EKA TINDZIMA timbirhi leti hundzeke, xana i vanhu vangani lava pfuxiweke eku feni, lava hi dyondzeke ha vona?— I ntlhanu. Vana a va ri vangani?— A va ri vanharhu. Naswona lowa vumune ku vuriwa leswaku i jaha. Xana u ehleketa leswaku leswi swi kombisa yini?—

Leswi swi kombisa leswaku Xikwembu xa va rhandza vana lavatsongo. Kambe xi ta pfuxa ni vanhu van’wana vo tala. Xana Xikwembu xi ta pfuxa ntsena lava endleke swilo leswinene?— Hi nga ha anakanya tano. Kambe, vanhu vo tala a va wu kumanga nkarhi wo dyondza ntiyiso hi Yehovha Xikwembu ni hi N’wana wakwe. Kutani va endle swilo leswi nga lulamangiki hikwalaho ka leswi va dyondzisiweke swilo leswi hoxeke. Xana u anakanya leswaku Yehovha u ta va pfuxa vanhu va tano?—

Bibele yi ri: “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Hikwalaho ka yini vanhu lava nga  lulamangiki kumbe lava nga endlangiki leswo lulama, va ta pfuxiwa?— Hikuva a va wu kumanga nkarhi wo dyondza hi Yehovha ni hi leswi a lavaka leswaku vanhu va swi endla.

Xana u ehleketa leswaku vanhu va ta pfuxiwa rini?— Anakanya hi nkarhi lowu Lazaro a feke ha wona, kutani Yesu a tshembisa makwavo Marta a ku: “Makwenu u ta pfuka.” Marta u hlamurile a ku: “Ndza swi tiva leswaku u ta pfuka eku pfuxiweni ka lava feke hi siku ro hetelela.” (Yohane 11:23, 24) Xana Marta a a vula yini loko a vula leswaku Lazaro u ta pfuka “hi siku ro hetelela”?—

Phela Marta a a xi tiva xitshembiso xa Yesu, lexi nge: ‘Hinkwavo lava nga eka masirha-bako ya xitsundzuxo va ta huma.’ (Yohane 5:28, 29) Hikokwalaho, “siku ro hetelela” i siku leri ha rona, vanhu hinkwavo lava tsundzukiwaka hi Xikwembu va nga ta pfuxiwa. Siku leri ro hetelela a hi siku ra tiawara ta 24. Ri ta va malembe ya gidi hi ku leha. Bibele yi vula leswi malunghana ni siku leri: ‘Xikwembu xi ta avanyisa vanhu va laha misaveni.’ Vanhu lava xi va avanyisaka va ta katsa ni vanhu lava pfuxiweke.—Mintirho 17:31; 2 Petro 3:8.

Anakanya ndlela leyi siku leri ri nga ta tsakisa ha yona! Eka siku leri ra malembe ya gidi hi ku leha, vanhu va timiliyoni lava feke va ta pfuxiwa eku feni. Ndhawu leyi va nga ta pfuxeriwa eka yona Yesu u yi vitana Paradeyisi. A hi vone leswaku Paradeyisi yi ta va yi ri kwihi ni leswaku yi ta va yi ri njhani.

Loko ka ha sale tiawara tinharhu leswaku a fa emhandzini ya nxaniso, Yesu u vulavule hi Paradeyisi ni wanuna loyi a beleriweke emhandzini,  loyi a a ri etlhelo kakwe. Wanuna loyi u dlayeriwe vugevenga lebyi a byi endleke. Kambe, loko xigevenga lexi xi languta Yesu ni ku tlhela xi twa leswi vulavuriwaka malunghana na Yena, xi sungule ku pfumela eka Yesu. Hiloko xigevenga xi ku: “U ndzi tsundzuka loko u nghena emfun’weni wa wena.” Yesu u hlamule a ku: “Ndzi tiyisile namuntlha ndzi ri eka wena, U ta va na mina eParadeyisini.”—Luka 23:42, 43.

Xana Yesu a a vula yini loko a vula marito lawa? Xana Paradeyisi yi kwihi?— Anakanya hi mhaka leyi. Xana Paradeyisi yo sungula a yi ri kwihi?— Tsundzuka leswaku Xikwembu xi nyike wanuna wo sungula, Adamu, ni nsati wakwe paradeyisi leswaku va hanya eka yona, kona kwala misaveni. A yi vitaniwa ntanga wa Edeni. A ku ri ni swiharhi entangeni wolowo, kambe a swi nga vavisi munhu. Naswona a ku ri ni mirhi leyi nga ni mihandzu yo tala yo tsokombela, swin’we ni nambu lowukulu. A swi tsakisa swinene ku hanya endhawini leyi!—Genesa 2:8-10.

Kutani loko hi anakanya hi xigevenga xexo xi ri eParadeyisini, hi fanele hi vona misava leyi hi mahlo ya mianakanyo, yi endliwe yi va ndhawu yo saseka yo hanya eka yona. Xana Yesu u ta va laha misaveni, eParadeyisini, swin’we ni munhu loyi, loyi a a ri xigevenga?— Doo! Xana wa swi tiva leswaku ha yini a nga ta va kona?—

Hikuva Yesu u ta va a ri etilweni a ri Hosi a fuma Paradeyisi ya laha misaveni. Kutani Yesu u ta va ni wanuna yoloye hi matwisiselo ya leswaku Yesu u ta n’wi pfuxa eka lava feke a tlhela a khathalela swilaveko swa yena. Kambe ha yini Yesu a ta pfumelela munhu loyi a a ri xigevenga  leswaku a hanya eParadeyisini?— A hi vone loko hi ta yi kuma nhlamulo.

Loko xigevenga lexi xi nga si vulavula na Yesu, xana a xi xi tiva xikongomelo xa Xikwembu?— Doo! Xi endle swilo swo biha hikuva a xi nga wu tivi ntiyiso malunghana ni Xikwembu. Loko xi ri eParadeyisini xi ta dyondzisiwa swikongomelo swa Xikwembu. Kutani xi ta kuma nkarhi wo kombisa leswaku hakunene xa xi rhandza Xikwembu hi ku endla ku rhandza ka Xona.

Xana un’wana ni un’wana loyi a pfuxiweke u ta hanya eParadeyisini emisaveni?— Doo! Xana wa swi tiva leswaku ha yini?— Hikuva van’wana va ta pfuxeriwa ku ya hanya na Yesu etilweni. Va ta fuma tanihi tihosi swin’we na yena, va fuma misava leyi nga Paradeyisi. A hi vone vumbhoni bya mhaka leyi.

Eka vusiku lebyi a feke ha byona, Yesu u byele vaapostola vakwe a ku: ‘Endlwini ya Tatana ya le tilweni, ku ni tindhawu to tala to tshama eka tona naswona ndzi ya mi lunghiselela ndhawu.’ Hiloko Yesu a va tshembisa a ku: “Ndzi ta tlhela ndzi vuya kutani ndzi ta mi amukela ekaya mi  va na mina, leswaku laha ndzi nga kona na n’wina mi va kona.”—Yohane 14:2, 3.

Xana Yesu u ye kwihi endzhaku ka ku pfuxiwa kakwe?— Ina, u tlhelele etilweni a ya va ni Tata wakwe. (Yohane 17:4, 5) Kutani Yesu u tshembise vaapostola ni valandzeri vakwe van’wana leswaku u ta va pfuxa leswaku va ta va na yena etilweni. Xana va ta endla yini loko va ri kwale na Yesu?— Bibele yi vula leswaku vadyondzisiwa va yena lava nga wela eka lava va nga ta ‘pfuxiwa ku sungula,’ va ta tshama etilweni kutani va fuma misava va ri “tihosi swin’we na yena ku ringana malembe wolawo ya 1000.”—Nhlavutelo 5:10; 20:6; 2 Timotiya 2:12.

Xana i vangani lava nga ta wela eka lava va nga ta ‘pfuxiwa ku sungula’ kutani va fuma na Yesu tanihi tihosi?— Yesu u byele vadyondzisiwa vakwe a ku: “Mi nga chavi, ntlhambinyana, hikuva Tata wa n’wina u tsakele ku mi nyika mfumo.” (Luka 12:32) “Ntlhambinyana” lowu, lowu nga ta pfuxeriwa ku ya va na Yesu eka Mfumo wakwe wa le tilweni, nhlayo ya wona ya tiveka. Bibele yi kombisa leswaku i vanhu va “144 000” lava pfuxiwaka emisaveni.—Nhlavutelo 14:1, 3.

Xana i vangani lava nga ta hanya eParadeyisini emisaveni?— Bibele a yi vuli leswaku i vangani. Kambe Xikwembu xi byele Adamu na Evha loko va ha ri entangeni wa Edeni leswaku va va ni vana kutani va tata misava. Ina, va tsandzekile ku endla tano. Kambe Xikwembu xi ta endla leswaku xikongomelo xa xona xa ku tata misava hi vanhu lavanene xi hetiseka.—Genesa 1:28; Esaya 45:18; 55:11.

Anakanya ndlela leyi swi nga ta tsakisa ha yona ku hanya eParadeyisini! Misava hinkwayo yi ta hundzuka ntanga wo saseka. Yi ta tala hi swinyenyana, swiharhi ni mirhi yo saseka ni swiluva swa tinxaka-xaka. A nga kona loyi a nga ta khomiwa hi xitlhavi hikwalaho ka vuvabyi kumbe loyi a nga ta fa. Vanhu hinkwavo va ta va vanghana. Loko hi lava ku hanya hilaha ku nga heriki eParadeyisini, lowu i nkarhi wa leswaku hi tilunghiselela.