1. Xana Davhida a a titwa njhani hi Yehovha naswona sweswo swi n’wi susumetele ku endla yini?

HOSI DAVHIDA u tsale a ku: “Yehovha hi lonkulu naswona u fanele a dzunisiwa swinene.” (Ps. 145:3) A a rhandza Yehovha naswona sweswo swi n’wi susumetele leswaku a N’wi dzunisa “exikarhi ka nhlengeletano.” (Ps. 22:22; 40:5) A swi kanakanisi leswaku wa n’wi rhandza Yehovha naswona u pfumelelana ni marito ya Davhida lama nge: “Onge u nga dzunisiwa, Wena Yehovha Xikwembu xa Israyele tata wa hina, ku suka enkarhini lowu nga riki na makumu ku ya enkarhini lowu nga riki na makumu.”—1 Tikr. 29:10-13.

2. (a) Hi nga n’wi dzunisa njhani Yehovha? (b) Xana van’wana va langutana ni swiphiqo swihi naswona i yini leswi hi nga ta swi kambisisa?

² Namuntlha, ndlela yin’wana yo dzunisa Yehovha i ku va hi hlamula emihlanganweni ya hina ya Vukreste. Hambiswiritano, vamakwerhu vo tala swa va tikela. Va swi lava ku hlamula emihlanganweni kambe va chava. I yini leswi va nga swi endlaka leswaku va hlula ku chava? Hi swihi switsundzuxo leswi nga hi pfunaka leswaku hi nyikela tinhlamulo leti khutazaka? Emahlweni ko va hi hlamula swivutiso sweswo, a hi rhangeni hi ku kambisisa swivangelo swa mune leswi endlaka hi hlamula emihlanganweni.

3-5. (a) Hilaha swi hlamuseriweke hakona eka Vaheveru 13:15, hikwalaho ka yini hi hlamula emihlanganweni? (b) Xana swa boha leswaku hinkwerhu hi nyikela nhlamulo hi ndlela leyi fanaka? Hlamusela.

³ Hinkwerhu ka hina Yehovha u hi nyike lunghelo ra ku n’wi dzunisa. (Ps. 119:108) Tinhlamulo ta hina emihlanganweni i “xitlhavelo [xa hina] xa ku dzunisa” naswona ku hava loyi a nga hi endlelaka xona. (Hlaya Vaheveru 13:15.) Xana Yehovha u langutele leswaku un’wana ni un’wana wa hina a nyikela xitlhavelo lexi  fanaka kumbe hi hlamula hi ndlela leyi fanaka? Nikatsongo!

⁴ Yehovha wa swi tiva leswaku hi ni vuswikoti lebyi hambaneke ni swiyimo leswi nga faniki, naswona u swi tlangela swinene switlhavelo leswi hi kotaka ku n’wi nyika swona. Ehleketa hi switlhavelo leswi a swi amukeleke leswi Vaisrayele va n’wi endleleke swona. Vaisrayele van’wana a va kota ku nyikela hi xinyimpfana kumbe hi mbuti. Kambe Muisrayele loyi a nga xisiwana a a pfumeleriwa ku nyikela hi “magugurhwana mambirhi kumbe swituvana swimbirhi.” Loko Muisrayele a nga swi koti ku humesa swinyenyana swimbirhi, Yehovha a amukela “vukhume bya mpimo wa efa ya mapa lama silekeke kahle.” (Lev. 5:7, 11) Mapa a ma nga durhi, kambe Yehovha a ma amukela, ntsena loko ku ri “mapa lama silekeke kahle.”

⁵ Ninamuntlha, Xikwembu xa hina lexi nga ni musa xa ha titwa hi ndlela yoleyo. Loko hi hlamula, a xi langutelanga leswaku hinkwerhu ka hina hi va ni vuswikoti byo vulavula ku fana na Apolosi kumbe hi va lava khorwisaka ku fana na Pawulo. (Mint. 18:24; 26:28) Yehovha a nga langutelanga leswaku hi endla leswi hi nga ta ka hi nga swi koti. Tsundzuka noni leyi nyikeleke hi swimalana swimbirhi swa nsimbi. A yi ri ya risima eka Yehovha hikuva yi nyikele hinkwaswo leswi a yi ri na swona.—Luka 21:1-4.

6. (a) Hi ku ya hi Vaheveru 10:24, 25, xana tinhlamulo ta van’wana ti hi khumba njhani? (b) U nga swi kombisa njhani leswaku wa ti tlangela tinhlamulo leti ku khutazaka?

⁶ Ha khutazana loko hi hlamula. (Hlaya Vaheveru 10:24, 25.) Hinkwerhu ha tsaka loko hi twa tinhlamulo to hambanahambana emihlanganweni. Ya hi tsakisa nhlamulo ya n’wana leyi humaka embilwini naswona yi ba nhloko ya mhaka. Swa hi khutaza ku twa munhu a hlamula hi rito leri kombisaka leswaku u tsakile hikwalaho ka ntiyiso lowu a wu kumeke. Ha va tlangela lava ‘nga ni xivindzi’ xo hlamula, hambileswi va nga ni tingana kumbe va sungulaka ku dyondza ririmi ra hina. (1 Tes. 2:2) Hi nga swi kombisa njhani leswaku ha ma tlangela matshalatshala ya vona? Loko mihlangano yi hela hi nga nkhensa nhlamulo ya vona leyi khutazaka. Ndlela yin’wana leyi hi nga kombisaka ha yona leswaku ha yi tlangela nhlamulo ya vona i ku va na hina hi hlamula. Kutani loko hi endla tano a ho kuma xikhutazo ntsena emihlanganweni kambe na hina hi khutaza van’wana.—Rhom. 1:11, 12.

7. Hi vuyeriwa njhani loko hi hlamula?

⁷ Ha vuyeriwa loko hi hlamula. (Esa. 48:17)  Hi ndlela yihi? Xo sungula, loko hi tivekela pakani yo hlamula hi ta susumeteleka ku yi lunghiselela kahle mihlangano. Loko hi yi lunghiselela kahle, hi ta ya hi ri twisisa kahle Rito ra Xikwembu. Kutani loko hi ya hi ri twisisa kahle, hi ta kota ku tirhisa leswi hi swi dyondzeke. Xa vumbirhi, hi ta ya hi yi tsakela swinene mihlangano hikuva hi ta va hi katseka eka yona. Xa vunharhu, loko hi endla matshalatshala leswaku hi hlamula, hakanyingi leswi hi swi hlamuleke swi ta tshama emianakanyweni ya hina ku ringana nkarhi wo leha.

8-9. (a) Hilaha swi kombisiweke hakona eka Malakiya 3:16, xana u ehleketa leswaku Yehovha u titwa njhani hi tinhlamulo ta hina? (b) I yini lexi van’wana va xi chavaka?

⁸ Hi tsakisa Yehovha loko hi vulavula hi ripfumelo ra hina. Hi nga tiyiseka leswaku Yehovha wa hi yingisela naswona wa ma tlangela swinene matshalatshala lawa hi ma endlaka leswaku hi hlamula emihlanganweni. (Hlaya Malakiya 3:16.) U kombisa leswaku wa ma tlangela hi ku hi katekisa loko hi tikarhatela ku n’wi tsakisa.—Mal. 3:10.

⁹ Swi le rivaleni leswaku hi ni swivangelo leswinene swo va hi hlamula emihlanganweni. Hambiswiritano, van’wana va nga ha chava ku yimisa voko. Loko ku ri leswaku u titwa hi ndlela yoleyo, u nga heli matimba. A hi kambisiseni misinya yin’wana ya milawu ya Bibele, swikombiso swi nga ri swingani ni switsundzuxo leswi nga hi pfunaka hinkwerhu leswaku hi hlamula hilaha ku engetelekeke emihlanganweni.

10. (a) Hi kwihi ku chava loku vo tala va hina hi nga na kona? (b) Loko u chava ku hlamula, hi yihi mfanelo leyinene leyi u nga ha vaka u ri na yona?

¹⁰ Xana nkarhi na nkarhi u khomiwa hi rhumbyana loko u ehleketa ku yimisa voko u hlamula? Loko swi ri tano, a wu wexe. Ntiyiso hi leswaku vo tala va hina hi va hi chuhilenyana loko hi hlamula. Leswaku u kota ku lwisana ni ku chava koloko, u fanele u tiva lexi ku vangelaka ku chava. Xana u chava leswaku u ta rivala leswi u lavaka ku swi vula kumbe u ta vula leswi hoxeke? Xana u vilerisiwa hileswaku nhlamulo ya wena yi nge vi leyi tsakisaka ku fana ni ta van’wana? Entiyisweni, a swi hoxanga ku chavisiwa hi swilo  swo tano. Swi kombisa leswaku wa titsongahata naswona u teka van’wana va ri lava tlakukeke eka wena. Yehovha wa yi rhandza mfanelo yoleyo. (Ps. 138:6; Filp. 2:3) Kambe Yehovha u lava leswaku na wena u n’wi dzunisa naswona u khutaza vamakwerhu emihlanganweni. (1 Tes. 5:11) Wa ku rhandza naswona u ta ku pfuna leswaku u va ni xivindzi.

11. Hi swihi switsundzuxo swa le Matsalweni leswi nga hi pfunaka?

¹¹ Xiya switsundzuxo swin’wana swa le Matsalweni. Bibele yi vula leswaku hinkwerhu hi endla swihoxo eka leswi hi swi vulaka ni ndlela leyi hi swi vulaka ha yona. (Yak. 3:2) Yehovha a nga langutelanga leswaku hi va lava hetisekeke, kasi swi tano ni hi vamakwerhu va hina. (Ps. 103:12-14) Ku fana na hina na vona i swirho swa ndyangu wa Yehovha naswona va hi rhandza. (Mar. 10:29, 30; Yoh. 13:35) Va swi twisisa leswaku mikarhi yin’wana tinhlamulo ta hina a hi ti vuli hilaha a hi kunguhate hakona.

12-13. Hi dyondza yini eka xikombiso xa Nehemiya na Yonasi?

¹² Ehleketa hi swikombiso swin’wana swa le Bibeleni leswi nga ku pfunaka u hlula ku chava. Tsundzuka Nehemiya. A a tirha endlwini ya hosi leyi nga ni matimba. Nehemiya a ri ni gome hileswi a twe leswaku malwangu ni tinyangwa ta Yerusalema a swi onhiwile. (Neh. 1:1-4) Ehleketa ndlela leyi a chuhe ha yona loko hosi yi n’wi vutisa leswaku hikwalaho ka yini a ri ni gome! Nehemiya u nambe a khongela kutani a yi hlamula. Leswi hosi yi swi vuleke swi va pfune swinene vanhu va Xikwembu. (Neh. 2:1-8) Nakambe ehleketa hi Yonasi. Loko Yehovha a n’wi kombela leswaku a ya vulavula ni Vaninivha, Yonasi u khomiwe hi rhumbyana lerova a baleka a kongoma endhawini yin’wana. (Yon. 1:1-3) Kambe hi ku pfuniwa hi Yehovha, Yonasi u yile a ya chumayela Vaninivha. Naswona leswi a va byeleke swona swi va pfune swinene Vaninivha. (Yon. 3:5-10) Eka Nehemiya hi dyondza leswaku i swa nkoka ku khongela hi nga si hlamula. Kasi eka Yonasi hi dyondza leswaku Yehovha u ta hi pfuna hi kota ku n’wi tirhela ku nga khathariseki ku chava loku hi nga na kona. Xana ku hlamula emihlanganweni swi nga chavisa ku fana ni ku chumayela Vaninivha?

¹³ Hi swihi switsundzuxo leswi nga ku pfunaka u kota ku nyikela tinhlamulo leti khutazaka emihlanganweni? A hi kambisiseni swiringanyeto swi nga ri swingani.

14. Hikwalaho ka yini hi fanele hi yi lunghiselela kahle mihlangano naswona hi nga swi endla rini sweswo?

¹⁴ Lunghiselela nhlangano wun’wana ni wun’wana. Loko u kunguhata kahle naswona u lunghiselela kahle, u ta va na xivindzi xo hlamula. (Swiv. 21:5) I ntiyiso leswaku hi lunghiselela mihlangano hi mikarhi leyi nga faniki. Eloise, noni leyi nga emalembeni ya va 80, u sungula ku lunghiselela Dyondzo ya Xihondzo xo Rindza loko vhiki ri sungula. U ri, “Ndzi yi tsakela swinene mihlangano loko ndzi yi lunghiselele ka ha ri na nkarhi.” Joy, loyi a tirhaka ntirho wa ku tihanyisa, u tivekele nkarhi wo lunghiselela Xihondzo xo  Rindza hi Mugqivela. U ri: “Ndzi rhandza ku ya emihlanganweni ndza ha swi tsundzuka kahle leswi ndzi swi lunghiseleleke.” Ike, nkulu loyi a tshamaka a khomekile naswona a nga phayona u ri, “Ndzi rhandza ku lunghiselela hakatsongotsongo evhikini ku ri ni ku lunghiselela mihlangano hinkwayo hi nkarhi wun’we.”

15. Hi yihi ndlela leyinene yo lunghiselela mihlangano?

¹⁵ Xana swi katsa yini ku yi lunghiselela kahle mihlangano? Nkarhi ni nkarhi loko u lunghiselela, sungula hi ku kombela Yehovha leswaku a ku nyika moya lowo kwetsima. (Luka 11:13; 1 Yoh. 5:14) Kutani tirhisa timinete ti nga ri tingani leswaku u kambisisa xihloko, swihlokwana, swifaniso ni swivutiso swa mpfuxeto. Loko u ri karhi u dyondza ndzimana ha yin’we, hlaya matsalwa hinkwawo lama kombisiweke eka ndzimana yoleyo loko swi koteka. Anakanyisisa hi rungula rero, ngopfungopfu eka tinhla leti u lavaka ku hlamula eka tona. Loko u lunghiselela kahle, u ta vuyeriwa swinene naswona swi ta ku olovela ku hlamula.—2 Kor. 9:6.

16. Hi swihi switirhisiwa leswi kumekaka naswona u swi tirhisa njhani?

¹⁶ Loko swi koteka, tirhisa switirhisiwa swa le ka elektroniki leswi nga kona hi ririmi ra wena. Hi ku tirhisa nhlengeletano yakwe, Yehovha u hi nyike switirhisiwa swa le ka elektroniki leswi hi pfunaka ku lunghiselela mihlangano. App ya hina ya JW Library yi hi pfumelela ku dawuniloda mikandziyiso leyi dyondziwaka eka tifoni ni tithebulete. Kutani hi nga kota ku yi dyondza kumbe ku yi yingisela nkarhi wun’wana ni wun’wana ni le ndhawini yin’wana ni yin’wana. Van’wana va tirhisa app leyi hi nkarhi wo wisa entirhweni kumbe exikolweni kumbe loko va ri eriendzweni. Watchtower Library na Watchtower LAYIBURARI YA LE KA INTHANETE swi endla leswaku swi hi olovela ku endla ndzavisiso eka dyondzo leyi hi lavaka ku yi dyondza hi vuenti.

17. (a) Hikwalaho ka yini swi ri swinene ku lunghiselela tinhlamulo to hlayanyana? (b) U dyondze yini eka vhidiyo leyi nge Vana Munghana Wa Yehovha—Lunghiselela Nhlamulo Ya Wena?

¹⁷ Loko swi koteka, lunghiselela tinhlamulo to hlayanyana eka dyondzo ha yin’we. Hikwalaho ka yini? A hi mikarhi hinkwayo va nga ku kombaka loko u yimisa voko. Swi nga ha endleka leswaku ni van’wana va yimisa kutani mufambisi wa dyondzo a komba un’wana wa vona. Leswaku mihlangano yi hela hi nkarhi, mufambisi wa dyondzo, a nga va kombi hinkwavo lava lavaka ku hlamula eka tinhla to karhi. Kutani u nga khunguvanyeki kumbe u hela matimba loko u nga kombiwi eku sunguleni ka dyondzo. Loko u lunghiselela tinhlamulo to hlayanyana, u ta va ni nkarhi wo tala wa ku hlamula. U nga ha lunghiselela ku hlaya tsalwa. Kambe loko u swi kota, u nga tlhela u lunghiselela ku hlamula hi marito ya wena. *

18. Hikwalaho ka yini hi fanele hi hlamula hi ku komisa?

 ¹⁸ Hlamula hi ku komisa. Hakanyingi, tinhlamulo leti khutazaka hi leto koma ti tlhela ti ba nhloko ya mhaka. Kutani tikarhatele ku hlamula hi ku komisa. Ringeta ku hlamula hi tisekoni leti nga hundziki 30. (Swiv. 10:19; 15:23) Loko se u ri ni malembe u ri karhi u hlamula, i swa nkoka leswaku u vekela van’wana xikombiso lexinene hi ku hlamula hi ku komisa. Loko u lehisa tinhlamulo ta wena, van’wana va nga ha chava leswaku va nge swi koti ku hlamula ku fana na wena. Nakambe tinhlamulo to koma ti endla leswaku vanhu vo tala va kota ku hlamula. Ngopfungopfu loko u kombiwa ro sungula, nyikela nhlamulo yo koma leyi baka nhloko ya mhaka. U nga ringeti ku humesa tinhla hinkwato leti nga eka ndzimana. Endzhaku ka loko ku buriwe hi tinhla ta nkoka eka ndzimana, u nga ha boxa tinhla leti engetelekeke.—Vona bokisi leri nge “ Ndzi Nga Hlamurisa Ku Yini?”

19. Mufambisi wa dyondzo a nga ku pfuna njhani naswona u fanele u endla yini?

¹⁹ Tivisa mufambisi wa dyondzo leswaku hi yihi ndzimana leyi u tsakelaka ku hlamula eka yona. Loko u hlawula ku endla tano, u fanele u vulavurisana ni mufambisi wa dyondzo ku nga si sungula mihlangano. Loko ku ri nkarhi wa leswaku u hlamula eka ndzimana yoleyo, hatla u yimisa voko naswona u ri yimisela ehenhla leswaku mufambisi wa dyondzo a ta ku vona.

20. Xana mihlangano ya vandlha yi nga fanisiwa ni swakudya leswi hi swi dyaka ni vanghana hi ndlela yihi?

²⁰ Teka mihlangano ya vandlha ku fana ni swakudya swo xawula leswi u swi dyaka ni vanghana. A hi nge vamakwerhu vo karhi va le vandlheni va hlele xinkhubyana kutani va ku kombela leswaku u lunghiselela swakudya swo karhi. Xana a wu ta angula njhani? U nga ha chavanyana, kambe u ta tikarhatela ku endla leswi hinkwavo va nga ta tiphina ha swona. Yehovha, Loyi a hi rhambeke, u lunghiselele swakudya swo nandziha emihlanganweni. (Ps. 23:5; Mat. 24:45) Naswona wa tsaka loko hi ta ni nyiko yitsongo, leyi hi yi lunghiseleleke kahle. Kutani lunghiselela kahle naswona u hlamula hi ku ntshunxeka. Kutani a wu nge dyi swakudya swa Yehovha ntsena kambe na wena u ta tisa nyiko yo karhi evandlheni.