NHLOKOMHAKA YA XIFUNENGETO | XANA U NGA SWI KOTA KU LAWULA VUTOMI BYA WENA?
Ntlhontlho: Swiyimo Leswi U Nga Ta Ka U Nga Swi Cinci
XANA u tshikilelekile hikwalaho ko karhatiwa hi vuvabyi lebyi nga tshungulekiki, hikwalaho ka leswi u dlayeke vukati kumbe hileswi u nga feriwa? Loko u langutana ni swiyimo leswi u nga ha titwa onge a wu nge swi koti ku swi hlula, u navela onge swi nga cinca. U nga swi kotisa ku yini ku tlhela u lawula xiyimo xa wena?
XIKOMBISO XA LE BIBELENI: PAWULO
Muapostola Pawulo u fambe maendzo yo tala a ri murhumiwa la hisekaka eka malembe ya 2 000 lama hundzeke. Kambe maendzo yakwe ma kavanyetekile loko a khotsiwa a nga ri ni nandzu, kutani a tshama endlwini ya khotso ku ringana malembe mambirhi a rindziwe hi socha. Ematshan’weni yo hluriwa hi gome, Pawulo a a khathala ngopfu hi leswi a a kota ku swi endla. Lava a va n’wi endzela, u va dyondzisile a tlhela a va chavelela. U tlhele a tsala mapapila yo hlayanyana lama kumekaka eBibeleni.—Mintirho 28:30, 31.
LESWI ANJA A SWI ENDLAKA
Tanihi laha swi hlamuseriweke hakona exihlokweni lexi hundzeke, Anja u tshama a ri endlwini. U ri: “Khensa yi cince vutomi bya mina. Sweswi a ndzi nge tiveki ekhombyeni ro tluleriwa hi vuvabyi, hikwalaho, a ndzi koti ku tirha ntirho wo tihanyisa ni ku fambafamba hilaha a ndzi endla hakona eku sunguleni.” Xana Anja u langutana njhani ni xiyimo xakwe? U ri: “Ndzi sungule ndlela leyintshwa yo endla swilo. Ndzi rhangisa swilo swa nkoka, ndzi tlhela ndzi endla leswaku xiyimiso xa mina xi fambisana ni leswi ndzi lavaka ku swi endla. Sweswo swi ndzi pfunile leswaku ndzi kota ku langutana ni xiyimo xa mina.”
“Ku nga khathariseki swiyimo leswi ndzi langutaneke na swona, ndzi dyondze ku eneriseka.”—Marito ya Pawulo lama nga eka Vafilipiya 4:11
LESWI U NGA SWI ENDLAKA
Loko swiyimo leswi u nga kotiki ku swi cinca swi lawula vutomi bya wena, ringeta ku endla leswi landzelaka:
-
Endla ntsena leswi u nga kotaka ku swi endla. Hi xikombiso, u nge swi koti ku lawula rihanyo ra wena hi ku helela, kambe u nga swi kota ku endla vutiolori, ku dya swakudya leswi nga ni rihanyo ni ku etlela nkarhi lowu ringaneke.
-
Tiva leswi u lavaka ku swi fikelela evuton’wini. Swi hlele ha xin’we xin’we. Tinyike nkarhi siku ni siku wo endla swilo leswi nga ku pfunaka leswaku u fikelela leswi u swi lavaka.
-
Endla mintirho leyitsongo leyi nga ta endla leswaku u titshemba. Basisa tafula ra le khixini ni ku hlantswa swibya. Ambala swiambalo leswi baseke. Rhanga hi ku endla mintirho ya nkoka loko wa ha ku pfuka.
-
Xiya leswi xiyimo xa wena xi ku pfunaka ha swona. Hi xikombiso, xana xiyimo xa wena xi ku endla u tiva tindlela letinene to langutana ni swiyimo swo tika? Xana u nga swi kota ku tirhisa vutivi byebyo ku pfuna van’wana?
Yinhla ya nkoka: A wu nge swi koti ku lawula swiyimo swa wena kambe u nga swi kota ku lawula ndlela leyi u langutanaka na swona ha yona.
U Nga Ha Tsakela
SWIVUTISO LESWI HLAMURIWAKA HI BIBELE
Xana Bibele Yi Nga Ndzi Pfuna Ku Hanya Ni Vuvabyi Lebyi Nga Tshungulekiki?
Ina! Kuma magoza manharhu lama nga ta ku pfuna u langutana ni vuvabyi lebyi nga tshungulekiki.
XIHONDZO XO RINDZA
Loko N’wana Wa Wena A Lamarile
Xiya swiphiqo swinharhu leswi u nga langutanaka na swona ni ndlela leyi vutlhari bya le Bibeleni byi nga ku pfunaka ha yona.
XIHONDZO XO RINDZA
Loko Nkataku A Lava Ku Khathaleriwa Hileswi A Vabyaka
Hlaya hi swiringanyeto swinharhu leswi nga ku pfunaka loko nkataku a ri ni vuvabyi lebyi nga tshungulekiki.
XIHONDZO XO RINDZA
Ku Ya Emahlweni Ni Vutomi Endzhaku Ka Loko U Dlaye Vukati
Hinkwavo lava dlayeke vukati va kuma leswaku vutomi endzhaku ka sweswo bya tika ku tlula leswi a va byi languterise xiswona. Ndzayo ya Bibele leyi twisisekaka yi nga ku pfuna leswaku u langutana na swona hi ndlela leyi humelelaka.
XIHONDZO XO RINDZA (NKANDZIYISO WA VANDLHA)
Ku Langutana Ni Ku Feriwa Hi Munghana Wa Vukati
Ku vava loku twiwaka hi munhu loko a feriwe hi munghana wa vukati ka tika swinene naswona ku teka nkarhi wo leha. Kambisisa ndlela leyi ntshembo wa ku pfuxiwa ka vafi lowu kumekaka eRitweni ra Xikwembu wu nga xihlovo xa nchavelelo ha yona.
