Ku Hetiseka Ka Swikombiso Swa Mfumo Wa Xikwembu
Ku Hetiseka Ka Swikombiso Swa Mfumo Wa Xikwembu
“Mi endla kahle loko mi nyikela nyingiso eka [rito ra vuprofeta] ku fana ni le ka rivoni leri voningaka endhawini ya munyama.”—2 PETRO 1:19.
1. I ku hambana kwihi loku hi ku kumaka emisaveni namuntlha?
MISAVA ya namuntlha yi tshama yi ri ni minkitsikitsi. Ku suka eka makhombo ya ekholoji ku ya eka vutherorisi bya misava hinkwayo, swiphiqo swa vanhu swi tikomba swi nyanya. Hambi ku ri vukhongeri bya misava bya tsandzeka ku pfuna. Entiyisweni, hakanyingi byi nyanyisa timhaka hi ku pfurhetela xihlawuhlawu, rivengo ni vutiko leswi hambanisaka vanhu. Ina, hilaha ku profetiweke hakona, “ku dzwihala lokukulu” ku funengete “vanhu va matiko.” (Esaya 60:2) Hambiswiritano, hi nkarhi lowu fanaka vanhu va timiliyoni va tiyiseka swinene hi vumundzuku. Ha yini? Hikuva va nyikela nyingiso eka rito ra Xikwembu ra vuprofeta “ku fana ni le ka rivoni leri voningaka endhawini ya munyama.” Va pfumela ku kongomisiwa hi “rito” kumbe rungula ra Xikwembu, leri sweswi ri kumekaka eBibeleni.—2 Petro 1:19.
2. Hi ku ya hi vuprofeta bya Daniyele lebyi vulavulaka hi ‘nkarhi wa makumu,’ i vamani ntsena lava pfuniwaka ku twisisa timhaka ta moya?
2 Malunghana ni ‘nkarhi wa makumu,’ muprofeta Daniyele u tsarile: “Vo tala va ta famba-famba, kutani vutivi bya ntiyiso byi ta andza. Vo tala va ta tiendla va tenga, va tibasisa ni ku pfumala xisandzu. Kunene lavo homboloka va ta endla hilaha ku hombolokeke, naswona a va kona vo homboloka lava va nga ta twisisa; kambe lava va nga ni vutlhari va ta twisisa.” (Daniyele 12:4, 10) Vanhu lava “famba-famba[ka],” kumbe lava dyondzaka Rito ra Xikwembu hi ku hiseka hi mbilu hinkwayo, va titsongahatelaka nkongomiso wa xona va tlhela va tikarhatela ku endla ku rhandza ka xona, hi vona ntsena lava nga ta twisisa timhaka ta moya.—Matewu 13:11-15; 1 Yohane 5:20.
3. I ntiyiso wihi wa nkoka lowu swichudeni swo sungula swa Bibele swi wu twisiseke hi va-1870?
3 Hi va-1870, loko ‘masiku yo hetelela’ ma nga si sungula, Yehovha Xikwembu u sungule ku voninga swinene eka “swihundla swo kwetsima swa mfumo wa matilo.” (2 Timotiya 3:1-5; Matewu 13:11) Hi nkarhi wolowo—ku hambana ni langutelo ra vanhu leri tolovelekeke—ntlawa wa swichudeni swa Bibele wu twisise leswaku ku vuya ka Kreste a ku nga ta vonaka. Endzhaku ko vekiwa exiluvelweni etilweni, Yesu a a ta vuya hi mongo wa leswaku a a ta fuma misava. Xikombiso lexi vonakaka, lexi katsaka swilo swo tala a xi ta xalamukisa vadyondzisiwa vakwe leswaku vukona byakwe lebyi nga vonakiki byi sungurile.—Matewu 24:3-14.
Loko Xikombiso Xi Hetiseka
4. Yehovha u ri tiyise njhani ripfumelo ra malandza yakwe ya manguva lawa?
4 Xivono xa ku hundzuriwa a xi ri xikombiso lexi hlamarisaka xa Kreste a ri eku vangameni ka Mfumo. (Matewu 17:1-9) Xivono xexo xi tiyise ripfumelo ra Petro, Yakobo na Yohane hi nkarhi lowu vo tala va tshikeke ku landzela Yesu hileswi a nga hetisisangiki leswi a va langutele leswaku u ta swi endla. Hilaha ku fanaka, enkarhini lowu wa makumu, Yehovha u tiyise ripfumelo ra malandza yakwe ya manguva lawa hi ku ma pfuna leswaku ma twisisa leswi engetelekeke malunghana ni ku hetiseka ka xivono xexo lexi hlamarisaka, ni vuprofeta byin’wana byo tala lebyi fambisanaka na xona. Kutani a hi kambisiseni timhaka tin’wana ta moya leti hetisekeke leti tiyisaka ripfumelo.
5. I mani la tikombeke a ri Nyeleti ya Nimixo, u ‘tsuvuke’ rini naswona njhani?
5 Loko a vulavula hi xivono xa ku hundzuriwa, muapostola Petro u tsarile: “Xisweswo hi ni rito ra vuprofeta leri tiyisekisiweke swinene; naswona mi endla kahle loko mi nyikela nyingiso eka rona ku fana ni le ka rivoni leri voningaka endhawini ya munyama, kukondza ku va vurhonga, kutani nyeleti ya nimixo yi tsuvuka etimbilwini ta n’wina.” (2 Petro 1:19) Nyeleti yoleyo ya Nimixo yo fanekisela kumbe “nyeleti ya mixo leyi vangamaka,” i Yesu Kreste la kwetsimisiweke. (Nhlavutelo 22:16) U ‘tsuvuke’ hi 1914 loko Mfumo wa Xikwembu wu tswariwa etilweni, wu fungha ku sungula ka nguva leyintshwa. (Nhlavutelo 11:15) Exivonweni xa ku hundzuriwa, Muxe na Eliya va humelerile va ri etlhelo ka Yesu, va ri karhi va vulavula na yena. Xana a va fanekisela vamani?
6, 7. I vamani lava fanekiseriwaka hi Muxe na Eliya exivonweni xa ku hundzuriwa, naswona i vuxokoxoko byihi bya nkoka lebyi Matsalwa ma byi paluxaka malunghana ni lava va fanekiseriwaka hi vona?
6 Tanihi leswi Muxe na Eliya va hlanganyeleke eku kwetsimisiweni ka Kreste, timbhoni letimbirhi leti tshembekaka ti fanele ti yimela lava nga ta fuma na Yesu eMfun’weni wakwe. Nhlamuselo ya ku va Yesu a ri ni vafumi-kulobye yi pfumelelana ni xikombiso xa le xivonweni xa Mesiya la vekiweke exiluvelweni, lexi voniweke hi muprofeta Daniyele. Daniyele u vone “loyi a fanaka ni n’wana wa munhu” a nyikiwa “ku fuma loku tshamaka hilaha ku nga heriki” hi “Nkulukumba wa Masiku,” Yehovha Xikwembu. Kambe xiya leswi Daniyele a kombiwaka swona endzhakunyana ka kwalaho. Wa tsala: “Mfumo ni ku fuma ni vukulu bya mimfumo leyi nga ehansi ka matilo hinkwawo yi nyikiwa vanhu lava va nga vakwetsimi va Loyi a Tlakukeke.” (Daniyele 7:13, 14, 27) Ina, loko ka ha sele malembe yo tlula ntlhanu wa madzana leswaku ku fika xivono xo hundzuriwa, Xikwembu xi paluxe leswaku “vakwetsimi” van’wana a va ta hlanganyela na Kreste eka lunghelo lerikulu ra ku fuma.
7 I vamani vakwetsimi va le xivonweni xa Daniyele? Muapostola Pawulo a a vulavula hi vanhu vo tano loko a ku: “Moya hi woxe wu nyikela vumbhoni swin’we ni moya wa hina leswaku hi vana va Xikwembu. Kutani loko hi ri vana, nakambe hi vadyandzhaka: vadyandzhaka hakunene va Xikwembu, kambe vadyandzhaka-kulobye na Kreste, ntsena loko hi xaniseka swin’we leswaku hi ta tlhela hi vangamisiwa swin’we.” (Varhoma 8:16, 17) Kahle-kahle vakwetsimi i vadyondzisiwa va Yesu lava totiweke hi moya. Ebukwini ya Nhlavutelo, Yesu u ri: “Loyi a hlulaka ndzi ta n’wi pfumelela ku tshamisa na mina exiluvelweni xa mina, tanihi leswi na mina ndzi hluleke kutani ndzi tshamisa ni Tata wa mina exiluvelweni xa yena.” ‘Vahluri’ lava va pfuxiweke eku feni va 144 000, va ta fuma emisaveni hinkwayo swin’we na Yesu.—Nhlavutelo 3:21; 5:9, 10; 14:1, 3, 4; 1 Vakorinto 15:53.
8. Vadyondzisiwa va Yesu lava totiweke va endle ntirho lowu fanaka ni wa Muxe na Eliya hi ndlela yihi, naswona vuyelo byi ve byihi?
8 Kambe, ha yini Vakreste lava totiweke va fanekiseriwa hi Muxe na Eliya? Xivangelo hileswaku Vakreste volavo loko va ha ri vanhu va nyama va endla ntirho lowu fanaka ni lowu endliweke hi Muxe na Eliya. Hi xikombiso, va tirha tanihi timbhoni ta Yehovha, hambiloko va xanisiwa. (Esaya 43:10; Mintirho 8:1-8; Nhlavutelo 11:2-12) Ku fana na Muxe na Eliya, va paluxa vukhongeri bya mavunwa hi xivindzi, loko hi hala tlhelo va khutaza vanhu va timbilu letinene leswaku va tinyiketela eka Xikwembu hi ku helela. (Eksoda 32:19, 20; Deteronoma 4:22-24; 1 Tihosi 18:18-40) Xana ntirho wa vona wu tswale mihandzu? Wu yi tswarile hakunene! Handle ko pfuneta eku hlengeleteni ka vatotiwa hinkwavo, va tlhele va pfuna timiliyoni ta “tinyimpfu tin’wana” leswaku ti titsongahata eka Yesu Kreste.—Yohane 10:16; Nhlavutelo 7:4.
Kreste A Hetisisa Ku Hlula Ka Yena
9. Nhlavutelo 6:2 yi n’wi hlamusela njhani Yesu hilaha a nga hakona namuntlha?
9 Sweswi Yesu i Hosi ya matimba a nga ha ri munhu wa nyama la khandziyeke ximbhongolwana. U hlamuseriwa a ri la khandziyeke hanci—xikombiso xa le Bibeleni xa nyimpi. (Swivuriso 21:31) Nhlavutelo 6:2 yi ri: “Waswivo, ku humelela hanci yo basa; ehenhla ka yona a ku tshame un’wana a ri ni vurha; hiloko a nyikiwa harhi, a huma a ri karhi a hlula, ni ku hetisa ku hlula ka yena.” Ku tlula kwalaho, mupisalema Davhida u tsarile malunghana na Yesu a ku: “Nhonga ya ntamu wa wena Yehovha u ta yi humesa eSiyoni, a ku: ‘Famba u ya hlula exikarhi ka valala va wena.’”—Pisalema 110:2.
10. (a) Ku gada ka Yesu hanci a ya hlula ku sungule hi ndlela yihi yo hlawuleka? (b) Ku hlula ka Kreste ko sungula ku yi khumbe njhani misava hi ku angarhela?
10 Yesu u rhange a hlula valala va yena va matimba swinene—Sathana ni madimona. Loko a va hlongorile etilweni, u va lahlele emisaveni. Mimoya leyi yo homboloka yi humesele vukarhi bya yona lebyikulu evanhwini, yi vanga khombo lerikulu, hi ku tiva leswaku yi saleriwe hi nkarhi wo koma. Khombo leri ri fanekiseriwa hi vagadi vanharhu va tihanci eka Nhlavutelo. (Nhlavutelo 6:3-8; 12:7-12) Hi ku pfumelelana ni vuprofeta bya Yesu malunghana ni “xikombiso xa vukona bya [yena] ni xa makumu ya mafambiselo ya swilo,” ku gada ka vona tihanci ku vange nyimpi, ndlala ni ntungu lowu dlayaka. (Matewu 24:3, 7; Luka 21:7-11) Ku fana ni switlhavi swa xiviri swa ku veleka, “switlhavi [leswi] swa maxangu” handle ko kanakana swi ta hambeta swi nyanya ku kondza Kreste a “hetisa ku hlula ka yena” hi ku lovisa vuthala hinkwabyo bya nhlengeletano leyi vonakaka ya Sathana. *—Matewu 24:8.
11. Matimu ya vandlha ra Vukreste ma tiyisekisa vulawuri bya vuhosi bya Kreste hi ndlela yihi?
11 Vulawuri bya Yesu bya vuhosi byi tlhela byi vonaka hileswi a hlayiseke vandlha ra Vukreste leswaku ri ta hetisisa xiavelo lexi a ri nyikeke xona xo chumayela rungula ra Mfumo emisaveni hinkwayo. Ku nga khathariseki ku xanisiwa hi tihanyi hi Babilona Lonkulu—mfumo wa misava wa vukhongeri bya mavunwa—ni hi tihulumendhe leti nga ni rivengo, ntirho wo chumayela wu ye emahlweni wu tlhela wu endliwa hi mpimo lowukulu swinene ku tlula rini na rini ematin’wini ya misava. (Nhlavutelo 17:5, 6) Lebyi i vumbhoni bya matimba swinene bya vuhosi bya Kreste!—Pisalema 110:3.
12. Ha yini vanhu vo tala va nga byi twisisi vukona lebyi nga vonakiki bya Kreste?
12 Kambe, khombo ra kona vanhu vo tala, ku katsa ni vanhu va timiliyoni lava tivulaka Vakreste, va tsandzeka ku twisisa leswaku swiendlakalo swo hlawuleka leswi endlekaka emisaveni swi kombisa ku hetiseka ka swilo leswi nga vonakiki. Va tlhela va hlekula lava va twarisaka Mfumo wa Xikwembu. (2 Petro 3:3, 4) Ha yini? Hikuva Sathana u va dlaye mianakanyo. (2 Vakorinto 4:3, 4) Entiyisweni, u ni madzana ya malembe a tise munyama wa moya eka lava tivulaka Vakreste, a kala a va vangela ku fularhela ntshembo wa risima wa Mfumo.
Ku Fularheriwa Ka Ntshembo Wa Mfumo
13. Xana munyama wa moya wu vange yini?
13 Yesu u profete leswaku vagwinehi a va ta nghena evandlheni ra Vukreste, ku fana ni mfava lowu byariweke exikarhi ka koroni, va hambukisa vanhu vo tala. (Matewu 13:24-30, 36-43; Mintirho 20:29-31; Yudha 4) Hi ku famba ka nkarhi, vanhu lava va tivulaka Vakreste va tekelele minkhuvo, mikhuva ni tidyondzo ta vuhedeni, va vula leswaku i swa “Vukreste.” Hi xikombiso, Khisimusi yi sungule eka mihivahivana leyi katsaka ku gandzela Mithra na Saturn, swikwembu swa vuhedeni. Kambe i yini lexi yengeke vanhu lava tivulaka Vakreste leswaku va tekelela minkhuvo leyi yi nga riki ya Vukreste? The New Encyclopædia Britannica (1974) yi ri: “Khisimusi, ku nga nkhuvo wa ku tswariwa ka Yesu Kreste, wu simekiwe loko ntshembo wa ku languteriwa ka Kreste wu hela.”
14. Tidyondzo ta Origen na Augustine ti nyikele nhlamuselo ya mavunwa malunghana ni ntiyiso wa Mfumo hi ndlela yihi?
14 Nakambe anakanya hi ku soholotiwa ka nhlamuselo ya rito leri nge “mfumo.” Buku leyi nge The Kingdom of God in 20th-Century Interpretation yi ri: “Origen [mutivi wa vukhongeri wa lembe-xidzana ra vunharhu] u kombisa leswaku ku cinca eka ku tirhisiwa ka rito leri nge ‘mfumo’ eVukresteni swi vangiwe hi nhlamuselo ya ndlela leyi Xikwembu xi fumaka ha yona etimbilwini ta vanhu.” Xana Origen a a sekele tidyondzo ta yena eka yini? Ku nga ri eMatsalweni, kambe eka “filosofi ni le ka langutelo ra misava leri hambaneke ni ra Yesu ni ra kereke yo sungula.” Ebukwini ya yena leyi nge De Civitate Dei (Muti wa Xikwembu), Augustine wa le Hipo (354-430 C.E.) u vule leswaku kereke hi yoxe i Mfumo wa Xikwembu. Tidyondzo to tano leti nga humiki eMatsalweni ti endle leswaku tikereke ta Vujagana ti va ni xisekelo xa vukhongeri xo amukela vulawuri bya politiki. Naswona ti tirhise vulawuri byolebyo hi madzana ya malembe, hakanyingi hi tihanyi.—Nhlavutelo 17:5, 18.
15. Xana Vagalatiya 6:7 yi hetiseke njhani malunghana ni tikereke to tala ta Vujagana?
15 Kambe, namuntlha tikereke ti tshovela leswi ti swi byaleke. (Vagalatiya 6:7) To tala ti heleriwa hi vulawuri ni vanhu. Mboyamelo wolowo wu vonaka swinene eYuropa. Hi ku ya hi magazini lowu nge Christianity Today, “sweswi tikereke-nkulu ta le Yuropa [a ta ha ri] tiyindlu ta vugandzeri kambe ti hundzuke timuziyama, ti endzeriwa ntsena hi vavalangi.” Mboyamelo lowu fanaka wa vonaka ni le swiphen’wini swin’wana swa misava. Xana leswi swi kombisa yini hi vukhongeri bya mavunwa? Xana byi to fa hikwalaho ka ku nga seketeriwi? Naswona, xana vugandzeri bya ntiyiso byi ta khumbeka njhani?
Lunghekela Siku Lerikulu Ra Xikwembu
16. Ha yini ku vengiwa loku nyanyaka ka Babilona Lonkulu ku ri ka nkoka?
16 Tanihi leswi musi ni nkuma leswi humaka eka vholkheno leyi a yi verhamile swi nga ha kombisaka leswaku yi ta buluka ku nga ri khale, leswi vanhu vo tala va vengaka vukhongeri eswiphen’wini swo tala swa misava swi kombisa leswaku masiku ya vukhongeri bya mavunwa ma hlayiwile. Ku nga ri khale, Yehovha u ta susumeta minhlangano ya tipolitiki ya misava leswaku yi twanana eku paluxeni ni le ku heriseni ka Babilona Lonkulu la nga nghwavava ya moya. (Nhlavutelo 17:15-17; 18:21) Xana Vakreste va ntiyiso va fanele va chava xiendlakalo xexo ni swiendlakalo swin’wana swa “nhlomulo lowukulu” leswi nga ta landzela? (Matewu 24:21) Nikatsongo! Kahle-kahle va ta va ni swivangelo swo tsaka loko Xikwembu xi lovisa lavo homboloka. (Nhlavutelo 18:20; 19:1, 2) Xiya xikombiso xa muti wa Yerusalema wa lembe-xidzana ro sungula ni Vakreste lava a va tshama kwalaho.
17. Ha yini malandza lama tshembekaka ya Yehovha ma nga langutanaka ni makumu ya mafambiselo lawa hi ku tiyiseka?
17 Loko mavuthu ya Rhoma ma rhendzela Yerusalema hi 66 C.E., Vakreste lava xalamukeke hi tlhelo ra moya a va hlamalanga kumbe ku chava. Leswi a va ri swichudeni leswi hisekaka swa Rito ra Xikwembu, a va swi tiva ‘leswaku ku lovisiwa ka wona a ku tshinele.’ (Luka 21:20) Nakambe a va swi tiva leswaku Xikwembu xi ta va pfulela ndlela yo balekela laha ku sirhelelekeke. Loko sweswo swi humelela, Vakreste va balekile. (Daniyele 9:26; Matewu 24:15-19; Luka 21:21) Hilaha ku fanaka namuntlha, lava va tivaka Xikwembu va tlhela va yingisa N’wana wa xona va nga langutana ni makumu ya mafambiselo lawa hi ku tiyiseka. (2 Vatesalonika 1:6-9) Entiyisweni, loko nhlomulo lowukulu wu hlasela, va ta ‘yima hi ntsako va ololoka ivi va tlakusa tinhloko ta vona, hikuva va swi tiva leswaku ku kutsuriwa ka vona ku tshinele.’—Luka 21:28.
18. Byi ta va byihi vuyelo bya nhlaselo wo hetelela lowu kongomeke wa Gogo eka malandza ya Yehovha?
18 Endzhaku ka ku lovisiwa ka Babilona Lonkulu, Sathana loyi a nga Gogo wa Magogo u ta ti hlasela ro hetelela hi ku kongoma Timbhoni ta Yehovha leti rhuleke. Mavuthu ya Gogo ma ta ta “kukota mapapa, [ma] funengeta tiko” naswona ma ta langutela ku hlula hi ku olova. Kambe ma ta sala ma hlamele! (Ezekiyele 38:14-16, 18-23) Muapostola Yohane wa tsala: “Ndzi vona matilo ma pfuleka, kutani waswivo, ku humelela hanci yo basa. Loyi a tshameke ehenhla ka yona u vuriwa wo Tshembeka ni wa Ntiyiso . . . Enon’wini wa yena a ku huma banga ro leha ro kariha, leswaku a khemba matiko ha rona.” “Hosi ya tihosi” leyi yi nga hluriwiki yi ta ponisa vagandzeri va Yehovha lava tshembekaka kutani yi lovisa valala va vona hinkwavo. (Nhlavutelo 19:11-21) Koloko ku ta va ku ri ku chaputa ka ku hetiseka ka xivono xa ku hundzuriwa!
19. Ku hlula ka Kreste loku heleleke ku ta va khumba njhani vadyondzisiwa vakwe lava tshembekaka, naswona va fanele va tikarhatela ku endla yini sweswi?
19 Yesu u ta “langutiwa hi ku hlamala esikwini rero mayelana ni hinkwavo lava kombiseke ripfumelo.” (2 Vatesalonika 1:10) Xana wa swi lava ku va un’wana wa lava nga ta kombisa xichavo lexikulu eka N’wana wa Xikwembu la hluleke hi nkarhi wolowo? Kutani hambeta u tiyisa ripfumelo ra wena ni ku ‘tshama u lunghekile, hikuva N’wana wa munhu u ta ta hi nkarhi lowu u nga wu ehleketiki.’—Matewu 24:43, 44.
Hlayisa Mianakanyo Ya Wena Leyi Hlutekeke
20. (a) Xana hi nga ku kombisa njhani ku tlangela ka hina lunghiselelo ra Xikwembu ra “hlonga ro tshembeka ni ro tlhariha”? (b) Hi swihi swivutiso leswi hi faneleke hi tivutisa swona?
20 Nkarhi na nkarhi “hlonga ro tshembeka ni ro tlhariha” ri khutaza vanhu va Xikwembu leswaku va tshama va xalamukile hi tlhelo ra moya ni ku hlayisa mianakanyo ya vona leyi hlutekeke. (Matewu 24:45, 46; 1 Vatesalonika 5:6) Xana wa swi tlangela switsundzuxo leswi swi nga enkarhini? Xana u tirhisa swona loko u hlela swilo leswi faneleke swi va swo sungula evuton’wini? Ha yini u nga tivutisi: ‘Xana ndzi ni langutelo lerinene ra moya leri ndzi endlaka ndzi kota ku vona N’wana wa Xikwembu hi mahlo ya mianakanyo a ri la fumaka etilweni? Xana ndza n’wi vona a lunghekele ku hetisisa ku avanyisa ka Xikwembu eka Babilona Lonkulu ni le ka fambiselo hinkwaro ra Sathana?’
21. Ha yini van’wana va nga ha vaka va pfumelele langutelo ra vona ra moya leswaku ri tsana, naswona va fanele va hatla va endla yini?
21 Van’wana lava hlanganyelaka ni vanhu va Yehovha va pfumelele langutelo ra vona ra moya leswaku ri tsana. Xana sweswo swi nga ha va swi vangiwe hi ku va va tsandzeke ku lehisa mbilu kumbe ku tiyisela, hilaha vadyondzisiwa van’wana vo sungula va Yesu va endleke hakona? Xana va khumbiwe hi mivilelo ya vutomi, ku hlongorisa swilo leswi vonakaka, kumbe ku xanisiwa? (Matewu 13:3-8, 18-23; Luka 21:34-36) Kumbexana van’wana va tikeriwe hi ku twisisa rungula rin’wana leri kandziyisiweke hi “hlonga ro tshembeka ni ro tlhariha.” Loko na wena u humeleriwe hi mhaka leyi, ha ku khutaza leswaku u dyondza Rito ra Xikwembu hi ku hiseka loku pfuxetiweke ni ku kombela mpfuno wa Yehovha leswaku u ta tlhela u va ni vuxaka lebyikulu na yena.—2 Petro 3:11-15.
22. Xana ku kambisisiwa ka xivono xa ku hundzuriwa ni vuprofeta byin’wana lebyi fambisanaka na xona swi ku khumbe njhani?
22 Xivono xa ku hundzuriwa xi kombiwe vadyondzisiwa va Yesu loko va lava xikhutazo. Namuntlha, hi ni nchumu lowukulu swinene lowu nga hi tiyisaka—ku hetiseka ka xivono lexi hlamarisaka xa ku hundzuriwa ni vuprofeta byin’wana byo tala lebyi fambisanaka na xona. Loko hi ri karhi hi anakanyisisa hi ku hetiseka ka swilo sweswo sweswi ni le nkarhini lowu taka, onge na hina hi nga ma vula hi timbilu ta hina hinkwato marito ya muapostola Yohane loko a ku: “Amen! Tana, Hosi Yesu.”—Nhlavutelo 22:20.
[Nhlamuselo ya le hansi]
^ par. 10 Eka Xigriki xo sungula, rito leri hundzuluxeriweke ri va “switlhavi swa maxangu” hi ku kongoma ri vula “switlhavi swa ku veleka.” (Matewu 24:8, Kingdom Interlinear) Leswi swi vula leswaku ku fana ni switlhavi swa ku veleka, swiphiqo swa misava swi ta hambeta swi andza swinene, swi ya chaputa eka nhlomulo lowukulu.
Wa Tsundzuka Xana?
• Xana ntlawa lowutsongo wa swichudeni swa Bibele wu sungule ku twisisa yini malunghana ni ku vuya ka Kreste hi va-1870?
• Xana xivono xa ku hundzuriwa xi hetiseke njhani?
• Ku gada ka Yesu hanci a ya hlula ku ve ni vuyelo byihi emisaveni ni le vandlheni ra Vukreste?
• Hi fanele hi endla yini leswaku hi ta va exikarhi ka lava nga ta pona loko Yesu a hetisa ku hlula ka yena?
[Swivutiso Swa Dyondzo]
[Swifaniso leswi nga eka tluka 16, 17]
Ku hetiseka ka swilo leswi kombisiweke exivonweni
[Swifaniso leswi nga eka tluka 18]
Xana wa swi tiva leswaku ku endleke yini loko Kreste a sungula ku hlula ka yena?