“Mi tshika xileriso xa Xikwembu, mi khomelela swi tiya endhavukweni wa vanhu.”—Marka 7:8.

LESWI BIBELE YI SWI VULAKA

Vanhu va velekiwe va ri ni ‘xilaveko xa moya’ lexi va nga xi enerisaka hi ku gandzela Xikwembu. (Matewu 5:3) Leswaku vanhu va ringete ku enerisa xilaveko xolexo va simeke vukhongeri byo tala lebyi sekeriweke eka mavonelo ya vanhu ku nga ri ya Xikwembu.

Hi xikombiso, loko Bibele yi vulavula hi swirho swa ntlawa wun’wana wa vukhongeri wa hi lembe-xidzana ro sungula yi ri: “Va xi hisekela Xikwembu; kambe ku nga ri hikwalaho ka vutivi lebyi kongomeke; hikuva, hikwalaho ka leswi va nga ku tiviki ku lulama ka Xikwembu, kambe va lavaka ku simeka ku lulama ka vona vini, a va tivekanga ehansi ka ku lulama ka Xikwembu.” (Varhoma 10:2, 3) Hilaha ku fanaka ni namuntlha, vukhongeri byo tala byi “dyondzisa swileriso swa vanhu [byi] swi endla tidyondzo leti nga enawini.”—Marka 7:7.

“A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.”—Vaheveru 10:24, 25.

LESWI BIBELE YI SWI VULAKA

Vaheveru 10:25 yi vula leswaku “hi nga fularheli ku hlengeletana ka hina.” Marito wolawo ma kombisa leswaku Xikwembu xi lava vanhu va hlengeletana tanihi ntlawa leswaku va gandzela. Xana mugandzeri un’wana ni un’wana a nga swi hlamusela hi ya yena ndlela leswaku Xikwembu i mani ni leswi xi swi languteleke eka hina? Doo! Bibele yi vula leswaku lava gandzelaka Xikwembu hi ndlela leyi amukelekaka, va fanele va “vulavula hi ku twanana” naswona va ‘hlangana emianakanyweni yin’we ni le ndleleni yin’we ya ku ehleketa.’ (1 Vakorinto 1:10) A va ta hleriwa hi ku ya hi mavandlha naswona va ‘rhandza nhlengeletano ya vamakwenu’ emisaveni hinkwayo. (1 Petro 2:17; 1 Vakorinto 11:16) Leswaku hi tsakisa Xikwembu, hi fanele hi gandzela hi vun’we ni hi ndlela leyi hlelekeke.

“Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:35.

LESWI BIBELE YI SWI VULAKA

Loko Bibele yi hlamusela ndlela leyi vanhu lava nga eka vukhongeri bya ntiyiso va nga voniwaka ha yona yi ri: “Mi ta va vona hi mihandzu ya vona. A swi endleki leswaku vanhu va kha madiriva emitweni kumbe makuwa eswigatlwini, a hi swona ke?” (Matewu 7:16) A swi kali swi lava leswaku u va mutivi wa swimilana leswaku u kota ku hambanisa nsinya wa makuwa ni swigatlu; hilaha ku fanaka a swi kali swi lava leswaku u dyondzela swa vukhongeri leswaku u kota ku hambanisa ntiyiso eka mavunwa. Hi yihi mihandzu yin’wana kumbe swilo swin’wana leswi vukhongeri bya ntiyiso byi nga voniwaka ha swona?

• Vukhongeri bya ntiyiso byi dyondzisa ntiyiso lowu humaka eRitweni ra Xikwembu ku nga Bibele. (Yohane 4:24; 17:17) A byi sekeriwanga eka filosofi ya vanhu.

• Vukhongeri bya ntiyiso byi pfuna vanhu leswaku va tiva Xikwembu ni vito ra xona, leri nge Yehovha.—Yohane 17:3, 6.

• Vukhongeri bya ntiyiso byi tshemba leswaku Mfumo wa Xikwembu hi wona ntsena wu nga ta pfuna vanhu, ku nga ri tihulumendhe ta vanhu.—Matewu 10:7; 24:14.

• Vukhongeri bya ntiyiso byi ni rirhandzu leri nga riki na vutianakanyi. (Yohane 13:35) Byi dyondzisa vanhu leswaku va xixima vanhu va tinxaka hinkwato, va tirhisa nkarhi ni swilo swa vona leswaku va pfuna van’wana ni leswaku va nga hlanganyeli etinyimpini ta matiko.—Mikiya 4:1-4.

• Vukhongeri bya ntiyiso i ndlela leyinene yo hanya ku nga ri mukhuva. Vanhu lava nga eka vukhongeri bya ntiyiso va hanya hileswi va swi dyondzisaka.—Varhoma 2:21; 1 Yohane 3:18.

Timbhoni ta Yehovha, ku nga vakandziyisi va magazini lowu, ti tikarhatela ku xixima Xikwembu hi marito ni swiendlo swa tona. U nga hlanganyela na tona eHolweni ya Mfumo leswaku u tivonela hi ya wena.