Etikweni ra Siriya, a ku ri ni xinhwanyatana xa Muisrayele lexi a xi ri ekule ni le kaya. A xi hambanisiwe ni ndyangu wa ka vona hi masocha ya Vasiriya naswona sweswi a xi ri nandza wa nsati wa Namani loyi a a ri murhangeri wa masocha. Xinhwanyatana lexi a xi gandzela Yehovha hambiloko vanhu lava a xi tshama na vona a va nga n’wi gandzeli.

Namani a a ri ni vuvabyi bya nhlonge lebyi nga tsakisiki naswona a a tshama a ri karhi a twa ku vava. Xinhwanyatana lexi a xi swi lava ku n’wi pfuna. Xi byele nsati wa Namani xi ku: ‘Ndzi tiva munhu loyi a nga tshungulaka nuna wa wena. Le Israyele ku ni muprofeta wa Yehovha la vuriwaka Elixa. A nga tshungula nuna wa wena.’

Nsati wa Namani u byele nuna wakwe leswi xinhwanyatana lexi xi n’wi byeleke swona. Namani a a tiyimiserile ku endla xin’wana ni xin’wana, kutani u ye ekaya ka Elixa eIsrayele. Namani a a lava leswaku Elixa a n’wi amukela tanihi munhu wo hlawuleka. Kambe ematshan’weni ya leswaku a vulavula na yena hi ku kongoma, Elixa u rhume nandza wakwe ku ya xeweta Namani ni ku n’wi byela rungula leri  nge: ‘Famba u ya hlamba ka nkombo eNambyeni wa Yordani. Kutani u ta hola.’

Namani a a hele matimba swinene. U te: ‘A ndzi anakanya leswaku muprofeta loyi u ta ndzi tshungula hi ku vitana Xikwembu xakwe ivi a tshambulutela mavoko yakwe eka mina. Ematshan’weni ya sweswo, u ndzi byela leswaku ndzi ya hlamba enambyeni lowu wa le Israyele. Hi ni milambu yo antswa eSiriya. Ha yini ndzi nga yi eka yona?’ Namani u hlundzukile ivi a huma ekaya ka Elixa.

Malandza ya Namani ma n’wi pfune leswaku a anakanyisisa kahle. Ma te: ‘Xana a wu nge endli xin’wana ni xin’wana leswaku u hola? Leswi muprofeta loyi a ku byelaka leswaku u swi endla swa olova swinene. Ha yini u nga swi endli?’ Namani u ma yingisile. U ye eNambyeni wa Yordani kutani a fika a nghena ematini ka nkombo. Endzhaku ka loko a nghene ka nkombo, Namani u hume ematini a horile. A a tsakile swinene naswona u tlhele a ya khensa Elixa. Namani u te: ‘Sweswi ndza swi tiva leswaku Yehovha i Xikwembu xa ntiyiso.’ U anakanya leswaku xinhwanyatana xa Muisrayele xi titwe njhani loko Namani a vuya a horile?