Xivumbiwa Lexi Hi Faneleke Hi Vulavula Na Xona eXivandleni Xa Moya

XIKWEMBU XA MATIMBA HINKWAWO xi byarhise swivumbiwa swin’wana swa moya vutihlamuleri byo karhi. Hi xikombiso, xi nyike Yesu Kreste vutihlamuleri byo fuma misava naswona xi hlawule tintsumi ta xona to tshembeka leswaku ti kongomisa ntirho wo chumayela mahungu lamanene. (Nhlavutelo 14:6) Kambe a swi tano hi xikhongelo. A xi byi nyikanga munhu vutihlamuleri byo yingisa swikhongelo. Swikhongelo swa hina hi fanele hi swi kongomisa eka Xikwembu ntsena.

Yehovha i “Mutwi wa xikhongelo.” (Pisalema 65:2) U yingisa swikhongelo swa hina naswona wa swi hlamula. Malunghana ni Xikwembu, muapostola Yohane u tsalele malandza ya Yehovha a ku: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, [Xikwembu] xa hi twa. Ku tlula kwalaho, loko hi tiva leswaku xa hi twa malunghana ni xin’wana ni xin’wana lexi hi xi kombelaka, ha swi tiva leswaku hi ta swi kuma swilo leswi hi swi kombelaka tanihi leswi hi swi kombelaka eka xona.”—1 Yohane 5:14, 15.

Tintsumi to tshembeka a ti swi lavi leswaku hi vulavula na tona kumbe hi khongela eka tona. Ta swi twisisa naswona ti tirhisana ni Xikwembu loko swi ta elunghiselelweni ra xikhongelo, hikuva minkarhi yin’wana ta katseka. Hi ndlela yihi? Loko muprofeta Daniyele a khongela eka  Yehovha malunghana ni ku lovisiwa ka muti wa Yerusalema, Xikwembu xi hlamule xikhongelo xakwe hi ku rhumela ntsumi Gabriyele ni rungula leri khutazaka.—Daniyele 9:3, 20-22.

Mahungu Lama Humaka Eka Vafi

Xana hi fanele hi vulavula ni vanhu lava feke? Ku ni switori swo tala swa vanhu lava ku vuriwaka leswaku va tshame va vulavula ni vanhu lava feke. Hi xikombiso, wansati un’wana wa le Ireland u endzeriwe hi mungoma loyi a nga fika a n’wi byela leswaku matolo a a bula ni nuna wakwe Fred, loyi o va ni mavhiki ma nga ri mangani a lovile. Mungoma yoloye, u vule leswi Fred a n’wi byeleke swona, naswona nsati wa Fred a a ehleketa leswaku timhaka leti to tiviwa hi yena ntsena. A swi ta olova leswaku wansati yoloye a ehleketa leswaku nuna wakwe Fred wa hanya exivandleni xa moya naswona u ringeta ku vulavula na yena hi ku tirhisa mungoma loyi. Ku tshemba mhaka leyi swi lwisana ni leswi Bibele yi swi dyondzisaka malunghana ni xiyimo xa vafi.—Vona bokisi leri nga laha hansi.

Xana switori swa mixaka leyi swi nga hlamuseriwa njhani? Ndlela yin’wana leyi madimona ma va kanganyisaka ha yona vanhu i ku tifanisa ni munhu la feke, hilaha swi veke hakona emhakeni ya Fred. Hi xihi xikongomelo xa wona? I ku endla leswaku vanhu va nga swi tshembi leswi Bibele yi swi dyondzisaka, ku tsanisa ripfumelo ra vona nileswaku va nga n’wi tshembi Yehovha. Swi le rivaleni leswaku Sathana ni madimona yakwe va hambukisa vanhu hi “mintirho hinkwayo ya matimba hi mahlori ya mavunwa ni swihlamariso ni hi vuxisi hinkwabyo lebyi nga lulamangiki eka lava va lovaka.”—2 Vatesalonika 2:9, 10.

Vangoma swin’we ni vanhu lava tirhisanaka  na vona va vula leswaku va swi kota ku vulavula ni vanhu lava feke. Loko hakunene va swi kota, va vulavula ni mimoya leyi lwisanaka na Yehovha. Hilaha ku fanaka, ku ni vanhu lava hi xihoxo va tibyelaka leswaku va gandzela Xikwembu. Muapostola Pawulo u huhuteriwe ku nyikela xitsundzuxo lexi nga biki mariri, lexi nge: “Swilo leswi matiko ma swi endlaka switlhavelo ma swi tlhavela madimona, hayi Xikwembu.”—1 Vakorinto 10:20, 21.

Loko hi swi tiva leswaku hi nga khongela eka Xikwembu Lexi Tlakukeke, lexi hi rhandzaka naswona xi khathalaka hi hina, i yini lexi nga ta hi susumetela ku khongela eka xikwembu xin’wana? Hambi ku ri Bibele yi hi tiyisekisa yi ku: “Loko ku ri Yehovha, mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.”—2 Tikronika 16:9.

[Marito lama tshahiweke exihlokweni lama nga eka tluka 9]

Loko hi swi tiva leswaku hi nga khongela eka Xikwembu Lexi Tlakukeke, lexi hi rhandzaka naswona xi khathalaka hi hina, i yini lexi nga ta hi susumetela ku khongela eka xikwembu xin’wana?

[Bokisi/Xifaniso lexi nga eka tluka 8, 9]

Ntiyiso Ni Mavunwa

NTIYISO: SATHANA I MUNHU WA XIVIRI

“Sathana hi byakwe u tihundzula ntsumi ya ku vonakala.”—2 Vakorinto 11:14.

“Hlayisani mianakanyo ya n’wina leyi hlutekeke, mi hiteka. Xirha xa n’wina, Diyavulosi, xa famba-famba ku fana ni nghala leyi vombaka, yi lava wa ku n’wi dya.”—1 Petro 5:8.

“Loyi a tamaka a endla xidyoho u huma eka Diyavulosi, hikuva Diyavulosi a a dyoha ku sukela eku sunguleni.”—1 Yohane 3:8.

“Hikwalaho, tivekeni ehansi ka Xikwembu; kambe mi kaneta Diyavulosi, kutani u ta mi balekela.”—Yakobo 4:7.

“Diyavulosi . . . a a ri mudlayi wa vanhu ku sukela eku sunguleni, naswona a nga yimanga a tiyile entiyisweni, hikuva ntiyiso a wu kona eka yena. Loko a vulavula vunwa, u vulavula hi ku landza mboyamelo wa yena, hikuva i muhembi ni tata wa mavunwa.”—Yohane 8:44.

MAVUNWA: LOKO HINKWERHU HI FA HI YA EXIVANDLENI XA MOYA

“U ta dya xinkwa hi nyuku wa xikandza xa wena kukondza u tlhelela emisaveni hikuva u humesiwe eka yona. Hikuva u ntshuri u ta tlhelela entshurini.”—Genesa 3:19.

“Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.”—Eklesiasta 9:5.

“Hinkwaswo leswi voko ra wena ri swi kumaka leswaku ri swi endla, swi endle hi matimba ya wena, hikuva a ku na ntirho hambi ku ri kungu, vutivi kumbe vutlhari eSheol [esirheni], ndhawu leyi u yaka eka yona.”—Eklesiasta 9:10.

“Moya wakwe wa huma, a tlhelela entshurini wa yena; hi siku rero miehleketo yakwe ya lova.”—Pisalema 146:4.

NTIYISO: TINTSUMI TO TSHEMBEKA TA KHATHALA HI HINA

“Ntsumi ya Yehovha yi aka nxaxa ku rhendzela hinkwavo lava n’wi chavaka, naswona ya va ponisa.”—Pisalema 34:7; 91:11.

“Xana [tintsumi] hinkwato a hi mimoya ya ntirho wa le rivaleni, leyi rhumiweke ku ya tirhela lava nga ta dya ndzhaka ya ku ponisiwa?”—Vaheveru 1:14.

“Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo, yi vula hi rito lerikulu yi ku: ‘Chavani Xikwembu mi xi vangamisa.’”—Nhlavutelo 14:6, 7.

MAVUNWA: YESU U RINGANA NI XIKWEMBU

“Ndzi lava mi tiva leswaku nhloko ya wanuna un’wana ni un’wana i Kreste; kasi nhloko ya wansati i wanuna; kasi nhloko ya Kreste i Xikwembu.”—1 Vakorinto 11:3.

“Loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka xona lexi vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.”—1 Vakorinto 15:28.

“Ndzi tiyisile ndzi ri eka n’wina, N’wana a nge endli xilo ni xin’we hi ku tisungulela, kambe u endla ntsena lexi a vonaka Tatana a xi endla.”—Yohane 5:19.