Hi 2022, mifumo emisaveni hinkwayo yi tirhise R 44 035 040 000 000.00 ku nga mali leyi nga si tshamaka yi tirhisiwa leswaku yi xava matlhari ya nyimpi, leswi swi vangiwe hi leswi Russia yi hlaselaka Ukraine. Hi ku ya hi xiviko lexi humesiweke hi April 2023 hi Stockholm International Peace Research Institute (SIPRI), hi 2022:

•   EYuropa, nxavo wa matlhari ya nyimpi wu “tlakuke hi tiphesente ta 13 hi lembe rero, ku nga ku andza lokukulu ka ku tirhisiwa ka mali hi lembe hi mifumo ya le Yuropa ku sukela hi 1991.”

•   “Russia ri engetele matirhiselo ya rona ya mali hi tiphesente ta kwalomu ka 9,2, leswi endleke leswaku ri suka eka xiyimo xa rona xa vuntlhanu ri ya eka xa vunharhu xa matiko lama tirhisaka mali yo tala emisaveni.”

•   United States ka ha ri rona tiko leri rhangeke emahlweni eka ku tirhisa mali yo tala ya ku xava matlhari ya nyimpi hikuva yi tirhise 39 wa tiphesente ku xava matlhari ya nyimpi ku tlula matiko laman’wana emisaveni.”

 Dokodela Nan Tian, mutsari wa xiviko xa SIPRI u te: “Emalembeni ya sweswinyana ku tlakuka ka ku xaviwa ka matlhari emisaveni hinkwayo i xikombiso xa leswaku hi hanya emisaveni leyi yaka yi nyanya ku nga sirheleleki.”

 Bibele yi profete leswaku mifumo ya matimba emisaveni hinkwayo namuntlha yi ta lwa naswona yi vula leswaku i nchumu wun’we ntsena lowu nga ta tisa ku rhula ka xiviri.

•   Bibele yi vula leswaku nkarhi lowu hi hanyaka eka wonai ‘nkarhi wa makumu.’—Daniyele 8:19.

•   Buku ya Daniyele yi profete leswaku hi nkarhi wolowo ku ta va ni mifumo ya matimba ya misava leyi phikizanaka. Mifumo leyi ya matimba ya misava yi ta “susumetana,” kumbe yi lwela ku fuma.Ku kwetlembetana koloko ku ta endla leswaku ma tirhisa “xuma” xo tala kumbe mali.—Daniyele 11:40, 42, 43.

 Leswaku u dyondza leswi engetelekeke hi vuprofeta lebyi byo tsakisa bya le Bibeleni, hlalela vhidiyo leyi nge, Ku Hetiseka Ka Vuprofeta Bya Daniyele Ndzima 11.

•   Bibele yi vula leswaku Xikwembu xi ta siva mifumo ya vanhu. Xi “ta simeka mfumo lowu nga ta ka wu nga wisiwi. Mfumo lowu a wu nge hundziseriwi eka vanhu van’wana. Wu ta pfotlosa wu herisa mifumo leyi hinkwayo, kambe wona wu ta fuma hilaha ku nga heriki.”—Daniyele 2:44.

•   Ku nga ri khale, Yehovha a Xikwembu u ta endla swilo leswi vanhu va tsandzekaka ku swi endla, ku nga ku tisa ku rhula ka xiviri loku nga ta tshama hilaha ku nga heriki. Njhani? Mfumo wakwe wa le tilweni wu ta herisa matlhari hinkwawo ya nyimpi ni madzolonga hinkwawo.—Pisalema 46:8, 9.

 Leswaku u dyondza leswi engetelekeke hileswi Mfumo wa Xikwembu wu nga ta swi endla, hlaya nhlokomhaka leyi nge, “Ku ‘Rhula Ku Ta Andza eHansi Ka Mfumo Wa Xikwembu.’”