Loko muapostola Yohane a ha ri mukhotsiwa exihlaleni xa Patmosi, Yesu u n’wi kombe swivono kumbe swifaniso swa 16 leswi tlhandlamanaka swa ndlela leyi vumundzuku byi nga ta va ha yona. Swivono leswi a swi kombisa ndlela leyi vito ra Yehovha ri nga ta kwetsimisiwa ha yona, Mfumo wakwe wu nga ta ta ha yona ni ndlela leyi ku rhandza kakwe ku nga ta endleka ha yona emisaveni hilaha ku endlekaka hakona etilweni.

Eka xivono xin’wana, Yohane u vone Yehovha a ri exiluvelweni xakwe xo vangama etilweni, a rhendzeriwe hi vakulu va 24 va ambale swiambalo swo basa naswona va vehele tiharhi ta nsuku etinhlokweni ta vona. Ku ve ni rihati ku tlhela ku twakala mpfumawulo wa ku dzindza loku humaka exiluvelweni. Hiloko vakulu lava va 24 va khinsama emahlweni ka Yehovha ivi va n’wi gandzela. Eka xivono xin’wana, Yohane u vone ntshungu lowukulu lowu humaka ematikweni hinkwawo, vanhu va tindzimi to hambanahambana lava gandzelaka Yehovha. Yesu loyi a nga Xinyimpfana, u va kongomisa ni ku va yisa laha ku nga ni mati ya vutomi. Endzhakunyana, u tlhele a vona xivono xin’wana laha Yesu se a a sungula ku fuma tanihi Hosi etilweni swin’we ni vakulu va 24. Eka xivono lexi landzeleke, Yohane u vone Yesu a lwa ni dragona leyi ku nga Sathana  swin’we ni madimona ya yena. Hiloko Yesu a va hlongola etilweni a va cukumetela emisaveni.

Hiloko Yohane a vona xifaniso xo saseka xa Xinyimpfana ni lava 144 000 va yime eNtshaveni ya Siyoni. U tlhele a vona ntsumi yi ri karhi yi haha empfhukeni yi byela vanhu leswaku va chava Xikwembu ni ku tlhela va xi vangamisa.

Eka xivono lexi landzeleke, u vone nyimpi ya Armagedoni. Eka nyimpi yoleyo, Yesu swin’we ni vuthu rakwe va herisa mafambiselo yo homboloka ya Sathana. Eka xivono xo hetelela, Yohane u vone vun’we lebyi a byi ri kona ematilweni ni le misaveni. Sathana ni valandzeri vakwe va heriseriwe makumu. Hinkwavo lava tshamaka etilweni ni laha misaveni va teka vito ra Yehovha tanihi leri kwetsimaka naswona va gandzela yena ntsena.