Vaavanyisi 17:1-13
-
Swifaniso swa Mikiya ni muprista wakwe (1-13)
17 A ku ri ni wanuna wa le ndhawini leyi nga ni tintshava ya Efrayimi,+ loyi a a vuriwa Mikiya.
2 Kutani a byela mana wakwe a ku: “Xana wa ha swi tsundzuka swiphemu swa silivhere swa 1 100 leswi u tekeriweke swona kutani u rhukana loyi a swi tekeke ndzi ri karhi ndzi swi twa? Silivhere yoleyo yi na mina. Yi teke hi mina.” Hiloko mana wakwe a ku: “Onge Yehovha a nga ku katekisa n’wananga.”
3 Kutani a tlherisela swiphemu swa silivhere swa 1 100 eka mana wakwe, kambe mana wakwe a ku: “Ndzi ta nyika* Yehovha silivhere leyi leswaku n’wana wa mina a endla xifaniso lexi vatliweke ni xifaniso xa nsimbhi.+ Hikwalaho silivhere leyi yi ta va ya wena.”
4 Endzhaku ka loko a tlherisele silivhere eka mana wakwe, mana wakwe a teka swiphemu swa silivhere swa 200 a swi nyika munhu loyi a endlaka swilo hi silivhere. Munhu loyi a endla xifaniso lexi vatliweke ni xifaniso xa nsimbhi; kutani swi vekiwa endlwini ya Mikiya.
5 Mikiya a a ri ni yindlu ya swikwembu, hiloko a endla efodi+ ni swifaniso swa terafimi,*+ a hlawula un’wana wa vana vakwe leswaku a va muprista wakwe.+
6 Emasikwini wolawo a ku nga ri na hosi eIsrayele.+ Munhu un’wana ni un’wana a a endla leswi a vonaka swi lulamile eka yena.*+
7 A ku ri ni jaha ra le Betlehema+ eYuda leri a ri huma endyangwini wa Yuda. A ri ri Mulevhi+ loyi a a tshama kwalaho swa nkarhinyana.
8 Jaha leri ri suka emutini wa Betlehema eYuda ri ya lava ndhawu leyi ri nga tshamaka eka yona. Loko ri ri karhi ri famba, ri fike endhawini ya tintshava ya Efrayimi, endlwini ya Mikiya.+
9 Kutani Mikiya a ku eka rona: “U huma kwihi?” Hiloko ri ku: “Ndzi Mulevhi loyi a humaka eBetlehema eYuda naswona ndzi famba ndzi lava ndhawu leyi ndzi nga tshamaka eka yona.”
10 Hiloko Mikiya a ku eka rona: “Tshama na mina u va mutsundzuxi* ni muprista wa mina. Ndzi ta ku nyika swiphemu swa silivhere swa khume hi lembe, swiambalo ni swakudya.” Kutani jaha leri ra Mulevhi ri nghena.
11 Hiloko jaha leri ra Mulevhi ri pfumela ku tshama na Mikiya, kutani a ri teka tanihi un’wana wa vana vakwe.
12 Ku tlula kwalaho, Mikiya a veka jaha leri ra Mulevhi leswaku ri va muprista wakwe+ naswona a ri tshama endlwini yakwe.
13 Kutani Mikiya a ku: “Sweswi ndza swi tiva leswaku Yehovha u ta ndzi katekisa, hikuva Mulevhi i muprista wa mina.”
Tinhlamuselo ta le hansi
^ Hi Xiheveru, “hlawulekisela.”
^ Kumbe “swikwembu swa ndyangu; swifaniso swa mavunwa.”
^ Kumbe “leswi a a anakanya leswaku swi lulamile.”
^ Hi Xiheveru, “tatana.”
