Muvumbi wa hina u tlharihe ku hi tlula. Tanihi Tatana wa rirhandzu, wa hi khathalela. Nakambe a a nga lavi leswaku hi tikongomisa. (Yeremiya 10:23) Tanihi leswi n’wana lontsongo a lavaka nkongomiso wa vatswari, na hina hinkwerhu hi lava nkongomiso wa Xikwembu. (Esaya 48:17, 18) Milawu ya le Bibeleni yi hi nyika nkongomiso lowu ku nga nyiko leyi humaka eka Xikwembu.—Hlaya 2 Timotiya 3:16.

Milawu ya Yehovha yi hi dyondzisa ndlela leyi hi nga hanyaka vutomi lebyinene ha yona sweswi ni ku hi kombisa leswaku hi nga byi kumisa ku yini vutomi lebyi nga heriki enkarhini lowu taka. Leswi hi vumbiweke hi Xikwembu, hi fanele hi amukela nkongomiso wa xona.—Hlaya Pisalema 19:7, 11; Nhlavutelo 4:11.

Ntiyiso wun’wana wa nkoka wa le Bibeleni wu hi kombisa leswi Xikwembu xi lavaka leswaku hi swi endla eswiyin’weni swo tala. Milawu yin’wana yi tirha eka swiyimo swo karhi. (Deteronoma 22:8) Hi fanele hi tirhisa vuswikoti byo anakanya leswaku hi twisisa ndlela leyi ntiyiso wa le Bibeleni wu hi byelaka ha yona leswi hi faneleke hi swi endla. (Swivuriso 2:10-12) Hi xikombiso, Bibele yi dyondzisa leswaku vutomi i nyiko leyi humaka eka Xikwembu. Ntiyiso wolowo wa nkoka wu nga hi kongomisa.—Hlaya Mintirho 17:28.

Yesu u vulavule hi swileriso swimbirhi leswi nga swa nkoka swinene. Xo sungula xi kombisa xikongomelo xa vutomi bya vanhu, ku nga ku tiva Xikwembu, ku xi rhandza ni ku xi tirhela hi ku tshembeka. Hi fanele hi anakanyisisa hi xileriso lexi xo sungula loko hi nga si endla swiboho swa hina hinkwaswo.  (Swivuriso 3:6) Lava hanyaka hi ku pfumelelana ni xileriso lexi va ta va vanghana va Xikwembu, va kuma ntsako wa xiviri ni vutomi lebyi nga heriki.—Hlaya Matewu 22:36-38.

Xileriso xa vumbirhi xi nga hi kongomisa leswaku hi va ni vuxaka lebyinene ni vanhu van’wana. (1 Vakorinto 13:4-7) Ku tirhisa xileriso lexi xa vumbirhi swi katsa ku tekelela ndlela leyi Xikwembu xi khomaka vanhu ha yona.—Hlaya Matewu 7:12; 22:39, 40.

Milawu ya Xikwembu yi dyondzisa mindyangu ndlela leyi rirhandzu ri nga yi endlaka yi va ni vun’we ha yona. (Vakolosa 3:12-14) Rito ra Xikwembu ri tlhela ri sirhelela mindyangu hi ku hi dyondzisa ntiyiso wa nkoka lowu hi kongomisaka wa leswaku vatekani va fanele va tshama swin’we vutomi hinkwabyo.—Hlaya Genesa 2:24.

Loko hi landzela tidyondzo ta le Bibeleni hi nga sirheleleka hi tlhelo ra nyama ni le mintlhavekweni ya hina. Hi xikombiso, hakanyingi vathori va tsakela vatirhi lava hanyaka hi milawu ya le Bibeleni, ku nga ku tshembeka ni ku tirha hi matimba. (Swivuriso 10:4, 26; Vaheveru 13:18) Rito ra Xikwembu ri tlhela ri hi dyondzisa leswaku hi fanele hi eneriseka loko hi kuma swilo leswi hi swi pfumalaka hi tlhela hi teka ku va ni vuxaka ni Xikwembu swi ri swa risima ku tlula swilo leswi vonakaka.—Hlaya Matewu 6:24, 25, 33; 1 Timotiya 6:8-10.

Loko hi hanya hi milawu ya Xikwembu hi nga sirhelela rihanyo ra hina. (Swivuriso 14:30; 22:24, 25) Hi xikombiso, loko hi namarhela milawu ya Xikwembu leyi yirisaka ku dakwa yi ta hi sirhelela eka mavabyi lama dlayaka ni le ka timhangu. (Swivuriso 23:20) Yehovha wa hi pfumelela leswaku hi nwa swakunwa swa xihoko hi ndlela leyi ringaniseriweke. (Pisalema 104:15; 1 Vakorinto 6:10) Milawu ya Xikwembu ya hi pfuna hi ku hi dyondzisa leswaku hi nga kongomisi leswi hi swi endlaka ntsena kambe ni leswi hi swi anakanyaka. (Pisalema 119:97-100) Kambe, Vakreste va ntiyiso a va xiximi milawu ya Xikwembu hileswi va lavaka ku vuyeriwa. Va endla tano leswaku va dzunisa Yehovha.—Hlaya Matewu 5:14-16.