Varhangeri va misava ni mihlangano ya matiko hinkwawo, a va swi kotanga ku kondletela ku rhula. Namuntlha tinyimpi leti lovisaka ta nyanya ku tlula nkarhi wihi na wihi ku sukela eka Nyimpi Ya Vumbirhi Ya Misava. Kwalomu ka tibiliyoni timbirhi ta vanhu, ku nga kwalomu ka kotara ya vanhu lava nga kona emisaveni hinkwayo, va tshama etindhawini leti khumbiwaka hi tinyimpi teto.

 I yini lexi endlaka leswaku vanhu va nga swi koti ku kondletela ku rhula? Bibele yi ri yini hi mhaka leyi?

1.  1. Vanhu va hanya hi ndlela leyi va sivelaka ku kondletela ku rhula. Bibele yi profete leswaku enkarhini wa hina, “vanhu va ta va lava tirhandzaka, varhandzi va mali, lava tikurisaka, lava titlakusaka, . . . lava nga tshembekiki, . . . lava nga tiyimiselangiki ku pfumelelana ni van’wana, . . . lava nga tikhomiki, lava nga ni tihanyi, . . . lava omeke tinhloko, lava tikukumuxaka.”—2 Timotiya 3:2-4.

2.  2. Vanhu hinkwavo a va swi koti ku titlhantlhela swiphiqo swa vona handle ko pfuniwa hi Muvumbi wa vona Yehovha a Xikwembu. Bibele yi vula leswaku “munhu la fambaka a nga ka a nga ma kongomisi magoza yakwe.”—Yeremiya 10:23.

3.  3. Misava yi kuceteriwa hi mufumi loyi a nga ni matimba ni lowo homboloka, Sathana Diyavulosi, loyi a “hambukisaka misava hinkwayo.” (Nhlavutelo 12:9) Loko misava ya ha ri ‘ehansi ka matimba ya lowo homboloka,’ ka ha ta va na nyimpi ni ku kwetlembetana.​—1 Yohane 5:19.

 Bibele yi hi tshembisa leswaku ku rhula a ku nge tisiwi hi matshalatshala ya vanhu kambe ku ta tisiwa hi Xikwembu.

•   “‘Hikuva ndzi swi tiva kahle leswi ndzi swi ehleketaka hi n’wina,’ ku vula Yehovha, ‘ndzi lava mi va ni ku rhula ku nga ri khombo, ndzi lava ku mi nyika vumundzuku lebyi mi byi languteleke.’”—Yeremiya 29:11.

 Xikwembu xi ta xi hetisisa njhani xitshembiso xexo? “Xikwembu lexi nyikaka ku rhula xi ta pfotlosa Sathana.” (Varhoma 16:20) Xikwembu xi ta tirhisa hulumendhe ya le tilweni leyi Bibele yi yi vulaka “Mfumo wa Xikwembu” leswaku yi tisa ku rhula emisaveni hinkwayo. (Luka 4:43) Ehansi ka Yesu Kreste, Hosi ya Mfumo wolowo, vanhu va ta dyondzisiwa ku hanya hi ku rhula.​—Esaya 9:6, 7.

•   Leswaku u dyondza swo tala, hlaya nhlokomhaka leyi nge, “I Yini Leswi Mfumo Wa Xikwembu Wu Nga Ta Swi Endla?”