“Ku Navela Ka Mina Ku Hetisekile”

Emilia a a ri phayona ra nkarhi hinkwawo emalembeni ya 15 lama hundzeke. Hambiswiritano, u boheke ku tshika. Emalembeni ya sweswinyana, a a tshamela ku tsundzuka nkarhi wolowo wo tsakisa swinene evuton’wini byakwe naswona a a lava ku tlhela a ndlandlamuxa vutirheli byakwe.

Kambe ntirho wakwe a wu n’wi dyela nkarhi wo tala kutani sweswo a swi n’wi tsona ntsako. Siku rin’wana u tshame a byela vatirhi-kulobye a ku: “Ndzi navela onge ndzi nga tirha tiawara leti hungutiweke.” Murhangeri wakwe u twe hi mhaka yoleyo kutani a ya a ya n’wi vutisa loko yi ri ntiyiso. Emilia u pfumerile leswaku i ntiyiso. Hambiswiritano, ku hunguteriwa tiawara entirhweni a swi ta lava mpfumelelo wa mukongomisi wa khampani hikuva hi ku ya hi nawu wa khampani vatirhi hinkwavo a va fanele va tirha tiawara leti fanaka. Kutani Emilia u tilunghiselele ku hlangana ni mukongomisi wa khampani naswona u khongele eka Xikwembu leswaku xi n’wi nyika xivindzi ni ku rhula.

Loko Emilia a hlangana ni mukongomisi wa khampani, hi vutlhari ni hi xivindzi u n’wi kombele leswaku a n’wi hungutela tiawara leti a ti tirhaka. U n’wi byele leswaku nkarhi wakwe wo wisa u wu tirhisela ku pfuna van’wana. U te: “Ndzi Mbhoni ya Yehovha kutani ndzi pfuna vanhu leswaku va va ni vuxaka na yena. Namuntlha vanhu vo tala a va ha ri na wona mahanyelo. Va lava ku dyondzisiwa milawu ya mahanyelo naswona tidyondzo ta Bibele leti ndzi va dyondzisaka tona ti nga va pfuna swinene. A ndzi lavi leswaku swilo leswi ndzi swi endlaka loko ndzi chayisa entirhweni swi kavanyeta ntirho wa mina laha khampanini, kambe ndzi nga swi tsakela ku kuma nkarhi lowu engetelekeke leswaku ndzi pfuna vanhu. Hi yona mhaka leyi ndzi kombelaka ku hunguteriwa tiawara leti ndzi ti hetaka laha ntirhweni.”

Mukongomisi u n’wi yingise hi vurhon’wana naswona u n’wi byele leswaku na yena u tshame a ehleketa hi ku pfuna swisiwana. Hiloko a ku: “Hi ku ya hi swivangelo leswi u swi hlamuseleke, ndzi ehleketa leswaku ndzi fanele ndzi endla hilaha u kombelaka hakona. Kambe, xana wa swi tiva leswaku u ta hola mali yitsongo?” Emilia u vule leswaku wa swi tiva sweswo naswona u tiyimisele ku olovisa vutomi byakwe loko swi laveka. U tlhele a ku: “Pakani ya mina leyikulu i ku endlela vanhu nchumu lowu nga ta va enerisa swinene.” Mukongomisi u te: “Ndza va xixima hakunene vanhu lava nyikelaka hi nkarhi wa vona handle ka vutianakanyi leswaku va pfuna van’wana.”

Ku hava mutirhi un’wana ekhampanini yoleyo loyi a tshameke a endleriwa sweswo. Sweswi Emilia u tirha masiku ya mune evhikini. Lexi n’wi hlamariseke ngopfu hileswi muholo wakwe wu nga hungutiwangiki. U ri: “Ku navela ka mina ku hetisekile kutani ndzi nga tlhela ndzi phayona.”

Xana u tshame u ehleketa hi ku cinca swiyimo swa wena leswaku u kota ku phayona kumbe u tlhela u byi nghenela?

[Marito lama tshahiweke exihlokweni lama nga eka tluka 32]

Mukongomisi u n’wi byele a ku: “Ndza va xixima hakunene vanhu lava nyikelaka hi nkarhi wa vona handle ka vutianakanyi leswaku va pfuna van’wana”