I MANI nandza wa Xikwembu lonene ku tlula hinkwavo lava tshameke va hanya?— U tiyisile, i Yesu Kreste. Xana u anakanya leswaku hi nga swi kota ku fana na yena?— Phela, Bibele yi vula leswaku u hi vekele xikombiso lexinene leswaku hi xi landzela. Naswona wa hi rhamba leswaku hi va vadyondzisiwa va yena.

Xana wa swi tiva leswaku ku va mudyondzisiwa wa Yesu swi vula yini?— Swi vula swilo swo tala. Xo sungula, hi fanele hi dyondza eka yena. Kambe a swi heleli kwalaho. Nakambe hi fanele hi swi tshemba hilaha ku heleleke leswi a swi vulaka. Loko hi swi tshemba, hi ta swi endla leswi a hi byelaka swona.

Vanhu vo tala va vula leswaku va pfumela eka Yesu. Xana u ehleketa leswaku hinkwavo ka vona i vadyondzisiwa vakwe hakunene?— Doo, vo tala va vona a hi vona. Va nga ha va va nghena kereke. Kambe vo tala va vona a va si tshama va tinyika nkarhi wo dyondza leswi Yesu a swi dyondziseke. Ku vula ntiyiso, vanhu lava landzelaka xikombiso xa Yesu, hi vona ntsena va nga vadyondzisiwa va yena.

A hi vulavule hi van’wana va lava a va ri vadyondzisiwa va Yesu loko a ha ri emisaveni. Un’wana wa lava va veke vo rhanga ku va mudyondzisiwa i Filipi. Filipi u landze munghana wa yena Nataniyele (loyi nakambe a vuriwaka Bartolomi), loyi u n’wi vonaka a tshame ehansi ka murhi. Loko Nataniyele a fika eka Yesu, Yesu u te: ‘Vonani, hi loyi munhu wo tshembeka, Muisrayele wa xiviri.’ Sweswo swi hlamarise Nataniyele kutani a vutisa a ku: ‘U ndzi tivela kwihi?’

 Yesu u te: “Ndzi ku vonile Filipi a nga si ku vitana, loko u ri ehansi ka nkuwa.” Nataniyele u hlamarisiwe hileswi Yesu a tivaka ni laha a a ri kona, hiloko Nataniyele a ku: “Wena u N’wana wa Xikwembu, u Hosi ya Israyele.”—Yohane 1:49.

Loko Filipi na Nataniyele va va vadyondzisiwa va Yesu, van’wana ana se a va ri ni siku rin’we va ri vadyondzisiwa. Vona i Andriya ni makwavo wa yena Petro ku katsa na Yohane kumbexana na Yakobo makwavo wa Yohane. (Yohane 1:35-51) Hambiswiritano, endzhakunyana, lava va mune va tlhelele entirhweni wa vona wa ku phasa tinhlampfi. Kutani siku rin’wana loko Yesu a ri karhi a famba eribuweni ra Lwandle ra Galeliya, u vone Petro na Andriya va ri karhi va hoxa tinkoka ta ku phasa tinhlampfi elwandle. Hiloko Yesu a va vitana a ku: “Ndzi landzeleni.”

Loko Yesu a fambe mpfhukanyana, u vone Yakobo na Yohane. A va ri ebyatsweni ni tata wa vona, va ri karhi va lunghisa tinkoka ta vona. Yesu u va vitanile leswaku na vona va n’wi landzela. Xana wena a wu ta va u  endle yini loko Yesu a ku vitana? Xana a wu ta tshika leswi u swi endlaka u n’wi landzela?— Vavanuna lava a va n’wi tiva kahle Yesu. A va swi tiva leswaku u rhumiwe hi Xikwembu. Hiloko va tshika ntirho wa vona wa ku phasa tinhlampfi kutani va landzela Yesu.—Matewu 4:18-22.

Loko vavanuna lava se va ri vadyondzisiwa va Yesu, xana a va nga ha swi endli swihoxo?— Doo! Tsundzuka leswaku vavanuna lava va tshame va phikizana hi leswaku i mani lonkulu eka vona. Kambe va n’wi yingisile Yesu naswona a va tiyimiserile ku cinca langutelo ra vona. Loko na hina hi tiyimiserile ku cinca langutelo ra hina, hi nga swi kota ku va vadyondzisiwa va Yesu.

Yesu a a rhamba vanhu va tinxaka hinkwato leswaku va va vadyondzisiwa va yena. Siku rin’wana hosi leyi a ya ha ri yitsongo, leyi a yi fuwile, yi tile eka Yesu kutani yi n’wi vutisa leswaku yi nga endla yini leswaku yi kuma vutomi lebyi nga heriki. Loko hosi leyi fuweke yi vule leswaku a yi yingisa swileriso swa Xikwembu ku sukela evuhlangini bya yona, Yesu u te eka yona: ‘Tana u va mulandzeri wa mina.’ Xana wa swi tiva leswi nga humelela?—

Loko hosi yoleyo yi kuma leswaku ku va mudyondzisiwa wa Yesu swi fanele swi va swa nkoka ku tlula ku fuwa, sweswo a swi yi tsakisanga nikatsongo. Yi arile ku va mudyondzisiwa wa Yesu hikuva a yi rhandza mali ku tlula Xikwembu.—Luka 18:18-25.

Loko se ku hele kwalomu ka lembe ni hafu Yesu a ri karhi a chumayela, u hlawule vanhu va 12 exikarhi ka vadyondzisiwa va yena, leswaku va va vaapostola. Vaapostola hi vona a a va rhuma leswaku va ya endla ntirho wo hlawuleka. Xana wa ma tiva mavito ya vona?— A hi ringete ku ma dyondza. Languta swifaniso swa vona laha kutani u vona loko u ta swi kota ku va vitana hi mavito. Sweswi ringeta ku vitana mavito ya vona u nga ma langutanga.

Hi ku famba ka nkarhi, un’wana wa vaapostola lava va 12 u hundzuke munhu wo biha. Vito ra yena i Yudasi Iskariyota. Endzhaku ka sweswo, ku hlawuriwe mudyondzisiwa un’wana leswaku a va muapostola. Xana wa ri tiva vito ra yena?— I Matiyasi. Hi ku famba ka nkarhi, Pawulo na  Barnaba na vona va ve vaapostola, kambe a va nga weli kona eka ntlawa wa lava va 12.—Mintirho 1:23-26; 14:14.

Hilaha hi dyondzeke hakona eka Ndzima 1 ya buku leyi, Yesu a a va rhandza swinene vana. Ha yini?— Hikuva a a swi tiva leswaku na vona swi nga ha endleka va va vadyondzisiwa vakwe. Kahle-kahle, minkarhi yin’wana vana va nga vula swilo hi ndlela leyi nga endlaka leswaku hambi ku ri vanhu lavakulu va yingisela naswona va lava ku dyondza swo tala malunghana ni Mudyondzisi Lonkulu.

Ku ni vavasati vo tala lava na vona va veke vadyondzisiwa va Yesu. Van’wana va fambe na yena loko a ya chumayela emitini yin’wana. Mariya wa Magadala, Yohana na Suzana a va famba na yena. Va nga ha va va  n’wi pfunile hi ku n’wi swekela swakudya ni ku n’wi hlantswela swiambalo.—Luka 8:1-3.

Xana wa swi lava ku va mudyondzisiwa wa Yesu?— Tsundzuka, ku vula ntsena leswaku hi van’wana va vadyondzisiwa va yena, a swi hi endli hi va vona. Ndlela leyi hi tikhomaka ha yona, kun’wana ni kun’wana laha hi nga kona, yi fanele yi kombisa leswaku hi vadyondzisiwa va yena, ku nga ri ntsena loko hi ri eminhlanganweni ya Vukreste. Xana hi tihi tindhawu tin’wana leti eka tona swi nga swa nkoka leswaku hi tikhoma ku fana ni mudyondzisiwa wa Yesu?—

Ina, hi fanele hi endla tano loko hi ri ekaya. Kambe ndhawu yin’wana hi le xikolweni. Leswi mina na wena hi nga fanelangiki hi swi rivala hileswaku loko hi lava ku va mudyondzisiwa wa Yesu wa ntiyiso, siku ni siku hi fanele hi tikhoma hi ndlela leyi a a tikhoma ha yona, kun’wana ni kun’wana laha hi nga kona.