Ndhawu Ya Ku Tifihla Emhehweni

LE HENHLA etintshaveni ta Yuropa, u nga kuma xinsinyana lexi tiyeke lexi vitaniwaka alpine rose. Hakanyingi xinsinyana lexi xi mila exikarhi ka makhwati yo tlhuma leswaku xi sirheleleka etimhehweni letikulu ta le tintshaveni. Mheho leyi tshamaka yi ri kona yi xungeta vukona bya swimilana leswi swa le tintshaveni hi ku hunguta mahiselo ya kona, hi ku endla leswaku moya ni misava swi oma kutani yi simula timitsu ta swona.

Hakanyingi alpine rose yi pona ku hlaseriwa hi mheho hi ku mila emagiyagiyeni exikarhi ka maribye. Hambiloko misava ya kona yi nga talanga, maribye ma sirhelela ximilana lexi leswaku xi tihlayisela mati. Hambileswi swi nga voniwiki nkarhi wo tala elembeni, hi ximumu swinsinyana leswi swi khavisa tintshava leti swi tifihlaka ha tona hi swiluva swo tshwuka.

Muprofeta Esaya u hlamusele leswaku “tihosana” a ti ta vekiwa hi Xikwembu, naswona yin’wana ni yin’wana a yi ta va “ndhawu ya ku tifihla emhehweni.” (Esaya 32:1, 2) Ehansi ka nkongomiso wa Hosi Kreste Yesu, tihosana leti ta moya, kumbe valanguteri a va ta fana ni maribye lama tiyeke, lama nga tsekatsekiki hi nkarhi wa ntshikilelo kumbe khombo. A va ta va vutumbelo lebyi tshembekaka hi nkarhi wa maxangu, naswona a va ta pfuna vanhu lava pfumalaka leswaku va sirhelela masalela ya mati ya vona ya moya lama humaka eRitweni ra Xikwembu.

Timheho leti fanaka ni nxaniso, ku hetiwa matimba kumbe vuvabyi ti nga tshamela ku xanisa Mukreste, ti vanga leswaku ripfumelo ra yena ri tsana loko a nga sirhelelekanga. Vakulu lava nga Vakreste va nga n’wi sirhelela hi ku yingiserisisa xiphiqo xakwe, va n’wi nyika ndzayo leyi sekeriweke eBibeleni va tlhela va n’wi nyika xikhutazo kumbe mpfuno lowu lavekaka. Ku fana ni Hosi ya vona leyi vekiweke, ku nga Kreste Yesu, va lava ku pfuna lava va nga “tsalangana.” (Matewu 9:36) Naswona va navela ku pfuna van’wana lava vavisiweke hi timheho ta tidyondzo ta mavunwa. (Vaefesa 4:14) Mpfuno wolowo lowu fikaka hi nkarhi lowu faneleke wu nga va wa nkoka.

Miriam u ri: “Ndzi karhateke swinene loko van’wana va vanghana va mina lavakulu va tshika ntiyiso naswona hi nkarhi lowu fanaka, tata wa mina u khomiwe hi vuvabyi bya ku mpfempfa ngati ebyongweni. Ndzi ringete ku rivala maxangu lawa hi ku sungula ku rhandzana ni munhu wa misava. Endzhakunyana ka sweswo, leswi a ndzi titwa ndzi nga ha faneleki ndzi byele vakulu va vandlha leswaku ndzi endle xiboho xo tshika ntiyiso, tanihi leswi a ndzi anakanya leswaku Yehovha a nga ha ndzi rhandzi.

“Enkarhini lowu wo nonon’hwa, nkulu la nga ni ntwela-vusiwana u ndzi tsundzuxe hi malembe lawa ndzi ma heteke ndzi ri phayona ra nkarhi hinkwawo. U ndzi byele leswaku minkarhi hinkwayo u tsakisiwe hi ku tshembeka ka mina, kutani hi tintswalo a ndzi kombela leswaku ndzi pfumelela vakulu leswaku va ndzi pfuna, va ndzi tiyisekisa leswaku Yehovha wa ha ndzi rhandza. Nkhathalelo wa vona wa rirhandzu enkarhini wolowo wo nonon’hwa a wu fana ni ‘ndhawu ya ku tifihla’ hi nkarhi wa xidzedze xa moya lexi a xi ndzi hlaserile. Ku nga si hela n’hweti, ndzi tshike jaha leri a ndzi rhandzana na rona, naswona ndzi hambete ndzi famba endleleni ya ntiyiso ku sukela hi nkarhi wolowo.”

Vakulu va tsaka loko va vona Vakreste-kulobye va humelela hi tlhelo ra moya, hikwalaho ka nsirhelelo lowu va wu kumaka hi nkarhi lowu faneleke. Naswona ‘tindhawu leti to tifihla eka tona’ i xikombiso xitsongo xa mpfuno lowukulu wa moya lowu hi nga ta wu kuma hi nkarhi wa Mfumo wa Kreste wa Gidi ra Malembe.