Wa Tsundzuka Xana?

Xana u vuyeriwile loko u hlaya minkandziyiso ya sweswinyana ya Xihondzo xo Rindza? A hi vone loko u nga ringeta ku hlamula swivutiso leswi landzelaka:

• Hi swihi swilo swin’wana leswi endlaka leswaku ku va ni vubihi byo tala swonghasi namuntlha?

Xin’wana lexi endlaka leswaku ku va ni swiendlo swo biha hileswi vanhu va voyameleke eku endleni ka leswo biha. (Genesa 8:21) Xivangelo xin’wana hileswi vanhu vo tala va nga riki na vutivi lebyi kongomeke bya ku rhandza ka Xikwembu. Ku tlula kwalaho, Sathana, musunguri wa vubihi, u hambeta a nghenelela etimhakeni ta vanhu.—1/1, matluka 4-6.

• Ku nga va ni vuyelo byihi lebyinene loko rito lerinene ro vuriwa hi nkarhi lowu faneleke? (Swivuriso 12:25)

Swi nga endla leswaku loyi a bumabumeriwaka a titwa a ri munhu na yena, swi nga n’wi khutaza swi tlhela swi n’wi endla a titwa a rhandziwa. Nakambe loko hi ri karhi hi bumabumela ha pfuneka leswaku hi vona leswinene eka van’wana.—1/1, matluka 16-17.

• A ku ri na yini endzeni ka areka ya ntwanano?

A ku ri ni swiphepherhele swimbirhi swa maribye ya Nawu swin’we ni manna. Endzhaku ka ku xandzuka ka Kora, nhonga ya Aroni yi vekiwe eArekeni leswaku yi va vumbhoni eka xitukulwana xexo. (Vaheveru 9:4) Nhonga ni manna swi nga ha va swi susiwile eArekeni emahlweni ka ku nyiketeriwa ka tempele ya Solomoni.—1/15, tluka 31.

• Ha yini Vayuda va le nkarhini wa Nehemiya a va boheka ku tisa tihunyi etempeleni?

Nawu wa Muxe a wu nga koxi leswaku ku tisiwa tihunyi. Kambe enkarhini wa Nehemiya a ku ri ni xilaveko xa tihunyi leswaku ti tirhiseriwa ku hisa magandzelo ealitarini.—2/1, tluka 11.

• I yini Xiphemu xa Matsalwa ya Muratori?

I xiphemu xa tsalwa ra voko ra Xilatini. Eku sunguleni, tsalwa leri a ri tsariwe hi Xigriki eku heleni ka lembe-xidzana ra vumbirhi C.E. Ri ni nxaxamelo wa khale swinene wa Matsalwa ya Vukreste ya Xigriki lowu tekiwaka tanihi lowu tshembekaka, naswona ri vulavula hi tibuku ni vatsari va tona.—2/15, matluka 13-14.

• Ha yini Hosi ya Xisati Vhaxiti ya le Peresiya yi hambete yi ala ku ya eka hosi? (Estere 1:10-12)

Bibele a yi xi hlamuseli xikongomelo xa yona. Vativi van’wana va ringanyeta leswaku yi arile hileswi a yi nga lavi ku titsongahata emahlweni ka vaendzi va hosi lava dakweke. Kumbexana hosi leyi ya xisati, leyi a yi ri mbhuri a yi nga titsongahati, xisweswo a yi vekela vavasati lavan’wana va le Mfun’weni wa Peresiya xikombiso xo biha.—3/1, tluka 9.

• Xana nkutsulo wu hi kutsula njhani?

Gandzelo ra Yesu ri nga hi kutsula exidyohweni lexi hi tswariweke na xona naswona ri nga hi ntshunxa eka vuyelo lebyi dlayaka bya xidyoho. (Varhoma 6:23) Gandzelo leri ri endla leswaku Vakreste va ntiyiso va nga vi ni ripfalo leri tivonaka nandzu. Naswona loko hi kombisa ripfumelo eka nkutsulo, se ha swi tiva leswaku Xikwembu xi hi languta njhani. (1 Yohane 2:1)—3/15, tluka 8.

• Hi nga dyondza yini eka xileriso xa Nawu lexi a xi sivela ku sweka ximbutana entswambeni wa mana wa xona? (Eksoda 23:19)

Ku sweka ximbutana entswambeni wa mana wa xona swi nga ha endleka a ku ri mukhuva wa vahedeni lowu a wu endleriwa ku vitana mpfula. (Levhitika 20:23) Xikwembu xi endle leswaku ntswamba wa manana wu wundla ni ku pfuna ximbutana leswaku xi kula. Ku sweka ximbutana entswambeni wa mana wa xona a swi ta kombisa ku nga byi xiximi vuxaka bya mbuti ni n’wana wa yona lebyi Xikwembu xi byi simekeke. Nawu lowu wu kombisa ntwela-vusiwana wa Xikwembu.—4/1, tluka 31.