1, 2. (a) I yini leswi u swi languteleke hi mahlongati eParadeyisini? (Vona xifaniso lexi nga eku sunguleni ka xihloko lexi.) (b) I yini lexi nga ta hi tisela ntsako lowukulu emisaveni leyintshwa?

HI BYI langutele hi mahlongati “[vutomi] lebyi nga heriki.” Muapostola Pawulo u vule leswaku i “[vutomi] bya xiviri.” (Hlaya 1 Timotiya 6:12, 19.) Vanhu vo tala va ta hanya hilaha ku nga heriki eParadeyisini laha misaveni. Swa tika ku anakanya ndlela leyi swi nga ta va ha yona ku pfuka mixo wun’wana ni wun’wana u titwa u hanye kahle, u tsakile naswona u nga vileli hi nchumu. (Esaya 35:5, 6) Anakanya ndlela leyi swi nga ta tsakisa ha yona ku heta nkarhi ni vandyangu wa wena ni vanghana va wena, ku katsa ni lava nga ta va va pfuxiwile eku feni. (Yohane 5:28, 29; Mintirho 24:15) U ta va ni nkarhi wo dyondza vuswikoti lebyintshwa kutani u antswisa vuswikoti bya wena eka swilo leswi u swi tsakelaka. Hi xikombiso, u nga ha dyondza leswi engetelekeke hi sayense. Kumbe u nga ha dyondza ndlela yo tlanga swichayachayana swo karhi swa vuyimbeleri kumbe ku dirowa yindlu ya wena n’wini.

 ² Hambileswi hi languteleke swilo swoleswo hinkwaswo leswinene, lexi nga ta hi tisela ntsako lowukulu i ku gandzela Yehovha. Anakanya ndlela leyi vutomi byi nga ta va ha yona loko vanhu hinkwavo va ta va va teka vito ra Yehovha ri ri leri kwetsimaka, va tlhela va amukela Yehovha tanihi Mufumi wa vona. (Matewu 6:9, 10) Hi ta tsakela ku vona misava yi tele hi vanhu lava hetisekeke, tanihi leswi a ku ri xikongomelo xa Xikwembu. Nakambe anakanya ndlela leyi swi nga ta olova ha yona ku kurisa vunghana bya hina na Yehovha loko hi ri karhi hi va lava hetisekeke hakatsongotsongo!—Pisalema 73:28; Yakobo 4:8.

3. I yini leswi hi faneleke hi swi lunghekela sweswi?

³ Ha tshemba leswaku Yehovha u ta swi endla swilo leswi hinkwaswo leswinene, hikuva “eka Xikwembu swilo hinkwaswo swa koteka.” (Matewu 19:25, 26) Loko hi lava ku hanya hilaha ku nga heriki emisaveni leyintshwa, lowu i nkarhi wa ku “khomelela swinene” evuton’wini lebyi nga heriki. Ha swi tiva leswaku makumu ma ta fika ku nga ri khale, hikwalaho hi fanele hi hanya hi ndlela leyi kombisaka leswaku hi langutele leswaku makumu ma nga fika nkarhi wihi ni wihi. Hi fanele hi endla hinkwaswo leswi hi nga swi kotaka sweswi leswaku hi tilunghiselela ku ya hanya emisaveni leyintshwa. A hi voneni leswaku hi nga swi endlisa ku yini sweswo.

4. Hi nga tilunghiselela njhani sweswi ku ya hanya emisaveni leyintshwa? Vula xikombiso.

⁴ Hi nga tilunghiselela njhani sweswi ku ya hanya emisaveni leyintshwa? Loko a hi kunguhata ku rhurhela etikweni rin’wana, a hi ta endla swilo swo karhi leswaku hi lunghekela ku ya hanya etikweni rolero. Hi xikombiso, hi nga ha sungula ku dyondza ririmi ni mikhuva ya vanhu va le tikweni rolero. Hi nga ha ringeta ku dya swin’wana swa swakudya swa vona. Hilaha ku fanaka, hi nga tilunghiselela sweswi ku ya hanya emisaveni leyintshwa hi ku endla leswi hi nga swi kotaka leswaku hi hanya onge hiloko se hi ri eka yona. A hi kambisiseni tindlela tin’wana leti hi nga swi endlaka ha yona sweswo.

5, 6. Ku dyondza ku yingisa nkongomiso lowu humaka enhlengeletanweni ya Yehovha swi ta hi pfuna njhani leswaku hi tilunghiselela ku ya hanya emisaveni leyintshwa?

⁵ Emisaveni leyi, Sathana u lava leswaku vanhu va anakanya leswaku va nga endla xin’wana ni xin’wana lexi va xi lavaka. Vo tala va anakanya leswaku i swa nkoka ku tilawula nileswaku a swi bohi ku yingisa Xikwembu. Vuyelo byi ve byihi? Ku ni ku xaniseka lokukulu ni ku pfumala ntsako. (Yeremiya 10:23) Kambe Yehovha i Mufumi la nga ni rirhandzu. Vutomi byi ta va byi tsakisa swinene emisaveni leyintshwa loko vanhu hinkwavo va ta va va yingisa yena ntsena!

⁶ Emisaveni leyintshwa, hi ta swi tsakela ku landzela nkongomiso lowu humaka enhlengeletanweni ya Yehovha, lowu nga ta hi pfuna ku endla misava leyi yi va paradeyisi yo saseka, hi tlhela hi pfuneta ku dyondzisa lava nga ta va va pfuxiwile eku feni. Yehovha u ta va a hi lunghiselele ntirho wo tala. Kambe ku vuriwa yini loko lava va hi rhangelaka va hi kombela ku endla nchumu lowu hi nga swi tsakeliki ku wu endla? Xana hi ta va yingisa? Xana hi ta endla leswi hi nga ta swi kota leswaku hi endla xiavelo xa hina hi tlhela hi xi tsakela? Leswaku hi tilunghiselela ku ya hanya hilaha ku nga heriki emisaveni leyintshwa, hi fanele hi yingisa nkongomiso lowu humaka enhlengeletanweni ya Yehovha sweswi.

7, 8. (a) Ha yini hi fanele hi tirhisana ni lava rhangelaka? (b) Hi kwihi ku cinca loku Vakreste van’wana va langutaneke na kona? (c) I yini leswi hi nga tiyisekaka ha swona emisaveni leyintshwa?

⁷ Loko hi lava ku tilunghiselela ku ya hanya  emisaveni leyintshwa, hi fanele hi dyondza ku eneriseka ni ku tirhisana ni nhlengeletano ya Yehovha ni vanhu van’wana. Hi xikombiso, loko hi nyikiwa xiavelo lexintshwa, hi tirhisana ni lava hi nyikeke xona hi tlhela hi tikarhatela ku va lava tsakeke naswona hi eneriseka. Loko hi dyondza ku tirhisana ni lava rhangelaka sweswi, a swi kanakanisi leswaku hi ta endla leswi fanaka emisaveni leyintshwa. (Hlaya Vaheveru 13:17.) Loko Vaisrayele va nghena eTikweni leri Tshembisiweke, va averiwe tindhawu leti a va ta tshama eka tona. (Tinhlayo 26:52-56; Yoxuwa 14:1, 2) A hi swi tivi leswaku un’wana ni un’wana wa hina u ta averiwa ku ya tshama kwihi emisaveni leyintshwa. Kambe loko hi dyondze ku va ni ntirhisano, hi ta swi tsakela ku endla ku rhandza ka Yehovha kun’wana ni kun’wana laha hi nga ta va hi tshama kona.

⁸ Anakanya lunghelo leri hi nga ta va hi ri na rona ra ku tirha emisaveni leyintshwa ya Xikwembu ehansi ka Mfumo wa xona! Hikwalaho ka xivangelo xolexo, ha swi tsakela ku tirhisana ni nhlengeletano ya Yehovha sweswi ni ku endla xin’wana ni xin’wana lexi hi averiwaka ku xi endla. Kambe minkarhi yin’wana swiavelo swa hina swi nga ha cinca. Hi xikombiso, vatirhi van’wana va le Bethele ya le United States va averiwe ku ya ensin’wini. Naswona valanguteri van’wana lava fambafambaka va averiwe ku va maphayona yo hlawuleka hikwalaho ka malembe lawa va nga na wona kumbe swiyimo swin’wana. Va tsakile eswiavelweni swa vona leswintshwa naswona Yehovha wa va katekisa. Loko hi khongelela leswaku Yehovha a hi pfuna, hi endla hinkwaswo leswi hi nga swi kotaka leswaku hi n’wi tirhela naswona hi dyondza ku eneriseka hi xiavelo xihi ni xihi lexi hi nyikiwaka xona, hi ta va lava tsakeke naswona Yehovha u ta hi katekisa. (Hlaya Swivuriso 10:22.) Ku vuriwa yini loko emisaveni leyintshwa, hi tsakela ku tshama endhawini yo karhi kambe nhlengeletano ya Yehovha yi hi kombela ku ya tshama endhawini yin’wana? Hi nkarhi wolowo, swi ta va swi nga ri na mhaka leswaku hi tshama kwihi kumbe hi endla yini. Hi ta va hi tlangela ntsena leswi hi nga ta va hi hanya emisaveni leyintshwa.—Nehemiya 8:10.

9, 10. (a) Ha yini swi nga ha lavaka leswaku hi lehisa mbilu emisaveni leyintshwa? (b) Hi nga swi kombisa njhani leswaku hi lehisa mbilu sweswi?

⁹ Minkarhi yin’wana swi nga ha lava hi lehisa mbilu emisaveni leyintshwa. Hi xikombiso, hi nga ha twa leswaku vanhu van’wana va tsake swinene hileswi maxaka ni vanghana va vona va pfuxiweke eku feni. Kambe, hi nga ha boheka ku rindza leswaku varhandziwa va hina va pfuxiwa eku feni. Loko sweswo swo endleka, xana hi ta tsaka ni van’wana hi tlhela hi lehisa mbilu? (Varhoma 12:15) Loko hi dyondza sweswi ku rindzela Yehovha hi ku lehisa mbilu leswaku a hetisisa switshembiso swakwe, swi ta hi pfuna leswaku hi lehisa mbilu hi nkarhi wolowo.—Eklesiasta 7:8.

¹⁰ Hi nga tlhela hi tilunghiselela ku ya hanya emisaveni leyintshwa hi ku lehisa mbilu loko ndlela leyi hi wu twisisaka ha yona ntiyiso wa le Bibeleni yi antswisiwa. Xana ha ri dyondza rungula rolero lerintshwa naswona xana hi lehisa mbilu loko hi nga ri twisisi kahle? Loko swi ri tano, emisaveni leyintshwa, swi ta hi olovela ku lehisa mbilu nkarhi wun’wana ni wun’wana  loko Yehovha a hi nyika swileriso leswintshwa.—Swivuriso 4:18; Yohane 16:12.

11. Ha yini hi fanele hi dyondza ku rivalela van’wana sweswi, naswona sweswo swi ta hi pfuna njhani emisaveni leyintshwa?

¹¹ Ndlela yin’wana leyi hi nga tilunghiselelaka ha yona ku ya hanya emisaveni leyintshwa i ku dyondza ku rivalela. Hi nkarhi wa Mfumo wa Kreste wa Gidi ra Malembe, swi ta hi tekela nkarhi ku va lava hetisekeke. (Mintirho 24:15) Xana hi ta kombisana rirhandzu hi tlhela hi rivalelana? Loko hi dyondza ku rivalela van’wana ni ku va ni vuxaka lebyinene na vona sweswi, swi ta hi olovela ku endla tano emisaveni leyintshwa.—Hlaya Vakolosa 3:12-14.

12. Ha yini hi fanele hi tilunghiselela sweswi ku ya hanya emisaveni leyintshwa?

¹² Emisaveni leyintshwa, a hi minkarhi hinkwayo hi nga ta kuma leswi hi swi lavaka, swi nga ha endleka hi boheka ku rindza. Hi ta boheka ku va lava khensaka hi tlhela hi eneriseka exiyin’weni xin’wana ni xin’wana lexi hi nga ta va hi ri eka xona. Entiyisweni, hi ta boheka ku kombisa timfanelo leti Yehovha a hi dyondzisaka leswaku hi va na tona sweswi. Hikwalaho loko hi dyondza ku va ni timfanelo toleto sweswi, hi kombisa leswaku misava leyintshwa i ya xiviri eka hina nileswaku hi tilunghiselela ku ya hanya hilaha ku nga heriki. (Vaheveru 2:5; 11:1) Nakambe, hi ta kombisa leswaku ha swi lava hakunene ku ya hanya emisaveni leyi vanhu hinkwavo va yingisaka Yehovha ntsena.

13. I yini leswi hi nga ta swi rhangisa evuton’wini bya hina emisaveni leyintshwa?

¹³ Emisaveni leyintshwa, hi ta va ni swilo hinkwaswo leswi hi swi lavaka leswaku hi tiphina hi vutomi. Kambe hi ta va ni ntsako lowukulu swinene hi ku va ni vuxaka lebyikulu na Yehovha. (Matewu 5:3) Hi ta va hi khomekile hi ku tirhela Yehovha naswona hi ta tiphina hi ku n’wi tirhela. (Pisalema 37:4) Hikwalaho, loko hi rhangisa Yehovha evuton’wini bya hina sweswi, hi tilunghiselela ku ya hanya emisaveni leyintshwa.—Hlaya Matewu 6:19-21.

14. Hi tihi tipakani leti vantshwa va nga tivekelaka tona entirhweni wa Yehovha?

¹⁴ Hi nga tiphina njhani hi ku tirhela Yehovha  hilaha ku engetelekeke? Ndlela yin’wana i ku tivekela tipakani. Loko wa ha ri muntshwa, anakanyisisa swinene hi ku tirhisa vutomi bya wena u tirhela Yehovha. Ha yini u nga endli ndzavisiso eka minkandziyiso ya hina u ta vona mintirho yo hambanahambana ya nkarhi hinkwawo? U nga hlawula wun’wana wa yona wu va pakani ya wena. * (Vona nhlamuselo ya le hansi.) Burisana ni van’wana lava nga ni malembe yo tala va ri karhi va tirhela Yehovha nkarhi hinkwawo. Loko u tirhisa vutomi bya wena leswaku u tirhela Yehovha, u ta kuma ndzetelo wa risima. Ntokoto wolowo wu ta ku pfuna leswaku u tirhela Yehovha emisaveni leyintshwa.

15. Hi tihi tipakani tin’wana leti hi nga tivekelaka tona loko hi ri karhi hi tirhela Yehovha?

¹⁵ Hi nga tivekela tipakani to tala loko hi tirhela Yehovha. Hi xikombiso, hi nga tivekela pakani yo dyondza vuswikoti lebyintshwa ensin’wini. Kumbe hi nga ha ringeta ku twisisa milawu leyi kongomisaka ya Bibele kutani hi dyondza ndlela leyi hi nga yi tirhisaka ha yona evuton’wini. Hi nga ringeta ku antswisa ndlela leyi hi hlayaka ha yona erivaleni kumbe hi antswisa tinkulumo kumbe tinhlamulo ta hina eminhlanganweni. Ntiyiso wa mhaka hi lowu: Loko u tivekela tipakani loko u ri karhi u tirhela Yehovha, ti ta ku pfuna leswaku u hiseka swinene naswona u tilunghiselela ku ya hanya emisaveni leyintshwa.

16. Ha yini ku tirhela Yehovha ku ri ndlela leyinene yo hanya?

¹⁶ Loko hi tirhisa nkarhi wa hina leswaku hi tilunghiselela ku ya hanya emisaveni leyintshwa ya Xikwembu, xana hi hundziwa hi ndlela yo antswa yo hanya ha yona namuntlha? Doo! Ku tirhela Yehovha i ndlela leyinene yo hanya ha yona. A hi n’wi tirheli hileswi hi sindzisiwaka hi munhu un’wana kumbe leswaku hi ta pona nhlomulo lowukulu. Loko hi ri ni vuxaka lebyinene na Yehovha hi va ni vutomi byo antswa naswona ha tsaka. Yoleyo i ndlela leyi a hi vumbeke leswaku hi hanya ha yona. Ku rhandziwa hi Xikwembu ni ku kongomisiwa hi xona  evuton’wini bya hina swi antswa ku tlula nchumu wihi ni wihi. (Hlaya Pisalema 63:1-3.) Hinkwerhu ha tsaka hileswi hi gandzelaka Yehovha hi timbilu ta hina hinkwato. Van’wana lava nga ni malembe yo tala va n’wi tirhela va nga vula va tiyiseka va ku, leyi i ndlela leyinene yo hanya ha yona.—Pisalema 1:1-3; Esaya 58:13, 14.

17. Swilo leswi hi tsakisaka ni vuhungasi swi ta va swi ri swa nkoka ku fikela kwihi eParadeyisini?

¹⁷ EParadeyisini, hi ta tiphina hi ku heta wun’wana wa nkarhi wa hina eka swilo leswi hi tsakisaka ni le ka vuhungasi. Phela, Yehovha u hi vumbe hi navela ku tiphina naswona u hi tshembisa leswaku u ta “enerisa ku navela ka xilo xin’wana ni xin’wana lexi hanyaka.” (Pisalema 145:16; Eklesiasta 2:24) Ha swi lava ku tihungasa ni ku wisa, kambe hi tiphina swinene hi swilo sweswo loko hi rhangisa vuxaka bya hina na Yehovha. Swi ta va tano ni le misaveni leyintshwa. Hikwalaho, i vutlhari ku hambeta hi ‘lava mfumo ku sungula’ ni ku tshama hi ri karhi hi anakanyisisa hi mikateko leyi hi yi kumaka loko hi ri karhi hi tirhela Yehovha.—Matewu 6:33.

18. Hi nga swi kombisa njhani leswaku hi tilunghiselela ku hanya hilaha ku nga heriki eParadeyisini?

¹⁸ Emisaveni leyintshwa, vutomi byi ta va byi ri byinene ngopfu. Onge hi nga kombisa ndlela leyi hi swi lavaka ha yona ku hanya eka yona hi ku lunghekela ‘vutomi bya xiviri’ sweswi. A hi tikarhateleni ku va ni timfanelo leti Yehovha a hi dyondzisaka leswaku hi va na tona sweswi naswona a hi chumayeleni mahungu lamanene hi ku hiseka. Onge hi nga kuma ntsako wa ku rhangisa vugandzeri bya Yehovha evuton’wini bya hina. Hi swi tshemba hi ku helela leswaku emisaveni leyintshwa, Yehovha u ta endla hinkwaswo leswi a swi tshembiseke. Hikwalaho a hi hanyeni onge se hi le misaveni leyintshwa!