DYONDZO 44
Xana Mikhuvo Hinkwayo Yi Tsakisa Xikwembu?
Yehovha u lava leswaku hi tiphina hi vutomi hi tlhela hi endla mikhuvo mikarhi yin’wana. Kambe xana mikhuvo hinkwayo ni tiholideyi swa n’wi tsakisa? Hi nga swi kombisa njhani leswaku ha n’wi rhandza Yehovha emhakeni leyi?
1. Hikwalaho ka yini mikhuvo yo tala yi nga n’wi tsakisi Yehovha?
U nga ha hlamala loko u dyondza leswaku mikhuvo yo tala yi huma eka tidyondzo leti nga riki kona eMatsalweni kumbe yi sungule eka vuhedeni. Mikhuvo yoleyo yi nga ha va yi fambisana ni vukhongeri bya mavunwa. Yi nga ha va yi fambisana ni vungoma kumbe yi sukela eka mhaka ya leswaku ku ni nchumu lowu nga fiki eka munhu. Mikhuvo yin’wana yi fambisana ni vukholwahava kumbe ku pfumela eka nhlanhla. (Esaya 65:11) Yehovha u tsundzuxa vagandzeri vakwe a ku: “Mi tihambanisa . . . naswona tshikani ku khumba xilo lexi nga basangiki.”—2 Vakorinto 6:17. a
2. Yehovha u titwa njhani hi mikhuvo leyi endlaka vanhu va xiximiwa hi ndlela leyi nga fanelangiki?
Yehovha wa hi lemukisa leswaku hi nga weli entlhan’wini wa ku “[tshemba] munhukulobye.” (Hlaya Yeremiya 17:5.) Tiholideyi tin’wana ti tlangeriwa hi xikongomelo xo ndhundhuzela vafumi kumbe masocha. Eka tin’wana ku tlangeriwa tshunxeko kumbe mijeko ni swin’wana leswi yimelaka tiko. (1 Yohane 5:21) Kasi hi tiholideyi tin’wana, vanhu va tlangela minhlangano ya tipolitiki kumbe ya vaakatiko. Yehovha u titwa njhani loko hi xixima munhu kumbe nhlangano hi ndlela leyi nga fanelangiki, ngopfungopfu leyi seketelaka tidyondzo leti lwisanaka ni xikongomelo xa Yena?
3. I swiendlo swihi leswi nga endlaka mikhuvo yi nga amukeleki?
Bibele yi sola ‘ku nwa ku tlula mpimo, mikhuvo leyi nga lawulekiki ni ku phikizana hi ku nwa.’ (1 Petro 4:3) Eka mikhuvo yin’wana, vanhu a va lawuleki naswona va tikhoma ku biha hi swa masangu. Leswaku hi tshama hi ri vanghana va Yehovha, hi fanele hi papalata mahanyelo wolawo lama thyakeke.
ANAKANYISISA
Twana ndlela leyi u nga tsakisaka Yehovha ha yona hi ku endla swiboho swa vutlhari mayelana ni tiholideyi ni mikhuvo.
4. Fularhela mikhuvo leyi Yehovha a yi vengaka
Hlaya Vaefesa 5:10, ivi mi bula hi swivutiso leswi:
-
Hi fanele hi tiyiseka hi yini loko hi nga si tlangela holideyi yo karhi?
-
Hi tihi tiholideyi leti vanhu vo tala va ti tlangelaka endhawini yaka n’wina?
-
U ehleketa leswaku tiholideyi toleto ta n’wi tsakisa Yehovha?
Xana u tshame u tivutisa leswaku Xikwembu xi titwa njhani loko vanhu va tlangela siku ra ku velekiwa? Bibele a yi boxi leswaku ku ni mugandzeri wa Yehovha loyi a tlangeleke siku ra ku velekiwa, kambe yi boxa vanhu vambirhi lava a va nga N’wi gandzeli lava tlangeleke masiku ya vona ya ku velekiwa. Hlaya Genesa 40:20-22 na Matewu 14:6-10. Endzhaku mi bula hi swivutiso leswi:
-
Mikhuvo leyimbirhi ya masiku ya ku velekiwa yi fana hi yini?
-
Hi ku ya hi matsalwa lawa, u ehleketa leswaku Yehovha u titwa njhani hi masiku ya ku velekiwa?
Kambe, u nga ha tivutisa, ‘Xana Yehovha u na mhaka loko ndzi tlangela siku ra ku velekiwa kumbe nkhuvo lowu nga fambisaniki ni Matsalwa?’ Hlaya Eksoda 32:1-8. Endzhaku tlanga VHIDIYO ivi mi bula hi swivutiso leswi landzelaka.
-
Hikwalaho ka yini hi fanele hi tiyiseka hi leswi amukelekaka eka Yehovha?
-
Hi nga swi endlisa ku yini sweswo?
Hi nga swi tiva njhani loko nkhuvo wo karhi wu nga xi tsakisi Xikwembu?
-
Xana wu sekeriwe eka tidyondzo leti nga kumekiki eMatsalweni? Leswaku u swi tiva, lavisisa laha wu sunguleke kona.
-
Xana wu endla vanhu, minhlangano kumbe mijeko swi xiximiwa hi ndlela leyi nga fanelangiki? Hi xixima Yehovha ku tlula munhu kumbe nchumu wihi na wihi naswona ha tshemba leswaku u ta tlhantlha swiphiqo swa misava.
-
Xana leswi endliwaka loko ku tlangeriwa mikhuvo yoleyo swi lwisana ni milawu ya Bibele? Hi fanele hi tshama hi ri ni mahanyelo lama baseke.
5. Pfuna van’wana leswaku va xixima leswi u pfumelaka eka swona
Swi nga ha tika loko van’wana va ku sindzisa ku katseka eka mikhuvo leyi nga n’wi tsakisiki Yehovha. Va hlamusele leswaku hikwalaho ka yini u nga katseki naswona u endla sweswo hi vutlhari. Leswaku u vona ndlela leyi u nga swi endlaka ha yona leswi tlanga VHIDIYO.
Hlaya Matewu 7:12, ivi mi bula hi swivutiso leswi:
-
Hi ku ya hi ndzimana leyi, xana u fanele u byela maxaka ya wena lama nga tirheliki Yehovha leswaku a ma fanelanga ma tlangela holideyi yo karhi?
-
U nga endla yini ku komba ndyangu wa wena leswaku wa wu rhandza naswona i wa nkoka eka wena hambileswi u nga taka u nga tlangeli na wona?
6. Yehovha u lava leswaku hi tsaka
Yehovha u lava leswaku hi tiphina ni mindyangu ya hina ni vanghana. Hlaya Eklesiasta 8:15, ivi mi bula hi xivutiso lexi:
-
Ndzimana leyi yi swi kombisa njhani leswaku Yehovha u lava hi tsaka?
Yehovha u lava leswaku vanhu vakwe va tiphina va ri swin’we. Tlanga VHIDIYO leswaku u vona ndlela leyi leswi, swi vonakeke kahle ha yona etinhlengeletanweni ta hina ta matiko.
Hlaya Vagalatiya 6:10, ivi mi bula hi swivutiso leswi:
-
Xana hi fanele hi tlangela tiholideyi leti vanhu vo tala va ti tlangelaka leswaku hi kota ku endlela van’wana “leswinene”?
-
I ku nyika ka muxaka muni loku nga ta ku tsakisa? Xana i ku titwa u boheka ku nyika hileswi ku nga holideyi kumbe i ku nyika loko u swi lava?
-
Timbhoni to tala mikarhi yin’wana ti endlela vana va tona swilo swo hlawuleka hambi ku ri ku va nyika tinyiko va nga swi langutelanga. Loko u ri ni vana, hi swihi swilo swin’wana swo hlawuleka leswi u nga va endlelaka swona?
VAN’WANA VA RI: “A hi swa nkoka leswaku holideyi yi sungule kwihi. Xa nkoka i ku tiphina hi ku va swin’we ni ndyangu ni vanghana.”
-
A wu ta ku yini?
NKATSAKANYO
Yehovha u lava hi tiphina hi ri ni mindyangu ni vanghana va hina. Kambe u tlhela a lava hi papalata mikhuvo leyi nga n’wi tsakisiki.
Mpfuxeto
-
Hi swihi swivutiso leswi hi faneleke hi tivutisa swona leswaku hi tiva loko nkhuvo wo karhi wu tsakisa Yehovha?
-
Hi nga wu pfuna njhani ndyangu ni vanghana va hina leswaku va twisisa swiboho swa hina mayelana ni tiholideyi?
-
U swi tiva njhani leswaku Yehovha u lava hi tsaka hi tlhela hi tiphina?
KUMA LESWI ENGETELEKEKE
Twana hi tiholideyi tin’wana leti Vakreste va nga ti tlangeliki.
Vona swivangelo swa mune leswi endlaka hi pfumela leswaku ku tlangela masiku ya ku velekiwa a swi xi tsakisi Xikwembu.
Vona ndlela leyi muntshwa un’wana a hlamuleke ha yona hi vutlhari loko van’wana exikolweni va n’wi hleka hileswi a nga tlangeliki Khisimusi.
Vakreste va timiliyoni va hlawule ku nga tlangeli Khisimusi. Va titwa njhani hi sweswo?
“Ti Kume Nchumu Wo Antswa” (Xihondzo xo Rindza, December 1, 2012)
a Vona Nhlamuselo 5 leswaku u twa leswi u nga swi endlaka eka swiyimo swo karhi loko vanhu van’wana va tlangela holideyi.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
