Good News for People of All Nations

XIBUKWANA lexi kombisiweke laha henhla xi humesiwe eMintsombanweni ya Miganga ya Timbhoni ta Yehovha ya 2004/05 leyi nge “Famba Ni Xikwembu.” Nkandziyiso wun’wana wa xibukwana lexi wu ni matluka ya 96, kasi xi tamele rungula ro koma hi tindzimi ta 92, ku sukela eka Xibunu ku fikela eka Xizulu, naswona xi lunghiseleriwe ku pfuna ku twarisa mahungu lamanene ya Mfumo eka vanhu vo tala hilaha swi nga kotekaka hakona. (Matewu 24:14) Swikombiso leswi landzelaka swi kombisa leswi hakanyingi swi humelelaka loko xibukwana lexi xi tirhisiwa.

• Endzhaku ko kuma xibukwana lexi entsombanweni, ndyangu wun’wana wa Timbhoni wu endzele mintanga yinharhu ya swiharhi. Kwalaho, wu hlangane ni vanhu lava humaka eIndiya, eNetherlands, ePakistan ni le Philippine. Nuna wa kona u te: “Hambileswi vanhu lava hinkwavo a va kota ku vulavula Xinghezi, va hlamarile loko hi va komba rungula hi ririmi ra vona, tanihi leswi a va ri ekule swinene ni le kaya. Va xi twisise kahle xikongomelo xa ntirho wa hina wa misava hinkwayo swin’we ni vun’we bya hina.”

• Mbhoni yin’wana yi kombe mutirhi-kulobye la humaka eIndiya xibukwana lexi. U tsake ngopfu loko a vona tindzimi hinkwato leti nga eka xona naswona u hlaye rungula leri hi ririmi ra yena. Leswi swi pfule ndlela ya mabulo lama engetelekeke ya Bibele. Mutirhi-kulobye un’wana la humaka ePhilippine u hlamarile loko a kume ririmi ra yena eka xibukwana lexi naswona u tsakele ku dyondza leswi engetelekeke hi Timbhoni ta Yehovha.

• Le Canada, wansati un’wana la humaka eNepal u pfumerile ku dyondza Bibele ni Mbhoni hi riqingho kambe a a kanakana ku rhamba makwerhu loyi wa xisati ekaya rakwe. Hambiswiritano, loko Mbhoni leyi yi byele wansati loyi malunghana ni xibukwana lexi nga ni rungula ra Xinepali, wansati loyi u tsake ngopfu lerova u rhambe makwerhu loyi wa xisati leswaku a n’wi endzela ekaya. U lave ku tivonela hi byakwe rungula leri tsariweke hi ririmi ra yena! Ku sukela hi nkarhi wolowo, dyondzo ya Bibele yi fambiseriwa ekaya ra wansati loyi.