Mindyangu Ya Vakreste, Tekelelani Xikombiso Xa Yesu!

“Kreste . . . [u] mi siyel[e] ntila leswaku mi landzelerisisa mikondzo yakwe.”—1 PET. 2:21.

1. (a) Hi wihi ntirho lowu N’wana wa Xikwembu a a ri na wona loko ku tumbuluxiwa? (b) Xana Yesu u titwa njhani hi vanhu?

LOKO Xikwembu xi endla matilo ni misava, N’wana wa xona wa mativula a a ri etlhelo ka xona a “ri mutirhi la nga ni vuswikoti.” N’wana wa Xikwembu u tlhele a tirhisana ni Tata wakwe loko Yehovha a ri karhi a tumbuluxa swiharhi leswikulu swo hambana-hambana ni swimilana ni loko A ri karhi a lunghiselela Paradeyisi leyi a yi ta va kaya ra vanhu lava endliweke hi xifaniso xa Yehovha. N’wana wa Xikwembu loyi endzhaku a tiviweke tanihi Yesu, a a va rhandza swinene vanhu. “Swilo leswi a [a] swi rhandza a swi ri ni vana va vanhu.”—Swiv. 8:27-31; Gen. 1:26, 27.

2. (a) I yini leswi Yehovha a swi endleleke vanhu lava nga hetisekangiki? (b) Hi le timhakeni tihi ta vutomi laha Bibele yi nyikaka nkongomiso?

² Endzhaku ka loko vanhu vambirhi vo sungula va dyohile, ku kutsuriwa ka vanhu lava dyoheke ku ve mhaka ya nkoka eka xikongomelo xa Yehovha. Yehovha u lunghiselele xitlhavelo xa nkutsulo xa Kreste leswaku vanhu va ta kota ku kutsuriwa. (Rhom. 5:8) Ku engetela kwalaho, Yehovha u hi nyike Rito rakwe ku nga Bibele, leri kongomisaka vanhu leswaku va kota ku langutana ni ku nga hetiseki. (Ps. 119:105) ERitweni rakwe, Yehovha u nyika vanhu nkongomiso lowu va pfunaka leswaku va va ni ntsako endyangwini. Malunghana ni vukati, buku ya Genesa yi vula leswaku wanuna u fanele a “namarhela nsati wakwe, kutani va fanele va va nyama yin’we.”—Gen. 2:24.

3. (a) I yini leswi Yesu a swi dyondziseke malunghana ni vukati? (b) Hi ta kambisisa yini exihlokweni lexi?

³ Loko Yesu a ha ri laha misaveni, u kandziyise leswaku vatekani va fanele va tshama swin’we vutomi bya vona hinkwabyo. U vulavule hi milawu leyi loko yi tirhisiwa a yi ta va pfuna ku papalata swiendlo ni mahanyelo lama nga vekaka vukati  bya vona ekhombyeni kumbe ma endla leswaku va nga vi na ntsako endyangwini. (Mat. 5:27-37; 7:12) Xihloko lexi xi ta tlhuvutsa ndlela leyi tidyondzo ta Yesu ni xikombiso lexi a xi vekeke loko a ha ri laha misaveni swi nga va pfunaka ha yona vavanuna, vavasati, vatswari swin’we ni vana leswaku va hanya vutomi lebyi tsakisaka ni lebyi enerisaka.

Ndlela Leyi Wanuna La Nga Mukreste A Xiximaka Nsati Wakwe Ha Yona

4. Hi kwihi ku yelana loku nga kona exikarhi ka ntirho wa Yesu ni wa vavanuna lava nga Vakreste?

⁴ Xikwembu xi veke wanuna leswaku a va nhloko ya ndyangu tanihi leswi Yesu a nga Nhloko ya vandlha. Muapostola Pawulo u te: “Wanuna i nhloko ya nsati wakwe tanihi leswi Kreste na yena a nga nhloko ya vandlha, leswi yena a nga muponisi wa miri lowu. Vavanuna, hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona.” (Efe. 5:23, 25) Hikwalaho, ndlela leyi Yesu a khomeke vadyondzisiwa vakwe ha yona yi vekele vavanuna lava nga Vakreste xikombiso xa ndlela leyi va faneleke va khoma vasati va vona ha yona. A hi kambisiseni tindlela tin’wana leti Yesu a kombiseke vulawuri lebyi Xikwembu xi n’wi nyikeke byona.

5. Yesu u byi tirhise njhani vulawuri byakwe eka vadyondzisiwa vakwe?

⁵ Yesu a a ri ni “moya wo rhula ni mbilu yo titsongahata.” (Mat. 11:29) Nakambe a a teka goza loko swi laveka. Minkarhi hinkwayo a a hetisisa vutihlamuleri byakwe. (Mar. 6:34; Yoh. 2:14-17) U nyike vadyondzisiwa vakwe ndzayo hi musa, a phindha-phindha loko swi laveka. (Mat. 20:21-28; Mar. 9:33-37; Luka 22:24-27) Hambiswiritano, Yesu a nga va holovelanga kumbe ku va khomisa tingana hambi ku ri ku va endla va titwa va nga rhandziwi kumbe a va endla va nga ha swi koti ku endla leswi a a va dyondzisa leswaku va swi endla. Ematshan’weni ya sweswo, a a bumabumela ni ku khutaza vadyondzisiwa vakwe. (Luka 10:17-21) A swi hlamarisi leswi Yesu a a xiximiwa hi vadyondzisiwa vakwe hikwalaho ka leswi a a va komba rirhandzu ni ntwela-vusiwana!

6. (a) Vavanuna va nga dyondza yini eka ndlela leyi Yesu a a tirhisana ha yona ni vadyondzisiwa vakwe? (b) Hi xihi xikhutazo lexi Petro a xi nyikeke vavanuna?

⁶ Xikombiso xa Yesu xi dyondzisa vavanuna leswaku vunhloko bya Vukreste a hi xikhundlha xo lawula van’wana hi tihanyi. Ku ri na sweswo, va fanele ku xixima va tlhela va komba van’wana rirhandzu. Muapostola Petro u khutaze vavanuna leswaku va tekelela tindlela ta Yesu ta rirhandzu hi ku “tshama” ni vasati va vona, ‘va va xixima.’ (Hlaya 1 Petro 3:7.) Hikwalaho, xana wanuna a nga byi kombisa njhani vulawuri a tlhela a xixima nsati wakwe?

7. Xana wanuna a nga n’wi xixima hi ndlela yihi nsati wakwe? Kombisa.

⁷ Ndlela yin’wana leyi wanuna a nga kombisaka ha yona leswaku u xixima nsati wakwe i ku rhanga hi ku tiva vonelo ni ndlela leyi nsati wakwe a titwaka ha yona a nga si endla xiboho lexi nga ta khumba ndyangu hinkwawo. Kumbexana ku fanele ku endliwa xiboho malunghana ni ku rhurha, ku cinca ntirho kumbe malunghana ni vutomi bya siku ni siku, leswi katsaka leswaku mi ta ya kwihi mi ya tihungasa kumbe matirhiselo ya mali ya ndyangu leswaku mi kota ku langutana ni ku tlakuka ka nxavo wa swilo. Tanihi leswi ndyangu wu nga ta khumbeka, loko wanuna o rhanga hi ku twa  vonelo ra nsati wakwe u ta va a kombisa musa, hikuva sweswo swi nga ha n’wi pfuna leswaku a teka xiboho lexi faneleke, lexi kombisaka leswaku u anakanyela van’wana naswona nsati wakwe swi ta n’wi olovela leswaku a seketela nuna wa yena. (Swiv. 15:22) Vavanuna lava nga Vakreste lava xiximaka vasati va vona va ta rhandziwa va tlhela va xiximiwa hi vasati va vona, kambe xa nkoka ngopfu, va ta amukeleka eka Yehovha.—Efe. 5:28, 29.

Ndlela Leyi Wansati A Nga Kombisaka Xichavo Lexi Enteke Eka Nuna Wakwe Ha Yona

8. Ha yini xikombiso xa Evha xi fanele ku papalatiwa?

⁸ Vavasati lava nga Vakreste va nga dyondza ndlela yo titsongahatela vulawuri hi ku kambisisa xikombiso lexinene xa Yesu. Xiya ku hambana loku ku nga kona eka ndlela leyi Yesu a byi tekaka ha yona vulawuri ni ndlela leyi wansati wo sungula a byi tekeke ha yona! Evha u tsandzekile ku vekela vavasati xikombiso lexinene. A a fanele a titsongahatela vunhloko bya nuna wakwe loyi Yehovha a a hundzisela milawu hi ku tirhisa yena. Hambiswiritano, Evha a nga byi xiximanga vunhloko bya nuna wa yena. U tsandzekile ku amukela swileriso leswi Adamu a n’wi byeleke swona. (Gen. 2:16, 17; 3:3; 1 Kor. 11:3) Hambileswi Evha a kanganyisiweke; kambe a a fanele a rhange hi ku vutisa nuna wakwe loko a a fanele a tshemba munhu loyi a a vula leswaku u n’wi byela leswi ‘Xikwembu xi swi tivaka.’ Ematshan’weni ya sweswo u ve ni ntiya-nhlana wo tiendlela xiboho hi yexe.—Gen. 3:5, 6; 1 Tim. 2:14.

9. Hi xihi xikombiso lexi Yesu a xi vekeke malunghana ni ku titsongahata?

⁹ Ku hambana ni sweswo, Yesu u veke xikombiso lexinene xo titsongahata eka loyi a nga Nhloko yakwe. Langutelo ra yena ni ndlela leyi a a hanya ha yona swi kombisa leswaku ‘a nga ehleketanga hi ku lwa, ku nga ku lwela ku ringana ni Xikwembu.’ Ematshan’weni ya sweswo, “u tichulurile kutani a teka xivumbeko xa hlonga.” (Filp. 2:5-7) Namuntlha, Yesu wa ha ri ni langutelo leri fanaka tanihi Hosi leyi fumaka. Hi ku titsongahata u tiveka ehansi ka Tata wakwe eka swilo hinkwaswo naswona u seketela vunhloko bya Yena.—Mat. 20:23; Yoh. 5:30; 1 Kor. 15:28.

10. Wansati a nga byi seketela njhani vunhloko bya nuna wakwe?

¹⁰ Wansati la nga Mukreste u fanele a tekelela Yesu hi ku seketela vunhloko bya nuna wakwe. (Hlaya 1 Petro 2:21; 3:1, 2.) Ehleketa hi mhaka leyi eka yona wansati a nga byi seketelaka ha yona vunhloko bya nuna wakwe. N’wana wa vona wa jaha u kombela ku ya emintlangweni yo karhi leyi a bohekaka ku kuma mpfumelelo wa vatswari a nga si ya eka yona. Tanihi leswi vatswari a va nga si bula hi mhaka leyi, swi ta va swinene leswaku manana a n’wi vutisa leswaku, “Xana u n’wi komberile tata wa wena?” Loko n’wana a vula leswaku a a nga si n’wi kombela, manana u fanele ku bula ni nuna wa yena a nga si endla xiboho. Ku engetela kwalaho wansati la nga Mukreste u ta papalata ku kaneta nuna wakwe kumbe ku lwisana ni vonelo rakwe emahlweni ka vana va vona. Loko yena ni nuna wakwe va nga pfumelelani hi mhaka yo karhi, u ta vulavula ni nuna wakwe exihundleni.—Efe. 6:4.

 Yesu I Xikombiso Lexinene Eka Vatswari

11. Hi xihi xikombiso lexinene lexi Yesu a xi vekeleke vatswari?

¹¹ Hambileswi Yesu a a nga tekanga kumbe ku va ni vana, u va vekele xikombiso lexinene vatswari lava nga Vakreste. Njhani? Hi rirhandzu ni hi ku lehisa mbilu u dyondzise vadyondzisiwa va yena hi leswi a a swi vula ni hi ku va vekela xikombiso. U va kombe ndlela yo hetisisa ntirho lowu a va nyikeke wona. (Luka 8:1) Ndlela leyi Yesu a a tirhisana ha yona ni vadyondzisiwa vakwe, yi va dyondzise ndlela leyi na vona a va fanele va hanyisana ha yona.—Hlaya Yohane 13:14-17.

12, 13. I yini leswi lavekaka loko vatswari va lava leswaku vana va vona va kula va ri karhi va chava Xikwembu?

¹² Hakanyingi vana va tekelela xikombiso xa vatswari va vona ku nga khathariseki leswaku i xinene kumbe i xo biha. Hikwalaho, vatswari tivutiseni: ‘Xana vana va hina va dyondza yini eka nkarhi lowu hi wu hetaka hi ri karhi hi hlalela TV, hi ri eku tihungaseni, eku hlayeni ka Bibele ni ndlela leyi hi seketelaka ntirho wa nsimu ha yona? Kahle-kahle hi swihi swilo leswi hi swi rhangisaka endyangwini wa hina? Xana hi veka xikombiso lexinene hi ku rhangisa vugandzeri bya ntiyiso evuton’wini bya hina?’ Nawu wa Xikwembu wu fanele wu rhanga wu va etimbilwini ta vatswari, loko va lava leswaku vana va vona va kula va ri karhi va chava Xikwembu.—Det. 6:6.

¹³ Loko vatswari va lwela ku tirhisa milawu ya Bibele etimhakeni ta siku ni siku, vana va vona va ta swi xiya sweswo. Leswi vatswari va swi vulaka ni leswi va swi dyondzisaka swi ta va ni ntikelo eka vana va vona. Hambiswiritano, loko vana va xiya leswaku vatswari va vona a va hanyi hi leswi va va dyondzisaka swona, va nga ha hetelela hi ku vula leswaku milawu ya le Bibeleni a hi ya nkoka kumbe a yi pfuni nchumu. Hikwalaho, vana va nga ha tsandzeka ku hlula ntshikilelo wa misava.

14, 15. Hi swihi swilo swa nkoka leswi vatswari va faneleke va pfuna vana va vona leswaku va swi hlakulela, naswona hi yihi ndlela yin’wana leyi va nga endlaka sweswo ha yona?

¹⁴ Vatswari lava nga Vakreste va swi tiva leswaku ku kurisa n’wana swi katsa swo tala ku tlula ku khathalela swilaveko swa yena swa nyama. Hikwalaho, swi ta va swi nga ri vutlhari ku dyondzisa n’wana leswaku a lava ku fikelela tipakani leti nga ta enerisa swilaveko swa yena swa nyama ntsena. (Ekl. 7:12) Yesu u dyondzise vadyondzisiwa vakwe leswaku va rhangisa mfumo wa Xikwembu ni ku lulama ka xona. (Mat. 6:33) Hikwalaho vatswari lava nga Vakreste va fanele tekelela Yesu hi ku tlhela va tikarhatela ku endla leswaku vana va vona va navela ku endla leswi engetelekeke entirhweni wa Xikwembu.

¹⁵ Ndlela yin’wana leyi vatswari va nga swi endlaka ha yona sweswo, i ku endla leswaku vana va vona va tolovelana ni vanhu lava nga eka ntirho wa nkarhi hinkwawo. Xiya ndlela leyi swi nga va khutazaka ha yona vantshwa loko va tolovelana ni maphayona kumbe mulanguteri wa xifundzha ni nsati wakwe. Ku endzela varhumiwa, vatirhi va le Bethele ni lava tirhaka entirhweni wo aka wa misava hinkwayo, swi nga endla leswaku va vona ntsako lowu va nga na wona wo tirhela Yehovha. A swi kanakanisi leswaku vaendzi volavo va ta va chumbutela mintokoto leyi tsakisaka. Xikombiso xa vona xa ku tinyiketela hi mbilu hinkwayo xi nga va pfuna swinene vana va wena leswaku va endla swiboho swa vutlhari, va tivekela  tipakani leti vuyerisaka hakunene naswona va kuma dyondzo leyi nga ta va pfuna leswaku va kota ku tiwundla loko va ri eka ntirho wa nkarhi hinkwawo.

Vana—I Yini Leswi Nga Ta Mi Pfuna Leswaku Mi Landzela Xikombiso Xa Yesu?

16. Xana Yesu u va xixime hi ndlela yihi vatswari va yena va laha misaveni ni Tata wakwe wa le tilweni?

¹⁶ Vana, na n’wina Yesu u mi vekele xikombiso lexinene. Yesu u kurisiwe hi Yosefa na Mariya naswona a a va yingisa. (Hlaya Luka 2:51.) U swi xiyile leswaku hambileswi a va nga hetisekanga, Xikwembu a xi va nyike vutihlamuleri byo n’wi kurisa. Hikwalaho, Yesu a a fanele ku va xixima. (Det. 5:16; Mat. 15:4) Loko a kurile, minkarhi hinkwayo Yesu a a endla swilo leswi nga ta tsakisa Tata wa yena wa le tilweni. Leswi swi endle leswaku a kota ku lwisana ni miringo. (Mat. 4:1-10) N’wina vantshwa, minkarhi yin’wana mi nga ha ringeka leswaku mi nga va yingisi vatswari va n’wina. Hikwalaho, i yini lexi nga ta mi pfuna leswaku mi landzela xikombiso xa Yesu?

17, 18. (a) Hi wihi ntshikilelo lowu vantshwa va langutanaka na wona exikolweni? (b) Vantshwa va nga kota ku tiyisela miringo loko va tsundzuka yini?

¹⁷ Swi nga ha endleka vanhu lava u nghenaka na vona xikolo va nga yi tivi milawu ya le Bibeleni. Va nga ha ku kucetela leswaku mi endla swilo swo huma endleleni naswona va ku endla xihlekiso loko u ala. Xana minkarhi yin’wana vanhu lava u nghenaka na vona xikolo va ku hlekula hikwalaho ka leswi u alaka ku hlanganyela na vona eka mikhuva yo karhi yo biha? Loko swi ri tano, xana u endla yini? Wa swi tiva leswaku loko u pfumelela sweswo swi ku chavisa kutani u sungula ku endla leswi va swi endlaka, u ta khomisa vatswari va wena na Yehovha tingana. Xana ku ta humelela yini loko u endla leswi endliwaka hi lava u nghenaka na vona xikolo? Kumbexana u tivekele tipakani to karhi, to tanihi ku va phayona, nandza wa vutirheli, ku ya chumayela laha ku nga ni xilaveko lexikulu xa vahuweleri va Mfumo kumbe ku ya tirha eBethele. Xana ku tolovelana ni lava u nghenaka na vona xikolo swi ta ku pfuna leswaku u fikelela tipakani ta wena?

¹⁸ N’wina vantshwa lava nga le mavandlheni ya Vukreste, xana minkarhi yin’wana mi tikuma mi ri ehansi ka swiyimo leswi ringaka ripfumelo ra n’wina? Xana mi endla yini? Ehleketani hi xikombiso lexi Yesu a mi vekeleke xona. U hlule miringo kutani a tiyimisela hi ku helela ku endla leswinene. Ku tsundzuka leswi swi ta ku nyika matimba yo byela lava u nghenaka na vona xikolo leswaku a wu swi lavi ku hlanganyela na vona eku endleni ka leswo biha. Ku fana na Yesu, tshama u ri karhi u anakanyisisa hi ntshembo wo tirhela Yehovha u tsakile naswona u n’wi yingisa hilaha ku nga heriki.—Hev. 12:2.

Ndlela Yo Kuma Ntsako eNdyangwini

19. I yini leswi nga hi tiselaka ntsako wa xiviri endyangwini?

¹⁹ Yehovha Xikwembu na Yesu Kreste va khathala swinene hi vanhu. Hambileswi hi nga hetisekangiki, hi nga wu kuma ntsako. (Esa. 48:17, 18; Mat. 5:3) Yesu u dyondzise ntiyiso lowu endlaka leswaku vanhu va kuma ntsako, kambe sweswo a hi swona ntsena leswi a swi dyondziseke vadyondzisiwa vakwe. Yesu u tlhele a va dyondzisa ndlela leyinene leyi va faneleke va hanya ha yona. Ku engetela kwalaho u va vekele xikombiso lexinene xo hanya vutomi byo olova ni ku ringanisela. Hinkwerhu ka hina endyangwini hi nga vuyeriwa loko hi landzela xikombiso xa yena. Hikwalaho, vavanuna, vavasati, vatswari swin’we ni vana va tekelela xikombiso xa Yesu! Ku khomelela eka tidyondzo ta Yesu ni ku tekelela xikombiso xakwe swi ta endla leswaku hi tsakela vutomi endyangwini hi tlhela hi eneriseka.

U Nga Hlamula Njhani?

• Vavanuna va nga byi tirhisa njhani vulawuri lebyi Xikwembu xi va nyikeke byona?

• Wansati a nga xi tekelela njhani xikombiso xa Yesu?

• Vatswari va nga dyondza yini eka ndlela leyi Yesu a va khomeke ha yona vadyondzisiwa vakwe?

• Vantshwa va nga dyondza yini eka xikombiso xa Yesu?

[Swivutiso Swa Dyondzo]

[Xifaniso lexi nga eka tluka 8]

I yini leswi wanuna la nga ni rirhandzu a nga ta swi endla loko a nga si teka xiboho lexi khumbaka ndyangu?

[Xifaniso lexi nga eka tluka 9]

Hi le hansi ka swiyimo swihi laha wansati a faneleke ku seketela vunhloko bya nuna wakwe?

[Xifaniso lexi nga eka tluka 10]

Vana va tekelela mahanyelo lamanene ya vatswari va vona