“U nga vi exikarhi ka lava va nwaka ngopfu vhinyo, exikarhi ka lava va dyaka nyama hi makolo.”—Swivuriso 23:20.

HA YINI MHAKA LEYI YI RI YA NKOKA?

Bibele a hi buku ya swa vutshunguri naswona a yi lawuli xin’wana ni xin’wana lexi munhu a xi endlaka. Hambiswiritano, swi nga ku vuyerisa ku twisisa langutelo ra Xikwembu hi rihanyo hilaha swi tsariweke hakona eBibeleni.

LESWI BIBELE YI SWI VULAKA

Matsalwa yo tala ya Bibele ma hi pfuna ku twisisa ndlela leyi Xikwembu xi titwaka ha yona hi ndlela leyi hi yi khomaka ha yona mimiri ya hina. Hi xikombiso, Bibele yi sola mikhuva leyi nga ni khombo, ku katsa ni vudakwa ni makolo. (Swivuriso 23:20) Milawu ya Xikwembu leyi a yi nyikiwe tiko ra khale ra Israyele a yi katsa magoza yo sivela ku hangalaka ka mavabyi naswona eswiyin’weni swin’wana a yi katsa ku tisirhelela eka wona. Nakambe Nawu a wu ri ni swileriso leswi kongomeke swa vuhlayiseki leswi a swi endleriwe ku sivela timhangu. (Deteronoma 22:8) Swi le rivaleni leswaku Bibele yi hi khutaza ku khathalela mimiri ya hina ni ku teka magoza lama faneleke leswaku hi sirhelela rihanyo ra hina.

“Xidyoho xi [nghene] emisaveni hi munhu un’we, ni rifu hikwalaho ka xidyoho.”—Varhoma 5:12.

LESWI VANHU VA SWI VULAKA

Vanhu vo tala va pfumela leswaku vuvabyi byi vangiwa hileswi vanhu va veke kona hi hundzuluko. Vanhu van’wana va ehleketa leswaku matimba lama nga twisisekiki, yo tanihi mimoya yo biha, hi yona leyi yi hi vangelaka mavabyi.

LESWI BIBELE YI SWI VULAKA

Hi ku ya hi Bibele, ha vabya hikwalaho ka leswi vatswari va hina vo sungula Adamu na Evha va xandzukeleke Xikwembu. (Varhoma 5:12) Loko va nga si xandzuka, a va tiphina hi rihanyo leri hetisekeke. A va swi tiva leswaku a va ta fa loko vo xandzukela Xikwembu. (Genesa 2:16, 17) Hambiswiritano, va dlaye vuxaka bya vona ni Xikwembu hi vomu xisweswo va lahlekeriwa hi rihanyo leri hetisekeke. *

Endzhaku ka loko Adamu na Evha va lahlekeriwe hi rihanyo ra vona leri hetisekeke, va endle leswaku na hina hi va ni rihanyo leri nga hetisekangiki. Hikwalaho, ku nga khathariseki matshalatshala hinkwawo lama endliwaka yo herisa mavabyi, hi tama hi vabya.

I YINI LESWI U NGA SWI ENDLAKA?

Bibele yi dyondzisa leswaku loko u vuyelelana ni Xikwembu hi ku yingisa milawu ya xona ya vutlhari, eku heteleleni u ta tiphina hi rihanyo leri hetisekeke emisaveni leyi nga paradeyisi. (Esaya 33:24) Xikwembu xi tshembisa leswaku xi ta herisa switlhavi, mavabyi ni rifu.—Nhlavutelo 21:3, 4.

“Vanhu lava hanyeke a va lavi n’anga, kambe yi laviwa hi lava va vabyaka.”—Matewu 9:12.

LESWI VANHU VA SWI VULAKA

Vanhu van’wana va ndhundhuzela ku hanyisiwa hi singita (leswi nakambe swi vuriwaka ku hanyisiwa hi ripfumelo) ematshan’weni ya vutshunguri.

LESWI BIBELE YI SWI VULAKA

Xikwembu xi pfumelele madokodela leswaku ma tshungula mavabyi exikarhi ka vanhu va xona eminkarhini ya ku tsariwa ka Bibele. (Genesa 38:28; Vakolosa 4:14) EBibeleni ku hava nchumu lowu kombisaka leswaku Xikwembu a xi nga ku tsakeli ku tirhisiwa ka mintsembyana, mafurha yo tola, nxaxamelo wa dokodela wa swakudya swo hlawuleka leswi antswisaka rihanyo ni matshungulelo man’wana. Entiyisweni, Yesu u vule leswaku “vanhu lava hanyeke a va lavi n’anga, kambe yi laviwa hi lava va vabyaka.”—Matewu 9:12.

Kambe Bibele a yi amukeli matshungulelo man’wana ni man’wana. Hi xikombiso, a yi wu amukeli mukhuva wa namuntlha wa ku tshungula vanhu hi singita. Nakambe Xikwembu a xi byi amukeli vutshunguri lebyi katsaka swiendlo swa vungoma. (Vagalatiya 5:19-21) Ematshan’weni yo tirhisa tindlela ta vutshunguri leti Bibele yi ti solaka, goza ra vutlhari leri u nga ri tekaka loko u vabya i ku lava vutshunguri lebyi faneleke hi xihatla, loko byi kumeka.