“A Ndzi Nga Tivi Nchumu Malunghana Ni Xikwembu”

WANUNA loyi a tshamaka eKerala, le Indiya u tsarile: “Lembe leri nga hundza, ndzi endzeriwe hi Timbhoni ta Yehovha kutani ti ndzi byela mahungu yo tsakisa malunghana ni Mfumo wa Xikwembu. A ndzi ri Mukhatoliki ku ringana malembe ya nhungu, kambe a ndzi nga tivi nchumu malunghana ni Xikwembu. Hi lembe rin’we ntsena ndzi dyondze swo tala.” U ye emahlweni a ku: “Ndza tsaka swinene ku tiva leswaku Xihondzo xo Rindza xi kandziyisiwa hi tindzimi ta 139 [sweswi i 146]. Swa hlamarisa leswaku vanhu va tindzimi hinkwato va twa rungula leri vulavulaka hi Xikwembu.”

Hambileswi vativi va filosofi vo tala va vulaka leswaku a swi koteki ku tiva Xikwembu, muapostola Pawulo u swi kombise kahle leswaku swa koteka ku xi tiva. Loko a vulavula ni ntlawa wa Vaatena, lava van’wana va vona a va gandzela ealitarini leyi nyiketeriweke eka “Xikwembu Lexi Nga Tiviwiki,” Pawulo u te: “Leswi mi nga xi tiviki lexi mi kombisaka ku tinyiketela ka vukwembu eka xona, ndzi xi twarisa eka n’wina. Xikwembu lexi endleke misava ni swilo hinkwaswo leswi nga eka yona . . . xi nyika vanhu hinkwavo vutomi ni ku hefemula ni swilo hinkwaswo. Naswona hi munhu un’we xi endle matiko hinkwawo ya vanhu, leswaku va tshama ehenhla ka vuandlalo hinkwabyo bya misava.”—Mintirho 17:23-26.

Pawulo u khutaze vayingiseri vakwe ku lava ku tiva Muvumbi, hikuva ‘a nga le kule ngopfu ni un’wana ni un’wana wa hina.’ (Mintirho 17:27) Timbhoni ta Yehovha ti ta swi tsakela ku ku pfuna leswaku u tiva Xikwembu xa ntiyiso ni timfanelo ta xona leti tsakisaka.