Anakanyisisa Hi Leswi Yehovha A Ku Endleleke Swona

ENDZHAKUNYANA ka loko Yesu a pfuxiwe eku feni, vadyondzisiwa vakwe vambirhi a va ri eku fambeni va suka eYerusalema va ya aEmawusi. Buku ya Luka yi ri: “Kuteloko va ha bula ni ku kanerisana, Yesu a tshinela ivi a fambisana na vona; kambe a va nga swi koti ku n’wi lemuka hi mahlo ya vona.” Hiloko Yesu a ku eka vona: “‘Xana mi kanetana hi timhaka tihi mi ri karhi mi famba?’ Kutani va yima va ku tserhe, va khwanyane mimombo.” Ha yini a va khwanyane mimombo? Vadyondzisiwa a va tshemba leswaku Yesu a a ta ntshunxa Israyele hi nkarhi wolowo eka vulawuri bya Vamatiko, kambe sweswo a swi humelelanga. Ematshan’weni ya sweswo, Yesu u dlayiwile. Hi yona mhaka leyi a va khwanyane mimombo.—Luka 24:15-21; Mint. 1:6.

Yesu u sungule ku kombisana ni vadyondzisiwa vakwe. “Ku sukela eka Muxe ni Vaprofeta hinkwavo a va hlamusela swilo leswi khumbaka yena eMatsalweni hinkwawo.” Hakunene, ku humelele swiendlakalo swo tala leswikulu ni leswi tiyisaka ripfumelo hi nkarhi wa vutirheli bya Yesu. Tanihi leswi vadyondzisiwa a va yingisele nhlamuselo ya Yesu, langutelo ra vona ri cincile, va tshike ku hlunama va sungula ku tsaka. Endzhakunyana nimadyambu, va te: “Xana timbilu ta hina a ti nga pfurhi loko a ri karhi a vulavula na hina egondzweni, loko a hi pfulela Matsalwa hi ku helela?” (Luka 24:27, 32) Hi nga dyondza yini eka ndlela leyi vadyondzisiwa va Yesu va anguleke ha yona?

Swi Hi Khumba Njhani Ku Langutela Swilo Leswi Nga Endlekiki?

Vadyondzisiwa vambirhi lava a va kongome aEmawusi va hlunamile hileswi swiendlakalo leswi a va swi languterile swi nga endlekangiki. Va titwe hilaha Swivuriso 13:12 yi vulaka hakona loko yi ku: “Ku langutela loku tlheriseriwaka endzhaku ku vabyisa mbilu.” Hilaha ku fanaka, van’wana va hina lava tirheleke Yehovha hi ku tshembeka ku ringana malembe yo tala, va ehleketa leswaku “nhlomulo lowukulu” a wu fanele se wu fikile. (Mat. 24:21; Nhlav. 7:14) Swa twisiseka leswi ku langutela koloko loku nga si endlekaka ku nga ha twisaka vanhu ku vava sweswi.

Kambe tsundzuka leswaku vadyondzisiwa volavo vambirhi va tlhele va sungula ku tsaka endzhaku ka loko Yesu a va pfune ku anakanyisisa hi vuprofeta lebyi se a byi hetisekile, lebyi byin’wana bya byona a byi hetiseke enkarhini wa vona. Hi ndlela leyi fanaka, hi nga kota ku  tshama hi tsakile ni ku tiyiselela ku hela matimba. Michael, nkulu un’wana wa Mukreste loyi a nga ni ntokoto, u te: “U nga ehleketi hi swilo leswi Yehovha a nga si swi endlaka. Kambe ehleketisisa hi swilo leswi se a swi endleke.” Hakunene, yoleyo i ndzayo leyinene!

Leswi Yehovha A Swi Endleke

Xiya swilo swin’wana swo hlamarisa leswi Yehovha se a swi endleke. Yesu u te: “Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu ku tlula leyi.” (Yoh. 14:12) Namuntlha, malandza ya Xikwembu ma endla mintirho leyikulu leyi Vakreste vo sungula va nga si tshamaka va yi endla. Vanhu lava tlulaka nkombo wa timiliyoni va swi langutele hi mahlo-ngati ku pona nhlomulo lowukulu. Ehleketa, a ku si tshama ni siku ni rin’we ku va ni malandza ya Yehovha yo tshembeka yo tarisa xileswi lama hisekaka ematikweni yo tala emisaveni hinkwayo! Hakunene, Yehovha u pfune malandza yakwe leswaku ma endla “mintirho leyikulu ku tlula leyi,” hilaha Yesu a profeteke hakona.

Hi swihi swilo swin’wana leswi Yehovha a hi endleleke swona? U endle leswaku vanhu va timbilu letinene va kota ku huma hi ndlela yo fanekisela emisaveni yo homboloka va nghena exiyin’weni xo rhula ni xa vun’we lexi a xi endleleke vagandzeri vakwe. (2 Kor. 12:1-4) Ehleketa hi swin’wana swa swilo leswi hi swi kumaka exiyin’weni xexo. Hi xikombiso, languta layiburari ya wena kumbe leyi nga eHolweni ya Mfumo. Phendla matluka ya buku ya Watch Tower Publications Index, kumbe u lava-lava swilo eka progreme ya khompyuta ya Watchtower Library. Yingisela drama ya Bibele leyi rhekhodiweke. Ehleketisisa hi ntsombano lowu veke kona sweswinyana. Ku tlula kwalaho, ehleketisisa hi vunakulobye lebyi hi byi tsakelaka ni Vakreste-kulorhi. Yehovha u hi nyike hi mpimo lowukulu swakudya swa moya ni vamakwerhu lava hi rhandzaka. Hakunene, hi le xiyin’weni xo rhula ni xa vun’we!

Mupisalema Davhida u te: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina.” (Ps. 40:5) Ku anakanyisisa hi swilo leswinene leswi Yehovha, Tata wa hina wa le tilweni, se a hi endleleke swona ni ndlela ya rirhandzu leyi a hi langutaka ha yona, hi nga kuma matimba lamantshwa yo tiyisela hi ku tshembeka entirhweni wa hina lowu hi n’wi endlelaka wona hi mbilu hinkwayo.—Mat. 24:13.

[Xifaniso lexi nga eka tluka 31]

Yesu u pfune vadyondzisiwa vakwe leswaku va ehleketisisa hi swilo leswi Yehovha se a va endleleke swona

[Swifaniso leswi nga eka tluka 32]

Ehleketisisa hi ntsombano lowu veke kona sweswinyana