ha yi tiva nhlayo ya vona. Xana wa yi tiva?— Bibele yi vula leswaku i 144 000. Nhlayo leyi na yona i xihundla xo kwetsima.—Nhlavutelo 14:1, 4.

Xana wa pfumela leswaku “xihundla xo kwetsima xa mfumo wa Xikwembu” i xihundla xo saseka swinene lexi un’wana ni un’wana a faneleke a xi tiva?— Kutani a hi endle leswi hi nga swi kotaka leswaku hi dyondza swo tala hi xona leswaku hi ta xi hlamusela vanhu vo tala hilaha hi nga kotaka hakona.