Xana Vukhongeri Lebyi Ndzi Nga Eka Byona Ndzi Lo Tihlawulela Kumbe I Bya Vatswari Va Mina?

LE POLAND vanhu vo tala va byela Timbhoni ta Yehovha va ku: “Kereke leyi ndzi nga velekiwa vatswari va mina va nghena eka yona, ndzi ta fela eka yona.” Hi ku ya hi vonelo ra vona, leswi swi vula leswaku vatswari lava nghenaka kereke yo karhi, ni vana va vona va ta nghena yona ku katsa ni vatukulu va vona. Xana laha u tshamaka kona vanhu va anakanya hi ndlela yoleyo loko swi ta emhakeni ya vukhongeri? Hakanyingi hi byihi vuyelo lebyi vaka kona loko vanhu va ri ni langutelo rero? Vanhu va nga ha hetelela va nghena kereke leswaku va hetisisa nawu ntsena naswona va swi teka swi ri ntolovelo wa ndyangu. Xana leswi swi nga humelela eka vanhu lava nga Timbhoni ta Yehovha lava dyondzeke ntiyiso eka vatswari kumbe eka vakokwa wa vona?

A swi vanga tano eka Timotiya loyi a dyondzisiweke ntiyiso hi manana na kokwana wa yena wa xisati lava a va tshemba ni ku rhandza Xikwembu xa ntiyiso hi mbilu hinkwayo. Timotiya u tive matsalwa yo kwetsima ‘ku sukela loko a ha ri ricece.’ Hi ku famba ka nkarhi, Timotiya, mana wa yena ni kokwa wa yena wa xisati va sungule ku khorwiseka leswaku Vukreste i vukhongeri bya ntiyiso. U ‘susumeteleke ku pfumela’ swilo leswi a swi tweke eMatsalweni malunghana na Yesu Kreste. (2 Tim. 1:5; 3:14, 15) Hilaha ku fanaka, hambileswi vatswari lava nga Vakreste namuntlha va ringetaka hi tindlela hinkwato leswaku vana va vona va va malandza ya Yehovha, vana hi voxe va fanele va hlakulela ku navela ku tirhela Yehovha.—Mar. 8:34.

Un’wana ni un’wana u fanele a susumeteleka ku pfumela eka timhaka leti khorwisaka loko a tiyimisele ku tirhela Yehovha swi huma embilwini ni ku tshama a tshembekile hambi ko ba lexi dumaka. Kutani ripfumelo ra yena ri ta tiya.—Efe. 3:17; Kol. 2:6, 7.

Leswi N’wana A Nga Swi Endlaka

Albert, * loyi a kuleleke endyangwini wa Timbhoni u ri: “Minkarhi hinkwayo a ndzi vona onge Timbhoni ta Yehovha ti ni vukhongeri bya ntiyiso, kambe a swi ndzi tikela ku pfumela leswi a ti swi vula malunghana ni ndlela leyi ndzi faneleke ndzi hanya ha yona.” Loko u ri muntshwa, u nga ha va ni mianakanyo leyi fanaka. Ha yini u nga endli matshalatshala yo tiva leswaku Xikwembu xi lava hi hanya hi ndlela yihi kutani u tsakela ku endla ku rhandza ka xona? (Ps. 40:8) Albert u ri: “Ndzi sungule ku khongela. Eku sunguleni a swi ndzi tikela ku khongela. Kambe a ndzi ringeta hi matimba ku khongela. Swi nga si ya ekule, ndzi sungule ku xiya leswaku ndzi nga va munhu wa nkoka emahlweni ka Xikwembu loko ndzi ringeta ku endla leswinene. Leswi swi ndzi  nyike matimba yo endla mindzulamiso.” Loko u hlakulela ku va ni vuxaka na Yehovha, u nga swi navela swinene ku endla ku rhandza ka yena.—Ps. 25:14; Yak. 4:8.

Anakanya hi ntlangu lowu u tshameke u wu tlanga, wo tanihi muravarava kumbe ntlangu wun’wana wo karhi. Loko u nga yi tivi milawu ya kona kumbe u nga swi koti kahle ku wu tlanga, wu ta ku phirha. Kambe loko u yi tiva milawu ya kona naswona u wu tiva kahle ntlangu wolowo, xana a wu nge tsakeli ku tshama u ri karhi u wu tlanga kumbe u endla malunghiselelo yo tlanga ni van’wana? Swi tano na hi mintirho ya Vukreste. Hikwalaho sungula hi ku lunghiselela minhlangano ya Vukreste. Hlanganyela eka mintirho hinkwayo leyi katsekaka evandlheni ra Vukreste. Ku nga khathariseki leswaku u ni malembe mangani, vanhu van’wana va nga ha khutaziwa hi xikombiso xa wena!—Hev. 10:24, 25.

Swi tano na hi ku byela van’wana malunghana ni ripfumelo ra wena. Leswi na swona swi fanele swi endliwa hi rirhandzu, ku nga ri hi ku sindzisiwa. Tivutise: ‘Ha yini ndzi lava ku byela vanhu van’wana malunghana na Yehovha? Hi swihi swivangelo leswi endlaka leswaku ndzi n’wi rhandza?’ U fanele u tiva Yehovha tanihi Tatana la nga ni rirhandzu. Yehovha u tirhise Yeremiya ku tsala a ku: “Entiyisweni mi ta ndzi lava mi tlhela mi ndzi kuma, hikuva mi ta ndzi lavisisa hi mbilu ya n’wina hinkwayo.” (Yer. 29:13, 14) Xana leswi swi lava leswaku u endla yini? Jakub u ri: “Ndzi boheke ku cinca ndlela leyi a ndzi anakanya ha yona. Ndzi sungule ku ya eminhlanganweni ni ku ya ensin’wini ndza ha ri ntsongo, kambe mintirho yoleyo yi hundzuke mukhuva. Ndzi sungule ku wu twisisa kahle ntiyiso loko ndzi ya ndzi n’wi tiva ku antswa Yehovha ndzi tlhela ndzi tiyisa vuxaka bya mina na yena.”

Vanghana lavanene lava khutazaka va nga ku pfuna swinene leswaku u tsakela ntirho wa nsimu. Xivuriso lexi huhuteriweke xi ri: “Loyi a fambaka ni vanhu vo tlhariha u ta tlhariha.” (Swiv. 13:20) Hikwalaho, endla xinghana ni vanhu lava tivekelaka tipakani enhlengeletanweni ya Yehovha va tlhela va tikarhatela ku ti fikelela ni ku n’wi tirhela va tsakile. Jola u ri: “Ku tolovelana ni vantshwa vo tala lava a va tiyimisele ku tirhela Yehovha swi ndzi khutazile. Ndzi sungule ku tsakela ku ya ensin’wini nkarhi na nkarhi.”

Leswi Vatswari Va Nga Swi Endlaka

Jola u ri: “Ndza va nkhensa swinene vatswari va mina hileswi va ndzi dyondziseke hi Yehovha.” Ina, vatswari va nga va ni nkucetelo lowukulu eka ndlela leyi vana va vona va yi hlawulaka. Muapostola Pawulo u tsarile a ku: “N’wina, vatatana, . . . hambetani mi kurisa [vana va n’wina] hi ku tshinya ni nkongomiso wa mianakanyo wa Yehovha.” (Efe. 6:4) Ndzayo leyi huhuteriweke yi swi veka erivaleni leswaku ntirho wa vatswari i ku dyondzisa vana va vona tindlela ta Yehovha, ku nga ri ta vona vini. Ematshan’weni yo khutaza vana va wena leswaku va endla leswi wena a wu ta rhandza leswaku va swi endla, swi ta va swinene ngopfu loko wo va pfuna leswaku va tiyimisela ku hanya hi ku pfumelelana ni swikongomelo swa Yehovha!

U nga ha dyondzisa n’wana wa wena marito ya Yehovha hi ku phindha-phindha naswona “u vulavula ha wona loko u tshama endlwini ya wena, loko u famba egondzweni, loko u etlela niloko u pfuka.” (Det. 6:6, 7) Ewa na Ryszard vatswari va majaha manharhu va ri: “A hi vulavula ngopfu hi mintirho yo hambana-hambana ya nkarhi hinkwawo.” Xana vuyelo byi ve byihi? “Vafana va hina va lave ku tsarisa eka Xikolo xa Vutirheli bya le Tilweni va ha ri vatsongo swinene ivi va va vahuweleri naswona eku heteleleni va tiendlele xiboho xo lava ku khuvuriwa. Loko se va  kurile va tirhe eBethele kutani van’wana va va maphayona.”

Xikombiso lexinene xa vatswari i xa nkoka. Ryszard u ri: “A hi tiyimisele ku ka hi nga hanyi vutomi bya mikoka yimbirhi, ekaya hi hanya hi ndlela yin’wana kasi loko hi ri evandlheni hi hanya hi ndlela yo karhi.” Hikwalaho tivutise: ‘I yini leswi vana va mina va swi dyondzaka eka mahanyelo ya mina? Xana va swi vona leswaku ndzi rhandza Yehovha hi mbilu hinkwayo? Xana va ri xiya rirhandzu rero loko ndzi khongela na vona ni loko va ndzi vona ndzi ri karhi ndzi va na dyondzo ya mina n’wini nkarhi na nkarhi? Xana va ri xiya eka ndlela leyi ndzi rhandzaka ntirho wa nsimu ha yona, eka vuhungasi bya mina, eka ndlela leyi ndzi tekaka swilo leswi vonakaka ha yona ni le ka ndlela leyi ndzi vulavulaka ha yona hi vamakwerhu evandlheni?’ (Luka 6:40) Vana wena va ta xiya vutomi bya wena bya siku na siku kutani va vona loko leswi u swi vulaka swi fambisana ni leswi u swi endlaka.

Loko u ri karhi u kurisa vana i swa nkoka swinene ku pfa u va tshinya. Hambiswiritano, Rito ra Xikwembu leri huhuteriweke ri hi byela leswaku hi “letela mufana hi ndlela leyi nga yakwe.” (Swiv. 22:6) Ewa na Ryszard va ri: “A hi tivekele nkarhi wo va ni dyondzo ya Bibele ni n’wana ha un’we.” Entiyisweni, vatswari va fanele va endla xiboho loko n’wana ha un’we a fanele a fambiseriwa dyondzo ya Bibele a ri yexe kumbe va hlanganile. Ku nga khathariseki leswaku mi hlawula yini, kambe mi fanele mi dzika eka swilaveko swa n’wana ha un’we. Leswi swi lava leswaku va pfumelelana ni swiyimo va tlhela va anakanyela. Hi xikombiso, ematshan’weni yo byela vana va wena leswaku vuyimbeleri byo karhi byi bihile, ha yini u nga va kombi ndlela yo endla swiboho swa vutlhari ni ku kambisisa ndlela leyi milawu ya Bibele yi katsekaka ha yona eka swiboho swoleswo?

Swi nga ha endleka vana va wena va swi tiva kahle leswi u swi languteleke eka vona naswona swi nga ha tikomba onge va endla hinkwaswo leswi u lavaka leswaku va swi endla. Kambe u fanele u fikelela timbilu ta vona. Tsundzuka, “xitsundzuxo lexi nga embilwini ya munhu xi fana ni mati yo enta, kambe munhu wa ku twisisa hi loyi a nga ta xi humesa.” (Swiv. 20:5) Vana la twisisaka, u xiyisisa swikombiso swin’wana ni swin’wana leswi nga ha vangelaka n’wana wa wena swiphiqo kutani u swi lulamisa hi ku hatlisa. Handle ko hehla vana va wena, va kombe leswaku wa va khathalela kutani u va vutisa swivutiso leswi faneleke. Hambiswiritano, tivonele leswaku u nga vutisi swivutiso swo tala. Ku khathala ka wena hi mbilu hinkwayo swi ta endla leswaku u kota ku va pfuna.

 Leswi Vandlha Ri Nga Swi Endlaka

Xana wena tanihi nandza wa Xikwembu u nga swi kota ku pfuna vantshwa lava nga kona evandlheni leswaku va teka milawu ya Xikwembu leyi va dyondzisiweke yona hi vatswari va vona yi ri ya nkoka? Hambileswi vatswari va nga ni vutihlamuleri byo letela vana va vona, swirho leswin’wana swa vandlha swi nga seketela matshalatshala ya vona, ngopfu-ngopfu vakulu. I swa nkoka swinene ku pfuna mindyangu leyi eka yona mutswari un’wana a nga riki Mbhoni ya Yehovha.

Xana vatswari va nga endla yini leswaku va pfuna vana va vona leswaku va rhandza Yehovha nileswaku va titwa va ri va nkoka? Mariusz, loyi a nga mulanguteri evandlheni rin’wana le Poland u ri: “Vakulu va fanele va vulavurisana ni vantshwa lava nga kona evandlheni. Sweswo a swi fanelanga swi endliwa loko ku ri ni swiphiqo ntsena kambe swi fanele swi endliwa nkarhi na nkarhi, va nga ha vulavurisana loko va ri entirhweni wa nsimu, endzhaku ka tidyondzo kumbe hi minkarhi yin’wana.” Ha yini u nga vutisi vantshwa malunghana ni ndlela leyi va titwaka ha yona evandlheni? Ku vulavula ko tano ku ta endla leswaku vantshwa va namarhela vandlha minkarhi hinkwayo naswona va titwa va ri xiphemu xa rona.

Loko u ri nkulu, xana u tolovelana na vona vantshwa va le vandlheni ra ka n’wina? Albert loyi a boxiweke eku sunguleni, loko a ha ri muntshwa u langutane ni miringo yo hambana-hambana, kambe sweswi i nkulu evandlheni. U ri: “Loko ndza ha ri muntshwa, a ndzi lava ku endzeriwa hi vakulu.” Vakulu va nga tlhela va kombisa leswaku va khathala hi vantshwa hi ku va khongelela leswaku va hambeta va tirhela Xikwembu ni leswaku va va ni vuxaka lebyikulu na xona.—2 Tim. 1:3.

I swinene ngopfu leswaku vantshwa va endla mintirho ya le vandlheni. Handle ka sweswo, swi nga endla leswaku va sungula ku hlongorisa tipakani ta misava. Xana n’wina vanhu lavakulu mi nga tirha na vona entirhweni wa nsimu naswona mi endla xinghana na vona? Hungasa na vona, u endla leswaku va ku tshemba ni ku endla xinghana na vona. Jola wa tsundzuka: “Makwerhu wa xisati la nga phayona u ndzi kombise rirhandzu. Leswi a ndzi nga swi hisekeli ku ya ensin’wini, u ndzi pfunile leswaku ndzi kota ku rhandza nsimu hi mbilu hinkwayo.”

Xiboho Xa Wena N’wini

Vantshwa, tivutiseni: ‘Hi tihi tipakani leti ndzi nga tivekela tona? Loko ndzi nga si khuvuriwa, xana ndzi tivekele pakani ya leswaku ndzi khuvuriwa?’ Xiboho xa ku khuvuriwa xi fanele xi va xi sekeriwe eka ku rhandza Yehovha hi mbilu hinkwayo, ku nga ri hikwalaho ka leswi u titwaka u boheka hileswi ku nga ntolovelo wa ndyangu wa ka n’wina.

Onge Yehovha a nga va Munghana wa wena wa xiviri naswona ntiyiso wu va xuma xa wena. Yehovha u vule leswi hi ku tirhisa muprofeta Esaya: “U nga languti ematlhelweni, hikuva mina ndzi Xikwembu xa wena.” Yehovha u ta va na wena, ntsena loko u tshama u ri munghana wa yena. Hakunene u ta ku tiyisa naswona u “ta ku khoma swi tiya hi voko ra [yena] ra xinene ra ku lulama.”—Esa. 41:10.

[Nhlamuselo ya le hansi]

[Xifaniso lexi nga eka tluka 4]

Ringeta ku twisisa leswi nga le mbilwini ya n’wana wa wena

[Xifaniso lexi nga eka tluka 6]

Xiboho xa ku khuvuriwa xi fanele xi va xi sekeriwe eka ku rhandza Yehovha hi mbilu hinkwayo