“Ku Pfuka Ko Sungula Ka Vafi”—Ku Le Ku Endlekeni Sweswi!
“Ku Pfuka Ko Sungula Ka Vafi”—Ku Le Ku Endlekeni Sweswi!
“Lava feke evun’weni na Kreste va ta sungula va pfuka.”—1 VATESALONIKA 4:16.
1, 2. (a) Hi wihi ntshembo lowu nga kona malunghana ni lava feke? (b) Hi xihi xisekelo lexi u nga na xona xa ku pfumela leswaku ku ta va ni ku pfuxiwa ka lava feke? (Vona nhlamuselo ya le hansi.)
“LAVA hanyaka va swi tiva leswaku va ta fa.” Ku sukela loko Adamu a dyohile, sweswo swi ve ntiyiso. Ematin’wini hinkwawo, un’wana ni un’wana loyi a tswariwaka wa swi tiva leswaku u ta fa eku heteleleni, naswona vo tala va tivutisile va ku: ‘I yini lexi nga ta landzela? Xiyimo xa vafi hi xihi?’ Bibele ya hlamula: “Loko ku ri lava feke, a va tivi nchumu nikatsongo.”—Eklesiasta 9:5.
2 Kutani, xana wu kona ntshembo malunghana ni lava feke? Ina. Entiyisweni, wu fanele wu ri kona, loko ku ri leswaku xikongomelo xo sungula xa Xikwembu hi vanhu xi ta hetiseka. Se ku hele malembe-xidzana yo tala, malandza yo tshembeka ya Xikwembu ma ri karhi ma kombisa ripfumelo eka xitshembiso xa Yehovha malunghana ni Mbewu leyi nga ta herisa Sathana ni maxangu lawa a ma vangeke. (Genesa 3:15) Vo tala va file. Leswaku va vona ku hetiseka ka xitshembiso xexo ni swin’wana leswi Yehovha a swi tshembiseke, va fanele va pfuxiwa eka lava feke. (Vaheveru 11:13) Xana sweswo swi ta koteka? Ina. Muapostola Pawulo u te: “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Siku rin’wana Pawulo u tshame a pfuxa jaha rin’wana leri vuriwaka Yutiko, leri weke efasitereni ra xithezi xa vunharhu kutani ri “tlakuriwa ri file.” Jaha leri hi rona ro hetelela eka vanhu va kaye lava pfuxiweke eku feni lava vikiweke eBibeleni.—Mintirho 20:7-12. *
3. Hi wihi nchavelelo lowu u wu kumeke eka marito ya Yesu lama tsariweke eka Yohane 5:28, 29, naswona ha yini?
3 Ku pfuxiwa ka vanhu volavo va kaye hi kona ku hi susumetelaka ku kholwa nhlamuselo ya Pawulo. Ku endla leswaku hi xi tshemba swinene xitiyisekiso xa Yesu lexi nge: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.” (Yohane 5:28, 29) Marito lawa ma chavelela hakunene! Naswona ma chavelela swinene eka vanhu va timiliyoni lava feriweke hi vanhu lava va va rhandzaka!
4, 5. Hi kwihi ku pfuxiwa ko hambana-hambana loku Bibele yi vulavulaka ha kona, naswona eka xihloko lexi ku ta tlhuvutsiwa ku pfuxiwa ka muxaka muni?
4 Vo tala lava nga ta pfuxiwa va ta hanya emisaveni leyi nga ta va yi ri ni ku rhula ehansi ka Mfumo wa Xikwembu. (Pisalema 37:10, 11, 29; Esaya 11:6-9; 35:5, 6; 65:21-23) Hambiswiritano, vanhu van’wana a va ta pfuxiwa sweswo swi nga si endleka. Xo sungula, Yesu Kreste a a fanele a pfuxiwa leswaku a nyikela ntikelo wa gandzelo rakwe eka Xikwembu hikwalaho ka hina. Yesu u file a tlhela a pfuxiwa hi 33 C.E.
5 Xa vumbirhi, swirho leswi totiweke swa “Israyele wa Xikwembu” swi fanele swi hlangana na Hosi Yesu Kreste eku vangameni ka le tilweni, laha swi nga ta “va ni Hosi minkarhi hinkwayo.” (Vagalatiya 6:16; 1 Vatesalonika 4:17) Xiendlakalo xexo xi vuriwa “ku pfuxiwa ko sungula eka lava feke” kumbe ‘ku pfuka ko sungula ka vafi.’ (Vafilipiya 3:10, 11; Nhlavutelo 20:6) Loko ku pfuxiwa koloko ku herile, ku ta fika nkarhi wa leswaku vanhu va timiliyoni va pfuxeriwa emisaveni va ri ni ntshembo wo kuma vutomi lebyi nga heriki eParadeyisini. Hikwalaho, ku nga khathariseki leswaku hi ni ntshembo wa ku ya hanya etilweni kumbe emisaveni, hi ku langutele hi mahlo-ngati ‘ku pfuka ko sungula ka vafi.’ Xana i ku pfuxiwa ka muxaka muni? Ku endleka rini?
“Hi Miri Wa Muxaka Muni?”
6, 7. (a) Loko Vakreste lava totiweke va nga si ya etilweni, ku fanele ku humelela yini? (b) Va ta pfuxiwa va ri ni miri wa muxaka muni?
6 Eka papila ra yena ro sungula leri yaka eka Vakorinto, Pawulo u pfuxe xivutiso malunghana ni ku pfuxiwa ko sungula ka vafi: “Lava feke va ta pfuxiwa njhani? Ina, xana va ta huma hi miri wa muxaka muni?” Kutani u hlamule xivutiso xexo a ku: “Lexi u xi byalaka a xi hanyi loko xi nga sungulanga xi fa . . . kambe Xikwembu xi yi nyika miri hilaha xi rhandzaka hakona . . . Ku vangama ka mimiri ya le tilweni i ka muxaka wun’wana, ni ka mimiri ya le misaveni i ka muxaka wun’wanyana.”—1 Vakorinto 15:35-40.
7 Marito ya Pawulo ma kombisa leswaku Vakreste lava totiweke hi moya lowo kwetsima va fanele va fa ku sungula va nga si kuma hakelo ya vona ya le tilweni. Loko va fa, mimiri ya vona ya laha misaveni yi tlhelela entshurini. (Genesa 3:19) Hi nkarhi lowu vekiweke hi Xikwembu, va pfuxiwa va ri ni miri lowu lunghekeleke ku ya hanya etilweni. (1 Yohane 3:2) Nakambe Xikwembu xi endla leswaku va nga ha fi. Sweswo a va tswariwi na swona, onge hiloko va hefemuleriwe moya-xiviri lowu nga fiki. Pawulo u ri: “Nchumu lowu wu faka, wu fanele wu ambala ni ku ka wu nga fi.” Ku nga fi i nyiko leyi humaka eka Xikwembu, leyi ‘ambariwaka’ hi lava pfuxiwaka eku pfukeni ko sungula ka vafi.—1 Vakorinto 15:50, 53; Genesa 2:7; 2 Vakorinto 5:1, 2, 8.
8. Hi swi tivisa ku yini leswaku lava 144 000 Xikwembu a xi va hlawuli eka swirho swa vukhongeri byo hambana-hambana?
8 Hi lava 144 000 ntsena lava pfuxiwaka ku sungula eka lava feke. Yehovha u sungule ku va hlawula hi Pentekosta ya 33 C.E., endzhakunyana ka loko a pfuxe Yesu eka lava feke. Hinkwavo “va tsariwe vito ra [Yesu] ni vito ra Tata wa [yena] emimombyeni ya vona.” (Nhlavutelo 14:1, 3) Hikwalaho, a va hlawuriwanga eka vukhongeri byo tala byo hambana-hambana. Hinkwavo i valandzeri va Kreste, naswona hinkwavo va tinyungubyisa hi ku byarha vito ra Tatana—ku nga Yehovha. Loko va pfuxiwa, va kuma xiavelo xo ya tirha etilweni. Ntshembo wo tirhela Xikwembu hi ndlela yo tano leyi kongomeke wa tsakisa eka vona.
Xana Va Pfuxiwa Sweswi?
9. Xana Nhlavutelo 12:7 na 17:14 yi hi pfuna njhani leswaku hi twisisa nkarhi lowu ku pfuxiwa ko sungula ku endlekaka ha wona?
9 Xana ku pfuxiwa ko sungula ka vafi ku humelela rini? Ku ni vumbhoni lebyi tiyeke bya leswaku ku le ku endlekeni sweswi. Hi xikombiso, ringanisa tindzima timbirhi ta Nhlavutelo. Xo sungula, languta eka Nhlavutelo ndzima 12. Eka yona hi hlaya leswaku Yesu Kreste la ha ku vekiwaka exiluvelweni, swin’we ni tintsumi takwe to kwetsima, va lwa na Sathana ni madimona ya yena. (Nhlavutelo 12:7-9) Hilaha nkandziyiso lowu wu kombiseke hakona, nyimpi yoleyo yi sungule hi 1914. * Kambe, xiya leswaku ku hava laha ku vuriwaka leswaku valandzeri lava totiweke va Kreste va hlanganyela na Yesu eka nyimpi yoleyo ya le tilweni. Sweswi languta eka Nhlavutelo ndzima 17. Eka yona hi hlaya leswaku endzhaku ka ku lovisiwa ka “Babilona Lonkulu,” Xinyimpfana xi ta hlula matiko. Kutani ya engetela yi ku: “Nakambe, lava vitaniweke, lava hlawuriweke naswona va tshembekeke, lava nga na [yena], va ta [ma] hlula na vona.” (Nhlavutelo 17:5, 14) “Lava vitaniweke, lava hlawuriweke naswona va tshembekeke” va fanele va va va pfuxiwile loko va ta va na Yesu loko a hlula misava ya Sathana ro hetelela. Hikwalaho, vatotiwa lava faka Armagedoni yi nga si fika va pfuxiwa exikarhi ka 1914 na Armagedoni.
10, 11. (a) I vamani vakulu va 24, naswona un’wana wa vona u hlavutele yini eka Yohane? (b) Hi nga fikelela makumu wahi hi mhaka leyi?
10 Xana hi nga vula hi ku kongoma leswaku ku pfuxiwa ko sungula ka vafi ku sungule rini? Ku na vuthala lebyi tsakisaka eka Nhlavutelo 7:9-15, laha muapostola Yohane a hlamuselaka xivono xa yena xa “ntshungu lowukulu, lowu a ku nga ri na munhu la kotaka ku wu hlaya.” Nhlamuselo ya ntshungu wolowo lowukulu yi hlavuteriwe Yohane hi un’wana wa vakulu va 24, naswona vakulu lava va yimela vadyandzhaka swin’we na Kreste va 144 000 eku vangameni ka le tilweni. * (Luka 22:28-30; Nhlavutelo 4:4) Yohane a a ri ni ntshembo wo ya ematilweni; kambe leswi a a ha ri laha misaveni loko nkulu un’wana a vulavula na yena, swi le rivaleni leswaku exivonweni xexo Yohane a a yimela vatotiwa lava a va ha ri laha misaveni, lava a va nga si kuma hakelo ya vona ya le tilweni.
11 Kutani hi nga gimeta hi yini eka mhaka ya ku va nkulu un’wana wa lava va 24 a hlavutela ntshungu lowukulu eka Yohane? Swi tikomba onge lava pfuxiweke lava nga swirho swa vakulu va 24 va hlanganyela eku hundziseni ka tidyondzo ta Xikwembu ta ntiyiso namuntlha. Hikwalaho ka yini sweswo swi ri swa nkoka? Hikuva nhlamuselo ya ntiyiso hi ntshungu lowukulu yi hlavuteriwe eka malandza ya Xikwembu lama totiweke lawa a ma ha ri laha misaveni hi 1935. Loko ku ri leswaku ku tirhisiwe un’wana wa vakulu va 24 leswaku a hundzisa ntiyiso lowu wa nkoka, swi vula leswaku u pfuxeriwe ematilweni emahlweni ka 1935. Leswi swi kombisa leswaku ku pfuxiwa ko sungula ka vafi ku sungule exikarhi ka 1914 na 1935. Xana swi nga koteka ku nyikela nhlamuselo leyi kongomeke?
12. Hlamusela leswaku ha yini ximun’wana xa 1918 xi vonaka ku ri nkarhi lowu ku pfuxiwa ko sungula ka vafi ku sunguleke ha wona.
12 Eka yinhla leyi, swi nga pfuna ku kambisisa mhaka leyi fambisanaka ni yoleyo eBibeleni. Yesu Kreste u totiwe tanihi Hosi ya Mfumo wa Xikwembu ya nkarhi lowu taka hi xixikana xa 29 C.E. Endzhaku ka malembe manharhu ni hafu, hi ximun’wana xa 33 C.E., u pfuxiwile tanihi xivumbiwa xa moya lexi nga ni matimba. Tanihi leswi Yesu a vekiweke exiluvelweni hi xixikana xa 1914, xana swi nga endleka leswaku ku pfuxiwa ka vatotiwa va yena lava tshembekaka ku sungule endzhaku ka malembe manharhu ni hafu, hi ximun’wana xa 1918? Sweswo swi nga va tano. Hambileswi Bibele yi nga yi boxiki hi ku kongoma mhaka leyi, yi fambisana ni matsalwa man’wana lama kombisaka leswaku ku pfuxiwa ko sungula ka vafi ku sungule endzhakunyana ka ku sungula ka vukona bya Kreste.
13. Xana 1 Vatesalonika 4:15-17 yi ringanyeta njhani leswaku ku pfuxiwa ko sungula ka vafi ku humelele eku sunguleni ka vukona bya Kreste?
13 Hi xikombiso, Pawulo u tsarile: “Hina lava hanyaka lava poneke ku fikela eka vukona bya Hosi [ku nga ri emakumu ya vukona bya yona] a hi nge va rhangeli nikatsongo lava etleleke eku feni; hikuva Hosi hi yoxe yi ta xika hi le tilweni hi rito ro lerisa, hi rito ra ntsumi leyikulu ni hi mhalamhala ya Xikwembu, kutani lava feke evun’weni na Kreste va ta sungula va pfuka. Endzhaku hina lava hanyaka lava poneke, hi ta tekiwa swin’we na vona hi ri emapapeni hi ya hlangana ni Hosi emoyeni; xisweswo hi ta va ni Hosi minkarhi hinkwayo.” (1 Vatesalonika 4:15-17) Hikwalaho, Vakreste lava totiweke lava feke emahlweni ka vukona bya Kreste va pfuxeriwe etilweni emahlweni ka lava a va ha hanya hi nkarhi wa vukona bya Kreste. Leswi swi vula leswaku ku pfuxiwa ko sungula ka vafi ku fanele ku sungule eku sunguleni ka vukona bya Kreste, naswona ku ya emahlweni “hi nkarhi wa vukona bya yena.” (1 Vakorinto 15:23) Ematshan’weni ya ku pfuxiwa ka vanhu hinkwavo hi nkarhi wun’we, ku pfuxiwa ko sungula ka vafi ku endleka nkarhi wo leha.
‘Un’wana Ni Un’wana Wa Vona A Nyikiwa Nguvu Yo Leha Yo Basa’
14. (a) Xana swivono leswi hlamuseriwaka eka Nhlavutelo ndzima 6 swi hetiseka rini? (b) I yini leswi hlamuseriwaka eka Nhlavutelo 6:9?
14 Nakambe, xiya vumbhoni lebyi nga eka Nhlavutelo ndzima 6. Eka yona Yesu u voniwa a khandziye hanci tanihi Hosi leyi hluleke. (Nhlavutelo 6:2) Matiko ma le nyimpini leyikulu. (Nhlavutelo 6:4) Ku ni ndlala leyikulu. (Nhlavutelo 6:5, 6) Vanhu va weriwe hi mintungu leyi dlayaka. (Nhlavutelo 6:8) Swiendlakalo leswi hinkwaswo leswi profetiweke swi fambisana kahle ni swiyimo swa misava ku sukela hi 1914. Kambe ku humelela ni swin’wana. Mianakanyo ya hina yi yisiwa ealtarini ya magandzelo. Etshakwini ra yona ku ni “mimoya-xiviri . . . ya lava dlayiweke hikwalaho ka rito ra Xikwembu ni hikwalaho ka ntirho lowu a va ri na wona wa ku nyikela vumbhoni.” (Nhlavutelo 6:9) Leswi “moya-xiviri [kumbe vutomi] wa nyama wu [nga] le ngatini,” entiyisweni leswi kombisiwaka swi ri etshakwini ra altari i ngati ya malandza yo tshembeka ya Yesu lama dlayiweke hikwalaho ka ku chumayela ka wona hi xivindzi ni hi ku hiseka.—Levhitika 17:11.
15, 16. Hlamusela leswaku ha yini marito lama nga eka Nhlavutelo 6:10, 11 ma kombetela eku pfuxiweni ko sungula ka vafi.
15 Ku fana ni ngati ya Avele wo lulama, ngati ya lava dlayeriweke ku va Vakreste yi rilela vululami. (Genesa 4:10) “Yi huwelela hi rito lerikulu, yi ku: ‘Hosi leyi Lawulaka yo kwetsima ni ya ntiyiso, xana u ta yima ku fikela rini u nga avanyisi ni ku rihisela ngati ya hina eka lava va tshamaka emisaveni?’” I yini lexi landzelaka? “Wun’wana ni wun’wana wa yona wu nyikiwa nguvu yo leha yo basa; kutani yi byeriwa ku wisanyana, kukondza ku helela nhlayo ya mahlonga-kulobye ni ya vamakwavo lava a va ri kusuhi ni ku dlayiwa ku fana na vona va dlayiweke.”—Nhlavutelo 6:10, 11.
16 Xana tinguvu leti to basa ti nyikiwe ngati leyi nga etshakwini ra altari? Nikatsongo! Tinguvu leti ti nyikiwe vanhu lava ngati ya vona yi halatiweke hi ndlela yo fanekisela ealtarini. Va nyikele vutomi bya vona eka vito ra Yesu naswona se a va pfuxiwe va ri vanhu va moya. Hi swi tivisa ku yini sweswo? Eku sunguleni ka buku ya Nhlavutelo, ha hlaya: “Loyi a nga ta hlula, na yena u ta ambexiwa tinguvu ta le handle to basa; naswona a ndzi nge ri hlanguli nikatsongo vito ra yena ebukwini ya vutomi.” Nakambe, tsundzuka leswaku vakulu va 24 a va “ambale tinguvu to basa ta le handle, va vehele tiharhi ta nsuku etinhlokweni ta vona.” (Nhlavutelo 3:5; 4:4) Kutani loko nyimpi, ndlala ni mintungu swi sungule ku hlasela misava, swirho swa lava 144 000 leswi feke, leswi yimeriwaka hi ngati leyi nga etshakwini ra altari, swi pfuxeriwe ku ya hanya etilweni naswona swi ambexiwe tinguvu to basa to fanekisela.
17. Xana lava amukelaka tinguvu to basa va ta ‘wisa’ hi ndlela yihi?
17 Lava va ha ku pfuxiwaka eka lava feke va fanele va ‘wisa.’ Va fanele va lehisa mbilu va rindza siku ra Xikwembu ra ndzihiselo. “Mahlonga-kulobye,” ku nga Vakreste lava totiweke lava ha riki emisaveni, ma ha fanele ma kombisa vutshembeki bya wona loko ma ri endzingweni. Loko nkarhi wa Xikwembu wo avanyisa wu fika, ku ‘wisa’ ku ta hela. (Nhlavutelo 7:3) Hi nkarhi wolowo, lava pfuxiweke va ta hlanganyela na Hosi Yesu Kreste eku heriseni ka lavo homboloka, ku katsa ni lava halateke ngati ya Vakreste lava nga riki na nandzu.—2 Vatesalonika 1:7-10.
Leswi Swi Vulaka Swona Eka Hina
18, 19. (a) Hi swihi swivangelo leswi nga endlaka u gimeta hi leswaku ku pfuxiwa ko sungula ka vafi ku le ku endlekeni sweswi? (b) Xana u titwa njhani hi ku twisisa ka wena malunghana ni ku pfuxiwa ko sungula ka vafi?
18 Rito ra Xikwembu a ri hi byeli hi ku kongoma siku ra ku pfuxiwa ko sungula ka vafi, kambe ri hi byela leswaku ku ta endleka nkarhi wo leha, hi nkarhi wa vukona bya Kreste. Lavo sungula ku pfuxiwa i Vakreste lava totiweke lava feke emahlweni ka ku sungula ka vukona bya Kreste. Loko vukona bya Kreste byi ri karhi byi ya emahlweni, Vakreste lava totiweke lava hetaka pfhumba ra vona ra laha misaveni va tshembekile va hundzuriwa “hi ku tsopeta ka tihlo” va va swivumbiwa swa moya leswi nga ni matimba. (1 Vakorinto 15:52) Xana vatotiwa hinkwavo va ta kuma hakelo ya vona ya le tilweni ku nga si fika nyimpi ya Armagedoni? A hi swi tivi. Kambe leswi hi swi tivaka hileswaku hi nkarhi lowu faneleke wa Xikwembu, hinkwavo lava 144 000 va ta kumeka va yime eNtshaveni ya Siyoni ya le tilweni.
19 Nakambe ha swi tiva leswaku vunyingi bya lava 144 000 ana se va na Kreste. Lava saleke emisaveni i vatsongo swinene. Byebyo i vumbhoni lebyi tiyeke bya leswaku nkarhi wa ku avanyisa ka Xikwembu wu ta hi ku hatlisa! Ku nga ri khale, mafambiselo hinkwawo ya misava ya Sathana ma ta herisiwa. Sathana hi byakwe u ta hoxiwa ekheleni ro enta. Kutani, ku pfuxiwa ka vanhu hi ku angarhela ku ta sungula, naswona hikwalaho ka gandzelo ra nkutsulo ra Yesu, vanhu vo tshembeka va ta endliwa va va lava hetisekeke, va fana na Adamu loko a nga si dyoha. Vuprofeta bya Yehovha lebyi nga eka Genesa 3:15 byi hetiseka hi ndlela yo hlamarisa. Hi ni lunghelo lerikulu hileswi hi hanyaka eminkarhini leyi!
[Tinhlamuselo ta le hansi]
^ par. 2 Malunghana ni lavan’wana va ntlhanu na vanharhu, vona 1 Tihosi 17:21-23; 2 Tihosi 4:32-37; 13:21; Marka 5:35, 41-43; Luka 7:11-17; 24:34; Yohane 11:43-45; Mintirho 9:36-42.
^ par. 9 Leswaku u kuma vumbhoni bya Matsalwa bya leswaku vukona bya Kreste byi sungule hi 1914, vona buku leyi nge Xana Bibele Yi Dyondzisa Yini Hakunene? eka matluka 215-18, leyi kandziyisiweke hi Timbhoni ta Yehovha.
^ par. 10 Leswaku u kuma rungula leri kombisaka leswaku hi swi tivisa ku yini leswaku vakulu va 24 va yimela Vakreste lava totiweke lava nga etilweni, vona buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! eka tluka 77, leyi kandziyisiweke hi Timbhoni ta Yehovha.
U Nga Hlamusela Xana?
Matsalwa lama landzelaka ma hi pfuna njhani leswaku hi twisisa nkarhi wa “ku pfuka ko sungula ka vafi”?
• 1 Vakorinto 15:23; 1 Vatesalonika 4:15-17
[Swivutiso Swa Dyondzo]
[Swifaniso leswi nga eka tluka 26]
I ku pfuxiwa kwihi ko hambana-hambana loku endlekaka ku nga si pfuxiwa vanhu hi ku angarhela?
[Xifaniso lexi nga eka tluka 29]
Xana vanhu van’wana lava a va file va nyikiwa njhani nguvu yo basa?