Mikateko Ya Mahungu Lamanene

“Yehovha [u ndzi totile] leswaku ndzi vula mahungu lamanene eka lavo rhula. U ndzi rhume leswaku ndzi ya bohelela lava vavisekeke mbilu, . . . leswaku ndzi chavelela hinkwavo lava rilaka.”—ESAYA 61:1, 2.

1, 2. (a) Yesu u tikombise a ri mani, naswona njhani? (b) Mahungu lamanene lama twarisiweke hi Yesu a ma tisa mikateko yihi?

SIKU rin’wana hi Savata loko a ha ku sungula vutirheli bya yena, Yesu a ri esinagogeni eNazareta. Nhlamuselo yi vula leswaku, “a nyikiwa buku-nsongwa ya muprofeta Esaya, ivi a pfula buku-nsongwa, a kuma ndhawu leyi a ku tsariwe leswi: ‘Moya wa Yehovha wu le henhla ka mina, hikuva u ndzi tote leswaku ndzi vula mahungu lamanene.’” Yesu u ye emahlweni a hlaya rungula leri engetelekeke ra vuprofeta. Hiloko a tshama ehansi kutani a ku: “Namuntlha tsalwa leri ma ha ku ri twaka ri hetisekile.”—Luka 4:16-21.

² Hi ndlela leyi, Yesu u tikombise a ri muvuri wa evhangeli loyi ku profetiweke ha yena, muvuri wa mahungu lamanene ni muchaveleri. (Matewu 4:23) Naswona leswi Yesu a a ta swi vula a swi ri mahungu lamanene hakunene! U byele vayingiseri va yena a ku: “Hi mina ku vonakala ka misava. Loyi a ndzi landzelaka a nge pfuki a fambe emunyameni, kambe u ta kuma ku vonakala ka vutomi.” (Yohane 8:12) U tlhele a ku: “Loko mi tshama eritweni ra mina, hakunene mi vadyondzisiwa va mina, naswona mi ta tiva ntiyiso, kutani ntiyiso wu ta mi ntshunxa.” (Yohane 8:31, 32) Ina, Yesu a a ri ni “marito ya vutomi lebyi nga heriki.” (Yohane 6:68, 69) Ku vonakala, vutomi, ntshunxeko—leyi i mikateko leyi faneleke yi tlangeriwa hakunene!

3. Hi wahi mahungu lamanene lama chumayeriweke hi vadyondzisiwa va Yesu?

³ Endzhaku ka Pentekosta ya 33 C.E., vadyondzisiwa va ye emahlweni ni ntirho wa Yesu wa ku vula evhangeli. Va chumayele ‘mahungu lamanene ya mfumo’ eka Vaisrayele ni le ka vanhu va matiko. (Matewu 24:14; Mintirho 15:7; Varhoma 1:16) Lava va ma amukeleke va tive Yehovha  Xikwembu. Va ntshunxiwile evuhlongeni bya vukhongeri kutani va va swirho swa tiko lerintshwa ra moya, “ku nga Israyele wa Xikwembu,” leri swirho swa rona swi nga ni ntshembo wa ku fuma hilaha ku nga heriki etilweni ni Hosi ya swona, Yesu Kreste. (Vagalatiya 5:1; 6:16; Vaefesa 3:5-7; Vakolosa 1:4, 5; Nhlavutelo 22:5) Yoleyo a yi ri mikateko ya risima hakunene!

Ku Vula Evhangeli Namuntlha

4. Ntirho wa ku chumayela mahungu lamanene wu hetisisiwa hi ndlela yihi namuntlha?

⁴ Namuntlha, Vakreste lava totiweke va hambeta va hetisisa ntirho wa vuprofeta lowu va byarhisiweke wona hi Yesu eku sunguleni, va ri karhi va seketeriwa hi “ntshungu lowukulu” lowu andzaka wa “tinyimpfu tin’wana.” (Nhlavutelo 7:9; Yohane 10:16) Hikwalaho, mahungu lamanene ma chumayeriwa hi mpimo lowukulu lowu nga si tshamaka wu voniwa. Timbhoni ta Yehovha ti ye ti ya “vula mahungu lamanene eka lavo rhula, [ti] ya bohelela lava vavisekeke mbilu, ku huwelela ntshunxeko eka lava endliweke makhumbi ni ku pfuriwa lokukulu ka mahlo ya vakhotsiwa; ku huwelela lembe ra vunene ra Yehovha ni siku ra ku rihisela ka Xikwembu xa hina; leswaku [ti] chavelela hinkwavo lava rilaka,” ematikweni ni le masin’wini ya 235. (Esaya 61:1, 2) Hikwalaho, ntirho wo vula evhangeli wa Vakreste wu endla leswaku mikateko ni nchavelelo wa xiviri swi hambeta swi kumiwa hi vanhu vo tala “lava nga emahlomulweni ya mixaka-xaka.”—2 Vakorinto 1:3, 4.

5. Timbhoni ta Yehovha ti hambane njhani ni tikereke tin’wana ta Vujagana loko swi ta eku chumayeleni ka mahungu lamanene?

⁵ I ntiyiso leswaku tikereke ta Vujagana ti seketela maendlelo yo hambana-hambana yo vula evhangeli. Tikereke to tala ti rhumela varhumiwa leswaku va ya hundzula vanhu ematikweni man’wana. Hi xikombiso, The Orthodox Christian Mission Center Magazine yi vika hi ntirho wa varhumiwa va Orthodox le Madagascar, edzongeni wa Afrika, le Tanzania ni le Zimbabwe. Hambiswiritano, eKerekeni ya Orthodox, ku fana ni le tikerekeni tin’wana ta Vujagana, vunyingi bya swirho swa kona a swi hlanganyeli entirhweni lowu. Ku hambana ni sweswo, Timbhoni ta Yehovha hinkwato leti tinyiketeleke ti tikarhatela ku hlanganyela eku vuleni ka evhangeli. Ta swi twisisa leswaku ku twarisa mahungu lamanene i xikombiso xa ripfumelo ra tona ra xiviri. Pawulo u te: “Munhu u kombisa ripfumelo hi mbilu leswaku a va la lulameke, kambe u vula erivaleni hi nomu wa yena leswaku a ponisiwa.” Entiyisweni, ripfumelo leri nga susumetiki munhu leswaku a teka goza, ri file.—Varhoma 10:10; Yakobo 2:17.

Mahungu Lamanene Lama Tisaka Mikateko Leyi Nga Heriki

6. Hi wahi mahungu lamanene lama chumayeriwaka namuntlha?

⁶ Timbhoni ta Yehovha ti chumayela mahungu lamanene ngopfu ku tlula hinkwawo. Ti pfula eTibibeleni ta tona kutani ti kombisa vanhu lava ma amukelaka leswaku Yesu u nyikele hi vutomi bya yena byi va gandzelo leswaku a pfulela vanhu ndlela yo tshinela eka Xikwembu, va rivaleriwa swidyoho va tlhela va va ni ntshembo wa vutomi lebyi nga heriki. (Yohane 3:16; 2 Vakorinto 5:18, 19) Ti twarisa leswaku Mfumo wa Xikwembu wu tlhomiwile etilweni ehansi ka Hosi leyi totiweke, Yesu Kreste, nileswaku ku nga ri khale wu ta herisa vuhomboloki emisaveni wu tlhela wu kongomisa ntirho wo vuyetela Paradeyisi. (Nhlavutelo 11:15; 21:3, 4) Ti hetisisa vuprofeta bya Esaya, ti tivisa vaakelani va tona leswaku sweswi i “lembe ra vunene ra Yehovha,” laha vanhu va ha pfulekeriweke hi lunghelo ro amukela mahungu lamanene. Va tlhela va tsundzuxa leswaku ku nga ri khale ku ta fika “siku ra ku rihisela ka Xikwembu xa hina” loko Yehovha a ta herisa vadyohi lava nga hundzukiki.—Pisalema 37:9-11.

7. I ntokoto wihi lowu kombisaka vun’we bya Timbhoni ta Yehovha, naswona ha yini ti ri ni vun’we byo tano?

⁷ Emisaveni leyi nga ni makhombo ni timhangu, lawa hi wona ntsena mahungu lamanene lama nga ni vuyelo lebyi nga heriki. Lava va ma amukelaka va va swirho swa nhlengeletano ya vamakwerhu va Vakreste lava nga ni vun’we emisaveni hinkwayo, lava nga pfumeliki ku hambanisiwa hi moya wa ku nga twanani ka rixaka, xivongo kumbe ikhonomi. Va ‘ambale rirhandzu, hikuva i xiboho lexi hetisekeke xa vun’we.’ (Vakolosa 3:14; Yohane 15:12) Leswi swi voniwe n’wexemu etikweni rin’wana ra le Afrika. Siku rin’wana nimixo ku ve ni ku baleselana hi swibalesa entsindza wa doroba. A ku ri karhi ku ringetiwa ku wutla mfumo. Loko se va sungule ku hlasela rixaka ro karhi, ndyangu wun’wana wa Timbhoni wu soriwile  hikwalaho ko tumbeta Timbhoni-kulobye ta rixaka rin’wana. Loko ndyangu lowu wu hlamula wu te: “Hina hi ni Timbhoni ta Yehovha ntsena laha ndlwini.” Eka tona, ku hambana hi rixaka a ku nga ri nchumu wa nkoka; lexi a xi ri xa nkoka a ku ri rirhandzu ra Vukreste ra ku chavelela lava pfumalaka. Xaka rin’wana ra ndyangu wolowo leri nga riki Mbhoni ri te: “Swirho swa vukhongeri hinkwabyo swi xenge vagandzeri-kulobye. I Timbhoni ta Yehovha ntsena leti nga va xengangiki vagandzeri-kulobye.” Swiendlakalo swo tala leswi fanaka ni lexi, leswi vikiweke ematikweni lama onhiweke hi tinyimpi ta tiko swi kombisa leswaku hakunene Timbhoni ta Yehovha ti ‘rhandza nhlengeletano hinkwayo ya vamakwavo.’—1 Petro 2:17.

Mahungu Lamanene Ma Hundzula Vanhu

8, 9. (a) Lava va amukelaka mahungu lamanene va hundzuka hi ndlela yihi? (b) I mintokoto yihi leyi kombisaka matimba ya mahungu lamanene?

⁸ Mahungu lamanene ma fambisana ni leswi Pawulo a swi vitaneke “vutomi bya sweswi ni lebyi nga ta ta.” (1 Timotiya 4:8) A ma nyiki ntshembo lowu tsakisaka lowu tiyeke wa vumundzuku ntsena, kambe ma tlhela ma antswisa ni “vutomi bya sweswi.” Mbhoni ya Yehovha ha yin’we-yin’we yi kongomisiwa hi Rito ra Xikwembu, ku nga Bibele, leswaku yi twananisa vutomi bya yona ni ku rhandza ka Xikwembu. (Pisalema 119:101) Vumunhu bya vona byi endliwa lebyintshwa loko va hlakulela timfanelo to tanihi ku lulama ni ku tshembeka.—Vaefesa 4:24.

⁹ Anakanya hi xikombiso xa Franco. A a ri ni ximbilwambilwana. Loko swilo swi tshuka swi nga fambi kahle, a a bava a khalakhasa a tlhela a fayelela swilo. Nsati wakwe u dyondze Bibele ni Timbhoni ta Yehovha, kutani xikombiso xa tona xa Vukreste hakatsongo-tsongo xi pfune Franco ku vona leswaku u fanele a hundzuka. U dyondze Bibele na tona naswona u hetelele a swi kotile ku kombisa mihandzu ya moya lowo kwetsima ya ku rhula ni ku tikhoma. (Vagalatiya 5:22, 23) U ve un’wana wa vanhu va 492 lava khuvuriweke le Belgium hi lembe ra ntirho ra 2001. Nakambe, anakanya hi Alejandro. Jaha leri ri godzomberiwe hi swidzidzirisi lerova ri kala ri sungula ku tihanyisa hi swilo swa le taleni, ri teka leswi ri nga swi kumaka ri ya swi xavisa leswaku ri ta kota ku xava swidzidzirisi. Loko Alejandro a ri ni malembe ya 22 hi vukhale, Timbhoni ta Yehovha ti n’wi khutaze ku dyondza Bibele, hiloko a pfumela. A a dyondza Bibele siku ni siku a tlhela a ya eminhlanganweni ya Vukreste. U hundzule vutomi bya yena hi ku hatlisa lerova hi nkarhi lowu nga ehansi ka tin’hweti ta tsevu, u swi kotile ku hlanganyela entirhweni wo vula evhangeli—a va un’wana wa vanhu va 10 115 lava hlanganyeleke entirhweni lowu n’wexemu le Panama.

Mahungu Lamanene I Nkateko Eka Lavo Rhula

10. I vamani lava amukelaka mahungu lamanene, naswona va ri hundzula njhani langutelo ra vona?

¹⁰ Esaya u profetile leswaku mahungu lamanene  a ma ta chumayeriwa eka lavo rhula. Vanhu lavo rhula i vamani? Hi lava va hlamuseriweke ebukwini ya Mintirho va ri lava nga ni “mboyamelo lowunene eka vutomi lebyi nga heriki.” (Mintirho 13:48) I vanhu lava titsongahataka va swiyimo hinkwaswo lava amukelaka rungula ra ntiyiso. Vanhu vo tano va dyondza leswaku ku endla ku rhandza ka Xikwembu swi ta tisa mikateko leyikulu swinene ku tlula leyi kumekaka emisaveni. (1 Yohane 2:15-17) Kambe, xana Timbhoni ta Yehovha ti ti fikelela njhani timbilu loko ti endla ntirho wa tona wo vula evhangeli?

11. Hi ku ya hi Pawulo, xana mahungu lamanene ma fanele ma chumayeriwa njhani?

¹¹ Anakanya hi xikombiso xa muapostola Pawulo loyi a tsaleleke Vakorinto a ku: “Vamakwerhu, loko ndzi ta eka n’wina a ndzi tanga hi ku lava ku mi hlamarisa hi mavulavulelo kumbe hi vutlhari loko ndzi mi byela xihundla xo kwetsima xa Xikwembu. Hikuva loko ndzi ri na n’wina ndzi tiendle loyi a nga tiviki nchumu loko a nga ri Yesu Kreste ni ku beleriwa ka yena.” (1 Vakorinto 2:1, 2) Pawulo a nga ringetanga ku tsakisa vayingiseri va yena hi dyondzo ya yena. U dyondzise mintiyiso leyi tiyisekisiweke hi Xikwembu, mintiyiso leyi namuntlha yi tsariweke eBibeleni. Nakambe, xiya xikhutazo xa Pawulo lexi yaka eka muvuri-kulobye wa evhangeli, ku nga Timotiya: “Chumayela rito, u va eka rona hi xihatla.” (2 Timotiya 4:2) Timotiya a a fanele a chumayela “rito,” rungula ra Xikwembu. Pawulo u tlhele a tsalela Timotiya a ku: “Endla hinkwaswo leswi u nga swi kotaka leswaku u tivonakarisa u amukeleka eka Xikwembu, u ri mutirhi la nga riki na nchumu wo khomiwa hi tingana ha wona, u ri tamela khwatsi rito ra ntiyiso.”—2 Timotiya 2:15.

12. Timbhoni ta Yehovha ti ma landzelela njhani marito ni xikombiso xa Pawulo namuntlha?

¹² Timbhoni ta Yehovha ti landzela xikombiso xa Pawulo swin’we ni marito ya yena lama yaka eka Timotiya. Ta swi xiya leswaku Rito ra Xikwembu ri ni matimba naswona ti ri tirhisa kahle loko ti ri karhi ti kombisa vaakelani va tona marito lama faneleke ya ntshembo ni ya nchavelelo. (Pisalema 119:52; 2 Timotiya 3:16, 17; Vaheveru 4:12) I ntiyiso, ti ti tirhisa kahle tibuku leti sekeriweke eBibeleni leswaku vanhu lava tsakelaka va kuma vutivi lebyi engetelekeke bya Bibele hi nkarhi wa vona. Kambe minkarhi hinkwayo ti lava ku kombisa vanhu marito lama humaka eMatsalweni. Ta swi tiva leswaku Rito ra Xikwembu leri huhuteriweke ri ta khumba timbilu ta vanhu lava titsongahataka. Naswona loko ti ri tirhisa hi ndlela leyi ti tiyisa ni ripfumelo ra tona.

“Chavelela Hinkwavo Lava Rilaka”

13. Hi lembe ra 2001, i swiendlakalo swihi leswi vangeke leswaku ku va ni xilaveko lexikulu xo chavelela lava rilaka?

¹³ Lembe ra 2001 ri ve ni makhombo yo tala, kutani hikwalaho ka sweswo vanhu vo tala a va lava nchavelelo. Xikombiso lexikulu hi lexi humeleleke le United States hi September n’wexemu loko matherorisi ma hlasela World Trade Center le New York na Pentagon ekusuhi ni le Washington, D.C. Minhlaselo yoleyo yi hlamarise tiko hinkwaro! Loko ku ri ni swiendlakalo swo tano, Timbhoni ta Yehovha ti lwela ku hetisisa ntirho wa tona wo “chavelela hinkwavo lava rilaka.” Mintokoto yi nga ri yingani yi ta kombisa ndlela leyi sweswo va swi endlaka ha yona.

14, 15. Timbhoni ti swi kotise ku yini ku tirhisa matsalwa hi ndlela leyi humelelaka eka swiendlakalo swimbirhi leswi nga faniki, leswaku ti chavelela lava rilaka?

¹⁴ Mbhoni leyi nga muvuri wa evhangeli wa nkarhi hinkwawo yi ye eka wansati un’wana loyi a a ri karhi a famba etlhelo ka xitarata kutani yi n’wi vutisa leswaku u anakanya yini hi minhlaselo ya sweswinyana ya matherorisi. Wansati loyi u sungule ku rila. U vule leswaku a a titwa a ri ni nhlomulo naswona a a navela onge a nga pfuna hi ndlela yo karhi. Mbhoni leyi yi n’wi byele leswaku Xikwembu xa hi rhandza hinkwerhu, kutani yi hlaya Esaya 61:1, 2. Wansati loyi u ma twisisile marito lawa lama huhuteriweke hi Xikwembu naswona u vule leswaku munhu un’wana ni un’wana u le ku rileni. U amukele xiphephana kutani a kombela Mbhoni leyi leswaku yi n’wi endzela ekaya.

¹⁵ Timbhoni timbirhi leti a ti ri entirhweni wa ku vula evhangeli ti hlangane ni wanuna un’wana loyi a ri eku tirheni eguxete ya yena. Va kombele ku n’wi komba marito lama humaka eMatsalweni lama chavelelaka hikwalaho ka khombo leri a ra ha ku endleka le World Trade Center. Loko a va pfumelerile va hlaye 2 Vakorinto 1:3-7, leyi nga ni marito lama nge: “Nchavelelo . . . wa andza ha Kreste.” Wanuna loyi u swi tlangerile  leswaku vaakelani va yena lava nga Timbhoni a va chavelela van’wana kutani a ku: “Onge Xikwembu xi nga katekisa ntirho wo saseka lowu mi wu endlaka.”

16, 17. I mintokoto yihi yimbirhi leyi kombisaka matimba ya Bibele yo pfuna vanhu lava nga ni gome kumbe lava khumbiweke hi makhombo?

¹⁶ Mbhoni leyi a yi endla riendzo ro vuyela eka vanhu lava tsakelaka yi hlangane ni n’wana wa wansati loyi a tshameke a kombisa ku tsakela, yi vula leswaku a yi tivutisa leswaku vaakelani va khumbeke njhani endzhaku ka khombo leri a ra ha ku endleka. Wanuna loyi u hlamarisiwe hileswi Mbhoni leyi a yi tinyike nkarhi wa ku endzela vanhu yi ya vona ndlela leyi va khumbekeke ha yona. U vule leswaku a a tirhela ekusuhi swinene ni le World Trade Center loko ku humelela khombo leri naswona u vone hinkwaswo leswi humeleleke. Loko a vutise leswaku ha yini Xikwembu xi pfumelela ku xaniseka, Mbhoni yi hlaye tindzimana ta le Bibeleni, ku katsa na Pisalema 37:39, leyi nge: “Ku ponisiwa ka lavo lulama ku huma eka Yehovha; i xisirhelelo xa vona hi nkarhi wa maxangu.” Wanuna loyi hi tintswalo u vutise leswaku Mbhoni leyi ni ndyangu wa yona va khumbeke njhani a tlhela a yi kombela leswaku yi vuya, kutani a tlangela hi mbilu hinkwayo leswi a endzeriweke.

¹⁷ Un’wana wa vanhu va magidi lava rilaka loyi a chaveleriweke hi Timbhoni ta Yehovha endzhaku ka minhlaselo ya matherorisi a ku ri wansati loyi Timbhoni ti hlanganeke na yena loko ti endzela vaakelani va tona. A a karhatiwe swinene hi leswi humeleleke naswona u yingiserile loko ti n’wi hlayela Pisalema 72:12-14: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yona.” Marito wolawo a ma twala hakunene! Wansati loyi u kombele Timbhoni leswaku ti tlhela ti hlaya tindzimana leti a tlhela a ti kombela leswaku ti nghena endlwini leswaku va ta ya emahlweni ni bulo. Loko bulo leri ri hela, se a ku sunguriwe dyondzo ya Bibele.

18. Mbhoni yi va pfune njhani vaakelani va yona loko yi komberiwa leswaku yi va khongelela?

¹⁸ Mbhoni yin’wana yi tirha ekhefini endhawini leyi ku tshamaka vanhu lava fuweke ntsena lava a va nga ma tsakeli mahungu lamanene ya Mfumo enkarhini lowu hundzeke. Endzhaku ka nhlaselo wa matherorisi, vaaki lava va sale va tsemeke nhlana. Hi Ravuntlhanu nimadyambu endzhaku ka nhlaselo, mininjhere wa khefi leyi u kombele  leswaku un’wana ni un’wana a ya hala handle a khome khandlhele, hi xikongomelo xo tsundzuka vanhu lava hlaseriweke. Hi ku anakanyela mintlhaveko ya vona, Mbhoni leyi na yona yi humile yi ya yima etlhelo ka xitarata. Mininjhere a a swi tiva leswaku munhu loyi a a ri Mbhoni ya Yehovha, kutani endzhaku ka ku tsundzuka vanhu volavo, u n’wi kombele leswaku a va khongelela. Mbhoni yi pfumerile. Exikhongelweni xa yona yi vulavule hi ku rila ka vanhu vo tala kambe yi vula leswaku vanhu lava rilaka a va fanelanga va rila va nga ri na ntshembo. Yi vulavule hi nkarhi lowu swiendlakalo swo tano swo chavisa swi nga ta ka swi nga ha vi kona kutani yi vula leswaku hinkwavo va nga tshinela eka Xikwembu xa nchavelelo hi ku kuma vutivi lebyi kongomeke lebyi humaka eBibeleni. Endzhaku ko vula leswaku “Amen,” mininjhere—a landzeriwa hi vanhu lava tlulaka 60 lava a va ri ehandle ka khefi—u tile eka Mbhoni leyi, a yi nkhensa a tlhela a yi angarha, a vula leswaku a nga si tshama a twa xikhongelo lexinene hi ndlela leyi.

Nkateko Eka Vaaki

19. I ntokoto wihi lowu kombisaka leswaku van’wana va ma xiya mahanyelo lamanene ya Timbhoni ta Yehovha?

¹⁹ Namuntlha vanhu lava tshamaka laha Timbhoni ta Yehovha ti chumayelaka hi ku hiseka va vuyeriwa swinene—hilaha vo tala va vuleke hakona. Ina, vanhu lava kondletelaka ku rhula, ku tshembeka ni mahanyelo lama baseke va ni nsusumeto lowunene. Etikweni rin’wana ra le Asiya Xikarhi, Timbhoni ti hlangane ni mutirhela-mfumo la tekeke penceni loyi khale a a ri muyimeri wa vusirheleri etikweni. U vule leswaku u tshame a averiwa ku kambisisa minhlangano ya vukhongeri yo hambana-hambana. Loko a kambisisa Timbhoni ta Yehovha, u tsakisiwe hi ku tshembeka ka tona ni ku tikhoma ka tona lokunene. U khumbiwe hi ripfumelo ra tona leri tiyeke ni hileswi tidyondzo ta tona ti sekeriweke eMatsalweni. Wanuna loyi u pfumerile ku dyondza Bibele.

20. (a) Ntirho lowu vikiweke hi Timbhoni ta Yehovha n’wexemu wu kombisa yini? (b) I yini lexi kombisaka leswaku ka ha ri na ntirho wo tala wo wu endla, naswona hi ri teka njhani lunghelo ra hina ra ku vula evhangeli?

²⁰ Mintokoto yi nga ri yingani leyi hlamuseriweke exihlokweni lexi leyi nga lo hlawuriwa eka yo tala swinene leyi nga hlamuseriwaka, yi swi veka erivaleni leswaku Timbhoni ta Yehovha a ti khomekile swinene hi lembe ra ntirho ra 2001. * Ti vulavule ni vanhu va timiliyoni, ti chavelela vo tala lava a va ri eku rileni, kutani ntirho wa tona wo vula evhangeli wu katekisiwile. Vanhu va 263 431 va kombise ku tinyiketela ka vona eka Xikwembu hi ku khuvuriwa. Emisaveni hinkwayo nhlayo ya vavuri va evhangeli yi andze hi tiphesente ta 1,7. Naswona mhaka ya leswaku vanhu va 15 374 986 va ve kona eXitsundzuxweni xa rifu ra Yesu xa lembe na lembe yi kombisa leswaku ka ha ri ni ntirho wo tala lowu faneleke wu endliwa. (1 Vakorinto 11:23-26) Onge hi nga hambeta hi lava vanhu vo rhula lava amukelaka mahungu lamanene. Naswona loko lembe ra vunene ra Yehovha ra ha ya emahlweni, onge hi nga hambeta hi chavelela “lava vavisekeke mbilu.” Mawaku lunghelo lerikulu swinene leri hi nga na rona! Entiyisweni hinkwerhu ka hina hi phindha marito ya Esaya lama nge: “Kunene ndzi ta khana eka Yehovha. Moya-xiviri wa mina wu ta tsakela Xikwembu xanga.” (Esaya 61:10) Onge Xikwembu xi nga hambeta xi hi tirhisa loko xi hetisisa marito lawa ya vuprofeta: “Yehovha, Hosi leyi Lawulaka u ta endla leswaku ku lulama ni ku dzunisiwa ku hluka emahlweni ka matiko hinkwawo.”—Esaya 61:11.

[Nhlamuselo ya le hansi]

Wa Tsundzuka Xana?

• Vanhu lavo rhula va katekisiwe njhani hi mahungu lamanene lawa Yesu a ma chumayeleke?

• Lava va amukeleke ntirho wo vula evhangeli wa vadyondzisiwa va Yesu va lembe-xidzana ro sungula va kume mikateko yihi?

• Vanhu lava yingisaka va katekisiwe njhani namuntlha hi mahungu lamanene?

• Lunghelo ra hina ra ku va vavuri va evhangeli hi ri languta njhani?

[Swivutiso Swa Dyondzo]

 [Chati leyi nga eka tluka 19-22]

2001 SERVICE YEAR REPORT OF JEHOVAH’S WITNESSES WORLDWIDE

 (See bound volume)

[Swifaniso leswi nga eka tluka 15]

Timbhoni ta Yehovha minkarhi hinkwayo ti tsundzuka vutihlamuleri bya tona bya ku vula evhangeli

[Swifaniso leswi nga eka tluka 17]

Lava va amukelaka mahungu lamanene va va swirho swa nhlengeletano ya vamakwerhu va misava hinkwayo lava nga ni vun’we