ENDZHAKU ka masiku ya Samsoni, Samuwele u ve muprofeta ni muavanyisi wa le Israyele. Vaisrayele a va tshamela ku byela Samuwele leswaku va lava ku va na hosi ku fana ni matiko man’wana. Hambileswi xikombelo xexo a xi nga n’wi tsakisi Yehovha, u byele Samuwele leswaku a endla hilaha tiko rero ri lavaka hakona. Xikwembu xi hlawule wanuna wo titsongahata la vuriwaka Sawulo leswaku a va hosi. Hi ku famba ka nkarhi Hosi Sawulo u titlhome tinsiva ivi a nga ha yingisi. Yehovha a a nga ha swi tsakeli leswaku Sawulo a va hosi, hiloko a byela Samuwele leswaku a hlawula hosi yin’wana—ku nga jaha leri vuriwaka Davhida. Hambiswiritano, ku hele malembe yo tala Davhida a nga si va hosi.

Loko Davhida a ha ri jaha u endzele vamakwavo lava a va ri masocha ya Sawulo. Masocha hinkwawo a ma chava xihontlovila lexi nga nala wa wona lexi vuriwaka Goliyadi lexi a xi tshamela ku va tlhontlha xi tlhela xi tlhontlha ni Xikwembu xa wona. Tanihi leswi Davhida a a hlundzukile, u pfumerile ku ya lwa ni xihontlovila xexo. Jaha rero leri a ri hlome hi xipelupelu ni maribye ma nga ri mangani, ri yile ku ya lwa ni nala wa rona, loyi a a lehe timitara ta kwalomu ka tinharhu. Loko Goliyadi a n’wi vungunya, Davhida u n’wi byele leswaku a a hlome ku n’wi tlula hikuva a a ta lwa na yena hi vito ra Yehovha Xikwembu! Davhida u dlaye Goliyadi hi ribye rin’we ntsena a tlhela a n’wi tsema nhloko hi banga ra yena. Sweswo swi chavise Vafilista hiloko va baleka.

Eku sunguleni Sawulo u tsakisiwe hi xivindzi xa Davhida hiloko a n’wi veka leswaku a rhangela vuthu ra yena. Kambe ku hlula ka Davhida ku endle leswaku Sawulo a n’wi vondzoka swinene. Davhida u boheke ku baleka leswaku a ponisa vutomi bya yena naswona u hete malembe a ri mubaleki. Hambiswiritano, Davhida u tshame a tshembekile eka hosi leyi a yi lava ku n’wi dlaya naswona u vule leswaku Hosi Sawulo u hlawuriwe hi Yehovha Xikwembu. Eku heteleleni Sawulo u fele enyimpini. Endzhakunyana ka kwalaho, Davhida u ve hosi hilaha Yehovha a a tshembise hakona.

Tanihi hosi, Davhida a a swi lava hi mbilu hinkwayo ku akela Yehovha tempele. Kambe Yehovha u n’wi byele leswaku tempele yoleyo yi ta akiwa hi un’wana wa vana va yena. N’wana wa Davhida la yi akeke a ku ri Solomoni. Hambiswiritano, Xikwembu xi katekise Davhida hi ku endla ntwanano lowu tsakisaka swinene na yena: Ndyangu wa yena a wu ta humesa tihosi leti a ti nga ta fana ni letin’wana. Eku heteleleni endyangwini wa yena a ku ta huma Mukutsuri kumbe Mbewu leyi tshembisiweke entangeni wa Edeni. Munhu yoloye a a ta va Mesiya, leswi vulaka “Mutotiwa” wa Xikwembu. Yehovha u tshembise leswaku Mesiya a a ta va Mufumi wa hulumendhe kumbe Mfumo lowu nga ta tshama hilaha ku nga heriki.

Leswi Davhida a a tsake swinene, u hlengelete swilo swo tala swo aka tempele ku katsa ni nsuku ni silivhere. U tlhele a tsala tinsimu to tala leti huhuteriweke. Loko Davhida a ri kusuhi ni ku fa, u te: “Moya wa Yehovha wu vulavule ha mina, rito rakwe a ri ri eririmini ra mina.”—2 Samuwele 23:2.

—Xi sekeriwe eka 1 Samuwele; 2 Samuwele; 1 Tikronika; Esaya 9:7; Matewu 21:9; Luka 1:32; Yohane 7:42.