Dyondzo 60

Abigayele Na Davhida

XANA wa n’wi tiva wansati loyi wo saseka loyi a hlangavetaka Davhida? Vito rakwe i Abigayele. A a tlharihile, naswona u sivele Davhida leswaku a nga endli swilo swo biha. Kambe hi nga si dyondza hi sweswo, a hi rhangeni hi vona leswi humeleleke hi Davhida.

Endzhaku ka loko Davhida a balekele Sawulo, u tumbele ebakwini. Vamakwavo ni ndyangu wa ka vona hinkwawo va ye laha a a ri kona. Vavanuna va kwalomu ka 400 va ye laha a a ri kona, kutani Davhida u ve murhangeri wa vona. Kutani Davhida u ye eka hosi ya Mowabu a ku: ‘Ndzi kombela u tshama na tatana na manana kukondza ndzi vona leswaku ku endleka yini hi mina.’ Endzhakunyana, Davhida ni vavanuna lava a a ri na vona va tifihle eswintshabyanini.

Endzhaku ka sweswo Davhida u hlangane na Abigayele. Nabali, nuna wakwe a a fuwile swinene. A a ri ni tinyimpfu ta 3 000 ni timbuti ta 1 000. Nabali a a ri ni nsele. Kambe nsati wakwe Abigayele a a saseke ngopfu. Nakambe Abigayele a a swi kota ku endla leswinene. Siku rin’wana u tshame a ponisa ndyangu wa yena. A hi voneni leswaku u swi endlise ku yini.

Davhida ni vavanuna lava a a ri na vona va ve ni tintswalo eka Nabali. Va n’wi pfune ku sirhelela tinyimpfu ta yena. Kutani siku rin’wana Davhida u rhume vavanuna lava a a ri na vona leswaku va ya kombela mpfuno eka Nabali. Vavanuna lava a va ri na Davhida va fike va kuma Nabali ni vapfuni va yena va ri karhi va tsemeta voya bya tinyimpfu. A ku ri siku ra nkhuvo, naswona Nabali a a ri ni swakudya swo tala leswinene. Kutani vavanuna va Davhida va fike va n’wi byela va ku: ‘Hi ve ni tintswalo eka wena. A hi ti yivanga tinyimpfu ta wena, kambe hi pfunile eku tihlayiseni. Sweswi, hi kombela u hi nyika swakudya.’

Nabali u te: ‘A ndzi nge va nyiki vanhu vo fana na n’wina swakudya swa mina.’ U va delerile a tlhela a rhukana Davhida. Loko vavanuna lava va vuya kutani va byela Davhida timhaka leti, Davhida u hlundzuke swinene. U byele vavanuna lava a ku: ‘Tekani mabanga ya n’wina!’ Kutani va khoma ndlela va lava ku ya dlaya Nabali ni vavanuna lava a a ri na vona.

Un’wana wa vavanuna lava a va ri na Nabali, la swi tweke loko Nabali a vula marito yo delela, u byele Abigayele leswi endlekeke. Hi ku hatlisa Abigayele u lulamise swakudya. U swi khandziyise etimbhongolweni kutani a nghena ndleleni. Loko a hlangana na Davhida, u xike embhongolweni yakwe kutani a nkhisama, a ku: ‘Ndza ku kombela hosi yanga, u nga n’wi tekeli nhlokweni nuna wa mina Nabali. I xiphukuphuku naswona u endla swilo swa vuphukuphuku. Hi leyi nyiko. Ndzi kombela u yi teka, naswona u hi rivalela eka leswi endlekeke.’

Davhida a hlamula a ku: ‘U wansati wo tlhariha. U endle leswaku ndzi nga dlayi Nabali hikwalaho ka vuphukuphuku byakwe. Muka hi ku rhula.’ Endzhakunyana ka loko Nabali a file, Abigayele u ve un’wana wa vasati va Davhida.

1 Samuwele 22:1-4; 25:1-43.