Mitirho 12:1-25
12 Enkarhini wolowo Heroda loyi a a ri hosi a sungula ku xanisa van’wana lava nga evandlheni.+
2 U dlaye Yakobo makwavo wa Yohane+ hi banga.+
3 Loko a vona leswaku sweswo swi tsakisa Vayuda, a khoma na Petro. (Leswi swi endleke hi masiku ya Swinkwa Leswi Nga Riki Na Comela.)+
4 U n’wi khome a ya n’wi pfalela ekhotsweni,+ a rindziwa hi mitlawa ya mune ya masocha naswona ntlawa ha wun’we a wu ri ni masocha ya mune lawa a ma cincana ku n’wi rindza, xikongomelo xa yena a ku ri ku n’wi humesa* a n’wi nyiketa eka vanhu endzhaku ka Paseka.
5 Hikwalaho Petro a a rindziwe ekhotsweni kambe vandlha a ri n’wi khongelela swinene eka Xikwembu.+
6 Loko Heroda a ri kusuhi ni ku n’wi humesa, hi vusiku bya kona, Petro a a etlele a bohiwe hi tinketana timbirhi exikarhi ka masocha mambirhi naswona a ku ri ni varindzi van’wana emahlweni ka nyangwa lava a va rindza khotso.
7 Kambe waswivo, ntsumi ya Yehovha* a yi yime kwalaho,+ kutani ku va ni ku vonakala ekhotsweni. Yi fika yi hlakahla Petro hi le tsheveni, yi n’wi pfuxa, yi ku: “Hatla u pfuka!” Hiloko tinketana ti wa emavokweni yakwe.+
8 Ntsumi yi ku eka yena: “Ambala swiambalo* ni maphaxani ya wena.” A endla tano. Eku heteleleni yi ku eka yena: “Ambala ni xiambalo xa wena xa le handle u ndzi landzela.”
9 Kutani a huma a yi landzela, kambe a a nga swi xiyi leswaku leswi a swi humelela hi ku tirhisa ntsumi a swi ri swa xiviri. Kahlekahle a a ehleketa leswaku u vona xivono.
10 Endzhaku ka loko va hundze varindzi vo sungula ni va vumbirhi, va fike egedeni ya nsimbhi leyi humelaka emutini, hiloko yi tipfulekela. Endzhaku ka loko va humile, va famba xitarata xin’we kutani hi ku hatlisa, ntsumi yi n’wi siya.
11 Loko Petro a sungula ku twisisa leswi a swi endleka a ku: “Se ndza swi vona leswaku Yehovha* u rhume ntsumi yakwe leswaku a ndzi ponisa evokweni ra Heroda ni le ka hinkwaswo leswi Vayuda a va lava ku ndzi endla swona.”+
12 Endzhaku ko twisisa leswi a swi endleka, a ya endlwini ya Mariya mana wa Yohane loyi a a vuriwa Marka,+ laha a ku ri ni vanhu vo hlayanyana lava a va hlengeletanile va ri karhi va khongela.
13 Loko a gongondza enyangweni, nandza wa xisati la vuriwaka Rhoda u tile a ta hlamula la gongondzaka.
14 Loko a twa rito ra Petro, a tsaka ngopfu lerova a nga pfuli ni nyangwa kambe a tsutsumela endzeni a ya va byela leswaku Petro u yime enyangweni.
15 Hiloko va ku eka yena: “U hlangane nhloko.” Kambe a phikelela a va byela leswaku a nga hembi. Va sungula ku vula va ku: “I ntsumi yakwe.”
16 Kambe Petro a yima kwalaho, a gongondza. Loko va pfula nyangwa va n’wi vona, va hlamala.
17 Kambe a va komba hi voko leswaku va miyela kutani a va byela hi vuxokoxoko ndlela leyi Yehovha* a n’wi humeseke ha yona ekhotsweni, a tlhela a ku: “Mi byela Yakobo+ ni vamakwerhu timhaka leti.” Kutani a huma a ya endhawini yin’wana.
18 Loko ri xile, masocha a ma pfilunganyekile swinene, ma tivutisa leswaku ku endleke yini hi Petro.
19 Heroda u n’wi lave ngopfu, loko a nga n’wi kumi a konanisa varindzi, a lerisa leswaku va xupuriwa;+ kutani a suka eYudiya a ya eKhezariya, a fika a tshama nkarhinyana kwalaho.
20 Heroda a a hlundzukele* vanhu va le Tiri ni va le Sidoni. Kutani va twanana va ya eka yena, naswona endzhaku ka loko va xavelele Blasto, wanuna loyi a a langutela yindlu ya hosi,* va kombela ku rhula eka yena, hikuva tiko ra vona a ri kuma swakudya etikweni ra hosi.
21 Hi siku rin’wana leri hlawuriweke, Heroda u ambale swiambalo swakwe swa vuhosi a tshama exitulwini xo avanyisa kutani a sungula ku vulavula ni vanhu.
22 Kutani vanhu lava hlengeletaneke va sungula ku huwelela va ku: “I rito ra xikwembu, a hi ra munhu!”
23 Hi ku hatlisa ntsumi ya Yehovha* yi n’wi ba, hikuva a nga xi dzunisanga Xikwembu, hiloko a dyiwa hi swivungu a fa.
24 Kambe rito ra Yehovha* ri ya ri kula ri tlhela ri hangalaka.+
25 Loko ku ri Barnaba+ na Sawulo, endzhaku ko heta ntirho wo phalala eYerusalema+ va tlherile kutani va famba na Yohane+ loyi nakambe a a vitaniwa Marka.
Tinhlamuselo ta le hansi
^ Kumbe “ku n’wi humesa a ya n’wi tengisa.”
^ Vona Xiengetelo A5.
^ Kumbe “Lungheka.”
^ Vona Xiengetelo A5.
^ Vona Xiengetelo A5.
^ Kumbe “ri ni moya wo lwa.”
^ Hi Xigriki, “kamara ro etlela ra hosi.”
^ Vona Xiengetelo A5.
^ Vona Xiengetelo A5.
