Tlhariha—U Lava “Nkongomiso Wa Vutshila”

Vutomi byi fanisiwa ni ku teka riendzo ro leha hi xikepe. Hambiswiritano, hakanyingi vanhu a va swi koti ku famba hi ndlela leyinene evuton’wini hi ku tirhisa vutlhari bya vona vini. Vanhu vo tala va tshovekeriwe hi xikepe xa vona xo fanekisela loko va langutana ni swiphiqo swa vutomi leswi fanaka ni magandlati lamakulu. (Ps. 107:23, 27) Ha yini swi fanela ku fanisa swiphiqo swa vutomi ni ku teka riendzo ro tika hi xikepe?

Khale a swi tika swinene ku tlutisa xikepe elwandle lerova a swi lava leswaku munhu a va a ri ni ntokoto. A ku ri vutshila lebyi hakanyingi munhu a a byi dyondza eka vatlutisi lava nga ni malembe va tlutisa swikepe, kumbe eka mufambisi wa xikepe. (Mint. 27:9-11) Swifaniso swa khale leswi mpfampfarhutiweke hi ku tirhisa pende swi kandziyisa ndlela leyi ntirho wa mufambisi wa xikepe a wu ri wa nkoka ha yona hikuva a a mpfampfarhutiwa a ri ni xivumbeko lexikulu ku tlula xa vatlutisi lavan’wana. Leswaku vatlutisi va kota ku tlutisa xikepe xa vona elwandle, a va dyondza hi tinyeleti, hi timheho leti hungaka elwandle ni swilo swin’wana leswi a swi va pfuna ku twisisa xiyimo xa le lwandle. Bibele yi vulavula hi vatlutisi vo karhi tanihi lava nga ni “vutshila,” ku nga rito leri vulaka “vutlhari.”—Ezek. 27:8.

Ku langutana ni swiphiqo swa vutomi namuntlha swi nga ha tikomba swi tika swinene ku fana ni ndlela leyi a swi tika ha yona ku tlutisa xikepe eminkarhini ya khale. I yini lexi nga hi pfunaka ku langutana ni swiphiqo sweswo?

HI NGA WU KUMA NJHANI “NKONGOMISO WA VUTSHILA”?

Tanihi leswi vutomi byi fanisiwaka ni ku teka riendzo hi xikepe, xiya leswi Bibele yi swi vulaka: “Munhu wo tlhariha u ta yingisa a tlhela a amukela swiletelo leswi engetelekeke, munhu la twisisaka hi loyi a amukelaka nkongomiso wa vutshila.” (Swiv. 1:5, 6) Xiga xa Xiheveru lexi hundzuluxeriweke xi va “nkongomiso wa vutshila” xi nga kombetela eka magoza lawa mufambisi wa khale wa xikepe a a ma teka. Xi hlamusela vuswikoti byo kongomisa hi vutshila.

Hi nga wu kuma “nkongomiso wa vutshila” ni ku dyondza ku famba hi ndlela leyinene evuton’wini hambileswi sweswo swi lavaka matshalatshala lamakulu. Hilaha buku ya Swivuriso yi vulaka hakona, hi fanele hi pfumelela “vutlhari” ni ku “twisisa” swi tirha swin’we. (Swiv. 1:2-6; 2:1-9) Kutani a hi nge tshiki ku lava nkongomiso wa Xikwembu hikuva hambi ku ri vanhu vo homboloka va nga ha tiva ndlela yo ‘lawula’ swilo leswaku va ta endla swilo swo biha.—Swiv. 12:5.

Kutani i swa nkoka leswaku hi va swichudeni leswi hisekaka swa Rito ra Xikwembu. Sweswo swi nga hi pfuna leswaku hi dyondza timhaka ta nkoka hi Yehovha na Yesu Kreste, loyi a vonakarisaka timfanelo ta Tata wakwe hi ku helela. (Yoh. 14:9) Nakambe hi kuma switsundzuxo swa vutlhari eminhlanganweni ya Vukreste. Ku tlula kwalaho, hi nga dyondza eka ntokoto wa van’wana, ku katsa ni vatswari va hina.—Swiv. 23:22.

TILUNGHISELELE U TLHELA U KUNGUHATA

“Nkongomiso wa vutshila” i wa nkoka ngopfu-ngopfu loko hi tikuma hi tlutisa xikepe elwandle leri kariheke ro fanekisela. Loko hi nga tiyiseki leswaku hi rihi goza leri hi  faneleke hi ri teka exiyin’weni xo tika, hi nga ha pfilunganyeka kutani hi weriwa hi khombo.—Yak. 1:5, 6.

Lexi tsakisaka hileswaku xiga lexi nge “nkongomiso wa vutshila” xi tlhela xi tirhisiwa emhakeni ya nyimpi. Ha hlaya: “U ta lwa nyimpi ya wena hi nkongomiso wa vutshila, [“hi rhengu ra vutshila,” hi ku ya hi vuhundzuluxeri bya The Revised English Bible] naswona ku ni ku pona laha ku nga ni vatsundzuxi vo tala.”—Swiv. 20:18; 24:6.

Ku fana ni munhu loyi a nga ni vutshila byo kunguhata tindlela to hlasela enyimpini, hi fanele hi ehleketa ni ku lunghekela nchumu wihi ni wihi lowu nga vekaka vuxaka bya hina na Yehovha ekhombyeni. (Swiv. 22:3) Hi xikombiso, u nga ha endla xiboho malunghana ni ku amukela ntirho lowuntshwa kumbe xikhundlha entirhweni. A swi kanakanisi leswaku u ta ehleketisisa hi muholo, nkarhi lowu u nga ta wu heta ku ya entirhweni ni ku tlhelela ekaya swin’we ni timhaka tin’wana. Hambiswiritano, ku ni timhaka tin’wana leti u faneleke u tivutisa tona: Xana ntirho wa kona wu ta fambisana ni milawu ya Bibele? Tiawara leti ndzi nga ta ti tirha to fana ni ku cinca-cinca ka minkarhi yo nghena, swi ta xi khumba njhani xiyimiso xa mina xa Vukreste?—Luka 14:28-30.

Loretta loyi a nga Mbhoni ya Yehovha a a tirha ekhampanini leyi a yi n’wi holela mali yo tala. Loko khampani yoleyo yi lava ku rhurhela endhawini yin’wana, u tshembisiwe xikhundlha xa le henhla. Varhangeri va khampani yoleyo va n’wi byele va ku: “Xikhundlha lexi a wu nge he pfuki u xi kumile evuton’wini. Nakambe Holo ya Mfumo yi le kusuhi ni laha khampani yi nga kona.” Kambe Loretta a a lava ku olovisa vutomi byakwe leswaku a ta tirhela Muvumbi wakwe hi xitalo. U xiye leswaku xikhundlha xakwe lexintshwa a xi ta n’wi dyela nkarhi wo tala lerova a saleriwa hi nkarhi wutsongo wo endla mintirho ya Vukreste. Hikwalaho, u tshike ntirho hambileswi un’wana wa varhangeri va khampani a n’wi lumeke ndleve leswaku hi yena ntsena mutirhi loyi a va swi lava swinene leswaku a hambeta a va tirhela. Loretta loyi a nga ni malembe ya kwalomu ka 20 a ri phayona, wa khorwiseka leswaku ku kunguhata swilo hi ku ya hi “nkongomiso wa vutshila” swin’we ni switsundzuxo leswi nga eRitweni ra Xikwembu, hi swona leswi n’wi tiseleke vuyelo lebyinene. U kote ku tiyisa vuxaka byakwe na Yehovha ni ku pfuna vanhu vo hlayanyana leswaku va amukela ntiyiso wa Bibele.

“Nkongomiso wa vutshila” wa laveka swinene ni le ndyangwini. Ku kurisa vana i ntirho lowu tekaka malembe yo tala naswona swiboho leswi vatswari va swi endlaka malunghana ni ndlela leyi va nga ta va pfuna ha yona leswaku va va ni vuxaka na Yehovha ni ku va wundla ha yona yi ta khumba vumundzuku bya ndyangu hinkwawo. (Swiv. 22:6) Hi xikombiso, vatswari lava nga Vakreste va nga ha tivutisa: ‘Xana hi tirhisa mabulo ni xikombiso xa hina leswaku hi dyondzisa vana va hina ku tshinela eka Yehovha leswaku va ta kota ku langutana ni swiphiqo swa vutomi hi vutlhari loko se va kurile? Xana mahanyelo ya hina ma va pfuna leswaku va twisisa ndlela leyi va nga tshamaka va tsakile ha yona hi ku va va hanya vutomi byo olova ni ku rhangisa vutirheli bya vona bya Vukreste?’—1 Tim. 6:6-10, 18, 19.

Ku va swilo swi hi fambela kahle evuton’wini a swi titsheganga hi ku tivekela tipakani to hlongorisa rifuwo kumbe ndhuma leti vanhu va misava leyi va talaka ku ti hlongorisa. Hosi Solomoni a a yi tiva kahle mhaka leyi. U huhuteriwe ku tsala a ku: “Swi ta va fambela kahle lava chavaka Xikwembu xa ntiyiso, hikuva a va xi chava.” (Ekl. 8:12) Marito wolawo ma kombisa leswaku swa vuyerisa ku lava “nkongomiso wa vutlhari” lowu sekeriweke eRitweni ra Xikwembu.—2 Tim. 3:16, 17.

[Xifaniso lexi nga eka tluka 30]

Hakanyingi vafambisi va xikepe a va mpfampfarhutiwa va ri ni xivumbeko lexikulu ku tlula xa vatlutisi lavan’wana leswaku ku kandziyisiwa nkoka wa ntirho wa vona

[Xihlovo Xa Kona]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.