Ku Nyikela Vumbhoni Endhawini Ya Ku Xavisela

LOKO a ri le Atena, siku ni siku muapostola Pawulo a a ya endhawini yo xavisela leswaku a ya chumayela mahungu lamanene hi Yesu. (Mint. 17:17) Pawulo u hlawule ku ya chumayela endhawini yo xavisela hikuva Vaatena a va heta nkarhi wa vona wo tala va ri endhawini leyi.

Endzhaku ka malembe ya kwalomu ka 2 000, vanhu va Yehovha va ha chumayela etindhawini ta vuxaviselo leswaku va twarisa rungula ra Mfumo wa Xikwembu. Ha yini? Hikuva vanhu vo tala va kumeka kona. Namuntlha ndhawu ya vuxaviselo ku nga va ndhawu leyi nga ni switolo swo tala. Timbhoni tin’wana ti kombele mpfumelelo eka mininjhere kumbe n’wini wa xitolo ivi ti veka tafula leri nga ni tibuku leti sekeriweke eBibeleni.

Hi xikombiso, endhawini leyi nga ni switolo swo tala le New Jersey, eU.S.A., ku vekiwe minkandziyiso leyi vulavulaka hi mhaka leyi nge “Xana Mi Nga Byi Hlayisa Njhani Vuxaka Lebyinene eNdyangwini?” Vuyelo byi ve byihi? Hi siku rin’we ku fambisiwe tibuku ta 153 hi tindzimi ta tsevu.

Wansati un’wana loyi a tshineleleke tafula leri a ri ri na tibuku u yingiserisisile loko Mbhoni yin’wana yi ri karhi yi n’wi hlamusela. Wansati loyi u pfumerile leswaku i swa nkoka ku endla ku rhandza ka Xikwembu evuton’wini bya hina ni le mindyangwini ya hina. U kombele tibuku leti landzelaka: Dyondza Eka Mudyondzisi Lonkulu, Xihundla Xa Ntsako eNdyangwini ni leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka.

Ninhlikanhi wanuna un’wana u hundze laha a ku vekiwe tibuku loko a nga si nghena exitolo lexi a xi ri kusuhi na ndhawu yoleyo. U kokiwe mahlo hi buku leyi nge Vantshwa Va Vutisa. Makwerhu wa xisati loyi a yime kwalaho u swi xiyile leswaku wanuna loyi a a yi tsakela buku leyi. U vutise wanuna loyi a ku: “Xana ku na leyi u yi tsakelaka?” U pfumerile hi nhloko kutani a a kombetela buku  leyi nge Vantshwa Va Vutisa. Makwerhu loyi u nyike wanuna loyi buku leyi ana se a a lunghekele ku yi amukela. U vule leswaku u na vana vanharhu. Loko va ri karhi va vulavula u hlamusele leswaku u burisana ni vana va yena kan’we hi vhiki. Vambirhi va le malembeni ya ka kondlo-a-ndzi-dyi. Loko a ri karhi a phendla buku leyi, u vule leswaku a nga tirhisa yona loko a ri karhi a burisana ni ndyangu wa yena. Muhuweleri loyi u tlhele a komba wanuna loyi buku leyi nge Xihundla Xa Ntsako eNdyangwini, a n’wi tiyisekisa leswaku yena ni nsati wa yena va nga kuma switsundzuxo leswi nga ta va pfuna loko va endla swiboho swa ndyangu. Wanuna loyi u xi tlangerile xiringanyeto xolexo kutani a nyikela hi mali naswona u pfumerile leswaku Timbhoni ti n’wi endzela ni ndyangu wa yena.

Xana Timbhoni ti titwe njhani hi siku ra tona ro nyikela vumbhoni endhawini leyi nga ni switolo swo tala? Makwerhu un’wana wa xisati u te: “Ndzi swi tsakerile ku chumayela hi ndlela leyi. A swi tsakisa swinene!” Makwerhu un’wanyana wa xisati u te: “Yehovha u vule leswaku mahungu lamanene ma ta chumayeriwa ku ya fika etindhawini ta le kule swinene ta misava. Namuntlha eParamus, le New Jersey, mahungu lawa lamanene ma chumayeriwe eka vanhu va tindzimi to hambana-hambana. A swi tsakisa ku chumayela endhawini leyi nga ni switolo swo tala. Un’wana ni un’wana loyi a chumayeleke hi ndlela leyi a a tsakile. Hinkwerhu ka hina a hi nga ha lavi ku famba.”

Xana u nga chumayela mahungu lamanene hi tindlela to hambana-hambana? Endlelo ra hina lerikulu ro chumayela i ku famba hi yindlu ni yindlu. (Mint. 20:20) Hambiswiritano, xana u nga swi ringeta ku chumayela endhawini leyi nga ni switolo swo tala?