Kombisa Ku Tlangela Ku Hanana Ka Yehovha

TLANGA

YEHOVHA i Xikwembu lexi hananaka. (Yakobo 1:17) Ku hanana ka yena hi ku vona eka swilo hinkwaswo leswi a swi tumbuluxeke. Matilo u ma tate hi tinyeleti, kasi misava u yi funengete hi swimilana swo saseka.—Pisalema 65:12, 13; 147:7, 8; 148:3, 4.

Mutsari wa Pisalema 104 u n’wi khense swinene Yehovha hikwalaho ka swilo leswi a swi tumbuluxeke lerova u tsale risimu ro n’wi dzunisa. Loko u hlaya pisalema yoleyo, xana na wena u titwa hilaha mupisalema a titweke ha kona? U te: “Ndzi ta yimbelelela Yehovha evuton’wini bya mina hinkwabyo; ndzi ta yimbelelela Xikwembu xanga miloti loko ntsena ndza ha ri kona.” (Pisalema 104:33) Xana na wena u lava ku endla leswi fanaka?

XIKOMBISO LEXIKULU XA KU HANANA

Yehovha u lava leswaku hi tekelela ku hanana ka yena. Naswona u hi nyike swivangelo leswinene swo va hi hanana. U huhutele muapostola Pawulo ku tsala a ku: “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina. Va endla leswinene, va fuwa hi mintirho leyinene, va hanana, va tiyimisela ku avelana ni van’wana, va tivekela hi ku hlayiseka masungulo lamanene ya nkarhi lowu taka, leswaku va ta khomelela swinene evuton’wini bya xiviri.”—1 Timotiya 6:17-19.

Epapileni rakwe ra vumbirhi leri yaka eka Vakorinto, Pawulo u hlamusele xikongomelo lexi hi faneleke hi va na xona loko hi nyika van’wana. U te: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) I mani loyi hi n’wi pfunaka loko hi hanana? Pawulo u vule leswaku hi pfuna van’wana loko hi va nyika leswi va swi pfumalaka, kambe hi tlhela hi tipfuna hikuva Yehovha u ta hi katekisa.—2 Vakorinto 9:11-14.

Endzhaku Pawulo u kombetele eka xikombiso lexikulu xa ku hanana ka Xikwembu loko a ku: “A ku nkhensiwe Xikwembu hikwalaho ka nyiko ya xona ya mahala leyi nga hlamuselekiki.” (2 Vakorinto 9:15) ‘Nyiko ya mahala’ ya Yehovha yi katsa swilo hinkwaswo leswinene leswi a hi nyikaka swona hi ku tirhisa Yesu Kreste. Nyiko ya kona i ya nkoka swinene.

Hi nga swi kombisa njhani leswaku ha swi nkhensa hinkwaswo leswi Yehovha na Yesu va hi endleleke swona ni leswi va nga ta hi endlela swona? Ndlela yin’wana i ku va hi hanana hi nkarhi, matimba ni hi swilo leswi vonakaka loko hi gandzela Yehovha ni loko hi pfuna van’wana leswaku va dyondza hi yena. Hi nga endla leswi ku nga khathariseki leswaku hi ni swo tala kumbe leswitsongo.—1 Tikronika 22:14; 29:3-5; Luka 21:1-4.

Tindlela Leti Van’wana Va Hlawulaka Ku Nyikela Ha Tona Eka Ntirho Wa Misava Hinkwayo

Ku fana ni Vakreste lava hanyeke hi minkarhi ya vaapostola, vo tala namuntlha va veka mali yo karhi leswaku va ta nyikela ha yona eka ntirho wa misava hinkwayo emabokisini ya le mavandlheni ya vona. (1 Vakorinto 16:2) N’hweti ni n’hweti mavandlha ma rhumela minyikelo yoleyo ehofisini ya Timbhoni ta Yehovha leyi langutelaka tiko ra wona. Nakambe swa koteka ku rhumela minyikelo hi ku kongoma eka vandla ra swa nawu leri tirhisiwaka hi Timbhoni ta Yehovha ta le tikweni ra ka n’wina. Leswaku u tiva vandla ra kona, hi kombela u nghena eka www.jw.org kutani u fonela rhavi ra Timbhoni ta Yehovha ra le tikweni ra ka n’wina. U nga nyikela hi ku tirhisa tindlela leti landzelaka:

MINYIKELO

U nga nyikela hi ku tirhisa Internet, khadi ra le bangi kumbe khadi ra xikweleti leri u ri kumaka ebangi. Ematikweni man’wana swa koteka ku nyikela hi ku tirhisa jw.org kumbe website yin’wana.
U nga nyikela hi mali, swin’wetsin’wetsi kumbe nhundzu yin’wana ya nkoka. Katsa ni papila leri kombisaka leswaku mali kumbe nhundzu ya kona i minyikelo leyi nga riki na swipimelo.

MINYIKELO LEYI NGA NI SWIPIMELO

U nga nyikela hi mali leyi yi nga ha tlhelaka yi vuyisiwa eka wena loko u yi lava.
Loko u nyikela hi ndlela leyi, katsa ni papila leri hlamuselaka swipimelo swa minyikelo ya kona.

TINDLELA TIN’WANA TO NYIKELA

Laha hansi ku xaxametiwe tindlela tin’wana leti u nga ha nyikelaka ha tona leswaku u seketela ntirho wo chumayela emisaveni hinkwayo. Loko u nga si nyikela, hi kombela leswaku u rhanga u fonela rhavi leri langutelaka tiko ra ka n’wina leswaku u ta tiva ndlela yo nyikela leyi amukelekaka laha u tshamaka kona. Swilaveko swa le nawini ni milawu ya swibalo swa hambana hi ku ya hi tindhawu, hikokwalaho vutisa un’wana loyi a nga ni vutivi hi swa nawu u nga si nyikela.

Ndzindzakhombo: Minyikelo yi nga endliwa hi ku tsala vandla leri tirhisiwaka hi Timbhoni ta Yehovha tanihi leri nga ta kuma mali ya ndzindzakhombo wa vutomi loko munhu a fa kumbe mali leyi munhu a yi kumaka loko a huma penceni.

Tiakhawunti Ta Bangi: Ku nga ha tsarisiwa vandla leri tirhisiwaka hi Timbhoni ta Yehovha loko sweswo swi fambisana ni swilaveko swa tibangi ta tiko ra ka n’wina, mali leyi lombisiweke hi ntswalo (certificates of deposit), kumbe akhawunti leyi munhu a yi pfulaka loko a kuma mali leyi a nyikiweke yona loko a huma penceni. A nga tlhela a hlamusela leswaku vandla rin’wana ra le nawini leri tirhisiwaka hi Timbhoni ta Yehovha ri ta kuma mali ya kona loko yena a fa.

Tixere Ni Mali Leyi Lombisiweke Hi Ntswalo (Bonds): Munhu a nga nyikela hi tixere ni mali leyi lombisiweke hi ntswalo eka vandla leri tirhisiwaka hi Timbhoni ta Yehovha. A nga ha tlhela a tsala papila leri vulaka leswaku mali ya kona yi ta tekiwa loko a fa.

Tindlu: Loko munhu a ri ni yindlu leyi nga ha xavisiwaka, a nga ha yi nyikela eka vandla ra le nawini leri tirhisiwaka hi Timbhoni ta Yehovha. Loko a tshama eka yona, a nga ha hlela leswaku a ya emahlweni a tshama kona ku fikela loko a fa.

Ku Nyikela Hi Mali Leyi Vekisiweke: Munhu a nga nyikela hi mali leyi a yi vekiseke eka vandla ra le nawini leri tirhisiwaka hi Timbhoni ta Yehovha, a tlhela a hlela ku kuma mali yo karhi lembe ni lembe loko a ha hanya. A nga ha kuma phepha ra xibalo leri kombisaka mali ya lembe leyi kokiweke loko a nyikela.

Mapapila Ya Ndzhaka Ni Vulawuri Bya Timali (Wills and Trusts): Munhu a nga ha hlela leswaku mali ya yena kumbe nhundzu ku nyikeriwa ha swona loko a file. A nga endla leswi hi ku landza endlelo ra nawu ro tsala papila leri kombisaka leswaku u lava leswaku vandla ra le nawini leri tirhisiwaka hi Timbhoni ta Yehovha ri ta kuma nhundzu kumbe mali ya yena. Lunghiselelo leri ri nga endla leswaku ku nga vi na xibalo.

U nga kuma rungula leri engetelekeke malunghana ni ku nyikela eka ntirho wa misava hinkwayo wa Timbhoni ta Yehovha eka broxara leyi nge, Charitable Planning to Benefit Kingdom Service Worldwide, leyi kumekaka hi Xinghezi ni hi Xipaniya ntsena. Broxara leyi yi ni tindlela to hambanahambana ta ndlela leyi munhu a nga nyikelaka ha yona. Swi nga endleka leswaku rungula rin’wana leri nga eka broxara leyi ri nga tirhi eka wena hikwalaho ka ku hambana ka milawu ya swibalo kumbe milawu yin’wana ya le tikweni ra ka n’wina. Kutani endzhaku ko hlaya broxara leyi, u fanele u vulavula ni mutsundzuxi wa wena wa le nawini. Vanhu vo tala va hoxe xandla leswaku va seketela ntirho wa hina lowu endliwaka emisaveni hinkwayo ni ku va va nga hakeli xibalo hi ku va va nyikela hi yin’wana ya tindlela leti. Loko broxara leyi yi kumeka laha u tshamaka kona, u nga kombela kopi ya yona eka matsalana wa vandlha ra n’wina.

Leswaku u kuma rungula leri engetelekeke, u nga ha fonela rhavi ra Timbhoni ta Yehovha ra laha u tshamaka kona.

U Nga Ha Tsakela

Dyondza Ku Nyikela Hi Ku Tirhisa Inthanete

Kambisisa tindlela ni leswi u nga swi tirhisaka leswaku u kota ku nyikela.

XIHONDZO XO RINDZA (NKANDZIYISO WA VANDLHA)