Xana u ti hlaye hi vukheta timagazini ta sweswinyana ta Xihondzo xo Rindza? A hi vone loko u ta swi kota ku hlamula swivutiso leswi landzelaka:

Hi byihi vumbhoni bya le Matsalweni lebyi kombisaka leswaku Xikwembu xi hi twela vusiwana?

Loko Vaisrayele va khale va ri evuhlongeni eEgipta, Xikwembu a xi ma vona maxangu lawa a va ri eka wona naswona a xi twa ku vava loku a va ku twa. (Eks. 3:7; Esa. 63:9) Leswi hi endliweke hi xifaniso xa Xikwembu, hi nga swi kota ku va ni ntwelavusiwana. Xikwembu xi hi twela vusiwana hambiloko hi titwa hi nga faneriwi hi rirhandzu ra xona.—wp18.3, matl. 8-9.

Xana tidyondzo ta Yesu ti va pfune njhani vanhu leswaku va tshika xihlawuhlawu?

Enkarhini wa Yesu, Vayuda vo tala a va ri na xihlawuhlawu. Kreste u kandziyise nkoka wo titsongahata naswona u sole vanhu lava nga ni xihlawuhlawu. U khutaze valandzeri vakwe leswaku va tekana tanihi vamakwerhu.—w18.06, matl. 9-10.

Hi dyondza yini emhakeni yo va Xikwembu xi alele Muxe ku nghena eTikweni leri Tshembisiweke?

Muxe a a ri na vuxaka lebyikulu na Yehovha. (Det. 34:10) Loko va ri ekusuhi ni ku heta malembe ya 40 emananga, vanhu va tlhele va gungula ra vumbirhi hikwalaho ka ku pfumaleka ka mati. Xikwembu xi byele Muxe leswaku a vulavula na ribye. Kambe, Muxe u be ribye. Kumbexana, Yehovha u hlundzuke hikwalaho ka leswi Muxe a nga swi landzelangiki swileriso swa Yena kumbe hikwalaho ka leswi Muxe a nga N’wi vangamisangiki hileswi a endleke singita. (Tinhl. 20:6-12) Leswi swi fanele swi hi dyondzisa leswaku i swa nkoka ku yingisa Yehovha ni ku n’wi vangamisa.—w18.07, matl. 13-14.

Hi nga tala ku endla swihoxo hi ndlela yihi loko hi avanyisa hi ku landza ku languteka ka munhu?

Ku ni swiyimo swinharhu leswi eka swona vanhu va talaka ku kuceteriwa hi leswi va swi vonaka: rixaka kumbe ndhavuko, rifuwo kumbe ku pfumala ni malembe ya munhu. I swa nkoka ngopfu leswaku hi ringeta ku languta van’wana hilaha Xikwembu lexi nga yiki hi nghohe xi va langutaka hakona! (Mint. 10:34, 35)—w18.08, matl. 8-12.

Hi tihi tindlela tin’wana leti Vakreste lava dyuhaleke va nga pfunaka van’wana ha tona?

Mukreste la dyuhaleke loyi a bohekeke ku cinca xiavelo xakwe wa ha ri wa nkoka eka Xikwembu naswona a nga pfuna van’wana. A nga tsakela ku pfuna vavanuna lava nga riki Timbhoni lava vasati va vona va nga Timbhoni, lava holeke, a nga fambisa tidyondzo ta Bibele hambi ku ri ku engetela vutirheli byakwe.—w18.09, matl. 8-11.

Hi swihi Switirhisiwa Swo Pfuneta Ku Dyondzisa leswi Vakreste va nga na swona?

Ku ni makhadi yo nghena eka jw.org ni swirhambo. Swiphephana swa nhungu leswi lunghiseleriweke kahle ku katsa ni timagazini ta Xihondzo xo Rindza ni Xalamuka! Nakambe ku ni tibroxara ti nga ri tingani, tibuku timbirhi leti tirhisiwaka ku dyondzisa Bibele ni tivhidiyo ta mune ku katsa ni leyi nge, Ha Yini U Fanele U Dyondza Bibele?—w18.10, tl. 16.

Xana Mukreste a nga “xava ntiyiso” hi ndlela yihi hilaha swi khutaziwaka hakona eka Swivuriso 23:23?

A ku laveki mali leswaku hi kuma ntiyiso. Hambiswiritano, hi fanele hi tirhisa nkarhi ni ku endla matshalatshala leswaku hi wu kuma.—w18.11, tl. 4.

Hi nga dyondza yini eka ndlela leyi Hosiya a tirhisaneke ha yona ni nsati wakwe, Gomere?

Gomere a tshamela ku endla vuoswi kambe Hosiya u n’wi rivalerile ni ku tlhela a tshama na yena tanihi nsati wakwe. Loko munghana wa vukati la nga Mukreste a endla vuoswi, munghana wa vukati loyi a nga riki na nandzu a nga n’wi rivalela. Loko a tlhela a endla timhaka ta masangu na yena, a nga ha ri na xona xivangelo xa Matsalwa xo dlaya vukati.—w18.12, tl. 13.