YUWELE 3:18 Vuprofeta lebyi byi vulavula hi xihlovo xa mati lexi humaka endhawini yo kwetsima ya tempele. Xi khuluka xi cheleta ‘Nkova lowu omeke wa Mirhi ya Munga.’ Kutani Yuwele na Ezekiyele va vona nambu lowu hanyisaka ndhawu leyi nga riki na mihandzu. Eka tindzima ta vona havambirhi, nambu wa kona wu huma endlwini ya Yehovha kumbe etempeleni.

ZAKARIYA 14:8 Muprofeta Zakariya u vona “mati ya vutomi” ma khuluka ma huma emutini wa Yerusalema. Hafu ya mati ma khulukela elwandle leri nga evuxeni kumbe eLwandle leri Feke naswona hafu leyin’wana yi khulukela elwandle leri nga evupeladyambu kumbe eLwandle ra Mediteraniya. Yerusalema a ku ri “muti wa Hosi leyikulu,” ku nga Yehovha Xikwembu. (Mat. 5:35) Xisweswo, leswi Zakariya a boxaka muti wolowo, swi hi tsundzuxa hi mfumo wa Yehovha lowu nga ta fuma misava hinkwayo enkarhini lowu taka. I khale hi twisisa leswaku mati lawa ku vulavuriwaka ha wona eka vuprofeta lebyi, ma vula leswaku Yehovha u ta katekisa mitlawa yimbirhi ya vanhu vo tshembeka eParadeyisini, ku nga lava nga ta pona nhlomulo lowukulu ni lava endzhaku ka sweswo va nga ta pfuxiwa eku feni.

NHLAVUTELO 22:1, 2 Muapostola Yohane u vona nambu wo fanekisela wo fana ni lowu voniweke hi Ezekiyele. Hambiswiritano, a wu khuluki wu huma etempeleni kambe wu huma exiluvelweni xa Yehovha. Kutani xivono lexi, ku fana ni xivono xa Zakariya, swi vonaka xi kandziyisa mikateko ya mfumo wa Xikwembu hi nkarhi wa Gidi ra Malembe.

I ntiyiso leswaku ku ni ku hambana kutsongo exikarhi ka mikateko leyi humaka emfun’weni wa Yehovha ni leyi fanekiseriwaka hi nambu lowu Ezekiyele a wu voneke exivonweni. Mikateko yoleyo hinkwayo yi huma eka Yehovha kutani yi ya eka vanhu hinkwavo vo tshembeka.

PISALEMA 46:4 Xiya ndlela leyi ndzimana leyi yi swi hlamuselaka ha yona swiyenge haswimbirhi, ku nga vugandzeri ni vuhosi. Laha hi vona nambu lowu tisaka ntsako ‘emutini wa Xikwembu,’ leswi vulaka Mfumo ni vuhosi swin’we ni “tabernakela leyikulu yo kwetsima ya La Nge Henhlahenhla,” leyi fanekiselaka vugandzeri lebyi tengeke.

Tindzimana leti hinkwato ti hi tiyisekisa leswaku Yehovha u ta katekisa vanhu vakwe vo tshembeka hi tindlela timbirhi. Xo sungula, hi ta vuyeriwa hilaha ku nga heriki hi Mfumo wa yena, xa vumbirhi hi ta vuyeriwa eka vugandzeri lebyi tengeke. Sweswi a hi tiyimiseleni ku tshama hi ri karhi hi lava “mati ya vutomi” eka Yehovha Xikwembu ni le ka N’wana wakwe, ku nga malunghiselelo ya vona ya rirhandzu lama hi pfunaka ku kuma vutomi lebyi nga heriki.—Yer. 2:13; Yoh. 4:10.