A hi kambisiseni nhlamuselo leyi huhuteriweke ya muapostola Pawulo emhakeni leyi. U hi nyika nkongomiso lowu nga ta hi pfuna leswaku hi endla swiboho leswi nga ta yisa ku dzuneka eka Xikwembu. (1 Vakorinto 11:3-16) Pawulo u hlamusele tinhla tinharhu leti hi faneleke hi ti kambisisa: (1) swiendlo leswi lavaka leswaku wansati a funengeta nhloko, (2) swiyimo leswi lavaka leswaku a endla tano, ni (3) swivangelo swa kona.

Swiendlo. Pawulo u boxe swimbirhi: ku nga xikhongelo ni ku profeta. (Tindzimana 4, 5) Xikhongelo i ndlela yo gandzela Yehovha hi ku vulavula na yena. Namuntlha, ku profeta ku nga fambisana ni ntirho wun’wana ni wun’wana lowu Mukreste a wu endlaka wo dyondzisa van’wana hi Bibele. Kambe, xana Pawulo u vula leswaku wansati u fanele a funengeta nhloko nkarhi wun’wana ni wun’wana loko a khongela kumbe a dyondzisa van’wana hi Bibele? Doo! Ku ni swiyimo swin’wana leswi nga laviki leswaku a funengeta nhloko loko a khongela kumbe a dyondzisa van’wana hi Bibele.

 Swiyimo. Pawulo u boxe swiyimo swimbirhi, ku nga ekaya ni le vandlheni. U te: “Nhloko ya wansati i wanuna . . . Wansati un’wana ni un’wana loyi a khongelaka kumbe ku profeta a nga funengelanga nchumu enhlokweni u tsongahata nhloko ya yena.” (Tindzimana 3, 5) Endyangwini, Yehovha u hlawule wanuna leswaku a va nhloko ya ndyangu. Wansati u ta va a tekela vunhloko bya nuna wa yena ehansi loko a byarha vutihlamuleri lebyi Yehovha a lavaka leswaku byi endliwa hi nuna wa yena, hikwalaho u fanele a titsongahatela vunhloko bya nuna wa yena. Hi xikombiso, loko swi lava leswaku a fambisa dyondzo ya Bibele nuna wa yena a ri kona, u fanele a xixima vunhloko bya nuna wa yena hi ku funengeta nhloko ya yena. U ta endla tano hambiloko nuna wa yena a khuvuriwile kumbe a nga khuvuriwanga, hikuva i nhloko ya ndyangu. * Loko swi lava leswaku a khongela kumbe a fambisa dyondzo, n’wana wa yena wa mufana la khuvuriweke a ri kona, u fanele a funengeta nhloko—sweswo a swi vuli leswaku n’wana wa yena i nhloko ya ndyangu kambe wansati u ta va a xixima lunghelo ra vunhloko leri nyikiweke va xinuna lava khuvuriweke evandlheni ra Vukreste.

Loko Pawulo a vulavula hi xiyimo xa le vandlheni u ri: “Loko munhu a vonaka a lwisana ni ntolovelo wo karhi, a ha ha ri na wun’wana, kasi ni mavandlha ya Xikwembu a ma ha ri na wun’wana.” (Ndzimana 16) Evandlheni ra Vukreste vunhloko byi byarhisiwe vavanuna lava khuvuriweke. (1 Timotiya 2:11-14; Vaheveru 13:17) I vavanuna ntsena lava hlawuriwaka ku va vakulu ni malandza ya vutirheli leswaku va ta khathalela ntlhambi wa Xikwembu hi ndlela leyi Xikwembu xi lavaka ha yona. (Mintirho 20:28) Kambe, minkarhi yin’wana swi nga endleka leswaku wansati la nga Mukreste a endla mintirho leyi endliwaka hi va xinuna lava khuvuriweke, lava fanelekaka. Hi xikombiso, swi nga lava leswaku a fambisa nhlangano wa ntirho wa nsimu. Kumbe a nga ha kombela makwerhu wa xinuna la khuvuriweke ka ha ri ni nkarhi, leswaku a famba na yena loko a ya fambisa dyondzo ya yena ya Bibele. * Hikwalaho ka leswi ntirho wolowo wu fambisanaka ni yin’wana leyi endliwaka evandlheni, u fanele a funengeta  nhloko ku kombisa leswaku u endla ntirho lowu a wu fanele wu endliwa hi makwerhu wa xinuna.

Kambe ku ni swiyimo swo tala leswi nga laviki leswaku makwerhu wa xisati a funengeta nhloko. Hi xikombiso, a nge funengeti nhloko loko a hlamula eminhlanganweni, loko a famba ni nuna wa yena ensin’wini kumbe ni makwerhu un’wana la khuvuriweke, kumbe a dyondza kumbe a khongela ni n’wana wa yena wa mufana la nga khuvuriwangiki. Ku nga ha tlakuka swivutiso swin’wana kutani loko makwerhu wa xisati a nga tiyiseki hi leswi a faneleke a swi endla, a nga ha endla ndzavisiso. * Loko a nga tiyiseki naswona ripfalo ra yena ri n’wi byela leswaku a funengeta nhloko, u ta va a nga dyohanga.

Swivangelo. Eka ndzimana 10, hi kuma swivangelo swin’wana swimbirhi leswi endlaka leswaku wansati la nga Mukreste a funengeta nhloko ya yena: ‘Wansati u fanele a va ni xikombiso xa vulawuri enhlokweni ya yena hikwalaho ka tintsumi.’ Xo sungula, xiya xiga lexi nge, “xikombiso xa vulawuri.” Xifunengeto xa nhloko i ndlela leyi wansati a kombisaka ha yona leswaku u xixima vunhloko lebyi Yehovha a byi nyikeke vavanuna lava khuvuriweke evandlheni. Kutani hi ku endla tano u kombisa leswaku u rhandza ni ku xixima Yehovha Xikwembu. Xivangelo xa vumbirhi xi kumeka eka marito lama nge “hikwalaho ka tintsumi.” Xana ku funengeta nhloko ka wansati ku ti khumba njhani tintsumi?

Tintsumi ta tsaka loko ti vona leswaku vulawuri bya Yehovha bya xiximiwa eka nhlengeletano ya yena emisaveni ni le tilweni. Nakambe ta dyondza eka xikombiso lexi vanhu lava nga hetisekangiki va ti vekelaka xona emhakeni leyi. Phela, na tona ti fanele ti xixima lunghiselelo ra Yehovha, ku nga nchumu lowu tintsumi  tin’wana ti tsandzekeke ku wu endla enkarhini lowu hundzeke. (Yudha 6) Tintsumi ti nga ha vona swiendlakalo swo hlayanyana laha wansati la nga Mukreste a titsongahataka eka vavanuna lava khuvuriweke evandlheni hambileswi a nga ni ntokoto, vutivi ni vutlhari byo tala ku va tlula. Minkarhi yin’wana wansati loyi a nga va Mukreste la totiweke loyi hi ku famba ka nkarhi a nga ta va ni xikhundlha lexi tlakukeke ku tlula tintsumi, a fuma na Kreste ematilweni. Xolexo i xikombiso lexinene eka tintsumi. Leri i lunghelo lerikulu hakunene ku va vamakwerhu hinkwavo va xisati va khutaza timiliyoni ta tintsumi leti tshembekaka leswaku ti xixima.