1. Hi nga xi tirhisa njhani xikhongelo lexi vuriweke hi Yesu lexi kumekaka eka Matewu 6:9-13, loko hi chumayela?

VANHU vo tala va ma tiva marito ya xikhongelo lexi kumekaka eka Matewu 6:9-13. Loko hi chumayela, hi tirhisa marito ya xikhongelo xolexo leswaku hi dyondzisa vanhu leswaku Mfumo wa Xikwembu i hulumendhe ya xiviri leyi nga ta hundzula misava leyi yi va paradeyisi. Hi tlhela hi tirhisa marito lama nge “vito ra wena a ri kwetsimisiwe,” ku kombisa leswaku Xikwembu xi ni vito ni leswaku hi fanele hi ri teka tanihi leri kwetsimaka.—Matewu 6:9.

2. Hi swi tivisa ku yini leswaku Yesu a a nga lavi leswaku hi phindhaphindha marito lama fanaka nkarhi hinkwawo loko hi khongela?

² Xana Yesu a a lava leswaku nkarhi hinkwawo loko hi khongela hi phindhaphindha marito lawa a ma tirhiseke, hilaha van’wana va endlaka hakona? Doo! Yesu u te: “Kambe loko u khongela, u nga vuli swilo leswi fanaka hi ku phindha-phindha.” (Matewu 6:7) Siku rin’wana, loko a dyondzisa vadyondzisiwa vakwe ndlela yo khongela, u phindhe xikhongelo xolexo kambe a nga tirhisanga marito lama fanaka. (Luka 11:1-4) Hikwalaho Yesu a a hi nyika xikhongelo xa xikombiso leswaku a hi dyondzisa leswaku hi swihi swilo leswi hi faneleke hi swi khongelela.

3. Hi swihi swivutiso leswi u nga ha tivutisaka swona loko u ri karhi u kambisisa xikhongelo xa xikombiso?

 ³ Exihlokweni lexi ni lexi landzelaka hi ta xi kambisisa hi vukheta xikhongelo xa xikombiso. Loko hi ri karhi hi xi kambisisa, tivutise, ‘Xikhongelo lexi xi nga ndzi pfuna njhani leswaku ndzi antswisa swikhongelo swa mina?’ Naswona xa nkoka swinene, ‘Xana ndzi hanya hi ku pfumelelana ni xikhongelo xa xikombiso?’

4. Marito lama nge “Tata wa hina” ma hi tsundzuxa yini, naswona Yehovha i Tata wa hina hi ndlela yihi?

⁴ Yesu u sungule xikhongelo lexi hi marito lama nge, “Tata wa hina.” Leswi swi hi tsundzuxa leswaku Yehovha i Tata wa vamakwerhu hinkwavo va xinuna ni va xisati lava nga kona emisaveni hinkwayo. (1 Petro 2:17) Lava Yehovha a va hlawuleke leswaku va ya hanya etilweni u va endle vana vakwe, hikwalaho i Tata wa vona hi ndlela yo hlawuleka. (Varhoma 8:15-17) Lava va nga ta hanya hilaha ku nga heriki laha misaveni na vona va nga n’wi vitana ‘Tatana.’ Yehovha u va nyika vutomi naswona u khathalela swilaveko swa vona hi ndlela ya rirhandzu. Va ta vitaniwa “vana va Xikwembu” loko va ta va se va hetisekile naswona va tshembekile eka Yehovha eka ndzingo wo hetelela.—Varhoma 8:21; Nhlavutelo 20:7, 8.

5, 6. Hi yihi nyiko ya nkoka leyi vatswari va nga yi nyikaka vana va vona, naswona n’wana ha un’we u fanele a endla yini hi nyiko leyi? (Vona xifaniso lexi nga eku sunguleni ka xihloko lexi.)

⁵ Vatswari va nyika vana va vona nyiko loko va va pfuna leswaku va twisisa leswaku Yehovha i Tata wa vona wa le tilweni ni loko va va dyondzisa ku khongela eka yena. Mulanguteri wa muganga wa le Afrika Dzonga u ri: “Ndzi khongele ni vana va hina va vanhwanyana vusiku byin’wana ni byin’wana handle ka loko ndzi nga ri kona ekaya, ku sukela loko va ha ku velekiwa. Vana va hina va tala ku vula leswaku a va ha ma tsundzuki hi ku kongoma marito lawa a ndzi ma vula loko ndzi khongela na vona vusiku byin’wana ni byin’wana. Hambiswiritano, va tsundzuka ndlela leyi xiyimo a xi ri ha yona, ndlela leyi a hi swi teka swi kwetsima ha yona ku vulavula ni Tata wa hina, Yehovha ni ku rhula ni ku sirheleleka leswi a hi titwa hi ri na swona. Loko se va swi kota ku khongela, ndzi va khutaze ku khongela hi rito ra le henhla leswaku ndzi ta va twa loko va phofulela Yehovha leswi va swi anakanyaka ni ndlela leyi va titwaka ha yona. Lowu a wu ri nkarhi lowunene wo tiva leswi nga etimbilwini ta vona. Hikwalaho ndzi va dyondzise ku katsa tinhla ta nkoka leti nga eka xikhongelo xa xikombiso leswaku swikhongelo swa vona swi ta va leswi twalaka.”

⁶ Vana vakwe va ye emahlweni va tshinela eka Yehovha hambiloko se va kurile. Se va tekiwile naswona va tirhela Yehovha nkarhi hinkwawo swin’we ni vanuna va vona. Nyiko ya nkoka leyi vatswari va nga yi nyikaka vana va vona i ku va dyondzisa leswaku Yehovha i Munhu wa xiviri nileswaku va nga va munghana wa yena lonkulu. Kambe n’wana ha un’we u fanele a tikurisela vunghana bya yena na Yehovha.—Pisalema 5:11, 12; 91:14.

7. Hi rihi lunghelo leri hi nga na rona, kambe i yini leswi hi faneleke hi swi endla?

⁷ Hi ni lunghelo ra ku tiva vito ra Xikwembu ni ra ku va “vanhu va vito ra xona.” (Mintirho 15:14; Esaya 43:10) Hi khongela hi ku, “Vito ra wena a ri kwetsimisiwe,” hileswaku ri endliwa ri va leri kwetsimaka. Hi tlhela hi kombela Yehovha leswaku a hi pfuna leswaku hi nga endli kumbe ku vula nchumu lowu nga ha tisaka xisandzu eka yena. A hi fanelanga hi fana ni van’wana va le nkarhini wa vaapostola lava a va nga swi endli leswi a va dyondzisa van’wana leswaku va swi endla. Pawulo u va tsalerile a ku: “Vito ra Xikwembu ra sandziwa hikwalaho  ka n’wina exikarhi ka matiko.”—Varhoma 2:21-24.

8, 9. Vula xikombiso xa ndlela leyi Yehovha a va pfunaka ha yona lava lavaka ku kwetsimisa vito ra yena.

⁸ Hi endla leswi hi nga swi kotaka leswaku hi dzunisa vito ra Yehovha. Makwerhu wa xisati wa le Norway loyi a feriweke hi nuna a n’wi siya ni n’wana wa jaha wa malembe mambirhi u ri: “A wu ri nkarhi wo tika swinene evuton’wini bya mina. A ndzi khongela siku ni siku, kwalomu ka awara yin’wana ni yin’wana, leswaku ndzi kuma matimba yo lawula ndlela leyi ndzi titwaka ha yona leswaku ndzi nga nyiki Sathana xivangelo xo tlhontlha Yehovha, hikwalaho ka xiboho xihi ni xihi xa vuphukuphuku lexi ndzi nga xi endlaka kumbe hikwalaho ka ku va ndzi nga tshembeki. A ndzi lava ku kwetsimisa vito ra Yehovha naswona a ndzi lava leswaku n’wana wa mina a tlhela a vona tata wakwe eParadeyisini.”—Swivuriso 27:11.

⁹ Xana Yehovha u swi hlamurile swikhongelo swakwe? Ina. U khutazekile hi ku tshama a ri ni vamakwavo va le vandlheni. Endzhaku ka malembe ya ntlhanu u tekane ni nkulu. N’wana wakwe loyi sweswi a nga ni malembe ya 20, i makwerhu la khuvuriweke. Makwerhu loyi wa xisati u ri: “Ndzi tsake swinene leswi nuna wa mina a ndzi pfuneke ku kurisa n’wana wa mina.”

10. Xikwembu xi ta ri kwetsimisa njhani hi ku helela vito ra xona?

¹⁰ Yehovha u ta ri kwetsimisa hi ku helela vito rakwe loko a ta va a lovise vanhu hinkwavo lava n’wi sandzaka va tlhela va nga pfumeli leswaku a va Mufumi wa vona. (Hlaya Ezekiyele 38:22, 23.) Hi nkarhi wolowo, vanhu va ta va va hetisekile naswona swivumbiwa hinkwaswo swa le tilweni ni laha misaveni swi ta gandzela Yehovha ni ku dzunisa vito rakwe lero kwetsima. Eku heteleleni, Tata wa hina la nga ni rirhandzu u ta va “swilo hinkwaswo eka vanhu hinkwavo.”—1 Vakorinto 15:28.

11, 12. I yini leswi Yehovha a pfuneke vanhu vakwe leswaku va swi twisisa hi 1876?

¹¹ Loko Yesu a nga si tlhelela etilweni, vadyondzisiwa vakwe va n’wi vutisile va ku: “Hosi, xana u vuyetela mfumo eIsrayele hi nkarhi lowu?” Yesu u va byele leswaku a wu nga si va nkarhi wa leswaku va tiva nkarhi lowu Mfumo wa Xikwembu wu nga ta sungula ku fuma ha wona. U byele vadyondzisiwa vakwe leswaku va tinyiketela swinene eku endleni ka ntirho wo chumayela lowu nga wa nkoka. (Hlaya Mintirho 1:6-8.) Kambe u tlhele a va dyondzisa ku khongelela leswaku Mfumo wa Xikwembu wu ta ni ku wu langutela hi ntsako nkarhi wolowo. Hi yona mhaka ha ha khongelaka leswaku Mfumo wu ta.

¹² Loko nkarhi wa leswaku Yesu a sungula ku fuma etilweni wu ri kusuhi, Yehovha u pfune vanhu vakwe ku twisisa leswaku a a ta sungula ku fuma hi lembe rihi. Hi 1876, Charles Taze Russell u tsale xihloko lexi nge, “Minkarhi Ya Vamatiko: Yi Hela Rini?” U hlamusele leswaku “minkarhi ya nkombo” leyi ku vulavuriwaka ha yona eka vuprofeta bya Daniyele i nchumu wun’we ni “nkarhi lowu vekiweke wa matiko” lowu Yesu a vulavuleke ha wona eka vuprofeta byakwe. Xihloko xolexo xi hlamusele leswaku minkarhi yoleyo a yi ta hela hi 1914. * (Vona nhlamuselo ya le hansi.)—Daniyele 4:16; Luka 21:24.

13. Ku humelele yini hi 1914, naswona swilo leswi endlekeke emisaveni ku sukela hi 1914 a swi kombisa yini?

¹³ Hi 1914, ku sungule nyimpi eYuropa naswona swi nga si ya kwihi yi ve kona emisaveni hinkwayo. Ku ve ni tindlala letikulu hikwalaho ka nyimpi yoleyo. Naswona loko nyimpi yoleyo yi hela hi 1918, mukhuhlwana lowu dlayaka wu dlaye vanhu vo tala emisaveni hinkwayo ku tlula lava feke enyimpini. Swilo leswi hinkwaswo a  swi ri xiphemu xa “xikombiso” lexi Yesu a vulavuleke ha xona. Xikombiso xolexo a xi kombisa leswaku Yesu u ve Hosi etilweni hi 1914. (Matewu 24:3-8; Luka 21:10, 11) Hi lembe rolero, u “[hume] a ri karhi a hlula, ni ku hetisa ku hlula ka yena.” (Nhlavutelo 6:2) Yesu u hlongole Sathana ni madimona yakwe etilweni a va lahlela laha misaveni. Endzhaku ka sweswo, vuprofeta lebyi byi sungule ku hetiseka: “Khombo eka misava ni lwandle, hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.”—Nhlavutelo 12:7-12.

14. (a) Ha yini ha ha khongelela leswaku Mfumo wa Xikwembu wu ta? (b) Hi wihi ntirho wa nkoka lowu hi faneleke hi wu endla sweswi?

¹⁴ Vuprofeta byolebyo lebyi nga eka Nhlavutelo ndzima 12 byi hi pfuna ku twisisa leswaku ha yini ku sungule ku humelela swilo leswi tsemaka nhlana emisaveni hi nkarhi lowu Yesu a veke Hosi ya Mfumo wa Xikwembu. Hambileswi Yesu a fumaka etilweni, Sathana wa ha fuma misava. Kambe ku nga ri khale Yesu u ta “hetisa ku hlula ka yena” hi ku herisa vuhomboloki hinkwabyo emisaveni. Kukondza nkarhi wolowo wu fika, hi ya emahlweni hi khongelela leswaku Mfumo wa Xikwembu wu ta naswona hi tshama hi khomekile hi ku chumayela hi Mfumo wolowo. Ntirho wa hina wu hetisisa vuprofeta bya Yesu lebyi nge: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

15, 16. Xana swi enerile ku khongelela ntsena leswaku ku rhandza ka Xikwembu ku endliwa laha misaveni? Hlamusela.

¹⁵ Kwalomu ka malembe ya 6 000 lama hundzeke, ku rhandza ka Xikwembu a ku endliwa laha misaveni. Hi yona mhaka Yehovha a vuleke leswaku swilo hinkwaswo “a swi ri swinene ngopfu.” (Genesa 1:31) Endzhaku ka sweswo, Sathana u xandzukile naswona ku sukela hi nkarhi wolowo, vanhu vo tala a va nga ri ku  endleni ka ku rhandza ka Xikwembu. Kambe namuntlha ku ni vanhu va kwalomu ka timiliyoni ta nhungu lava tirhelaka Yehovha. Va khongelela leswaku ku rhandza ka Xikwembu ku endliwa laha misaveni, naswona vona va endla ku rhandza ka Xikwembu. Va hanya hi ndlela leyi tsakisaka Xikwembu naswona va dyondzisa van’wana hi ku hiseka malunghana ni Mfumo wa xona.

¹⁶ Hi xikombiso, murhumiwa un’wana wa laha Afrika la nga ni malembe ya 80, loyi a khuvuriweke hi 1948, u ri: “Nkarhi na nkarhi ndzi khongelela leswaku vanhu hinkwavo lava fanaka ni tinyimpfu va twa ntiyiso naswona va pfuniwa ku tiva Yehovha nkarhi wu nga si hela. Naswona, loko ndzi lava ku chumayela munhu, ndza khongela ndzi kombela vutlhari bya leswaku ndzi fikelela mbilu ya munhu yoloye. Kasi, malunghana ni vanhu lava fanaka ni tinyimpfu lava se hi va kumeke, ndzi khongelela leswaku Yehovha a katekisa matshalatshala ya hina yo va khathalela.” Makwerhu loyi wa xisati la dyuhaleke u pfune vanhu vo tala leswaku va dyondza hi Yehovha. Xana u nga ehleketa hi vadyuhari van’wana lava endlaka ku rhandza ka Yehovha hi ku hiseka?—Hlaya Vafilipiya 2:17.

17. U titwa njhani hi leswi Yehovha a nga ta swi endlela vanhu ni misava enkarhini lowu taka?

¹⁷ Hi ta ya emahlweni hi khongelela leswaku ku rhandza ka Yehovha ku endliwa kukondza a herisa valala va yena laha misaveni. Endzhaku ka sweswo misava yi ta endliwa paradeyisi naswona vanhu va tibiliyoni va ta pfuxiwa eku feni. Yesu u vule leswaku “nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.” (Yohane 5:28, 29) Anakanya ndlela leyi hi nga ta va hi tsake ha yona loko hi amukela varhandziwa va hina lava pfuxiweke eku feni! Xikwembu “xi ta sula mihloti hinkwayo” ematihlweni ya hina. (Nhlavutelo 21:4) Vanhu vo tala lava nga ta pfuxiwa ku ta va ku ri “lava nga lulamangiki,” lava nga si tshamaka va dyondza ntiyiso malunghana na Yehovha na Yesu. Hi ta tiphina hi ku va dyondzisa ku rhandza ka Xikwembu leswaku va ta kuma “vutomi lebyi nga heriki.”—Mintirho 24:15; Yohane 17:3.

18. Hi swihi swilo leswi vanhu va swi lavaka swinene?

¹⁸ Loko Mfumo wa Xikwembu se wu fikile, wu ta kwetsimisa vito ra xona naswona swivumbiwa hinkwaswo etilweni ni le misaveni swi ta gandzela Yehovha hi vun’we. Xikwembu xi ta nyika vanhu swilo leswi va swi lavaka swinene loko xi hlamula swikombelo swinharhu swo sungula leswi nga eka xikhongelo xa xikombiso. Exihlokweni lexi landzelaka hi ta bula hi swilaveko swin’wana swa nkoka leswi Yesu a hi dyondziseke leswaku hi khongela malunghana na swona.