Gome Lerikulu Leri Tekaka Nkarhi Wo Leha

SWESWINYANA, mukambisisi un’wana u ringete ku kumisisa leswaku lava nga exirilweni xa ku feriwa hi vanhu lava va va rhandzaka va titwa njhani endzhaku ka nkarhi. U rhumele maphepha ya swivutiso eka vatswari vo talanyana lava a ku hundze malembe yo hlayanyana va feriwe hi vana. A hi vatswari hinkwavo lava hlamuleke. Vladimir, tatana loyi a ku hundze malembe ya ntlhanu a feriwe hi n’wana wa jaha, u vule leswaku swa ha n’wi tikela ku vulavula hi n’wana wakwe. *

Gome ro tano leri tekaka nkarhi wo leha ri tolovelekile eka vatswari lava feriweke. Eka malembe ya khume lama hundzeke William u feriwe hi n’wana wa jaha wa 18 wa malembe hi ku nwela ematini. William u tsarile a ku, “Rifu rakwe ra ha ndzi twisa ku vava, naswona ndzi ta fa ndza ha twa ku vava.” Loko ku hundze malembe ya ntlhanu Lucy a feriwe hi n’wana wakwe wa mufana hikwalaho ka vuvabyi bya xitshuketa, u tsarile a ku: “Eka masiku yo hlayanyana yo sungula, a ndzi tshamela ku vula ndzi ku, ‘A hi ntiyiso.’ Ndzi titwe onge ndzo lorha naswona ndzi ta pfuka ku nga ri khale. Endzhaku ka nkarhi wo leha ndzi sungule ku swi xiya leswaku a ku ri ntiyiso, leswaku n’wana wa mina a nge he vuyi ekaya. N’wana wa mina u fe malembe ya ntlhanu lama hundzeke, kambe minkarhi yin’wana loko ndzi ri ndzexe, mihloti ya mina ya xiririka loko ndzi n’wi kumbuka.”

Ha yini vatswari lava feriweke hi vana, vo tanihi Vladimir, William na Lucy, va titwa va ri ni gome lerikulu leri tekaka nkarhi wo leha? A hi xiyeni swivangelo swin’wana.

Ha Yini Ku Ri Ni Gome Ronghasi?

Loko endyangwini ku tswariwa n’wana, ntsako lowu vatswari va vaka na wona a wu hlamuseleki. Loko va xinga ricece ra vona, va ri nyanga loko ri etlele, kumbe va vona ku n’wayitela ka rona, va tsaka swinene ni ku eneriseka. Vatswari lava nga ni rirhandzu va khathalela vana va vona. Va va letela leswaku va tikhoma kahle ni ku va ni mahanyelo lamanene. (1 Vatesalonika 2:7, 11) Loko vana va amukela vuleteri lebyi, vatswari va tinyungubyisa ha vona, kutani va sungula ku va ni ntshembo lowukulu ha vona.

Vatswari lava khathalaka va tirha hi matimba leswaku va wundla vana va vona. Nkarhi na nkarhi va nga ha veka mali kumbe nhundzu etlhelo leswaku va kota ku pfuna vana va vona, va tisungulela mindyangu ya vona enkarhini lowu taka. (2 Vakorinto 12:14) Sweswo hinkwaswo swi  kombetela eka mhaka yin’we—vatswari va kurisa vana va vona leswaku va hanya, ku nga ri ku fa. Loko n’wana a fa, ntirho wo n’wi kurisa wu helela empfhukeni naswona ntshembo wa vatswari hi yena wa nyamalala. Rirhandzu lerikulu leri vatswari va nga na rona eka n’wana wa vona a ra ha yi helo, ri siveriwa hi xihingakanyo lexi simeke xa rifu. Ku fa ka n’wana wa vona ku siya vangwa lerikulu etimbilwini ta vona. Vatswari va titwa va ri ni gome lerikulu leri nga heriki hi ku olova.

Bibele yi tiyisekisa leswaku vatswari lava feriweke hi vana va va ni gome lerikulu leri tekaka nkarhi wo leha. Loko yi hlamusela ndlela leyi kokwa wa hina Yakobe a titweke ha yona loko a twa leswaku Yosefa n’wana wakwe u dlayiwile, Bibele yi ri: “Yakobe a handzula minkhancu yakwe hi le xikarhi kutani a ambala nguvu yo khwaxa emasengeni ya yena naswona a rila n’wana wakwe masiku yo tala. Kutani vana vakwe va majaha hinkwavo ni va vanhwanyana hinkwavo va hambeta va ta ku ta n’wi chavelela, kambe a nga chaveleleki, a ku: ‘Ndzi ta rhelela eSheol [kumbe esirheni] eka n’wananga ndza ha rila!’” Ku hundze malembe Yakobe a ha rila n’wana wakwe, loyi a a ehleketa leswaku u file. (Genesa 37:34, 35; 42:36-38) Xikombiso xin’wana xa le Bibeleni xi katsa wansati wo tshembeka la vuriwaka Nawomi loyi a a feriwe hi vana vakwe vambirhi va majaha. Hikwalaho ka gome lerikulu, u lave ku cinca vito rakwe ra Nawomi, leri vulaka “Ku Tsaka Ka Mina,” ri va Marha, ku nga “Ku Bava.”—Rhuti 1:3-5, 20, 21.

Hambiswiritano, Bibele a yi hlamuseli hi ta gome leri vatswari va nga na rona ntsena. Kambe yi kombisa ni ndlela leyi Yehovha a va tiyisaka ha yona lava nga ni gome. Eka xihloko lexi landzelaka, hi ta bula hi tindlela tin’wana leti Xikwembu xi va chavelelaka ha tona lava rilaka.

[Nhlamuselo ya le hansi]