Bibele Yi Nga Va Pfuna Vanhu Lava Tekaneke

VUKATI—eka van’wana, rito leri ri vula ntsako. Kambe eka van’wana ri vula nhlomulo. Wansati un’wana u ri: “Ndzi titwa onge ndzi tshikiwile. Ndzi titwa ndzi tekeriwa ehansi naswona minkarhi hinkwayo ndzi titwa ndzi ri ni xivundza.”

I yini leswi endlaka leswaku vanhu vambirhi lava hlambanyeke leswaku va ta rhandzana ni ku tsakelana, va nga ha rhandzani? Xivangelo xin’wana i ku pfumala vutivi malunghana ni leswi vukati byi vulaka swona. Mutsari un’wana wa maphepha ya swa vutshunguri u ri: “Hi nghenela vukati hi nga ri na vutivi.”

Leswaku namuntlha a va talanga lava tivaka timhaka ta vukati swi seketeriwe hi ndzavisiso lowu endliweke hi Tsima ra Tiko ra Ndzavisiso wa ta Vukati, ku nga ndzavisiso lowu endliweke hi Yunivhesiti ya Rutgers eNew Jersey, le U.S.A. Varhangeri va tsima leri va tsarile: “Vanhu vo tala lava ku endliweke ndzavisiso lowu eka vona va kumeke va kurisiwe hi vatswari lava vukati bya vona a byi nga tsakisi kumbe hi vatswari lava tshikiweke. Va byi tiva kahle vukati lebyi nga tsakisiki, kambe a va tiyiseki leswaku vukati lebyinene byi fanele byi va njhani. Van’wana va nga ha vula leswaku vukati lebyinene hi ‘lebyi nga faniki ni bya vatswari va mina.’”

Xana Vakreste a va na swona swiphiqo swa vukati? Va na swona. Kahle-kahle, eka lembe-xidzana ro sungula Vakreste van’wana a va fanele va nyikiwa ndzayo leyi kongomeke leswaku va “nga lavi ku tintshunxa” eka vukati bya vona. (1 Vakorinto 7:27) Swi le rivaleni leswaku vukati byin’wana ni byin’wana bya vanhu vambirhi lava nga hetisekangiki minkarhi yin’wana byi ta va ni swiphiqo, kambe hi ni mpfuno. Vavanuna ni vavasati va nga antswisa vuxaka bya vona hi ku tirhisa misinya ya milawu ya Bibele.

Hakunene, Bibele a yo va buku leyi vulavulaka hi ta vukati ntsena. Kambe leswi yi huhuteriweke hi Musunguri wa lunghiselelo ra vukati, hi nga langutela leswaku misinya ya milawu ya yona yi hi pfuna. Hi ku tirhisa muprofeta Esaya, Yehovha Xikwembu u te: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona. Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.”—Esaya 48:17, 18.

Xana rirhandzu leri nga tshama ri va kona exikarhi ka wena ni munghana wa wena wa vukati ri sungula ku hela? Xana se mo va nuna na nsati ntsena? Wansati un’wana loyi a nga ni malembe ya 26 a tekiwile u te: “Ndlela leyi vukati bya muxaka lowu byi katingaka ha yona a yi hlamuseleki. A ku na lexi cincaka naswona byi ku katinga u kala u swi twa.” Ematshan’weni yo lahla thawula, ha yini u nga tiyimiseli ku endla xo karhi? Xihloko lexi landzelaka xi ta kombisa vavanuna ni vavasati ndlela leyi misinya ya milawu ya Bibele yi nga va pfunaka ha yona emhakeni yin’wana ya vukati—ku nga ku tiboha.